To The Word – Day 148

₁Lekoko le lengwe la Baarabia le be le ile la šwahlela naga ya Juda gomme la bolaya barwa ka moka ba Joramo ntle le Ahasia, morwa wa gagwe wa mafelelo. Ka gona batho ba Jerusalema ba bea Ahasia kgoši legatong la tatagwe. _2-3Ahasia e bile kgoši a na le mengwaga ye masome a mabedi a metšo ye mebedi, gomme a buša a le Jerusalema ngwaga o tee. Ahasia le yena a latela mohlala wa ba lapa la Kgoši Ahaba, ka gobane Athalia, mmagwe, morwedi wa Kgoši Ahaba le setlogolwana sa Kgoši Omri wa Israele, e be e le yena a mo eletšago go dira dilo tše mpe. ₄A dira dibe pele ga Morena bjalo ka ba lapa la Ahaba, ka gobane ka morago ga lehu la tatagwe ba bangwe ba bona e ile ya ba baeletši ba gagwe, gomme ba mo senyetša bogoši. ₅O ile a latela dikeletšo tša bona, a tšwa dira le Kgoši Joramo wa Israele, morwa wa Ahaba, go yo lwa le Kgoši Hasaele wa Siria. Madira a thulana Ramote kua Gileade, gomme Joramo a gobala moo ntweng. ₆A gomela motseng wa Jesriele gore a yo tšwa a fola dintho, mme Ahasia a mo etela moo.

₇Modimo a dira gore Ahasia a yo bona Joramo, ka gobane o be a ratile gore a yo bolawa. Ge Ahasia a sa le moo, yena le Joramo ba tšwa go yo gahlanetša Jehu, morwa wa Nimshi, yo Morena a bego a mo kgethile gore a feleletše ba lapa la Ahaba. ₈Ge Jehu a sa phetha kotlo ya Modimo ya lapa leo, o ile a gahlana le sehlopha sa baetapele ba Juda le barwa ba bomogolwaAhasia ba ba bego ba felegeditše Ahasia leetong leo. Jehu a ba bolaya. ₉Gwa nyakwa Ahasia, gomme a hwetšwa a utamile Samaria. A išwa go Jehu gomme a bolawa. Eupša go mmoloka gona ba mmoloka ka ge e be e le setlogolo sa Kgoši Joshafate, yo a bego a khunamela Morena ka pelo ya gagwe ka moka.

Go ile gwa se šale motho wa lapa la Ahasia yo e bego e ka ba kgoši.

₁₀Ya re ge Athalia, mmagoKgoši Ahasia, a ekwa gore morwagwe o bolailwe, a laela gore ba lapa la mošate wa Juda ba bolawe ka moka. ₁₁Ahasia o be a na le kgaetšedi ka malapa, Josheba, yo a bego a nyetšwe ke moprista yo a bitšwago Joyada. Ka sephiri Josheba a tšhabiša morwa yo mongwe wa Ahasia, Joase, a mo tloša go barwa ba bangwe bao ba bego ba tlile go bolawa, gomme a mo iša le mofepi ka phapošing ya go bolokela malao ka Tempeleng. Ka go fela a mo utile o ile a mo phološa diatleng tša Athalia. ₁₂Josheba le monna wa gagwe ba hlokomela mošemanyana yoo mengwaga ye e selelago ba mo utile ka Tempeleng ge go sa buša Mohumagadi Athalia.

₁Ge moprista Joyada a seno letela mengwaga ye e selelago, a beta pelo a loga maano. A kwana le balaodi ba ba latelago ba ba lekgolo: Asaria, morwa wa Jerohamo, Ishmaele, morwa wa Johanane, Asaria, morwa wa Obede, Maasea, morwa wa Adaya, le Elishafate, morwa wa Sikri. ₂Ba sepela le metse ya Juda ka moka, ba kgobokanya Balefi le mantona a dikgorwana, gomme ba boela nabo Jerusalema.

₃Ka moka ba bokana ka Tempeleng gomme moo ba dira kgwerano le Joase, morwa wa kgoši. Joyada a re go bona: “Šo morwa wa kgoši ye e hlokafetšego. Bjale e tla ba kgoši, bjalo ka ge Morena a boletše mabapi le ditlogolo tša Dafida. ₄Se le swanetšego go se dira sese: Ge baprista le Balefi ba tsena modirong ka letšatši la Sabatha, karolo ya boraro ya bona e lete masoro a dikgoro tša Tempele, ₅karolo ye nngwe ya boraro e lete ngwako wa kgoši, gomme ba ba šetšego ba bewe Lesorong la Motheo. Batho ka moka ba bokane ka kgorong ya Tempele. ₆Go se ke gwa ba le yo a tsenago ka Tempeleng ntle le baprista le Balefi ba ba lego modirong. Bona ba ka tsena ka gobane ba neetšwe Morena, fela batho ba bangwe ka moka ba phethe ditaelo tša Morena gomme ba be ka ntle. ₇Balefi ba dikologe kgoši ba mo lete ba swere dihlabano tša bona, gomme ba ye le yena gohle mo a yago gona. Yo mongwe yo a ka lekago go tsena ka Tempeleng a bolawe.”

₈Balefi le batho ba Juda ka moka ba phetha ditaelo tšohle tša Joyada. Joyada a se ke a lokolla banna bale go ya gae ge ba etšwa modirong ka Sabatha, ka gona balaodi bale ba tšea banna ba bona go ba ba tsenago modirong gotee le go ba ba tšwago. ₉Joyada a neela bahlankedi marumo le dikotse le dikotsana tšela e bego e le tša Kgoši Dafida mme di bolokilwe ka Tempeleng. ₁₀A bea banna ba ba swerego matsolo ba teile lenaka pele ga Tempele ba tietše aletare gare, gore ba šireletše kgoši. ₁₁Ke moka Joyada a eta Joase pele a mo ntšha ka Tempeleng, a mo rweša mphapahlogo, gomme a mo neela puku ya melao ye e laolago bogoši. Ya ba ge ba mmea kgoši. Moprista Joyada le barwa ba gagwe ba tlotša Joase, gomme ba goa ba re: “A kgoši a re phelele!”

₁₂Athalia a kwa mešito ya batho ba kitimela Tempeleng ba tiela kgoši mekgolokwane, ka gona le yena a itlhaganela a ya ntshe. ₁₃Fao a bona kgoši ye mpsha kgorong ya Tempele e eme ka thoko ga kokwane ya magoši e dikologilwe ke balaodi ba madira le baletši ba diphala. Setšhaba ka moka se be se thabile se letša diphala, gomme baopedi ba Tempeleng ba hlabelela ka diletšo tša bona. A gagola diaparo tša gagwe ka manyami, gomme a goa a re: “Ke go uša mmušo! Ke go uša mmušo!”

₁₄Joyada a se ke a rata gore Athalia a bolaelwe Tempeleng, ka gona a bitša balaodi ba madira gomme a re go bona: “Mo tlošeng a putle gare ga melokoloko ya baleti, gomme le bolayeng yo mongwe le yo mongwe yo a ka lekago go mo phološa.”

₁₅Ba mo swara, ba mo iša mošate, gomme ba mmolaela moo Lesorong la Dipere.

₁₆Moprista Joyada a dira kgwerano le Kgoši Joase le setšhaba gore yena le kgoši le setšhaba e tla ba setšhaba sa Morena. ₁₇Setšhaba ka moka sa ya tempeleng ya Baale gomme ba e kgereša. Ba phušola dialetare le medimo ya diswantšho moo, mme ba bolaela Mathane, moprista wa Baale, fao pele ga dialetare tšeo. ₁₈Joyada a bea baprista le Balefi gore ba hlokomele modiro wa Tempele. Ba be ba swanetše go phetha mediro ye ba e filwego ke Kgoši Dafida, le go tšhuma dihlabelo tše di direlwago Morena go ya ka melao ya Moshe. Le gona ba be ba hlokometše moopelo le menyanya ka taelo ya Dafida. ₁₉Joyada a bea baleti masorong a dikgoro tša Tempele gore go se ke gwa tsena motho yo a tšhilafetšego.

₂₀Balaodi ba madira, le baetapele ba setšhaba, le bahlankedi ba bagolo, le setšhaba ka moka ba dira molokoloko ba ya le Joyada go yo tšea kgoši Tempeleng ba mo tliša mošate. Ba tsena ka Lesoro la ka Tletlolo, gomme ba dudiša kgoši setulong sa bogoši. ₂₁Setšhaba ka moka se be se thabile, gomme bjale motse o fodile ka ge Athalia a be a bolailwe.

₁Joase e bile kgoši ya Juda a na le mengwaga ye e šupago, gomme a buša a le Jerusalema mengwaga ye masome a mane. Mmagwe e be e le Tsibia wa motse wa Beresheba. ₂Joase a dira tše di kgahlago Morena ge moprista Joyada a sa phela. ₃Joyada a mo nyalela basadi ba babedi, gomme bona ba mmelegela barwa le barwedi.

₄Ka morago Joase a tlelwa ke mogopolo wa go lokiša Tempele. ₅A bokanya baprista le Balefi gomme a ba laela gore ba ye metseng ya Juda ba kgobokanye tšhelete go Baisraele ka moka gore go tle go lokišwe Tempele ngwaga ka ngwaga. A ba botša gore ba itlhaganele, eupša Balefi ba diega; ₆ka gona a bitša Joyada, moetapele wa bona, a mmotšiša a re: “Ke ka lebaka lang o se wa hlokomela gore Balefi ba ntšhiše batho ba Juda le ba Jerusalema lekgetho le Moshe, mohlanka wa Morena, a le nyakilego go Baisraele go hlokomela Tente ya bodulo bja Morena?”

₇Balatedi ba Athalia, mosadi yola yo mobe, ba be ba sentše Tempele ba bile ba šomišitše dilo tše kgethwa tirelong ya Baale.

₈Kgoši a laela Balefi gore ba betle polokelo ya lekgetho mme ba e bee lesorong la Tempele. ₉Ba roma batseta gohle motseng wa Jerusalema le nageng ya Juda gore yo mongwe le yo mongwe a tliše lekgetho go Morena lela Moshe, mohlanka wa Morena, a bego a le beetše setšhaba kua lešokeng. ₁₀Taba yeo ya kgahla batho le baetapele ba bona, gomme ba tliša makgetho a bona go fihlela ba felelela. ₁₁Letšatši le lengwe le le lengwe Balefi ba be ba tšea polokelo ba e iša go baleti ba mošate ba ba bego ba e hlokometše. Nako ye nngwe le ye nngwe ge e na le tšhelete ye ntši, mongwaledi wa mošate le moemedi wa Moprista yo Mogolo ba be ba ntšha tšhelete yeo gomme ba boetše polokelo madulong a yona. Ka tsela yeo ba kgobokanya tšhelete ye ntši.

₁₂Kgoši le Joyada ba be ba tšea tšhelete yeo ba e neela bao ba bego ba hlokometše go lokiša Tempele, gomme bona ba thwala babetli le babetli ba maswika, le batho ba go šoma ka tshipi le ka mphiri gore ba lokiše Tempele. ₁₃Bašomi ba šoma ka maatla, ba tšwela pele gabotse gomme ba boetša Tempele seemong sa yona. Ka tsela yeo ya tia go swana le pele. ₁₄Ge ba feditše go lokiša Tempele, gauta le silibera ye e šetšego e ile ya fiwa kgoši le Joyada, bona ba dira meruswi le dibjana tša tirelo le tša dihlabelo ka gauta le silibera yeo.

Ge Joyada a sa phela, dihlabelo di be di dirwa ka mehla Tempeleng. ₁₅Ge a tšofetše kudu, a na le mengwaga ye lekgolo le masome a mararo, a hlokafala. ₁₆Ba mmoloka mabitleng a mošate motseng wa Dafida, ka go leboga mediro ye a e diretšego setšhaba sa Israele le Modimo le Tempele.

₁₇Eupša ge Joyada a seno hlokafala, baetapele ba Juda ba tla ba loba Kgoši Joase mme ba mo aroša, a theetša bona. ₁₈Ka gona batho ba se hlwe ba khunamela Morena, Modimo wa borakgolokhukhu ba bona, ka Tempeleng, gomme ba thoma go khunamela dikota tša borapedi le medimo ya diswantšho. Molato woo wa bona wa dira gore Morena a tukele naga ya Juda le motse wa Jerusalema bogale. ₁₉Morena a roma baprofeta gore ba ba kgale ba boele go yena, eupša batho ba gana go theetša. ₂₀Ke moo moya wa Morena o ilego wa aparela Sakaria, morwa wa moprista Joyada. A ema moo batho ba bego ba kgona go mmona, a goa a re: “Morena Modimo o botšiša gore ke ka lebaka lang le tshetše ditaelo tša gagwe. O re le ka se ke la atlega! Le mo hlanogetše, ka gona le yena o le hlanogetše!” ₂₁Batho ba mo lakana gomme ba mmolaya ka maswika kgorong ya Tempele ba laetšwe ke kgoši. ₂₂Kgoši o be a itebaditše potego yela tatagoSakaria, Joyada, a bego a mo hlankela ka yona, ka fao a laela gore Sakaria a bolawe. Ge Sakaria a ehwa, a goa a re: “A Morena a bone seo se dirwago gomme a lefeletše!”

₂₃Ge seruthwane sa ngwaga woo se fihla, madira a Siria a hlasela Juda le Jerusalema, ba bolaya baetapele bohle, gomme ba romela tše ba di thopilego ka moka go kgoši ya bona kua Damaskose. ₂₄Madira ao a Siria e be e se a mantši, eupša Morena a dira gore ba fenye madira a mantši a Juda ka gobane setšhaba seo se be se hlanogetše yena Morena, Modimo wa borakgolokhukhu ba sona. Ka tsela yeo Kgoši Joase a otlwa. ₂₅O ile a gobatšwa o šoro, gomme ge manaba a boela morago, bahlankedi ba gagwe ba babedi ba mo logela maanomabe mme ba mmolaya malaong a gagwe go lefeletša go bolawa ga morwa wa moprista Joyada. A bolokwa motseng wa Dafida, eupša e sego mabitleng a mošate. ₂₆Bao ba ilego ba mo logela maanomabe e be e le Sabade, morwa wa mosadi wa Moamone yo leina la gagwe e bego e le Shimate, le Josabade, morwa wa mosadi wa Momoaba yo leina la gagwe e bego e le Shomere. ₂₇Tlhathollo ya Puku ya Dikgoši e na le ditaba tša barwa ba Joase, le diprofeto tše ntši tše a ilego a kgalengwa ka tšona, le ditaba tša ka moo a ilego a tsošološa Tempele. Amatsia, morwa wa gagwe, a mo hlatlama bogošing.

₁Amatsia e bile kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema. ₂O be a dira tše di kgahlago Morena, eupša a sa di dire ka pelo ya gagwe ka moka. ₃Ge a seno tielela bogošing, o ile a bolaya bahlankedi bale ba go bolaya tatagwe. ₄Eupša a se ke a bolaya bana ba bona, fela a phetha se Morena a se laetšego setšhaba melaong ya Moshe a re: “Batswadi ba se ke ba bolaelwa melato ya bana ba bona, bana le bona ba se ke ba bolaelwa melato ya batswadi ba bona; motho a bolaelwe fela molato wo o obilwego ke yena mong.”

₅Kgoši Amatsia a kgobokanya banna ka moka ba kgoro ya Juda le ya Benjamene, a ba bea ka dihlophanahlophana tša madira go ya ka dikgorwana tša bona, gomme a ba beela balaodi ba bahlabani ba ba dikete le ba ba makgolo. O be a kgobokantše banna ka moka ba mengwaga ye masome a mabedi le go feta fao. Ka moka ya ba ba dikete tše makgolo a mararo. E be e le bahlabani ba ba kgethilwego, ba itokišeditše ntwa, ba rutilwe go lwa ka marumo le dikotse. ₆Go ba oketša a thwala bahlabani ba dikete tše lekgolo ba Israele, a ba lefa ka silibera ya dikilokramo tše dikete tše tharo. ₇Eupša moprofeta yo mongwe a ya go yena a re: “O se ke wa tšea bahlabani ba ba Israele. Morena ga a eme le banna ba ba Mmušo wa ka Leboa le bona Baefraime ba. ₈Mohlomongwe o gopola gore ba tla go tiiša ntweng, eupša ke Modimo yo a nago le maatla a go dira gore motho a fenye goba a fenywe, gomme o tla dira gore manaba a gago a go fenye.”

₉Amatsia a botšiša moprofeta a re: “Bjale silibera yela ke šetšego ke ba lefile yona?”

Moprofeta a mo fetola a re: “Morena a ka go bušetša ya go feta yeo!” ₁₀Ka gona Amatsia a hlaola madira ale a go a thwala, gomme a a botša gore a boele ga gaboona. Ba boela morago ba tuketše batho ba Juda bogale.

₁₁Amatsia a itiiša maatla gomme a eta madira a gagwe pele ba ya Moeding wa Letswai. Fao ba lwa gomme ba bolaya bahlabani ba Baedomo ba dikete tše lesome, ₁₂ba ba ba thopa ba bangwe ba dikete tše lesome. Ba iša mathopša godimo ga legaga motseng wa Sela, gomme ba ba kgoromeletša fase ba pšhatlaganywa ke maswika.

₁₃Bahlabani bale ba Israele, bale Amatsia a go se ba dumelele go ya ntweng le yena, bona ba ile ba hlasela metse ya Juda gare ga Samaria le Bethe-Horone, ba bolaya banna ba dikete tše tharo, ba thopa le thoto ye ntši.

₁₄Ge Amatsia a fentše Baedomo o ile a boa le medimo ya bona ya diswantšho, a e ipeela yona, a e tšhumela le diorelo. ₁₅Taba yeo ya galefiša Morena, ka gona a roma moprofeta go Amatsia gore a mmotšiše a re: “Ke ka lebaka lang o khunamela medimo e šele ye e paletšwego le ke go phološa batho ba yona diatleng tša gago?”

₁₆Amatsia a mo tsena ganong a re: “Kgane re go beile moeletši wa kgoši? Homola, go sego bjalo o tla bolawa!”

Moprofeta yola pele ga ge a homola a re: “Bjale ke a tseba gore Modimo o rerile go go feleletša, ka ge o dirile taba ya mohuta wo mme wa hlokomologa keletšo ya ka.”

₁₇Kgoši Amatsia wa Juda le baeletši ba gagwe ba kwana gore ba hlasele Israele. Ka gona a roma batseta go Kgoši Joase wa Israele yo e bego e le morwa wa Joahase le setlogolo sa Jehu, a mo hlohla a re: “Tlaa re lwe!” ₁₈Joase a fetola Amatsia ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘A morwa wa ka a nyale morwedi wa gago.’ Gwa tla phoofolo ya naga gomme ya gatakanya mošwana wola. ₁₉Bjale Amatsia, o ikgogomoša ka go re o fentše Baedomo, ka gona o na le makoko. Eupša nna ke re itulele moo lapeng la gago. Ke ka lebaka lang o tsoša mpherefere wo o tlago tlišetša wena le batho ba gago mahlomola?”

₂₀Fela Amatsia a di tšeiša phefo. E be e le thato ya Morena gore Amatsia a fenywe, ka gobane yena le ba lapa la gagwe ba be ba khunamela medimo ya diswantšho ya Baedomo. ₂₁Ka gona Kgoši Joase wa Israele a tšwa dira a yo lwa le Kgoši Amatsia wa Juda. Ba gahlana kua Bethe-Shemeshe nageng ya Juda, ₂₂madira a Juda a fenywa, gomme yo mongwe le yo mongwe a tšhabela ga gagwe. ₂₃Joase a thopa Amatsia gomme a mo iša Jerusalema. Moo a kgereša morako wa motse go tloga Lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi. ₂₄A boela Samaria le gauta ka moka le silibera ya ka Tempeleng, le ditlabakelo ka moka tša ka Tempeleng tše di bego di hlokomelwa ke ditlogolo tša Obede-Edomo, le mahumo a mošate. A thopa le batho.

₂₅Kgoši Amatsia wa Juda a phela mengwaga ye lesome le ye mehlano ka morago ga ge Kgoši Joase wa Israele a hwile. ₂₆Tše dingwe tše Amatsia a di dirilego, go tloga mathomong go iša mafelelong a pušo ya gagwe, di ngwadilwe mo go Ditaba tša magoši a Juda le a Israele. ₂₇Go tloga ka yona nako yela Amatsia a hlanogetšego Morena o ile a dula a logetšwe maanomabe Jerusalema. Mafelelong a tšhabela motseng wa Lakishe, eupša manaba a gagwe a mo latelela moo gomme a mmolaya. ₂₈Setopo sa gagwe sa išwa Jerusalema ka koloi ya dipere, gomme sa bolokwa mabitleng a botatagwe motseng wa Dafida.

₁Setšhaba ka moka sa Juda sa kgetha Usia, morwa wa Amatsia, wa mengwaga ye lesome le ye e selelago, gore a hlatlame tatagwe bogošing. ₂Ke ka morago ga lehu la Amatsia moo Usia a thopilego Elate gape, gomme a tsošološa motse woo.

₃Usia ya ba kgoši a na le mengwaga ye lesome le metšo ye e selelago, gomme a buša a le Jerusalema mengwaga ye masome a mahlano a metšo ye mebedi. Mmagwe e be e le Jekolia wa Jerusalema. ₄A dira tše di kgahlago Morena, a swana le tatagwe. ₅Ge Sakaria, motho yo a bego a mo ruta go hlompha Modimo, a sa phela, o be a khunamela Morena ka potego, gomme Modimo a mo atla.

₆Usia a yo lwa le Bafilista. A kgereša morako wa motse wa Gathe le wa Jamnia le wa Ashdode, gomme a aga metse ye mengwe kgauswi le Ashdode le nageng yohle ya Filistia. ₇Modimo a mo thuša gore a fenye Bafilista, le Baarabia ba ba dulago Guru-Baale, le Bameune. ₈Baamone ba loba Usia, gomme a ba le maatla kudu, setumo sa gagwe sa ba sa fihla Egepeta.

₉Usia a aga tora ya go tia Jerusalema Lesorong la Sekhutlong le Lesorong la Moeding le moo morako o bego o mena legopo. ₁₀A ba a aga le ditora tša tlhapetšo kua melaleng, a epa le didiba tše ntši ka gobane o be a na le mehlape ye mentši nagengtlase le kua melaleng. Ka ge a be a rata temo o be a na le balemi le bašomi ba dirapa tša merara kua nageng ya dithaba le kua nageng ye e nonnego.

₁₁O be a na le madira ao a bego a dula a itokišeditše ntwa. A be a badilwe mme a arogantšwe ka dihlophanahlophana ke Jeiele, mongwaledi, le Maasea, mohlankedi, ba hlokometšwe ke Hanania, yo mongwe wa bahlankedi ba bagolo ba kgoši. ₁₂Madira a be a laolwa ke mantona a dikgorwana a dikete tše pedi le makgolo a a selelago. ₁₃Mantona ao a be a laola bahlabani ba dikete tše makgolo a mararo le tše di šupago le makgolo a mahlano bao ba bego ba kgona go lwela kgoši ka bogale. ₁₄Usia a fa madira dikotse, marumo, dikefa tša tshipi, diaparo tša boitšhireletšo, mara le mesebe, le maswika a diragamabje. ₁₅Motseng wa Jerusalema ditsebi tša gagwe tša dira dilo tša go thunya metsi le tša go kgokološa maswika a magolo ditoreng le dikhutlong tša morako wa motse. Setumo sa gagwe sa aparela gohle, gomme a ba le maatla kudu ka gobane Modimo o be a mo thuša.

₁₆Eupša ge Kgoši Usia a eba le maatla o ile a thoma go ikgogomoša, gomme taba yeo ya mo senyetša bogoši. A nyatša Morena Modimo wa gagwe ka go tsena ka Tempeleng go tšhuma seorelo aletareng ya diorelo. ₁₇Moprista Asaria a mo latela a na le baprista ba masome a seswai ba sebete ₁₈go yo mo thibela. Ba re: “Usia, ga se wena o ka tšhumelago Morena seorelo, gobane beng ba modiro wo ke baprista, ditlogolo tša Arone. Tloga fa felong mo gokgethwa. O nyaditše Morena Modimo, gomme ga a sa tlo go godiša.”

₁₉Usia o be a eme ka moo Tempeleng ka thoko ga aletare ya diorelo a swere setšhumeladiorelo. Ya re a sa galefetše baprista bjalo, a tšwa dišo phatleng tša bolwetši bja letlalo bja go mo tšhilafatša baprista ba lebeletše. ₂₀Asaria le baprista bale ba bangwe ba re go bona bolwetši bjoo phatleng ya kgoši ba tšhoga, gomme ba mo raka ka Tempeleng. Le yena a tšwa ka pela, ka gobane Morena o be a mo otlile.

₂₁Bolwetši bjoo bja swara Kgoši Usia bophelong bja gagwe ka moka gomme a tšhilafala go fihlela a ehwa. O be a phela ka ngwakong wa thokwana, a sa dumelelwe go tsena ka Tempeleng, gomme ka mošate go laola Jotamo, morwa wa gagwe, e le yena a bušago naga.

₂₂Moprofeta Jesaya, morwa wa Amotse, o ile a ngwala dilo ka moka tše Kgoši Usia a ilego a di dira nakong ya pušo ya gagwe. ₂₃Usia a ithobalela le botatagwe gomme a bolokwa mabitleng a mošate. Fela ka lebaka la bolwetši bjola bja gagwe a se ke a bolokwa karolong ya dikgoši. Jotamo, morwa wa gagwe, a mo hlatlama bogošing.