To The Word – Day 193

₁Morena a ntaele a re: ₂“Wena motho wa nama, bontšha Jerusalema tše di šišimišago tše e di dirilego. ₃Botša Jerusalema gore Morena, Mong wa bohle, o re go yona:

“ ‘O tšwa lefaseng la Kanana mo o tswaletšwego gona. Tatago e be e le Moamore, mmago e le Mohete. ₄Ge o seno belegwa ga go yo a ilego a go ripa kalana, goba a go hlapiša gore o hlweke, goba a go šidila ka letswai, goba a go phuthela ka mašela. ₅Ga go yo a ilego a go kwela bohloko a go direla se sengwenyana sa dilo tšeo ka go go šokela. Ge o seno belegwa batswadi ba gago ba ile ba go šišingwa, ba go lahla nageng.

₆“ ‘Ya re ge ke feta ka go bona o ragaraga ka gare ga madi a gago. O be o thankgetše madi, eupša ka se go lese o ehwa. ₇Ka go godiša bjalo ka semela sa lešoka. Wa gola wa tielela, wa ba wa fihla lehlapong. Wa thoka matswele, wa tšwa le matsa, fela o be o ponapona.

₈“ ‘Ya re ge ke feta gape ka bona o le yo a loketšego go nyalwa. Ka go apeša kobo ya ka ka ge o be o le fela, mme ka ikanela wena, ka itlemaganya le wena ka lenyalo, wa ba wa ka.’ ” O realo, Morena, Mong wa bohle.

₉“Ke moka ka tšea meetse ka go hlapiša, ka go tloša madi ale. Ka go tlotša ka makhura a mohlware. ₁₀Ka go apeša diaparo tša mebalabala, ka ba ka go rweša dieta tša letlalo le lebotse, le lešela le boletiana hlogong, le seaparo sa silika. ₁₁Ka go hlama ka dikgabišo, ka go apeša maseka matsogong, le dipheta molaleng. ₁₂Ka go rweša lengina la nko, le mangina a ditsebe, le kgare ye botse. ₁₃O be o kgabile ka dikgabišo tša gauta le tša silibera, le diaparo o be o apara tša lešela le boletiana le tša silika ya mebalabala, o eja dinkgwa tša bupi bja mathume, le todi, le makhura a mohlware. Wa ba yo mobotse kudu, wa go ka ba mohumagadi. ₁₄O ile wa tuma ditšhabeng tšohle ka botse bja gago bjo bo phethegilego, ka gobane ke nna yo ke bego ke go dirile gore o be yo mobotse ka mokgwa woo.” O realo, Morena, Mong wa bohle.

₁₅“Eupša wena o ile wa bota botse bja gago, setumo sa gago sa go fetola sefebe, wa ikgafela go robala le mang le mang yo a fetago. ₁₆Wa tšea tše dingwe diaparo tša gago tša mebalabala wa kgabiša dintotoma tšeo go tšona o khunamelago medimo ya diswantšho, wa itira sefebe moo. ₁₇Wa tšea dikgabišo tša silibera le tša gauta tše ke bego ke go file tšona, wa dira medimo ya diswantšho ye metona ka tšona, mme wa feba le tšona. ₁₈Wa tšea diaparo tšela tša gago tša mebalabala wa di apeša medimo yeo ya diswantšho, wa ba wa neela medimo yeo makhura a mohlware ao ke bego ke go file ona, le seorelo. ₁₉Ke go file dijo – bupi bja mathume, makhura a mohlware, le todi – eupša wena wa di neela medimo yeo ya diswantšho gore e natefelwe ke monkgo wo mobose wa tšona. Go bile bjalo.” O realo, Morena, Mong wa bohle.

₂₀“Wa ba wa tšea barwa le barwedi ba o bego o mpelegetše bona wa ba hlabela medimo yeo ya diswantšho gore e be dijo tša yona. Kgane bofebe e be e se bobe bjo bogolo, ₂₁ge o bile o direla medimo yeo ya diswantšho sehlabelo ka bana ba ka? ₂₂Ge o be o dira tšeo ka moka tša go šišimiša o itirile sefebe ga se wa ka wa gopola tša bjaneng bja gago – mola o ponapona, o ragaraga ka gare ga madi a gago.”

₂₃Morena, Mong wa bohle, o re: “O yo madimabe! O yo madimabe! O dirile tše mpe tšeo ka moka mme wa tla ₂₄wa ikgobelela dintotoma tša go feba le go khunamela medimo ya diswantšho mapatlelong ohle. ₂₅Mathomong a tsela ye nngwe le ye nngwe o ikgobeletše dintotoma, wa goboša botse bja gago, wa fetlela mofeti yo mongwe le yo mongwe dirope, wa feba le banna ba bantši. ₂₆Wa ba wa feba le Baegepeta, baagišani bale ba gago ba mapele a magolo, wa nthumola ka go atiša bofebe bja gago.

₂₇“Bjale ke emišitše letsogo gore ke go otle le gore ke go fokoletše naga. Ke go gafetše diatleng tša manaba a gago, Bafilista, ba ba bego ba lešwa dihlong ke bofebe bja gago, gore ba dire se ba se ratago ka wena.

₂₈“Ka ge o be o sešo wa kwelela go feba, o ile wa ipapatša go Baasiria. Wa feba nabo, eupša le bona wa se ba kwelele. ₂₉Wa ba wa feba le batho ba Babilonia, naga ya bagwebi, eupša le bona ba se go kgotsofatše.”

₃₀Morena, Mong wa bohle, o re: “Tšohle tše ge o be o di dira o be o di dira o tsogetšwe, o itshwere bjalo ka sefebe se se se nago dihlong. ₃₁Mathomong a tsela ye nngwe le ye nngwe o be o feba, o ikgobeletše dintotoma tša go khunamela medimo ya diswantšho mapatlelong ohle. Eupša wena tefo o be o se na taba nayo, o sa etše segwebakathobalo. ₃₂Mosadi wa seotswa towe! O reng o re o na le monna wa ratana le banna ba šele? ₃₃Etse sa segwebakathobalo ke go fiwa dimpho, eupša wena dimpho o be o di fa dinyatsi tša gago ka moka, o di goketša gore di tle di go robale di etšwa kgole le kgauswi. ₃₄Wena o segwebakathobalo sa mohuta wa sona. Ga go motho yo a go kaladitšego gore o be segwebakathobalo. Ga o lefše, ke wena o ba lefago. Owe, ga o swane le ba bangwe!”

₃₅Ka gona, wena Jerusalema, sefebe towe, ekwa se Morena a se bolelago:

₃₆Morena, Mong wa bohle, o re: “O ile wa ikapola diaparo wa pepentšha lepono, wa feba le dinyatsi tša gago, wa khunamela medingwana yohle ya gago ya go šišimiša, wa direla medingwana yeo dihlabelo ka bana ba gago. ₃₇Ka lebaka leo, ke tla kgoboketša dinyatsi tšela tša gago ka moka, tšela o bego o ipshina natšo, tšela o bego o di rata, le tšela o bego o di hloile. Ke tla ba tliša go wena ba etšwa kgole le kgauswi, ke moka ka go hlobodiša diaparo gore ba go bonele. ₃₈Ke tla go ahlola ka kahlolo ye e lebanego basadi ba diotswa le ba babolai, ka go otla ka lehu ke befetšwe ke bile ke hufega. ₃₉Ke tla go gafela diatleng tša bona, gomme ba tla thunthunya dintotoma tšeo o febago go tšona, gape o khunamelago medimo ya diswantšho. Ba tla go tšola diaparo, ba go amoga dikgabišo tša gago, mme ba go tlogela o ponapona.

₄₀“Ba tla hlohleletša lekoko gore le go otle; ba tla go bolaya ka maswika, ba ba ba go rathaganya ka ditšhoša tša bona. ₄₁Ba tla tšhuma dintlo tša gago, ba go otla o bonwa ke basadi ka bontši. Ke tla go lahliša bofebe, ka go lahliša le go lefa dinyatsi tša gago. ₄₂Ya ba gona kgalefo ya ka e felago, mme ka se sa tuka bogale. Nka se sa galefa goba ka hufega. ₄₃O lebetše ka mo ke ilego ka go swara ka gona mola o sa le yo mofsa, gomme o nkgalefišitše ka dilo tšohle tšela o bego o di dira. Ke ka lebaka leo ke tlago go otlela tše o di dirilego. A ke re o okeditše ditiro tšohle tša gago tše di šišimišago ka bofebe?” O realo, Morena, Mong wa bohle.

₄₄Morena o re: “Mang le mang yo a ratago dika, wena Jerusalema, o tla go hlaba ka se se rego: ‘Ngwana wa tadi o tsebja ka mereto.’ ₄₅Le wena o tloga o abetše mmago yo a šišingwago monna wa gagwe le bana. O swana le banabeno ba basadi ba ba šišingwago banna le bana ba bona. Mmagolena e be e le Mohete, tatagolena e le Moamore.

₄₆“Mogolwago ke Samaria ye e lego ka leboa, le metsana ya kgauswi ye e lego barwedi ba yona. Morathwago ke Sodoma ka borwa, le metsana ya kgauswi ye e lego barwedi ba yona. ₄₇Ga se wa ba ekiša fela go tše ba di dirago, le mekgweng ya bona ye e šišimišago o ba ekišitše; sebakanyana o ile wa ba yo mobe le go ba feta mo go tšohle tše o bego o di dira. Ka nakonyana fela o ile wa ikhwetša o dira tše mpe go feta bona.

₄₈“Nna, Morena, Mong wa bohle, ke re: Ke ikana ke le Modimo yo a phelago gore Sodoma, morathwago, le metsana ya kgauswi le yona ga se ya ka ya dira tše wena le metsana ya kgauswi le wena le di dirilego. ₄₉Sebe sa ngwaneno, Sodoma, le barwedi ba gagwe e bile makoko le bojagobe le go se šetše – ba be ba sa thuše badiidi le bahloki ka selo. ₅₀Ge ba ikgantšha, ba dira tše di šišimišago ke ile ka ba fediša, bjalo ka ge le wena o tseba gabotse.

₅₁“Samaria ga se ya dira dibe, le ge e le seripagare sa tše di dirilwego ke wena. Wena o dirile tše dintši tša go šišimiša go feta yona. Tšohle tša go šišimiša tše di dirilwego ke wena o di dirile mo banabeno, Samaria le Sodoma, ba ilego ba bonala nke ga ba na molato. ₅₂Bjale ge, inyatše ka ge o emelela banabeno. Ka ge dibe tša gago di šišimiša go feta tša bona, bona ba bonala ba lokile go phala wena. Ka gona, inyatše, o swabe, gobane o dirile nke banabeno ba lokile.”

₅₃Morena o re go Jerusalema: “Ke tla atla Sodoma le metsana ya kgauswi le yona gape, le Samaria le metsana ya kgauswi le yona; le wena ke tla go atla gape, ₅₄gore o inyatše gape o swabele tšohle tše o di dirilego, e be gona go homotša bana bao beno. ₅₅Banabeno, Samaria le Sodoma, gotee le metsana ya kgauswi le bona, ba tla iketla gape, le wena le metsana ya kgauswi le wena le tla iketla gape. ₅₆A ke re o be o phara Sodoma dika mehleng yela ya ge o ikgantšha, ₅₇le ya pele ga ge tše mpe tše o bego o di dira di utollwa? Bjale o swana nayo ge – o lehlapa la Baedomo, le la Bafilista, le la baagišani ba gago ba bangwe ba ba go nyatšago. ₅₈Yo a swanetšego go otlelwa bohlola le tše di šišimišago tše a di dirilego, ke wena.” O realo, Morena.

₅₉Morena, Mong wa bohle, o re: “Ke tla go swara ka mo o swanelago ka gona, ka gobane o nyaditše keno yela ya gago go nna, wa tlemologanya lenyalo la ka le wena. ₆₀Eupša ke tla gopola kgwerano ye ke e dirilego nago mola o sa le yo mofsa, gomme ke tla dira kgwerano le wena ya go ya go ile. ₆₁Ke mo o tlago elelwa ka mo o ilego wa dira ka gona, gomme wa inyatša ge ke tšea mogolwago le morathwago ke go fa bona e eba barwedi ba gago, le ge seo e se se nna le wena re dirilego kgwerano ka sona. ₆₂Ke tla tsošološa kgwerano ya ka le wena, gomme o tla tseba gore Morena ke nna. ₆₃E tla re ge ke go swarela diphošo tša gago tšohle, wa gopola mme wa inyatša, wa hlokišwa molomo ge o ipona kgobogo.” O realo, Morena, Mong wa bohle.

₁Morena a re go nna: ₂“Wena motho wa nama, hlabela setšhaba sa Israele nyepo, o se botše ka go se swantšhetša. ₃Ba botše gore nna, Morena, Mong wa bohle, ke re: Ntšhu ye kgolo ya maphego a magolo a matelele le mafofa a mantši a mebalabala e kile ya tla ya kotama dithabeng tša Lebanone. Ya roba kalana ya ka godimodimo ya mosedere. ₄Ya kga letlakala la ntlheng la wona ya le iša nageng ya kgwebo, ya le bea motseng wa bagwebi. ₅Ke moka ya tšea semelana nageng ya Israele ya se bjala tšhemong ye e nonnego. Ya se bjala bjalo ka motswapitswapi kgauswi le moela wa meetse a mantši. ₆Semelana seo sa hloga, sa gola gabotse, ya ba morara, fela wa se golele godimo. Makala a wona a lelalela ntšhung yela, medu yona ya sobelela fase. Ya ba morara, wa hloga dikala le dikalana.

₇“Gwa ba le ye nngwe ntšhu ye kgolo ya diphego tše dikgolo le mafofa a mantši. Bjale morara wa medišetša medu ya wona go ntšhu yela, wa lebiša le makala a wona go yona, gore e o nošetše ka meetse a go feta ao a bego a le ka serapeng seo morara o bego o metše ka go sona. ₈Eupša morara o be o šetše o bjetšwe ka tšhemong ye e nonnego, kgauswi le moela wa meetse a mantši, gore morara o tle o hloge makala, o enywe, mme e be wo o kgahlišago.

₉“Ka gona, nna, Morena, Mong wa bohle, ke a botšiša ke re: Afa morara wo o tla atlega? Na ntšhu ya mathomo e ka se o tumole ka medu, ya hlohlora dikenywa, matlakala ohle a a hlogago a pona? Go o tumola go ka se nyake maatla a mantši goba setšhaba. ₁₀Go bjalwa gona o bjetšwe, eupša na o tla atlega? Na o ka se pone ge o bethwa ke phefo ya bohlabela? Afa o ka se ponele ka moo serapeng se o metšego ka go sona?”

₁₁Morena a re go nna: ₁₂“Botšiša setšhaba seo sa dingangele ge eba se tseba se seswantšho seo se se šupago. O ba botše gore kgoši ya Babilonia o ile a tla Jerusalema, a thopa kgoši le bakgomana ba yona a ba iša Babilonia. ₁₃A tšea yo mongwe wa leloko la kgoši, a kwana le yena, mme a mo eniša a re a mmotegele. A tšea le bagolo ba setšhaba ba naga yeo a ba dira mathopša. ₁₄Tšeo o be a di direla gore setšhaba se se sa mo nyatša sa mo tsogela maatla, le gore kwano yeo e hlompšhe. ₁₅Eupša kgoši ya Juda ya mo tsogela maatla mme ya roma batseta Egepeta go yo kgopela gore ba thušwe ka dipere le madira a mantši. Na e ka ba o tla tšwelela? Na wa go dira tše bjalo a ka phonyokga? Na a ka re a tshetše kwano a se otlwe?

₁₆“Nna, Morena, Mong wa bohle, ke re: Ke ikana ke le Modimo yo a phelago gore kgoši ya Juda e tla hwela Babilonia, nageng ya kgoši ye e mmeilego kgoši, yona ye a nyaditšego keno ya yona gape a tshetšego kwano ye a e dirilego le yona. ₁₇Ešita le kgoši ya Egepeta ka madira a yona a maatla le bahlabani ba bantši a ka se mo thuše ntweng, ge Bababilonia ba dikanetša Jerusalema ka mokgobo wa mobu le ka dithubamaboto, gore ba tle ba bolaye batho ba bantši. ₁₈O nyaditše keno ya gagwe ka go tshela kwano ye a bego a ikanetše yona. O dirile dilo tše ka moka, gomme bjale a ka napa a se otlwe?”

₁₉Morena, Mong wa bohle, o re: “Ke ikana ke le Modimo yo a phelago gore ke tla mo otlela go nyatša keno ye a nkenetšego yona, le go se phethe tše a kwanego le nna ka tšona. ₂₀Ke tla mo rea ka lelokwa ka mo tanya ka lona. Ke tla mo iša Babilonia ka mo otla gona, ka gobane ga se a mpotegela. ₂₁Bagale ba gagwe ba tla bolawa ka tšhoša, gomme mašaledi a šwalalanyetšwa mathokong ohle. Ke mo le tlago lemoga gore go boletše nna, Morena.”

₂₂Morena, Mong wa bohle, o re:

₁Morena a re go nna: ₂“Na ke seema mang se batho ba felago ba se hlaba ba re:

₃Morena, Mong wa bohle, o re: “Ke ikana ke le Modimo yo a phelago, gore le ka se sa hlaba seema se mo setšhabeng sa Israele. ₄Bophelo bja motho yo mongwe le yo mongwe ke bja ka, bo laolwa ke nna, bja tatagongwana le bja yena ngwana. Motho wa go dira dibe ke yena a tlago hwa.

₅“Yo a ratago go phetha thato ya ka ka mehla o sepela ka molao, mme o dira tše di lokilego. ₆Ga a je dijo tša didimo tša dithabeng goba a khunamela medingwana ya diswantšho ya Baisraele. Ga a tšhilafatše mosadi wa monna yo mongwe ka go otswa le yena, goba a robala le mosadi yo a bonego kgwedi. ₇Ga a gatelele motho; o bušetša moadingwa se moadingwa a bego a beeleditše ka sona; ga a utswetše batho; o fa ba ba swerwego ke tlala dijo, le gona o apeša ba ba se nego diaparo. ₈Ga a adime motho tšhelete ka go e tswadiša. O a itshwara gore a se dire tše mpe, gomme tshekong ga a ahlole ka go kgetholla. ₉Motho yo mobjalo o hlompha melao ya ka gomme o phetha ditaelo tša ka gabotse. O lokile gomme ruri o tla phela.” O realo, Morena, Mong wa bohle.

₁₀“Eupša motho yo mobjalo a ka no ba le morwa yo e lego mohlakodi le mmolai, yo a dirago se sengwe sa dilo ka moka ₁₁tšela tatagwe a sego a ka a di dira. O ja dijo tša didimo tša dithabeng, goba o tšhilafatša mosadi wa monna yo mongwe ka go otswa le yena, ₁₂o gatelela badiidi le bahloki, o a hlakola goba ga a bušetše moadingwa se a mo swaretšego sona. O dira dilo tša makgapha, ₁₃goba o adima batho tšhelete ka go e tswadiša. Na o tla phela? Aowaa, a ka se ke. Ge a dirile makgapha ao gona o tla hwa. E tla be e le moipolai yo a sa llelwego.

₁₄“Morwa yoo le yena a ka ba le morwa yo a bonago dibe ka moka tše tatagwe a bego a di dira, fela yena a se di dire. ₁₅A se je dijo tša didimo tša dithabeng goba a khunamela medingwana ya diswantšho ya Baisraele. A se tšhilafatše mosadi wa monna yo mongwe ka go otswa le yena, ₁₆goba a gatelela motho, goba a se bušetše moadingwa se a mo swaretšego sona. A se hlakole batho, eupša a fa ba ba swerwego ke tlala dijo, le gona a apeša ba ba se nego diaparo. ₁₇A itshwara gore a se dire tše mpe, le gona a se adime motho tšhelete ka go e tswadiša. A latela melao ya ka a ba a phetha le ditaelo tša ka. A ka se hwe ka lebaka la bokgopo bja tatagwe, eupša ka nnete o tla phela. ₁₈Tatagwe yena o be a gatelela batho, a bile a ba hlakola, gomme a dira batho ba gabo tše mpe. Ka gona o tla hwa ka lebaka la tša gagwe dibe.

₁₉“Eupša lena le a botšiša le re: ‘Na morwa yo o reng a sa otlwe ka lebaka la dibe tša tatagwe?’ Ke ka lebaka la gore morwa yo o be a dira tše di lokilego le tše di nkgahlago. O be a phetha melao ya ka mme a e latela; ka lebaka leo ruri o tla phela. ₂₀Go tla hwa yo a dirago dibe. Morwa wa motho a ka se otlwe ka lebaka la dibe tša tatagwe, goba tatagomotho a otlwa ka lebaka la dibe tša morwagwe. Moloki o tla putsetšwa boloki bja gagwe, le yo kgopo o tla otlelwa bokgopo bja gagwe.

₂₁“Ge yo kgopo a ka tlogela dibe tša gagwe tšohle, mme a phetha melao ya ka, ge a ka dira tše di lokilego le tše di nkgahlago, a ka se hwe; ruri, o tla phela. ₂₂O tla lebalelwa dibe tša gagwe ka moka; o tla phela ka ge a dirile tše di lokilego. ₂₃Nna, Morena, Mong wa bohle, ke re: Kgane le gopola gore ke kgahlwa ke lehu la yo kgopo? Aowaa, ke kgahlwa ke ge a ka tlogela ditsela tše mpe mme a phela.

₂₄“Eupša ge moloki a ka tlogela go dira tše di lokilego gomme a thoma go dira tše kgopo, e lego makgapha ohle ao a dirwago ke bakgopo, na o tla fela a phela? Le gatee! Boloki bjohle bjo a bo dirilego bo ka se gopolwe. O tla hwa ka lebaka la go se botege ga gagwe le dibe tša gagwe.

₂₅“Eupša lena le re: ‘Tše Morena a di dirago ga se tša loka.’ Ntheeletšeng, lena setšhaba sa Israele. Kgane tše ke di dirago ga se tša loka? Na tše di sego tša loka ga se tše di dirwago ke lena? ₂₆Ge moloki a tlogela go dira tše di lokilego, a thoma go dira tše kgopo, mme a hwa, o hwa ka lebaka la tše kgopo tše a di dirilego. ₂₇Ge yo kgopo a tlogela go dira dibe mme a dira tše di lokilego le tše di nkgahlago, o a iphološa. ₂₈O lemoga tše a di dirago mme a tlogela go dira dibe. Ka gona ruri o tla phela, a ka se hwe. ₂₉Gomme lena setšhaba sa Israele le re: ‘Tše Morena a di dirago ga se tša loka.’ Kgane le gopola gore ke nnete tše ke di dirago ga se tša loka? Na tše di sego tša loka ga se tše di dirwago ke lena?

₃₀“Bjale nna, Morena, Mong wa bohle, ke tla ahlola yo mongwe le yo mongwe wa lena, setšhaba sa Israele, ka tše a di dirilego. Sokologang le tlogele dibe tšohle tše le di dirago, gore di se le iše tahlegong. ₃₁Lahlang dibe tše le bego le di dira, le beng le dipelo tše difsa le menagano ye mefsa. Ke ka lebaka lang le nyaka go hwa, lena setšhaba sa Israele? ₃₂Nna, Morena, Mong wa bohle, ke re: Ga ke kgahlwe ke ge motho a ehwa. Ka gona tlogelang dibe tša lena mme le phele.”

₁“Hlaba mokgoši o llele babuši ba Israele o re:

“Ke wona mokgoši wa sello, gomme o swanetše go hlabja ka tlhokofalo.”

₁Ka letšatši la lesome la kgwedi ya bohlano ya ngwaga wa bošupa wa ge re le mathopša, bagolo ba bangwe ba setšhaba sa Israele ba ile ba tla ba kgopela maele go Morena, gomme ba fihla ba dula fase pele ga ka. ₂Ke moka Morena a ntaela a re: ₃“Wena motho wa nama, botša bagolo ba ba setšhaba gore nna, Morena, Mong wa bohle, ke re: A ke re le tlile go kgopela maele go nna? Fela nna, Morena, Mong wa bohle, ke ikana ke le Modimo yo a phelago gore nka se kgopelwe ke lena maele.

₄“Na o itokišeditše go ba ahlola, wena motho wa nama? O itokišeditše go ba ahlola? Gona o ba gopotše tša go šišimiša tšela borakgolokhukhu ba bona ba bego ba di dira. ₅O ba botše gore nna, Morena, Mong wa bohle, ke re: Mohla wola ke kgetha Baisraele ke ile ka ikana go ditlogolo tša Jakobo ke emišitše letsogo, ka ikutollela bona kua nageng ya Egepeta. Ka ba botša ke emišitše letsogo ka re: Ke nna Morena Modimo wa lena. ₆Mohlang woo ke ile ka ikana go bona gore ke tla ba ntšha nageng ya Egepeta ka ba iša nageng ye ke ba nyaketšego yona, naga ya mokhora le monono, ya go di phala ka moka. ₇Ka re go bona: Ka moka ga lena lahlang medimo yeo ya diswantšho ya go šišimiša ye le e botilego, le gona le se ke la itšhilafatša ka medingwana yeo ya Egepeta; Morena Modimo wa lena ke nna. ₈Eupša bona ba ngangabala, ba gana go ntheeletša. Gwa se be le o tee yo a lahlago medimo ya gagwe ya go šišimiša ya diswantšho ye ba bego ba e botile, goba yo a lesago go khunamela medingwana ya Egepeta. Ke mo ke ilego ka nagana go tšhollela bogale bja ka godimo ga bona le go ba gakalela ka kgalefo ya ka gona kua Egepeta. ₉Eupša ka se dire bjalo, ka gobane ke be ke tla ikgoboša ditšhabeng tše ba bego ba phela gare ga tšona, tšeo ke itsebagaditšego go Baisraele di mpona ka go ba ntšha nageng ya Egepeta.

₁₀“Ka gona ke ile ka ba ntšha nageng ya Egepeta ka ba iša lešokeng la Sinai. ₁₁Ka ba fa melao ya ka, ka ba ka ba begela ditaelo tša ka tše di phedišago yo a di phethago. ₁₂Godimo ga moo ke ile ka ba fa le matšatši a Disabatha tša ka e le seka sa kgwerano ya ka le bona, gore ba tsebe ge e le nna, Morena, ke ba kgethwafatšago. ₁₃Eupša le gona kua lešokeng setšhaba sa Israele se ile sa nngangabalela. Ba se phethe melao ya ka, ba gana le go phetha ditaelo tša ka tše di phedišago yo a di phethago. Ba nyatša matšatši a Disabatha tša ka. Ke mo ke ilego ka nagana go tšhollela bogale bja ka godimo ga bona, le go ba gakalela ka kgalefo ya ka kua lešokeng ka ba fediša. ₁₄Eupša ka se dire bjalo, ka gobane ke be ke tla ikgoboša ditšhabeng tše di bego di mpone ge ke ntšha Baisraele Egepeta. ₁₅Le ge go le bjalo, ka ikana go bona kua lešokeng gore nka se ba iše nageng yela ke ba filego yona, naga ya mokhora le monono, ya go di phala ka moka. ₁₆Ke ikanne bjalo, ka gore ba be ba ganne go phetha ditaelo tša ka le melao ya ka, ba nyaditše le matšatši a Disabatha tša ka – ba kganyoga go khunamela medingwana ya bona.

₁₇“Le ge go le bjalo, ka ba šokela ka se ba bolaye, ka se ba fediše kua lešokeng. ₁₈Ka re go bana ba bona kua lešokeng: Le se ke la phetha melao le ditaelo tša borakgolokhukhu ba lena, goba la itšhilafatša ka medingwana ya bona. ₁₉Ke nna Morena Modimo wa lena; le phethe melao ya ka le ditaelo tša ka. ₂₀Le kgethwafatše matšatši a Disabatha tša ka, gore e tle e be seka sa kgwerano ya ka le lena, gore le tsebe ge nna, Morena, ke le Modimo wa lena.

₂₁“Eupša moloko woo le wona o ile wa nngangabalela. Ba se phethe melao ya ka le ditaelo tša ka tše di phedišago yo a di phethago. Ba nyatša matšatši a Disabatha tša ka. Ke mo ke ilego ka nagana go tšhollela bogale bja ka godimo ga bona, le go ba gakalela ka kgalefo ya ka kua lešokeng. ₂₂Eupša ka se dire bjalo, ka gobane ke be ke tla ikgoboša ditšhabeng tše di bego di mpone ge ke ntšha Baisraele nageng ya Egepeta. ₂₃Godimo ga moo ka ikana go bona kua lešokeng gore ke tla ba šwalalanya le ditšhaba, ka ba phatlalatša le dinaga, ₂₄ka gore ba be ba gana go phetha ditaelo tša ka, le melao ya ka, ba nyaditše le matšatši a Disabatha tša ka, mme ba kganyoga go khunamela medingwana ya borakgolokhukhu ba bona.

₂₅“Ke ka lebaka leo ke ba filego melao ye e sego ya loka le ditaelo tše di sa ba phedišego. ₂₆Ka ba lesa ba itšhilafatša ka dikabelo tša bona, ka ba ka ba lesa ba dira dihlabelo ka barwa bohle ba bona ba maitšibolo gore ke ba tšhoše. Ke mo ba tlago lemoga gore ke nna Morena.

₂₇“Bjale ge, wena motho wa nama, botša setšhaba sa Israele gore nna, Morena, Mong wa bohle, ke re: Wo ke mokgwa wo mongwe wo borakgolokhukhu ba lena ba nnyefotšego ka wona ka go se botege ga bona. ₂₈Ke ba išitše nageng ye ke bego ke ikanne go ba fa yona. Ya re ge ba bona meboto ye e phagamego le mehlare ya matlakala a mantši ba dira dihlabelo go yona, ba mpefediša ka dikabelo tša bona. Moo ba dira dihlabelo tša monkgo wo mobose, ba tšholla dikabelo tša bona tša dino. ₂₉Nna ka ba botšiša ka re: Dintotoma tše le yago go tšona tše ke dilomang? Le lehono di sa bitšwa ‘Dintotoma’. ₃₀Bjale botša setšhaba sa Israele gore nna, Morena, Mong wa bohle, ke re: Le reng le itšhilafatša ka mokgwa wo borakgolokhukhu ba lena ba bego ba itšhilafatša ka wona, le arogela medimong ya bona ya go šišimiša ya diswantšho? ₃₁Ka ge le be le tliša dikabelo tša lena, le dira le dihlabelo ka bana ba lena, le itšhilafaditše ka medingwana yohle ya lena go fihlela le lehono. Bjale na nka nama ka kgopelwa ke lena maele, lena setšhaba sa Israele? Nna, Morena, Mong wa bohle, ke ikana ke le Modimo yo a phelago, gore maele nka se a kgopelwe ke lena. ₃₂Le re: ‘Re nyaka go etša ditšhaba tše dingwe, ra swana le batho ba ba dulago dinageng tše dingwe ba khunamelago dikota le maswika.’ Eupša se le se naganago se ka se direge.”

₃₃“Nna, Morena, Mong wa bohle, ke ikana ke le Modimo yo a phelago, gore ke tla ba kgoši ya lena ka maatla a ka a magolo le bonatla ge ke se sa le galefetše. ₃₄Ka maatla a ka a magolo le bonatla ke tla le ntšha ditšhabeng ka le kgoboketša dinageng tše le šwalalanyeditšwego go tšona ke se sa le galefetše. ₃₅Ke tla le tliša Lešokeng la Ditšhaba, gomme moo ka le ahlola ke lebane le lena. ₃₆Ke tla le ahlola bjalo ka ge ke ile ka ahlola borakgolokhukhu ba lena lešokeng la Egepeta.” O realo, Morena, Mong wa bohle.

₃₇“Ke tla le hlokomela bjalo ka modiša ge a hlokomela mohlape wa gagwe, ka dira gore le botegele kgwerano. ₃₈Bao ba ganago go bušwa ke nna le ba go mphošetša ke tla ba tloša mo go lena. Ke tla ba ntšha dinageng tše ba falaletšego go tšona, fela nageng ya Israele gona ba ka se boele. Ke gona le tlago lemoga gore Morena ke nna.”

₃₉Morena, Mong wa bohle, o re: “Bjale ge, lena setšhaba sa Israele, ka moka ga lena le ka no tšwela pele la khunamela medingwana ya lena! Ge le sa ntheeletše, le tla nkgopola ka morago, la se sa nnyatša ka dikabelo tša lena le medingwana ya lena. ₄₀Gona kua nageng ya lena, thabeng ya ka ye kgethwa, thabeng ye e phagamego ya Israele, ke mo le tlago nkhunamela gona, lena setšhaba sohle sa Israele. Le tla be le nkgahla mme ke tla nyaka gore le ntlišetše dihlabelo le dikabelo tša lena tše dibotsebotse, gotee le dimpho tša lena tše dikgethwa. ₄₁Mohla ke le ntšha ditšhabeng ke le kgoboketša dinageng tše le šwalalanyeditšwego go tšona, ke tla le amogela bjalo ka ge nke le monkgo wo mobose, ka ipontšha ke le mokgethwa gare ge lena ditšhaba di ntebeletše. ₄₂Mohla ke le bušetša nageng ya Israele, nageng ye ke ikannego go e fa borakgolokhukhu ba lena, ke mo le tlago lemoga gore ke nna Morena. ₄₃Moo le tla gopola maitshwaro ale a lena le ditiro tšohle tše le itšhilafaditšego ka tšona. Le tla inyatša ka lebaka la tšohle tše mpe tše le dirilego. ₄₄Mohla ke le swara ka mo go lebanego tlhomphego ya ka, e sego maitshwaro a lena a mabe le ditiro tša lena tše kgopo, ke mo lena, setšhaba sa Israele, le tlago lemoga gore ke nna Morena.” O realo, Morena, Mong wa bohle.