To The Word – Day 19

_1-2Setšhaba sa Israele sa tloga Refidime, mme ka letšatši la pele la kgwedi ya boraro morago ga ge ba tlogile Egepeta, ba fihla lešokeng la Sinai. Ba hloma mešaša go lebana le thaba ya Sinai, ₃gomme Moshe a rotogela thabeng go kopana le Modimo.

Morena a mmolediša a le thabeng, a mmotša gore a botše Baisraele, ditlogolo tša Jakobo, a re: ₄“Le bone se nna, Morena, ke se dirilego Baegepeta, le ka mo ke le kukilego bjalo ka ntšu e belege matswiana a yona mafegong, gomme ka le tliša fa go nna. ₅Bjale, ge le ka ntheeletša gabotse mme la botegela kgwerano ya ka, le tla ba setšhaba sa ka se se kgethilwego gare ga ditšhaba ka moka. Lefase lohle ke la ka, eupša lena le tla ba ₆setšhaba se se kgethetšwego nna ke nnoši, gomme le tla ntlhankela le le baprista.” ₇Ke gona Moshe a fologilego a kgobokanya bagolo ba setšhaba, a ba botša tšohle tše Morena a mo laetšego tšona. ₈Ke moo setšhaba ka moka se fetotšego mmogo sa re: “Re tla dira tšohle tše Morena a re boditšego tšona.” Moshe a begela Morena taba ye.

₉Morena a re go Moshe: “Ke tla theogela go wena ka sepipa sa leru, gore setšhaba se nkwe ge ke bolela le wena, ba tle ba go kgolwe go tloga bjale.”

Moshe a botša Morena ka moo setšhaba se fetotšego ka gona. ₁₀Morena a re go yena: “Eya go setšhaba o ba botše gore lehono le ka moswane ba hlwe ba itlhwekiša. Ba hlatswe diaparo tša bona, ₁₁ba itokišetše letšatši le le latelago letšatši la ka moswane. Ka lona letšatši leo ke tla theogela thabeng ya Sinai mo setšhaba ka moka se ka kgonago go mpona. ₁₂Dira mollwane go dikologa thaba, mme o botše setšhaba se hlokomele gore se se ke sa namela thaba, ešita le go e batamela. Yo a tlago gata thaba o tla hwa lehu; ₁₃go se be le yo a mo kgwathago ka seatla, eupša a bolawe ka maswika, goba a thunywe ka mesebe – e ka ba seruiwa goba motho – se se ke sa phela. E tla re ge phalafala e lla, e be gona batho ba namelelago thabeng.”

₁₄Ke gona Moshe a fologilego thaba gomme a tsebiša setšhaba gore se itlhwekiše. Ka fao ba hlatswa diaparo tša bona, ₁₅mme Moshe a re go bona: “Itokišetšeng letšatši le le latelago letšatši la ka moswane, gomme monna a se ke a robala mosadi lebakeng le.”

₁₆Goseng ga letšatši la boraro thabeng gwa ba medumo le dikgadima, sepipa sa leru sa rotoga, gomme phalafala ye maatla ya galagala. Setšhaba ka moka mešašeng sa thothomela ka letšhogo. ₁₇Moshe a ba hlahla ba tšwa mešašeng go gahlana le Modimo, gomme ba ema tlase ga thaba. ₁₈Thaba ka moka ya Sinai e be e pipeditšwe ke muši, gobane Morena o be a theogetše godimo ga yona ka mollo. Muši o be o kuelelela godimo bjalo ka muši o etšwa leubeng, gomme setšhaba ka moka sa tlekatleka o šoro. ₁₉Go lla ga phalafala gwa galagala go eya. Moshe a bolela, gomme Modimo a mo fetola ka modumo. ₂₀Morena a fologela ntlheng ya thaba ya Sinai, a bitša Moshe gore a namelele thabeng. Moshe a namelela, ₂₁gomme Morena a re go yena: “Theogela tlase o yo botša setšhaba gore se se ke sa šwahla mollwane gore se mpone, ka gore ba ka hwa ka bontši. ₂₂Le bona baprista ba ba mpatamelago ba itlhwekiše, gore ke se ba hlokofatše.”

₂₃Moshe a re go Morena: “Setšhaba ga se dumelelwe go namela thaba ye, gobane wena mong o re boditše gore re tšee thaba ye e le ye kgethwa, le gore re e beele mollwane.”

₂₄Morena a mo fetola a re: “Theoga, o boe le Arone. Fela baprista le setšhaba ba se ke ba šwahla mollwane go rotogela go nna, gore ke se ba hlokofatše.”

₂₅Moshe a theogela go setšhaba a se botša tše Morena a di boletšego.

₁Modimo o boletše a laya setšhaba a re: ₂“Ke nna Morena Modimo wa gago yo a go ntšhitšego Egepeta, mo o bego o le lekgoba.

₃“O se ke wa direla modimo wo mongwe ka ntle ga ka.

₄“O se ke wa itirela seswantšho sa selo se sengwenyana sa legodimong, goba sa lefaseng, goba sa ka meetseng ka fase ga lefase. ₅O se ke wa di obamela goba wa di direla, gobane ke nna Morena Modimo wa gago, Modimo yo a sa kgotlelelego tirelo ya medingwana ya diswantšho. Ke otla ba ba ntlhoilego le ditlogolo tša bona, ka latišiša go fihlela molokong wa boraro le wa bone. ₆Eupša diketekete tša meloko ya bao ba nthatago, ba phethago melao ya ka, ke di direla ka lerato.

₇“O se ke wa goboša leina la ka, gobane nna, Morena Modimo wa gago, ke tla otla yoo a gobošago leina la ka.

₈“Hlompha Sabatha mme o se kgethwafatše. ₉Ka matšatši a a selelago o dire mediro ya gago ka moka, ₁₀fela letšatši la bošupa ke la go khutša, le kgethetšwe nna, Modimo wa gago. Ka lona o se ke wa dira modiro ofe le ofe – wena, goba ngwana wa gago, goba lekgoba la gago, goba seruiwa sa gago, goba mofaladi yo a dulago nageng ya geno. ₁₁Ka matšatši a a selelago nna, Morena, ke dirile lefase le legodimo le mawatle le tšohle tše di lego go tšona, eupša ka letšatši la bošupa ka khutša. Ke ka lebaka leo nna, Morena, ke šegofaditšego letšatši la Sabatha ka le dira le lekgethwa.

₁₂“Hlompha tatago le mmago gore o phele nako ye telele nageng ye nna, Morena Modimo wa gago, ke go fago yona.

₁₃“O se ke wa bolaya.

₁₄“O se ke wa otswa.

₁₅“O se ke wa utswa.

₁₆“O se ke wa bolela bohlatse bja maaka ka yo mongwe.

₁₇“O se ke wa duma ngwako wa yo mongwe. O se ke wa duma mosadi wa gagwe, goba lekgoba la gagwe, goba kgomo ya gagwe, goba pokolo ya gagwe, goba se sengwe se e lego sa gagwe.”

₁₈Ya re ge setšhaba se ekwa medumo le segalo sa phalafala mme ba bona dikgadima le thaba e kuela muši, ba thothomela ka poifo, ba emela kgole. ₁₉Ba re go Moshe: “A e be wena o bolelago le rena, hle, re tla theeletša; a e se be Modimo a bolelago le rena, re se tlo hwa.”

₂₀Moshe a ba fetola a re: “Se boifeng; Modimo o tletše fela go le leka le go le tiišetša gore le fele le mmoifa, mme le se senye.” ₂₁Eupša setšhaba sa fela se emetše kgole, ya ba Moshe fela a batamelago leru leo le leso mo Modimo a bego a le gona.

₂₂Morena o laetše Moshe gore a botše Baisraele a re: “Le iponetše ka bolena gore nna, Morena, ke boletše le lena ke le legodimong. ₂₃Le se ke la itirela medimo ya silibera goba ya gauta go e khunamela legatong la go khunamela nna. ₂₄O ntirele aletare ya mobu, gomme godimo ga yona o dire dihlabelo ka dihuswane tša gago le dikgomo tša gago e be dihlabelo tša go tšhungwa ka moka le dihlabelo tša kagišano. Lefelong le lengwe le le lengwe leo ke tlago go kgethela go ntirela go lona, ke tla tla go wena ka go šegofatša. ₂₅Ge o ntirela aletare ya matlapa o se ke wa e aga ka matlapa a a betlilwego, gobane ge o betla matlapa, o a a tšhilafatša. ₂₆O se ke wa nkagela aletare ye e namelelwago ka manamelo; ge o ka dira bjalo, o tla bonelwa ge o rotoga ka manamelo.”

₁“Šedi ditaelo tše o swanetšego go di fa Baisraele: ₂Ge o reka lekgoba le e lego Moheberu, le go hlankele nywaga ye e selelago. Ka ngwaga wa bošupa a lokollwe a sa lefe selo. ₃Ge a be a se a nyala ge a thoma go go hlankela, a se sepele le mosadi ge a tloga; eupša ge a be a nyetše ge a eba lekgoba la gago, gona a tloge le mosadi wa gagwe. ₄Ge mong wa gagwe a mo nyadišitše mosadi, gomme mosadi yoo a mmelegela barwa goba barwedi, gona mosadi le bana ba gagwe ke ba mong, gomme monna a tloge a nnoši. ₅Fela ge monna wa lekgoba a ka ikana gore o rata mong wa gagwe le mosadi wa gagwe le bana ba gagwe, ka gona ga a nyake go lokollwa, ₆gona mong wa gagwe a tsene naye felo ga tirelo. Fao a mmapetše le lemati goba serepodi, gomme a mo phule tsebe ka tšhwana. Gona mohlanka e tla ba lekgoba la mong wa gagwe bophelo ka moka.

₇“Ge monna a ka rekiša morwedi wa gagwe gore e be lekgoba, morwedi a se ke a rekollwa bjalo ka makgoba a banna. ₈Ge morwedi a ka rekišetšwa monna yo a mmeeleditšego, fela monna yoo a ikhwetša a sa rate mosadi yo, gona morwedi a rekollelwe go tatagwe; mong wa gagwe ga a na tokelo ya go mo rekiša setšhabeng se šele, ka ge monna yoo a forile mosadi yoo. ₉Ge monna a ka rekela morwagwe lekgoba la mosetsana, a monna yoo a sware mosetsana mo nkego ke morwediagwe. ₁₀Ge monna a ka nyala mosadi wa bobedi, a fele a efa mosadi wa pele dijo le diaparo le ditokelo tša nyalano bjalo ka mehleng. ₁₁Ge monna a sa phethe ditshwanelo tše tharo tše, gona mosadi yoo a tloge a lokologile, monna a sa lefiwe selo.”

₁₂“Motho yo a ka itiago yo mongwe a hwa, le yena a bolawe. ₁₃Fela ge a bolaile yo mongwe e se ka boomo, e le tiro tša ka, nna, Modimo, gona a ka no tšhabela mo nna, Morena, ke tlago mo laolela gona. ₁₄Fela ge motho a ka rera yo mongwe a mmolaya ka boomo, le yena a bolawe, le ge a ka tšhabela aletareng ya ka gore a lotege.

₁₅“Motho yo a itiago tatagwe goba mmagwe, a bolawe.

₁₆“Motho yo a utswago yo mongwe go mo rekiša, goba go mo dira lekgoba, a bolawe.

₁₇“Motho yo a rogago tatagwe goba mmagwe, a bolawe.

₁₈“Ge batho ba elwa gomme motho a itia yo mongwe ka leswika goba ka letswele, fela a se hwe, yo bjalo motho a se otlwe. Ge monna yo a iteilwego a ka ikoka a robetše, ₁₉fela ka morago a tielela, a totobela ka ntle le ge e le ka go ikokotlela ka lehlotlo, moitei wa gagwe a se ke a bonwa molato, fela a lefele nako ya ge moiteiwa a be a robetše, mme a be a bone gore o folela sa ruri.

₂₀“Ge motho a ka itia lekgoba la gagwe la monna goba la mosadi ka molamo, gomme lekgoba la hwa semeetseng, mmolai yoo a otlwe. ₂₁Fela ge lekgoba le ka se hwe, gwa ba gwa feta letšatši goba a mabedi, mong wa lekgoba a se ke a otlwa, ka gobane lekgoba leo ke thoto ya gagwe.

₂₂“Ge banna ba ka re ba elwa, ba thula mosadi wa moimana gomme mpa ya senyega, eupša yena mosadi a se gobale ka mokgwana wo mongwe, monna yo a gobaditšego moimana yoo a lefišwe ka mo monna wa mosadi yoo a nyakago ka gona le baahlodi ba dumelago. ₂₃Fela ge eba moimana a gobetše, gona kotlo e ebe ya go lefeletša bophelo ka bophelo, ₂₄leihlo ka leihlo, leino ka leino, seatla ka seatla, leoto ka leoto, ₂₅mollo ka mollo, ntho ka ntho, mogogoma ka mogogoma.

₂₆“Ge motho a ka fahla lekgoba la gagwe la monna goba la mosadi mme a le gonya leihlo, a motho yoo a lokolle lekgoba leo e le tefelo ya leihlo. ₂₇Ge motho a ka re a itia lekgoba a le kgola leino, a lokolle lekgoba leo e le tefelo ya leino.”

₂₈“Ge poo e ka hlaba motho ya mmolaya, poo yeo e bolawe ka maswika, mme nama ya yona e se ke ya lewa; mong wa yona yena a tšwe molatong. ₂₉Eupša ge poo yeo e tsebja e ehlwa e hlaba batho, gomme mong wa yona a lemošitšwe taba ye fela a sa e diše, gomme ya bolaya motho, e bolawe ka maswika, mong wa yona le yena a bolawe. ₃₀Fela ge mong wa yona a ka dumelelwa go ntšha setseka gore a phele, a a lefe tefelo ka moka ya molato yeo a e lefišwago. ₃₁Ge poo e ka bolaya mošemanyana goba mosetsana, a go dirišwe wona molao wo. ₃₂Ge poo e ka bolaya lekgoba la monna goba la mosadi, mong wa yona a lefe mong wa lekgoba dipapetlana tša silibera tše masome a mararo, gomme yona e bolawe ka maswika.

₃₃“Ge motho a ka khurumolla molete goba a epa molete a se o khurumele, gomme poo goba pokolo ya yo mongwe ya wela ka gare, ₃₄motho yoo a lefele seruiwa seo. A lefe mong wa sona ka tšhelete, gomme yena a šale le setoto. ₃₅Ge poo ya motho e ka bolaya ya yo mongwe, banna ba babedi bao ba rekiše poo ye e phelago, mme ba arogane tšhelete ya thekišo; ba arogane le nama ya kgomo ye e bolailwego. ₃₆Eupša ge go tsebja gore poo yeo e tlwaetše go hlaba, gomme mong wa yona a se e diše, mong yoo a lefe yo a lobilego ka poo ye e phelago, yena a šale le setoto.”

₃₇“Ge motho a ka utswa kgomo goba nku gomme a e bolaya goba a e rekiša, a lefe kgomo yeo ka kgomo tše tlhano, mme nku yeo ka dihuswane tše nne.”

₁E rile ge Jesu a bona mašaba, a rotogela thabeng, a dula fase. Barutiwa ba gagwe ba tla go yena, ₂gomme a thoma go ba ruta, bona le mašaba, a re:

₁₁“Ba lehlogonolo ke lena ge le rogwa, le hlomarwa, le pharwa ka bobe bja mehutahuta ka lebaka la ka. ₁₂Thabang le hlalale, ka gore moputso wa lena ke wo mogolo legodimong. Etse le baprofeta ba ba bilego gona pele ga lena ba be ba hlomarwa ka yona tsela yeo.”

₁₃“Lena le letswai la lefase. Eupša ge letswai le ka tapa, le tla tswailošwa ka eng? Ga le sa na le mohola; sa lona ke go lahlelwa ntle, batho ba le gata ka maoto.

₁₄“Lena le seetša sa lefase. Motse wo o agilwego thabeng o ka se fihlege. ₁₅Le gona motho ga a re go gotetša lebone a le ribega ka seroto, eupša o le hloma sehlomong sa lona, la bonegela bohle ka ngwakong. ₁₆Le sa lena seetša a se bonegele batho ka tsela yeo, gore ba tle ba bone mediro ya lena ye mebotse, gomme ba tumiše Tatagolena wa legodimong.”

₁₇“Le se ke la gopola gore ke tlile go fediša melao ya Moshe le dithuto tša baprofeta. Ga se ka tla go di fediša, eupša ke tlile go dira gore tlhathollo ya tšona ya nnete e kwešišege. ₁₈Ruri, ke le botša gore ge legodimo le lefase di sa le gona, ga go tlhakanyana goba seripana sa tlhaka ya molao wo mongwenyana wa Moshe ye e tlago phumolwa. Melao yohle e swanetše go hwetša tlhathollo ya yona ya nnete. ₁₉Ka gona, yo a ka fedišago molawana wo monnyane gare ga melao ye gomme a botša ba bangwe gore e fedišitšwe, o tla bonwa e le yo monnyane mmušong wa Modimo. Eupša yo a e phethago gomme a botša ba bangwe gore le bona ba e phethe, o tla bonwa e le yo mogolo mmušong wa Modimo. ₂₀Ka gona, ke le botša gore ge le sa phale boramangwalo kudu le Bafarisei ka go dira tše di nyakwago ke Modimo, le ka se tsene mmušong wa gagwe.”

₂₁“Le kwele gore kgale batho ba ile ba botšwa gore ba se ke ba bolaya motho; yo a ka bolayago motho o swanetše go išwa tshekong. ₂₂Ge e le nna ke le botša gore mang le mang yo a ka befelelwago ngwanabo, o swanetše go išwa tshekong; yo a ka rego ‘selokewena’ go ngwanabo, o swanetše go išwa Kgorongkgolo ya setšhaba; le yo a ka rego ‘setlaela tena’ go ngwanabo, o lebanwe ke go ya mollong wa hele. ₂₃Ka gona, ge o ka re o iša mpho go Modimo aletareng, wa elelwa o le moo gore ngwaneno o ngongorega ka wena, ₂₄o tlogele mpho ya gago moo pele ga aletare, o yo boelana le ngwaneno pele, o kgone o iša mpho ya gago.

₂₅“O boelane le mosekišananago ka pela le sa le tseleng ya go ya tshekong, gore a se yo go gafela go moahlodi, moahlodi a go gafela go maphodisa, mme wa lahlelwa kgolegong. ₂₆Ruri, ke go botša gore o ka se tšwe gona o sešo wa lefa tšheletenyana ya mafelelo ya kotlo ya gago.”

₂₇“Le kwele gore go thwe: ‘O se ke wa otswa.’ ₂₈Ge e le nna ke le botša gore mang le mang yo a lebelelago mosadi ka go mo duma, o šetše a otswitše le yena ka pelong. ₂₉Ka gona, ge leihlo la gago la la go ja le go diriša dibe, le gonye o le lahle. Go kaone gore o lobe setho se tee, go na le gore mmele wa gago ka moka o lahlelwe heleng. ₃₀Ge seatla sa gago sa la go ja se go diriša dibe, se ripe o se lahle. Go kaone gore o lobe setho se tee, go na le gore mmele wa gago ka moka o lahlelwe heleng.”

₃₁“Go boletšwe le go re: ‘Yo a hlalago mosadi wa gagwe a mo fe lengwalo la tlhalo.’ ₃₂Ge e le nna ke le botša gore ge monna a ka hlala mosadi wa gagwe e se ka lebaka la bootswa, o mo dira gore a otswe ka go nyalwa gape; le yena monna yoo a mo nyalago o a otswa.”

₃₃“Le gona le kwele gore kgale batho ba ile ba botšwa gore ba se ke ba tshela dikeno tša bona, le gona ba phethe tše ba di enetšego Morena. ₃₄Ge e le nna ke le botša gore le go ena le se ke la ena, le ge e le ka legodimo, ka gobane ke setulo sa bogoši sa Modimo; ₃₅goba ka lefase, ka gobane ke bogato bja gagwe; goba ka Jerusalema, ka gobane ke motse wa Kgoši ye kgolo. ₃₆Motho a se ke a ena le ka hlogo ya gagwe, ka ge a ka se kgone go fetoša le ntsana ya moriri wa gagwe ya ba ye tšhweu goba ye ntsho. ₃₇Sa lena e be ‘ee’ ge eba le dumela, goba ‘aowa’ ge eba le gana; se se oketšwago se tšwa go Yomobe.”

₃₈“Le kwele gore go thwe: ‘Leihlo le lefša ka leihlo, leino ka leino.’ ₃₉Ge e le nna ke le botša gore le se ke la itefeletša go batho ba ba le fošeditšego. Ge motho a ka go itia thama ya la go ja ka seatla, o mo retollele le ye nngwe. ₄₀Le ge motho a ka ikemišetša go yo go bega kgorong gore a go tšeele seaparo sa ka gare, o mo lese a tšee le sona seaparo sa ka ntle. ₄₁Le ge motho a ka go gapeletša gore o sepele le yena kilometara e tee, o sepele naye kilometara tše pedi. ₄₂Ge motho a ka go kgopela selo, o mo fe sona; yo a nyakago o mo adima selo, o mo adime sona.”

₄₃“Le kwele gore go thwe: ‘O rate ngwaneno, lenaba la gago lona o le hloye.’ ₄₄Ge e le nna ke le botša gore le rate manaba a lena, le rapelele bao ba le hlomerego, ₄₅gore le tle le be bana ba Tatagolena wa legodimong, yo a hlabišetšago baloki le bakgopo letšatši go swana, le pula a e nešetšago ba ba dirago tše di lokilego le ba ba dirago tše mpe. ₄₆Na Modimo a ka le putsetša go rata fela bao ba le ratago? Ga ke re seo ke se se dirwago le ke balekgetho? ₄₇Gomme ge le botšišana maphelo le ba gabolena fela, le phala ba bangwe ka eng? Ga ke re seo ke se se dirwago le ke baditšhaba? ₄₈Ebang baloki ba ba feletšego, bjalo ka ge Tatagolena wa legodimong e le moloki yo a feletšego.”

₁“Le hlokomele gore mediro ya lena ya borapedi le se e dire pepeneneng gore batho ba bone tše le di dirago; ge le ka dira bjalo le ka se hwetše moputso go Tatagolena wa legodimong.

₂“Ka gona, ge o efa mohloki selo, o se ke wa dira gore o bonwe ke batho, wa etša baikaketši ka disinagogeng le mo mekgotheng, gore ba retwe ke batho. Ruri, ke le botša gore ke gona ge ba hweditše moputso wa bona ka botlalo. ₃Wena ge o thuša mohloki, seo e be khupamarama. ₄Ke mo seo o se dirilego se ka se tsebjego ke motho. Gomme Tatago, yo a bonago tše di dirwago ka sephiring, o tla go putsa.”

₅“Ge le rapela, le se ke la etša baikaketši. Bona ba rata go rapela ba eme ka disinagogeng le magahlanong a ditsela, gore ba bonwe ke batho. Ruri, ke le botša gore ke gona ge ba hweditše moputso wa bona ka botlalo. ₆Wena ge o rapela, o tsene ka phapošing ya gago, o tswalele lemati, o rapele Tatago yo a sa bonwego. Gomme Tatago, yo a bonago tše di dirwago ka sephiring, o tla go putsa.

₇“Ge le rapela le se ke la touta go swana le baditšhaba, gobane bona ba gopola gore ba tla kwewa ka ge dithapelo tša bona e le tše telele. ₈Le se ke la etša bona, gobane Tatagolena o tseba tše le di hlokago le pele le mo kgopela tšona. ₉Ka gona, ge le rapela le re:

₁₄“Ge le lebalela ba bangwe diphošo tše ba le šitelago ka tšona, Tatagolena wa legodimong le yena o tla le lebalela tša lena. ₁₅Eupša ge le sa lebalele ba bangwe diphošo tša bona, gona le Tatagolena a ka se le lebalele tša lena.”

₁₆“Ge le ikona dijo le se ke la itira tše nkego le nyamile la etša baikaketši. Bona ba šošobanya difahlego gore ba bonwe ke batho gore ba ikona dijo. Ruri, ke le botša gore ke gona ge ba hweditše moputso wa bona ka botlalo. ₁₇Wena ge o ikona dijo, o hlape mahlo, o tlole moriri, ₁₈gore batho ba se ke ba lemoga gore o ikona dijo – go tsebe fela Tatago yo a sa bonwego. Gomme Tatago, yo a bonago tše di dirwago ka sephiring, o tla go putsa.”

₁₉“Le se ke la ipolokela mahumo mo lefaseng mo go nago le ditšhwele le diji, le mo go thubago mahodu a utswa. ₂₀Lena le ipolokele mahumo legodimong mo tšhwele le diji di sa kgonego go senya, mo go sa thubego mahodu a utswa. ₂₁Gobane mo go lego lehumo la motho ke mo go bago pelo ya gagwe.”

₂₂“Mahlo ke lebone la motho. Ge mahlo a motho a lokile motho o ba seetšeng; ₂₃eupša ge mahlo a gagwe a se a loka, o ba leswiswing. Bjale ge seetša se se lego mothong e le leswiswi, o tla ba leswiswing le legologolo!”

₂₄“Ga go motho yo a ka hlankelago marena a mabedi; o tla hloya yo mongwe, a rata yo mongwe; a botegela yo mongwe, a nyatša yo mongwe. Le ka se kgone go hlankela Modimo le mahumo ka nako e tee.

₂₅“Ke ka lebaka leo ke le botšago gore le se ke la balabala mabapi le dijo le dino le diaparo tše le di hlokago bophelong. Ga ke re bophelo bo bohlokwa go phala dijo? Mmele le wona ga ke re o bohlokwa go phala diaparo? ₂₆Lebelelang dinonyana tše di fofago moyeng. Ga di bjale peu, ga di bune mabele tša a tšhela ka matlolong; le ge go le bjalo Tatagolena wa legodimong o a di otla. Na lena ga le ba bohlokwa kudu go feta dinonyana? ₂₇Kgane ke mang mo go lena yo a ka ikokeletšago bophelo gannyane ka go bo balabalela?

₂₈“Gomme diaparo tšona le balabalelang ka tšona? Lebelelang ka mo matšoba a naga a melago ka gona: ga a šome, ga a ithokele diaparo. ₂₉Eupša ke le botša gore le Kgoši Solomone, le ge a be a humile le dinala, o be a sa tšhephe bjalo ka le lengwe la ona. ₃₀Bjale ge ešita le bjang bja naga, bjo bo bago gona lehono, ka moswane bo tsoge bo lahletšwe sebešong, Modimo a bo apeša ka mokgwa wo, na lena a ka nama a se le apeše le go feta, lena ba tumelo ye nnyane?

₃₁“Ka gona le se ke la balabala la re: ‘Na re tla ja eng, re tla nwa eng, re tla aparang?’ ₃₂Tšeo ka moka ke tše baditšhaba ba dulago ba balabala ka tšona. Tatagolena wa legodimong o a tseba gore tšohle tšeo le phela ka tšona. ₃₃Lena sa pele le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona. ₃₄Ka gona le se ke la tshwenyega ka tša ka moswane, ka gobane la ka moswane le na le a lona mathata. Letšatši le lengwe le le lengwe le na le mathata a a le lekanego.”

₁“Le se ke la bona ba bangwe diphošo, gore le lena Modimo a se tlo le bona diphošo, ₂ka gobane ka moo le bonago ba bangwe diphošo ke ka moo le lena Modimo a tlago le bona diphošo, le melao yeo le e šomišago go ba bangwe le go lena Modimo o tla e šomiša. ₃O reng o bona phatšana ye e fahlilego ngwaneno, eupša o sa bone kota ye e fahlilego wena? ₄Na o ka botša ngwaneno wa re: ‘A ke go fahlolle phatšana ye e go fahlilego,’ mola wena o fahlilwe ke kota? ₅Moikaketši tena! Pele iphahlolle kota ye e go fahlilego, ke mo o tlago bona gabotse, wa kgona o fahlolla ngwaneno phatšana ye e mo fahlilego.

₆“Se sekgethwa le se ke la se fa dimpša – di ka retologela go lena tša le hlasela. Magakabje a lena le se a lahlele pele ga dikolobe – di ka a gata ka ditlhako.”

₇“Kgopelang, gomme le tla fiwa; nyakang, gomme le tla hwetša; kokotang, gomme le tla bulelwa. ₈Gobane mang le mang yo a kgopelago o a fiwa, yo a nyakago o a hwetša, le yo a kokotago o tla bulelwa. ₉Ke mang mo go lena yo a ka fago morwagwe leswika ge a mo kgopela bogobe? ₁₀Goba a mo fa noga ge a mo kgopela hlapi? ₁₁Ge ešita le lena le lego ba babe le tseba go fa bana ba lena tše botse, na Tatagolena wa legodimong yena a ka napa a se le phale ka go fa bao ba mo kgopelago dilo tše dibotse?

₁₂“Tšohle tše le ratago gore batho ba le direle tšona, le lena le ba direle tšona. Se se akaretša melao ya Moshe le dithuto tša baprofeta.”

₁₃“Le tsene ka kgoro ye e pitlaganego, ka gobane kgoro ye e išago tahlegong e ahlame, le tsela ye e yago go yona ke ye kgolo, gomme ba ba sepelago ka yona ke ba bantši. ₁₄Eupša kgoro ye e išago bophelong yona e pitlagane, le tsela ya yona ke ye tshese, gomme ba ba e hwetšago ga ba nene.”

₁₅“Le itoteng go baprofeta ba maaka, ba ba tlago go lena ka boleta bjalo ka dinku, mola ka therešo e le diphiri tše bogale. ₁₆Le tla ba tseba ka ditiro tša bona. Motho ga a fule diterebe mohlareng wa meetlwa, goba mago monganeng. ₁₇Mohlare wo mobotse o enywa dienywa tše dibotse; wo e sego wo mobotse o enywa dienywa tše e sego tše dibotse. ₁₈Mohlare wo mobotse o ka se enywe dienywa tše e sego tše dibotse, le wo o sego wo mobotse o ka se enywe dienywa tše dibotse. ₁₉Gomme mohlare wo mongwe le wo mongwe wo o sa enywego dienywa tše dibotse o a rengwa, wa lahlelwa mollong. ₂₀Le baprofeta ba maaka le tla ba tseba ka ditiro tša bona.”

₂₁“Ga se mang le mang yo a mpitšago a re ‘Morena, Morena,’ yo a tlago tsena legodimong, eupša go tla tsena fela bao ba phethago thato ya Tate wa legodimong. ₂₂Mohla wa Letšatši la Kahlolo ba bantši ba tla re go nna: ‘Morena, Morena, kgane ga se ra botša batho melaetša ya Modimo ka maatla a gago, ra leleka bademone ka go bolela leina la gago, ra dira le mehlolo ye mentši?’ ₂₃Ke mo ke tlago ba fetola ka re: ‘Ga se ka ka ka le tseba. Tlogang go nna, lena ba go tshela melao ya Modimo!’

₂₄“Ka gona, mang le mang yo a kwago mantšu a a ka gomme a phetha tše ke di bolelago, o swana le monna yo bohlale yo a agilego ngwako wa gagwe leswikeng. ₂₅Gwa na pula ye kgolo, dinoka tša falala, le phefo ya tšutla ngwako woo kudu. Eupša wa se ke wa wa, ka gobane o agilwe leswikeng.

₂₆“Eupša yo a kwago mantšu a a ka gomme a se phethe tše ke di bolelago, o swana le monna wa setlatla yo a agilego ngwako wa gagwe lešabašabeng. ₂₇Gwa na pula ye kgolo, dinoka tša falala, le phefo ya tšutla ngwako woo kudu, gomme wa wa, wa pšhatlagana.”

₂₈Ge Jesu a fetša go bolela mantšu ao, lešaba la makatšwa ke ka moo a bego a ruta batho ka gona, ₂₉ka gobane o be a sa ba rute go swana le boramangwalo; o be a ba ruta e le yo a nago le maatla a go dira bjalo.