Tshedimošo ya tlaleletšo

Pesalome 67

Go tsebišwa moopediši gore ke pesalome ya go opelwa e letšwa ka diletšo. Ke kopelo.

₁Re šokele hle, Modimo,

mme o re šegofatše;

re lebelele ka botho, Sela

₂gore lefase le tle le tsebe thato ya gago,

le gore ditšhaba tšohle di tle di lemoge gore o re phološitše.

₃A ditšhaba di go rete, wena Modimo;

a ditšhaba ka moka di go rete!

₄Merafe a e hlalale,

e opele ka lethabo,

ka gobane o ahlola batho ka toka,

o hlahla ditšhaba tšohle lefaseng. Sela

₅A ditšhaba di go rete, wena Modimo;

a ditšhaba ka moka di go rete!

₆Naga e re tšwetše puno;

ke ka mo Modimo,

yena Modimo wa rena,

a re šegofaditšego.

₇Modimo o a re šegofatša;

a batho ka moka gohle lefaseng

ba mmoife.