HESEKIELE 19

₂“Mmago e be e se ge e le tau ya tshadi ditaung!

A patlama le ditau a godiša tawana tša gagwe.

₃A lela ye nngwe ya tawana tša gagwe,

ya gola ya ba tau ya lesogana,

ya ithuta go tsoma, ya ba sejabatho.

₄Ditšhaba tša kwa ka ga yona,

mme tša e thea ka molete;

tša e goga ka segalanko tša e iša Egepeta.

₅Ya re ge e bona gore e paletšwe le lehutšo le fedile,

ya tšea ye nngwe ya ditawana tša yona,

ya e godiša ya ba tau ya lesogana.

₆Ya re ge e godile go iphetša,

ya šika le ditau tše dingwe.

Le yona ya ithuta go tsoma,

ya ba sejabatho.

₇Ya hlahlamolla dibo tša bona,

ya thuba metse ya bona.

Ge e rora badudi bohle ba naga

ba be ba swarwa ke letšhogo.

₈Ditšhaba tša go tšwa dileteng tše di bapelanego

tša bokanela go e hlasela.

Ba e rea ka lelokwa la bona,

ba e tanya ka moleteng.

₉Ba e goga ka segalanko

ba e tsenya ka lešakeng,

ba tla ba e iša go kgoši ya Babilonia.

Ba dula ba e letile,

gore go rora ga yona go se sa tsoga

go kwagetše dithabeng tša Israele.

₁₀“Mmago o be a etša morara

wo o bjetšwego kgauswi le moela ka serapeng sa merara.

O be o entšwe kudu, o nabile,

ka ge meetse e be e le maphaaphaa.

₁₁Makala a wona a be a tiile,

mme go dirwa melamo ya bogoši ka ona.

Morara woo wa letla go fihla marung;

o bonala ka botelele le makala a wona a mantši.

₁₂Eupša mothotsoko a o tumola a galefile

a o lahlela fase.

Phefo ya bohlabatšatši ya o pontšha,

dikenywa tša wona tša hlohlorega.

Lekala la wona la go tia la omelela,

la bešwa mollong.

₁₃Morara woo bjale o hlabolotšwe wa bjalwa leganateng,

nageng ya lesehla.

₁₄Gwa tsupologa mollo kutung ya morara woo,

wa tšhuma makala le dikenywa.

Ga o sa ne makala a go tia,

a go dira melamo ya bogoši.