Pesalome 146

₁Retang Morena!

A ke tumiše Morena!

₂Ke tla mo reta bophelong bja ka ka moka;

ge ke sa phela ke tla opelela Modimo wa ka ditumišo.

₃Le se ke la ikanya babuši,

batho ba nama,

ba go se kgone go phološa.

₄Motho wa nama ge a ehwa o boela mobung;

ke mohla merero ya gagwe e phuhlamago.

₅Go lehlogonolo

yo a thušwago ke Modimo wa Jakobo,

yo a botilego Morena Modimo wa gagwe,

₆yena yo a hlodilego legodimo le lefase le lewatle le tšohle tše di lego ka go ona.

Ka mehla o a botega.

₇Ba ba gateletšwego o ba dira ka toka,

ba ba swerwego ke tlala o ba fa dijo.

Morena o lokolla bagolegwa,

₈o budulla difofu,

o kgothatša ba ba nyamilego,

o rata baloki.

₉Morena o babalela bafaladi,

ke mmabaledi wa ditšhiwana le bahlologadi,

mola bakgopo bona a ba kgopamišetša ditsela.

₁₀Morena o tla buša go ya go ile;

Modimo wa gago, wena Sione,

o tla buša ka go sa felego.

Retang Morena!