HESEKIELE 16

₁Morena a ntaele a re: ₂“Wena motho wa nama, bontšha Jerusalema tše di šišimišago tše e di dirilego. ₃Botša Jerusalema gore Morena, Mong wa bohle, o re go yona:

“ ‘O tšwa lefaseng la Kanana mo o tswaletšwego gona. Tatago e be e le Moamore, mmago e le Mohete. ₄Ge o seno belegwa ga go yo a ilego a go ripa kalana, goba a go hlapiša gore o hlweke, goba a go šidila ka letswai, goba a go phuthela ka mašela. ₅Ga go yo a ilego a go kwela bohloko a go direla se sengwenyana sa dilo tšeo ka go go šokela. Ge o seno belegwa batswadi ba gago ba ile ba go šišingwa, ba go lahla nageng.

₆“ ‘Ya re ge ke feta ka go bona o ragaraga ka gare ga madi a gago. O be o thankgetše madi, eupša ka se go lese o ehwa. ₇Ka go godiša bjalo ka semela sa lešoka. Wa gola wa tielela, wa ba wa fihla lehlapong. Wa thoka matswele, wa tšwa le matsa, fela o be o ponapona.

₈“ ‘Ya re ge ke feta gape ka bona o le yo a loketšego go nyalwa. Ka go apeša kobo ya ka ka ge o be o le fela, mme ka ikanela wena, ka itlemaganya le wena ka lenyalo, wa ba wa ka.’ ” O realo, Morena, Mong wa bohle.

₉“Ke moka ka tšea meetse ka go hlapiša, ka go tloša madi ale. Ka go tlotša ka makhura a mohlware. ₁₀Ka go apeša diaparo tša mebalabala, ka ba ka go rweša dieta tša letlalo le lebotse, le lešela le boletiana hlogong, le seaparo sa silika. ₁₁Ka go hlama ka dikgabišo, ka go apeša maseka matsogong, le dipheta molaleng. ₁₂Ka go rweša lengina la nko, le mangina a ditsebe, le kgare ye botse. ₁₃O be o kgabile ka dikgabišo tša gauta le tša silibera, le diaparo o be o apara tša lešela le boletiana le tša silika ya mebalabala, o eja dinkgwa tša bupi bja mathume, le todi, le makhura a mohlware. Wa ba yo mobotse kudu, wa go ka ba mohumagadi. ₁₄O ile wa tuma ditšhabeng tšohle ka botse bja gago bjo bo phethegilego, ka gobane ke nna yo ke bego ke go dirile gore o be yo mobotse ka mokgwa woo.” O realo, Morena, Mong wa bohle.

₁₅“Eupša wena o ile wa bota botse bja gago, setumo sa gago sa go fetola sefebe, wa ikgafela go robala le mang le mang yo a fetago. ₁₆Wa tšea tše dingwe diaparo tša gago tša mebalabala wa kgabiša dintotoma tšeo go tšona o khunamelago medimo ya diswantšho, wa itira sefebe moo. ₁₇Wa tšea dikgabišo tša silibera le tša gauta tše ke bego ke go file tšona, wa dira medimo ya diswantšho ye metona ka tšona, mme wa feba le tšona. ₁₈Wa tšea diaparo tšela tša gago tša mebalabala wa di apeša medimo yeo ya diswantšho, wa ba wa neela medimo yeo makhura a mohlware ao ke bego ke go file ona, le seorelo. ₁₉Ke go file dijo – bupi bja mathume, makhura a mohlware, le todi – eupša wena wa di neela medimo yeo ya diswantšho gore e natefelwe ke monkgo wo mobose wa tšona. Go bile bjalo.” O realo, Morena, Mong wa bohle.

₂₀“Wa ba wa tšea barwa le barwedi ba o bego o mpelegetše bona wa ba hlabela medimo yeo ya diswantšho gore e be dijo tša yona. Kgane bofebe e be e se bobe bjo bogolo, ₂₁ge o bile o direla medimo yeo ya diswantšho sehlabelo ka bana ba ka? ₂₂Ge o be o dira tšeo ka moka tša go šišimiša o itirile sefebe ga se wa ka wa gopola tša bjaneng bja gago – mola o ponapona, o ragaraga ka gare ga madi a gago.”

₂₃Morena, Mong wa bohle, o re: “O yo madimabe! O yo madimabe! O dirile tše mpe tšeo ka moka mme wa tla ₂₄wa ikgobelela dintotoma tša go feba le go khunamela medimo ya diswantšho mapatlelong ohle. ₂₅Mathomong a tsela ye nngwe le ye nngwe o ikgobeletše dintotoma, wa goboša botse bja gago, wa fetlela mofeti yo mongwe le yo mongwe dirope, wa feba le banna ba bantši. ₂₆Wa ba wa feba le Baegepeta, baagišani bale ba gago ba mapele a magolo, wa nthumola ka go atiša bofebe bja gago.

₂₇“Bjale ke emišitše letsogo gore ke go otle le gore ke go fokoletše naga. Ke go gafetše diatleng tša manaba a gago, Bafilista, ba ba bego ba lešwa dihlong ke bofebe bja gago, gore ba dire se ba se ratago ka wena.

₂₈“Ka ge o be o sešo wa kwelela go feba, o ile wa ipapatša go Baasiria. Wa feba nabo, eupša le bona wa se ba kwelele. ₂₉Wa ba wa feba le batho ba Babilonia, naga ya bagwebi, eupša le bona ba se go kgotsofatše.”

₃₀Morena, Mong wa bohle, o re: “Tšohle tše ge o be o di dira o be o di dira o tsogetšwe, o itshwere bjalo ka sefebe se se se nago dihlong. ₃₁Mathomong a tsela ye nngwe le ye nngwe o be o feba, o ikgobeletše dintotoma tša go khunamela medimo ya diswantšho mapatlelong ohle. Eupša wena tefo o be o se na taba nayo, o sa etše segwebakathobalo. ₃₂Mosadi wa seotswa towe! O reng o re o na le monna wa ratana le banna ba šele? ₃₃Etse sa segwebakathobalo ke go fiwa dimpho, eupša wena dimpho o be o di fa dinyatsi tša gago ka moka, o di goketša gore di tle di go robale di etšwa kgole le kgauswi. ₃₄Wena o segwebakathobalo sa mohuta wa sona. Ga go motho yo a go kaladitšego gore o be segwebakathobalo. Ga o lefše, ke wena o ba lefago. Owe, ga o swane le ba bangwe!”

₃₅Ka gona, wena Jerusalema, sefebe towe, ekwa se Morena a se bolelago:

₃₆Morena, Mong wa bohle, o re: “O ile wa ikapola diaparo wa pepentšha lepono, wa feba le dinyatsi tša gago, wa khunamela medingwana yohle ya gago ya go šišimiša, wa direla medingwana yeo dihlabelo ka bana ba gago. ₃₇Ka lebaka leo, ke tla kgoboketša dinyatsi tšela tša gago ka moka, tšela o bego o ipshina natšo, tšela o bego o di rata, le tšela o bego o di hloile. Ke tla ba tliša go wena ba etšwa kgole le kgauswi, ke moka ka go hlobodiša diaparo gore ba go bonele. ₃₈Ke tla go ahlola ka kahlolo ye e lebanego basadi ba diotswa le ba babolai, ka go otla ka lehu ke befetšwe ke bile ke hufega. ₃₉Ke tla go gafela diatleng tša bona, gomme ba tla thunthunya dintotoma tšeo o febago go tšona, gape o khunamelago medimo ya diswantšho. Ba tla go tšola diaparo, ba go amoga dikgabišo tša gago, mme ba go tlogela o ponapona.

₄₀“Ba tla hlohleletša lekoko gore le go otle; ba tla go bolaya ka maswika, ba ba ba go rathaganya ka ditšhoša tša bona. ₄₁Ba tla tšhuma dintlo tša gago, ba go otla o bonwa ke basadi ka bontši. Ke tla go lahliša bofebe, ka go lahliša le go lefa dinyatsi tša gago. ₄₂Ya ba gona kgalefo ya ka e felago, mme ka se sa tuka bogale. Nka se sa galefa goba ka hufega. ₄₃O lebetše ka mo ke ilego ka go swara ka gona mola o sa le yo mofsa, gomme o nkgalefišitše ka dilo tšohle tšela o bego o di dira. Ke ka lebaka leo ke tlago go otlela tše o di dirilego. A ke re o okeditše ditiro tšohle tša gago tše di šišimišago ka bofebe?” O realo, Morena, Mong wa bohle.

₄₄Morena o re: “Mang le mang yo a ratago dika, wena Jerusalema, o tla go hlaba ka se se rego: ‘Ngwana wa tadi o tsebja ka mereto.’ ₄₅Le wena o tloga o abetše mmago yo a šišingwago monna wa gagwe le bana. O swana le banabeno ba basadi ba ba šišingwago banna le bana ba bona. Mmagolena e be e le Mohete, tatagolena e le Moamore.

₄₆“Mogolwago ke Samaria ye e lego ka leboa, le metsana ya kgauswi ye e lego barwedi ba yona. Morathwago ke Sodoma ka borwa, le metsana ya kgauswi ye e lego barwedi ba yona. ₄₇Ga se wa ba ekiša fela go tše ba di dirago, le mekgweng ya bona ye e šišimišago o ba ekišitše; sebakanyana o ile wa ba yo mobe le go ba feta mo go tšohle tše o bego o di dira. Ka nakonyana fela o ile wa ikhwetša o dira tše mpe go feta bona.

₄₈“Nna, Morena, Mong wa bohle, ke re: Ke ikana ke le Modimo yo a phelago gore Sodoma, morathwago, le metsana ya kgauswi le yona ga se ya ka ya dira tše wena le metsana ya kgauswi le wena le di dirilego. ₄₉Sebe sa ngwaneno, Sodoma, le barwedi ba gagwe e bile makoko le bojagobe le go se šetše – ba be ba sa thuše badiidi le bahloki ka selo. ₅₀Ge ba ikgantšha, ba dira tše di šišimišago ke ile ka ba fediša, bjalo ka ge le wena o tseba gabotse.

₅₁“Samaria ga se ya dira dibe, le ge e le seripagare sa tše di dirilwego ke wena. Wena o dirile tše dintši tša go šišimiša go feta yona. Tšohle tša go šišimiša tše di dirilwego ke wena o di dirile mo banabeno, Samaria le Sodoma, ba ilego ba bonala nke ga ba na molato. ₅₂Bjale ge, inyatše ka ge o emelela banabeno. Ka ge dibe tša gago di šišimiša go feta tša bona, bona ba bonala ba lokile go phala wena. Ka gona, inyatše, o swabe, gobane o dirile nke banabeno ba lokile.”

₅₃Morena o re go Jerusalema: “Ke tla atla Sodoma le metsana ya kgauswi le yona gape, le Samaria le metsana ya kgauswi le yona; le wena ke tla go atla gape, ₅₄gore o inyatše gape o swabele tšohle tše o di dirilego, e be gona go homotša bana bao beno. ₅₅Banabeno, Samaria le Sodoma, gotee le metsana ya kgauswi le bona, ba tla iketla gape, le wena le metsana ya kgauswi le wena le tla iketla gape. ₅₆A ke re o be o phara Sodoma dika mehleng yela ya ge o ikgantšha, ₅₇le ya pele ga ge tše mpe tše o bego o di dira di utollwa? Bjale o swana nayo ge – o lehlapa la Baedomo, le la Bafilista, le la baagišani ba gago ba bangwe ba ba go nyatšago. ₅₈Yo a swanetšego go otlelwa bohlola le tše di šišimišago tše a di dirilego, ke wena.” O realo, Morena.

₅₉Morena, Mong wa bohle, o re: “Ke tla go swara ka mo o swanelago ka gona, ka gobane o nyaditše keno yela ya gago go nna, wa tlemologanya lenyalo la ka le wena. ₆₀Eupša ke tla gopola kgwerano ye ke e dirilego nago mola o sa le yo mofsa, gomme ke tla dira kgwerano le wena ya go ya go ile. ₆₁Ke mo o tlago elelwa ka mo o ilego wa dira ka gona, gomme wa inyatša ge ke tšea mogolwago le morathwago ke go fa bona e eba barwedi ba gago, le ge seo e se se nna le wena re dirilego kgwerano ka sona. ₆₂Ke tla tsošološa kgwerano ya ka le wena, gomme o tla tseba gore Morena ke nna. ₆₃E tla re ge ke go swarela diphošo tša gago tšohle, wa gopola mme wa inyatša, wa hlokišwa molomo ge o ipona kgobogo.” O realo, Morena, Mong wa bohle.