To The Word – Day 194

₁Morena a ntaela a re: ₂“Wena motho wa nama, lebelela borwa, o bolele o lebeletše gona, o porofete sethokgwa sa ka borwa bja naga. ₃O botše sethokgwa seo sa ka borwa bja naga gore se kwe se Morena a se bolelago. Morena, Mong wa bohle, o re: Bonang! Ke gotša mollo ka gare ga gago wo o tlago tšhuma sehlare se sengwe le se sengwe se se lego mo go wena, se setala le sa go oma. Ga go se se kago tima kgabo ya wona ye e laumago. O tla babola bohle go tloga ka borwa go fihla ka leboa. ₄Bohle ba tla bona gore o goditšwe ke nna, Morena, gomme o ka se tingwe ke motho.”

₅Eupša nna ka re: “Morena, Mong wa bohle, batho ba lla ka la gore ka mehla ke bolela ka dika.”

₆Morena a ntaela a re: ₇“Wena motho wa nama, kgala Jerusalema. Kgalema mafelo ao batho ba khunamelago medimo ya diswantšho go ona. O porofete naga ya Israele ₈o e botše gore nna, Morena, ke re: Ke a go lwantšha. Ke tla khwamola tšhoša ya ka ka le gagara ka moka, baloki le bakgopo. ₉Ke tla hlaba batho bohle ka tšhoša ya ka, go tloga ka borwa go fihla ka leboa. ₁₀Bohle ba tla tseba gore nna, Morena, ke khwamotše tšhoša ya ka, le gore nka se sa e khwamela.

₁₁“Wena motho wa nama, golola mo nkego o hlomoga pelo. Gotla gabohloko o le mo o tlago bonwa ke batho. ₁₂Ge ba go botšiša gore na o golola ka lebaka la eng, o ba botše gore ke ka lebaka la taba tše o di kwelego. E tla re ge di hlaga, bohle ba kgaoga matswalo, ba repha matsogo, ba nolega moko, ba ba ba itlhapologela ka lebaka la letšhogo. Nako e tlile; e šetše e fihlile.” O realo, Morena, Mong wa bohle.

₁₃Morena a ntaela a re: ₁₄“Wena motho wa nama, porofeta o re Morena o re: Tšhoša! Tšhoša e looditšwe ya phadimišwa!

₁₉“Bjale, wena motho wa nama, porofeta. Bethantšha diatla gore tšhoša e hlabe leboelela. Ke tšhoša ye e bolayago, tšhoša ye e kgebetlago, ye e šiišago e etšwa ka mathoko ohle. ₂₀E nola setšhaba sa ka moko, ya se thekesediša ka letšhogo. Ke tla hlasela motse wa bona ka tšhoša ye e bekenyago boka legadima, ye e looleditšwego polao. ₂₁Hlabela ka go la go ja le go la nngele, wena tšhoša ye bogale, hlabela ka mathoko ohle. ₂₂Le nna ke tla bethantšha diatla, mme kgalefo ya ka ya kokobela. Ke realo, nna, Morena.”

₂₃Morena a ntaela a re: ₂₄“Wena motho wa nama, swaya ditsela tše pedi tšeo kgoši ya Babilonia e kago tšea ka tšona, e tla be e swere tšhoša. Tsela tšeo ka dipedi di tloge nageng e tee. O bee maswao moo di aroganago gona. ₂₅O beele kgoši yeo leswao tseleng e tee yeo e ka mo išago motseng wa Baamone wa Raba, o tla be a swere tšhoša; ye nngwe o e swaye gore e mo iše nageng ya Juda, motseng wa Jerusalema wo o ageleditšwego ka morako. ₂₆Kgoši ya Babilonia e eme mathomong a mo ditsela tšeo di aroganago gona gore a laole. O šikinya mesebe ka kgotlopong, o kgopela maele go medimo ya gagwe ya diswantšho, o lekola sebete sa seruiwa sa sedimo. ₂₇Ka seatla sa la go ja o swara mosebe wo o swailwego. Wona o mo laetša gore a yo bea dithubamerako, a laele madira go hlasela, a hlabe mokgoši wa ntwa, a bee dithubamerako masorong, a kgobele mokgobo wa mobu go dikanetša motse, a age le dithala tša go o hlola. ₂₈Batho ba Jerusalema ba tla gopola gore go laola moo ke ga bofora, ka gobane ba ikanne gore ba tla botegela Babilonia. Eupša ka go hlasela Jerusalema o tla ba gopotša molato wa bona mme a ba thopa. ₂₉Ka gona, nna, Morena, Mong wa bohle, ke re: Ka ge le nkgopoditše melato ya lena ka go pepentšha gore le gana go bušwa ke nna, le ka go tšweletša dibe tša lena nyanyeng ka tšohle tše le di dirago, ka ge le ikgopoditše nna ka tsela ye, le tla thopša.

₃₀“Hee, wena mmuši wa Israele, moilabokgethwa, rabokgopo towe, letšatši la gago le fihlile, yona nako ya mafelelo ya go otlwa ga gago. ₃₁Nna, Morena, Mong wa bohle, ke re: Rola kuane ya gago, o role le mphapahlogo! Go ka se sa ba bjalo ka pele: Banyatšegi ba tla hlompšha, bahlomphegi ba nyatšwa. ₃₂Lešope! Lešope! Ee, motse wo ke tla o dira lešope. La mohuta wo ga se la ka la bonwa. Eupša mohla go etla mmuši yo o mo lebanego ke tla mo fa wona.”

₃₃“Wena motho wa nama, porofeta o re Morena, Mong wa bohle, o bolela ka Baamone ba ba rogago Israele o re:

₃₅“ ‘Khwamela tšhoša segatleng! Ke ya go le ahlola mo le hloletšwego gona, nageng ye le tswaletšwego go yona. ₃₆Ke tla tšhollela kgalefo ya ka godimo ga lena, ke tla le tšhuma ka mollo wa bogale bja ka. Le gona ke tla le gafela diatleng tša banna ba sehlogo, ditsebi tša polao. ₃₇Le tla fedišwa ka mollo. Madi a lena a tla tšhollwa nageng ya gabolena, gomme le ka se sa gopolwa ke motho.’ ” O realo Morena.

₁Morena a re go nna: ₂“Wena motho wa nama, na o itokišeditše go ahlola motse woo wa go tlala dipolao? Gona o o gopotše tšohle tša go šišimiša tše o bego o di dira. ₃O botše motse woo gore nna, Morena, Mong wa bohle, ke re: Jonna, motse wa go itahla ka go ipolaela batho ba wona, le ka go itšhilafatša ka go itirela medingwana! ₄O ikobetše molato ka go bolaya batho, le gona o itšhilafaditše ka medingwana ye o itiretšego yona yeo. O iphokoleditše matšatši, o fihlile mafelelong a bophelo bja gago. Ke ka lebaka leo ke lesitšego ditšhaba di go kwera, le dinaga tšohle di go sega. ₅Batho ba kgole le ba kgauswi ba tla go kodutla, wena segoboga, mmameferefere towe! ₆Bona! Baetapele bohle ba Israele ba ba agilego mo go wena ba šomišitše maatla a bona go bolaya batho. ₇Badudi ba gago ga ba hlomphe botatagobona le bommagobona. Ba swara bafaladi gampe, ba gatelela bahlologadi le ditšhiwana. ₈O nyaditše mafelo ao ke khunamelwago go ona, wa nyatša le matšatši a Disabatha tša ka. ₉Badudi ba bangwe ba gago ba seba ba bangwe gore ba bolawe; ba bangwe ba ja didimo mo go khunamelwago medimo ya diswantšho dithabeng, bangwe ba dira tša bohlola. ₁₀Ba bangwe ba robala le basadi ba botatagobona; bangwe ba gapeletša basadi ba ba bonego kgwedi mme ba tšhilafetše gore ba robale nabo, mme ba itšhilafatše. ₁₁Ba bangwe ba dira tša maila le basadi ba bangwekabona; bangwe ba tšhilafatša dingwetši tša bona ka ditiro tša dihlong; ba bangwe ba tšhilafatša dikgaetšedi tša bona, e lego barwedi ba botatagobona. ₁₂Ba bangwe ba rekwa gore ba bolaye batho; bangwe ba adima Baisraelekabona tšhelete ka go e tswadiša, bangwe ba e tswadiša go feta tekanyo; bangwe ba hlalefetša Baisraelekabona ka go ba lefiša go feta tekanyo. Nna ba ntebetše.” O realo, Morena, Mong wa bohle.

₁₃“Ke bethantšha diatla ke kgotsa poelo ye e fetago tekanyo ye o ikgobokeleditšego yona, le batho ba ba bolailwego ka gare ga gago. ₁₄Na mohla ke etla go go otla o tla be o sa na le sebete, moko wona o tla be o sa na le wona? Ke realo, nna, Morena, gomme ke tla phetha. ₁₅Ke tla šwalalanyetša badudi ba gago ditšhabeng, ka ba phatlalatša le dinaga, gomme ke tla go hlatswa go tšhilafala ga gago. ₁₆Ke tla go nyatša pele ga ditšhaba, moipolai e le wena mong, fela o tla lemoga gore Morena ke nna.”

₁₇Morena a re go nna: ₁₈“Wena motho wa nama, setšhaba sa Israele ga se nkhole ka selo. Ba swana le tshipi ye e lahlilwego, e lego mphiri le thini le tshipi le morodi, dilo tše di šetšego ge go hlwekišwa silibera moubelong. ₁₉Ka gona, nna, Morena, Mong wa bohle, ke re go bona: Ka ge le lena le le bjalo, le se na mohola, ke tla le kgoboketša Jerusalema. ₂₀Bjalo ka ge motho a kgobela silibera le mphiri le tshipi le morodi le thini moubelong, a butšwetša mollo go di tološa, le nna ke tla le kgobela ke befetšwe ebile ke galefile, ka le tsenya ka motseng ka le tološa. ₂₁Ee, ke tla le kgoboketša ka le butšwetša ka kgalefo ya ka ye e tukago mollo ka le tološa ka motseng. ₂₂Le tla tološwa kua Jerusalema go swana le silibera ge e tološwa moubelong, mme ke gona le tlago lemoga gore ke nna, Morena, ke tšholotšego kgalefo ya ka godimo ga lena.”

₂₃Morena a re go nna: ₂₄“Wena motho wa nama, botša Jerusalema o re: O swana le naga ye e sego ya nelwa ke pula ka ge ke e galefetše. ₂₅Baetapele ba Jerusalema ba swana le ditau tše di bopago di gagola diphoofolo tše di di bolailego. Ba bolaya batho, ba ba amoga thoto le dilo tše bohlokwa, gomme ka dipolao tšeo tša bona ba hlola bahlologadi ba bantši. ₂₆Baprista ba gona ba tshela melao ya ka ebile ba nyatša mafelo ao ke khunamelwago go ona. Ga ba kgetholle se sekgethwa go se e sego se sekgethwa. Ga ba rute batho go kgethologanya dilo tše di hlwekilego le tše di sego tša hlweka, le gona ga ba šetše matšatši a Disabatha tša ka. Ka gona ba a nnyatša. ₂₇Bagolo ba gona ba swana le diphiri tše di gagolago diphoofolo tše di di bolailego. Ba bolaya batho gore ba holege ka thoto tša bona. ₂₈Baprofeta ba gona ba fihlile dibe tšeo go no swana le batho ba ba kgophago leboto ka motaga. Ba bona dipono tša maaka ba ba ba ba porofetela maaka, ba re ba bolela lentšu la Morena, Mong wa bohle, mola nna, Morena, ke se ka bolela le bona. ₂₉Badudi ba naga ye ba tšeela batho dilo ka kgang ba ba hlakola. Ba gatelela bahloki le bahlaki, ba tšeela le bafaladi dilo ka kgang, ba ba hlokiša toka. ₃₀Ke nyakile motho yo a ka thibago morako, yo a ka emago moo go kgerešitšwego gona a šireletša naga gore ke se e fediše, fela ka mo hloka. ₃₁Ka gona ka tšhollela bogale bja ka godimo ga bona, ka ba fediša ka kgalefo ya ka ye e laumago mollo. Ke ba otletše tše ba di dirilego.” O realo, Morena, Mong wa bohle.

₁Morena a re go nna: ₂“Wena motho wa nama, go kile gwa ba le basadi ba babedi, e le barwedi ba mosadi o tee. ₃Mola ba sa dula Egepeta e sa le ba bafsa ba be ba itirile difebe. Gona moo ba be ba swarwa matswele, ba phopholwa ditlhoko e sa le makgarebe. ₄Yo mogolo o be a bitšwa Ohola, mme morathwagwe e le Oholiba. Ka ba nyala ka babedi, mme ba mpelegela barwa le barwedi. Ohola ke Samaria, Oholiba ke Jerusalema. ₅Ohola, le ge e be e le wa ka, o ile a no fela e le sefebe, gomme a duma dinyatsi tša gagwe, e lego Baasiria, bagale ₆ba go apara diaparo tša bohwibidu bja go retela, babušiši le balaodi, ka moka ga bona e le masogana a go bopega, a go namela dipere. ₇Yena e be e le sefebe sa ditswatswa tša masogana a Asiria, gomme a itšhilafatša ka medingwana yohle ya mang le mang yo a bego a mo duma kudu. ₈O ile a se lahle bofebe bjo a bo thomilego kua Egepeta, mola banna ba robala naye e sa le yo mofsa, ba mo phophola ditlhoko tša matswele e sa le lekgarebe, ba mo swara bjalo ka sefebe. ₉Ka gona nna ka mo gafela diatleng tša dinyatsi tša gagwe tša Asiria tše a bego a di duma kudu. ₁₀Bona ba mo hlobodiša, ba tšea barwa le barwedi ba gagwe, yena ba mmolaya ka tšhoša. A goboga basading ka kotlo ye a otlilwego ka yona.

₁₁“Oholiba, ngwanabo, le ge a di bone, yena a bela madi le go feta, mme a feba le go fetiša mogolwagwe. ₁₂Le yena a duma babušiši le balaodi ba Baasiria, bagale ba go apara diaparo tša botšhepi, ba go namela dipere, bohle e le masogana a go bopega. ₁₃Nna ka mmona a tšhilafetše, ka bona ka babedi ga bona ba swana ka bobe.

_14-15“Fela Oholiba yena a fetiša mogolwagwe ka bofebe. E be e re ge a bona diswantšho tša banna di setilwe lebotong, tša balaodi ba Bababilonia tše di kwadilwego ka mebala ya bohwibidu bja madi, mathekeng ba itlemile ka mapanta, dihlogong ba rwele dikuane tša botšhepi, e le diswantšho tša Bababilonia bao naga ya bona e bego e le Babilonia, ₁₆ge a di bona fela a ba dume, a rome batseta go bona kua Babilonia. ₁₇Bababilonia ba tle ba robale naye, mme ba mo tšhilafatše ka bofebe bja bona. Ge a itšhilafaditše ka bona bjalo, ba thome go mo tena. ₁₈Ge a ntše a sa iphihle gore ke yena sefebe, a apolela mang le mang diaparo, o ile a ntšhišimiša bjalo ka mogolwagwe. ₁₉A feteletša bofebe bja gagwe ge a ntše a gopola tša mola e sa le yo mofsa, mola e le sefebe nageng ya Epepeta. ₂₀A duma go robala le dinyatsi tša gagwe tša mešuka ya go lekana le ya dipokolo, tša go kunyakunyetša bjalo ka dipere tša dipoo.” ₂₁Wena Oholiba, o be o ikgopotša bofebe bjola bja gago bja mola o sa le lekgarebe, mola banna ba go swara matswele, ba go phophola ditlhoko kua Egepeta.

₂₂“Ka lebaka leo, wena Oholiba, nna, Morena, Mong wa bohle, ke re: Ke tla hlohleletša dinyatsi tša gago tšela di go tennego, ka di tliša tša go hlasela di etšwa ka mathoko ohle. ₂₃Ke tla tliša Bababilonia le Bakaldea bohle, le banna ba go tšwa Pekode le Shoa le Koa le Baasiria ka moka. Ke tla kgoboketša babušiši le balaodi bohle bale ba masogana ba go bopega, le bahlankedi le bagale, ka moka e le ba go namela dipere. ₂₄Ba tla go hlasela ba etšwa leboa, ba etla le madira a mantši le dikoloi tša ntwa, le dikoloi tše dingwe. Ba tla go dikanetša ba swere dithebe le dikotse, ba rwele le dikefa tša ntwa. Ke tla go gafela diatleng tša bona gore ba go otle, gomme ba tla go ahlola ka melao ya segagabobona. ₂₅Ke tla go galefela, mme ka ba lesa ba go otla ba galefile. Ba tla go ripa nko le ditsebe mme ba bolaya bana ba gago ka tšhoša. Ee, ba tla go amoga barwa le barwedi, ba ba ba go tšhumela thoto. ₂₆Ba tla go apola diaparo, ba go tšeela le magakabje. ₂₇Ke tla fediša bononyana le bofebe bja gago bjo bo thomilego kua Egepeta. O ka se sa bo hlolosela goba wa gopola Egepeta.”

₂₈Morena, Mong wa bohle, o re: “Ke tla go gafela diatleng tša batho bao o ba hloilego gape ba go tenago. ₂₉Ka ge ba go hloile, ba tla go amoga tšohle tše o di šometšego. Ba tla go tlogela o le fela, wa bonelwa lepono le o bego o gweba ka lona. Bononyana le bofebe bja gago ₃₀ke bjona bjo bo go hloletšego kotlo ye. O be o le sefebe sa ditšhaba, ebile o itšhilafatša ka medingwana ya bona. ₃₁O be o sepela mehlaleng ya mogolwago, ka gona ke tla go fa sona senwelo sela sa kotlo ya gagwe gore o se nwe.”

₃₂Morena, Mong wa bohle, o re:

₃₅Bjale ge, Morena, Mong wa bohle, o re: “Ka ge o ntebetše mme o mphuraletše, o tla otlelwa bononyana le bofebe bja gago.”

₃₆Morena a re go nna: “Wena motho wa nama, na o itokišeditše go ahlola Ohola le Oholiba? Gona ba gopotše tša go šišimiša tše ba bego ba di dira. ₃₇Ba otswitše, ba bolaile batho mme ba kgamathela madi diatleng – ba otswitše le medingwana ya bona, ba ba ba e hlabela bana ba ba mpelegetšego bona ya ba dijo tša yona. ₃₈Gomme tšeo ga se ka moka tše ba ntirilego tšona. Ba tšhilafaditše le felo ga ka go gokgethwa, ba ba ba nyatša matšatši a Disabatha tša ka. ₃₉Ka lona tšatši le ba hlabetšego medingwana ya bona bana ba bona ba tlile felong ga ka go gokgethwa mme ba go nyatša. Ke tšona tše ba di dirilego ka ntlong ye e lego ya ka.

₄₀“Ntle le tšeo, ba be ba roma batseta go yo bitša banna ba go tšwa kgole, mme banna bao ba tle. Basadi bao ba babedi ba hlape mmele, ba ithakge mahlo ka pilo, ba apare le dikgabišo. ₄₁Ba dule setulong sa masethesethe, mme mo pele ga sona go bewe tafola ye e lokišeditšwego go jela, ye ba bego ba beile seorelo le makhura a mohlware godimo ga yona, dilo tše ke bego ke ba file tšona. ₄₂Gwa kwagala lešata la lekoko le le iketlilego, la sehlopha sa banna ba ba tlišitšwego ba etšwa lešokeng. Ba rweša basadi bao maseka matsogong le mefapahlogo ye mebotse dihlogong. ₄₃Gomme nna ka pelong ka re etse mosadi yo wa go hlagatšwa ke bootswa ba mo febiša. ₄₄Ba be ba robala naye. Ba be ba robala le basadi bao ba difebe, Ohola le Oholiba, bjalo ka banna ge ba robala le sefebe. ₄₅Banna ba go loka bona ba tla ba bona molato wa bootswa le wa go bolaya batho, ka gobane ke diotswa le gona ba kgamathetše madi diatleng.”

₄₆Morena, Mong wa bohle, o re: “Tlišang lekoko le tle le ba tšhošetše le be le ba hlakole. ₄₇Lekoko leo a le ba bolaye ka maswika, le ba gagare ka ditšhoša, le ba bolaele barwa le barwedi, le be le ba tšhumele dintlo. ₄₈Ke ka mo ke tlago fediša bofebe mo nageng, e le go kgala basadi bohle gore ba se febe ba etša bona. ₄₉Gomme lena basadi ba babedi le tla otlelwa bofebe bja lena, le sebe sa lena sa go khunamela medingwana ya lena. Ke mo le tlago lemoga gore ke nna Morena, Mong wa bohle.”

₁Ya re ka letšatši la lesome la kgwedi ya lesome ya ngwaga wa senyane wa ge re le mathopša Morena a re go nna: ₂“Wena motho wa nama, ngwala gore lehono ke letšatši la bokae kgweding, ka gobane le ke letšatši leo ka lona kgoši ya Babilonia e thomago go dikanetša Jerusalema. ₃O botše setšhaba seo sa dingangele seswantšho, o se botše gore nna, Morena, Mong wa bohle, ke re: Bea pitša sebešong. ₄O segelele digoba tšohle tše dibotse – tša dirope le tša matsogo – o e tlaleletše ka mašetla a mabotse. ₅O kgabelele nama ye botsebotse ya dihuswane; o bešeletše pitša kudu ka dikgong. O apee nama, o e kgabakgabiše le mašetla.”

₆Morena, Mong wa bohle, o re: “Wo madimabe ke motse woo wa go tlala dipolao! O swana le pitša ye e rusitšego ye e sa tlogego ruse. Ntšha nama pitšeng, segoba ka se tee ka se tee o sa di kgetholle. ₇Go kile gwa bolawa batho moo motseng, eupša madi a se tšhollelwe fase moo a bego a ka khupetšwa ka mobu; a ile a tšhollelwa letlapeng. ₈Ke a tšholotše moo gore a se khupetšege, gore ke tle ke a lefeletše ke galefile.”

₉Ka gona Morena, Mong wa bohle, o re: “Motse wo madimabe ke woo wa go tlala dipolao! Le nna ke tla bešeletša mollo kudu ka dikgong. ₁₀Oketša dikgong, o bešeletše mollo, o butšwiše nama pherephere, moro o be o felele, le marapo a swe. ₁₁Bjale bea pitša yela ya go se be le selo magaleng, gore e fiše tšhiritšhiri mo tshipi ya yona e tlago hwibila, mme mešidi le ruse ka gare tša lorela, ₁₂le ge ruse yeo e ka se tloge ka moka moo kgabong ya mollo. ₁₃Wena Jerusalema, mediro ya gago ya bofebe e go tšhilafaditše. Le ge ke lekile go go hlwekiša, o no šala o sa tšhilafetše. O ka se hlweke gape go fihlela ke go gakalela ka kgalefo ya ka. ₁₄Ke realo, nna, Morena. Bjale nako ya gore ke go otle e fihlile. Nka se hlokomologe dibe tša gago, goba ka go šokela, le ge e le go go gaugela. O tla ahlolwa go ya ka maitshwaro a gago le ka tše o di dirilego.” O realo, Morena, Mong wa bohle.

₁₅Morena a re go nna: ₁₆“Wena motho wa nama, ka bonakwana ke ya go go amoga motho yo o mo ratago kudu; fela o se ke wa mo ilela goba wa mo llela, goba wa sekiša meokgo. ₁₇O fegelelwe teng; o se ilele mohu; o dule o rwele kuane le dieta. O se ipipe maledu goba wa ja nama ya mogoga.”

₁₈Ke be ke tsogile ke botša batho molaetša woo. Mantšiboa a lona tšatši leo mosadi wa ka a hlokafala, gomme ka le le latelago ka dira ka moo ke bego ke laetšwe ka gona. ₁₉Batho ba mpotšiša ba re: “Nke o re botše gore tše o di dirago tše rena di re ruta eng.”

₂₀Ka gona ka re go bona: “Morena o boletše le nna a ntaela ₂₁gore ke le botše, lena setšhaba sa Israele, gore yena Morena, Mong wa bohle, o re: ‘Ke kgauswi le go tšhilafatša felo ga ka mo gokgethwa – sona sebo se le ikgantšhago ka sona, se le ratago go se boga le go se etela. Gomme barwa le barwedi ba lena ba le ba tlogetšego morago Jerusalema ba tla bolawa ka tšhoša.’ ₂₂Ke gona le tlago dira se ke se dirilego. Le ka se ipipe maledu goba la ja nama ya mogoga. ₂₃Le tla dula le rwele dikuane le dieta, ebile le ka se ilele goba la lla. Le tla otišwa ke go otlelwa dibe tša lena mme la balabala le le mmogo. ₂₄Ke mo nna, Hesekiele, ke tlago ba sešupo go lena; le tla dira tšohle tše ke di dirilego. Morena o re mohla tšeo di direga le tla lemoga gore ke yena Morena, Mong wa bohle.”

₂₅Morena a re: “Gomme wena motho wa nama, ke yo ba amoga sebo seo sa bona se se ba kgahlago mme ba ikgantšhago ka sona, se ba ratago go se bogela le go se etela. Ke tla ba ka ba amoga le barwa le barwedi ba bona. ₂₆Mohla ke dira seo mothotsoko yo a tla bego a phonyokgile o tla tla a go anegela taba tšeo. ₂₇Lona tšatšing leo o tla rarologelwa ke polelo, mme wa bolela le yena. O tla bolela, wa se sa homola. Ke ka moo o tlago ba sešupo go bona, gomme ba tla lemoga gore Morena ke nna.”

₁Morena a re go nna: ₂“Wena motho wa nama, lebelela go Baamone o ba porofete. ₃O ba botše gore ba theeletše tše nna, Morena, Mong wa bohle, ke di bolelago ke re: Le be le re: ‘Swine!’ mola felo ga ka mo gokgethwa go tšhilafatšwa, le mola naga ya Israele e senywa, le mola batho ba Juda ba išwa bothopša. ₄Ka gona, ke tla le gafela dikgoro tša leganateng la ka bohlabela ba le fenya. Ba tla hloma mešaša ya bona nageng ya lena mme ba dula gona. Ba tla ja dikenywa tša lena, ba nwa le maswi a lena. ₅Motse wa Raba ke tla o fetoša mafulo a dikamela, naga ya Amone ka e fetoša meraka ya dihuswane. Ke mo le tlago lemoga gore Morena ke nna.

₆“Morena, Mong wa bohle, o re: Le be le phaphatha diatla, le bina le thabile, le nyatša naga ya Israele. ₇Ka gona, ke tla le otla, ka le gafela diatleng tša ditšhaba tše dingwe, mme tšona tša le hlakola. Ke tla le fediša la se sa ba setšhaba, le naga ya lena ya se sa ba gona. Ke mo le tlago lemoga gore Morena ke nna.”

₈Morena, Mong wa bohle, o re: “Ka ge Bamoaba ba rile batho ba Juda ba swana le ditšhaba tše dingwe ka moka, ₉ke tla lesa metse ye e šireletšago mollwane wa Moaba e hlaselwa, ke ra le yona metse yela ye mebotsebotse ya naga yeo, e lego Bethe-Jeshimote, Baale-Meone le Kiriathaime. ₁₀Ke tla gafela Bamoaba le Baamone go dikgoro tša leganateng la ka bohlabela tša ba fenya, gore Bamoaba ba se sa gopolwa ke ditšhaba. ₁₁Ke tla otla Bamoaba, gomme ba tla lemoga gore Morena ke nna.”

₁₂Morena, Mong wa bohle, o re: “Baedomo ba itefeleditše gasehlogo ka batho ba naga ya Juda, gomme tefeletšo yeo e obetše Baedomo molato wo mogolo. ₁₃Ka gona nna, Morena, Mong wa bohle, ke re ke tla otla naga ya Edomo, ka bolaya batho ba gona le diphoofolo. Ke tla fetoša naga yeo leganata, go tloga motseng wa Temane go yo fihla go wa Dedane, gomme batho ba gona ba tla bolawa ka tšhoša. ₁₄Baisraele, setšhaba sa ka, ba tla ntefeletša ka Baedomo, gomme ba dira gore Baedomo ba kwe bogale bja ka le kgalefo. Baedomo ba tla tseba gore go itefeletša ga ka go bjang.” O realo, Morena, Mong wa bohle.

₁₅Morena, Mong wa bohle, o re: “Bafilista, ka ge ba hloile manaba a bona, ba itefeleditše gasehlogo ka ona, mme ba a fediša ka lebaka la metsoto ya bona ya kgale. ₁₆Ka gona nna, Morena, Mong wa bohle, ke re ke tla otla Bafilista, ka fediša Bakreta bao. Ke tla fediša le mašaledi a bona a a agilego lebopong la lewatle. ₁₇Ke tla itefeletša kudu ka bona, ka ba otla ke galefile. Ge ke itefeletša bjalo ke mo ba tlago lemoga gore ke nna Morena.”

₁Tše ke dipolelo tša Agure, morwa wa Jake, wa go tšwa Masa.

Yena o boditše Itiele le Ukale a tiišitše a re: