To The Word – Day 149

₁Jotamo e ile ya ba kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye lesome le ye e selelago. Mmagwe e be e le Jerusha, morwedi wa Tsadoko. ₂A dira tše di kgahlago Morena, go no swana le Usia, tatagwe. Fela yena a se ke a dira sebe sela sa tatagwe sa go tšhuma seorelo ka Tempeleng. Eupša setšhaba sona sa fela se tšwela pele le go dira dibe.

₃E bile Jotamo yo a ilego a aga Lesoro la ka Tletlolo la Tempele, gomme a dira modiro wo mogolo karolong ya Jerusalema ye e bitšwago Ofele. ₄Dithabeng tša Juda o ile a aga metse, gomme ka dithokgweng a aga dibo le ditora. ₅A lwa le kgoši ya Amone le madira a yona gomme a a fenya. A laela Baamone gore ba mo lobe mengwaga ye meraro ka silibera ya dikilokramo tše dikete tše tharo, le mabele a dikilokramo tše milione, le garase ye kaalo. ₆Jotamo a ba le maatla ka gobane o be a theeletša Morena Modimo wa gagwe ka potego. ₇Ditiragalo tše dingwe tša pušo ya Jotamo, le dintwa tše a di lwelego le dilo tše a di dirilego, ka moka di ngwadilwe mo go Ditaba tša magoši a Israele le a Juda. ₈Jotamo e bile kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye lesome le ye e selelago. ₉O ile a ithobalela le botatagwe gomme a bolokwa motseng wa Dafida, mme Ahase, morwa wa gagwe, a mo hlatlama bogošing.

₁Ahase e ile ya ba kgoši a na le mengwaga ye masome a mabedi, gomme a buša a le Jerusalema mengwaga ye lesome le ye e selelago. O be a sa dire tše di kgahlago Morena, a sa swane le Kgoši Dafida, rakgolwagwe, ₂eupša a latela mohlala wa magoši a Israele. A dira diswantšhobopša tša tshipi tša Baale, ₃a tšhuma seorelo moeding wa Bene-Hinomo. A ba a direla medimo ya diswantšho dihlabelo ka barwa ba gagwe, a etša ditlwaedi tša makgapa tša ditšhaba tšela Morena a di rakilego nageng ge Baisraele ba goroga. ₄Ahase a fela a dira dihlabelo, a tšhuma le seorelo dintotomeng tšeo go tšona go bego go khunamelwa medimo ya diswantšho, le ka fase ga mehlare ka moka ya merithi ye megolo.

_5-6Ka gobane Kgoši Ahase o be a dira dibe, Morena Modimo wa gagwe o ile a mo gafela diatleng tša kgoši ya Siria, gomme ya mo fenya, ya thopa Bajuda ba bantši ya ba iša Damaskose. Morena a ba a dira gore Pekage, kgoši ya Israele, morwa wa Remalia, a fenye Ahase mme a bolaye bahlabani ba bogale ba Juda ba dikete tše lekgolo le tše masome a mabedi ka letšatši le tee. Morena, Modimo wa borakgolokhukhu ba bona, a dira gore taba yeo e hlagele batho ba Juda ka gobane ba be ba mo furaletše. ₇Mogale yo mongwe wa Moisraele yo leina la gagwe e bego e le Sikri a bolaya Maasea, morwa wa Ahase, le Asrikamo, mohlokomedi wa ka mošate, le Elkana, yo a bego a latela kgoši ka maemo. ₈Madira a Baisraele a ile a thopa basadi le bana ba dikete tše makgolo a mabedi le ge Bajuda e be e le batho ba gabobona, gomme ba ba iša Samaria gotee le thoto ye ntši.

₉Monna yo mongwe yo a bitšwago Odede, moprofeta wa Morena, o be a dula motseng wa Samaria. Yena a gahlanetša madira ale a Baisraele ge a batametše go tsena motseng, gomme a re: “Morena, Modimo wa borakgolokhukhu ba lena, o be a befeletšwe batho ba Juda gomme a ba gafela diatleng tša lena, fela bjale o kwele ka moo le ba bolailego ka sehlogo ka gona. ₁₀Bjale le sa ikemišeditše go dira banna le basadi ba Jerusalema le ba Juda makgoba a lena. Ga ke re le lena le oba melato pele ga Morena Modimo wa lena? ₁₁Ntheetšeng! Mathopša a ke bana ba bolena. A ba sepele, go sego bjalo Morena o tla le galefela gomme a le otla.”

₁₂Baetapele ba bane ba Mmušo wa ka Leboa, e lego Asaria, morwa wa Johanane, Berekia, morwa wa Meshilemote, Jehiskia, morwa wa Shalume, le Amasa, morwa wa Hadelai, le bona ba se kwane le se madira a se dirago. ₁₃Ba re: “Le se ke la tliša mathopša ao mo! Re šetše re obile molato wo mogolo pele ga Morena, gomme ra mmefediša. Bjale le nyaka go godiša sebe le molato wa rena.” ₁₄Ka gona madira a neela batho le baetapele ba bona mathopša ale le thoto, ₁₅gomme banna bale ba bane ba bewa gore ba fe mathopša a a sego a apara selo diaparo tša go tšwa thotong yela e thopilwego. Ba fa le mathopša ka moka diaparo le dieta, ba ba fa le dijo le dino, gomme ba ba tlotša ka makhura a mohlware mo ba kwelego bohloko. Ba ba bego ba lapile kudu ba ile ba nametšwa dipokolo, gomme mathopša ka moka a boetšwa Jeriko, motseng wa mehlare ya mepalema, go magagabobona. Ka morago Baisraele ba boela Samaria.

_16-17Baedomo ba šwahlela naga ya Juda gape gomme ba thopa batho. Ka gona Kgoši Ahase a kgopela kgoši ya Asiria gore e mo thuše. ₁₈Ka nako yeo Bafilista ba be ba šwahlela metse ya nagengtlase le ya ka borwa bja Juda. Ba thopa motse wa Bethe-Shemeshe, wa Ayalone, wa Gederote, wa Soko, wa Timna, wa Gimso, le metsana ye e bego e bapile le yona, gomme ba dula go yona. ₁₉Ka gobane Kgoši Ahase wa Juda o be a lesitše setšhaba sa gagwe se itirela tše se di ratago ka ge a be a sa botegele Morena, Morena o ile a dira gore Bajuda ba fenywe. ₂₀Bakeng sa go tlo thuša Ahase, Kgoši Tiglate-Pilesere wa Asiria a tla a mo hlasela gomme a mo tlišetša mathata. ₂₁Ka gona Ahase a tšea dilo tše bohlokwa tša Tempele le tša mošate, le tša malapa a baetapele ba setšhaba, a loba kgoši yeo ka tšona, fela le seo sa se ke sa thuša selo.

₂₂Le ka yona nako yeo ya ge Ahase a pitlagantšwe ke mathata, o ile a no tšwela pele le go se botegele Morena. ₂₃A direla medimo ya Basiria ba ba bego ba mo fentše dihlabelo. A re: “Medimo ya Siria e thušitše magoši a Siria, ka gona ge nka e direla dihlabelo, le nna e ka nthuša.” Taba yeo ya uša yena le setšhaba sa gagwe. ₂₄A kgobokanya le ditlabakelo tša Tempele a di pšhatlaganya. A tswalela Tempele gomme a aga dialetare sekhutlong se sengwe le se sengwe sa mekgotha ya Jerusalema. ₂₅Motseng wo mongwe le wo mongwe wa Juda a kgobela dintotoma tšeo go tšona go bego go khunamelwa medimo ya diswantšho, moo diorelo di bego di swanetše go tšhumelwa medimo yeo. Ka go dira bjalo a befediša Morena, Modimo wa borakgolokhukhu ba gagwe.

₂₆Ditiragalo tše dingwe tša pušo ya gagwe le dilo ka moka tše a di dirilego, go tloga mathomong a pušo ya gagwe go iša mafelelong, di ngwadilwe mo go Ditaba tša magoši a Juda le a Israele. ₂₇Kgoši Ahase a ithobalela le botatagwe gomme a bolokwa Jerusalema, eupša e sego mabitleng a mošate. Morwa wa gagwe, Hiskia, a mo hlatlama bogošing.

₁Hiskia e bile kgoši ya Juda a na le mengwaga ye masome a mabedi a metšo ye mehlano, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Abia, morwedi wa Sakaria. ₂O be a dira tše di kgahlago Morena, a etša Kgoši Dafida, rakgolwagwe.

₃Hiskia o ile a bula mejako ya Tempele gape kgweding ya mathomo ya ngwaga wo e bilego kgoši ka wona, gomme a laela gore Tempele e lokišwe. ₄A kgobokanya baprista le Balefi ka kgorong ya ka bohlabela ya Tempele, ₅gomme a bolela le bona moo a re: “Ntheetšeng, lena Balefi! Ineeleng go Morena, gomme le hlwekišeng Tempele ya Morena, Modimo wa borakgolokhukhu ba lena. Tše di tšhilafatšago Tempele le di ntšhetšeng ntle. ₆Borakgolokhukhu ba rena ba be ba sa botegele Morena Modimo wa rena, ba dira tše di sa mo kgahlego. Ba be ba mo tlogetše gomme ba fularetše lefelo le a dulago ka go lona. ₇Ba tswaletše mejako ya Tempele, ba tima mabone, gomme ba se ke ba tšhuma seorelo goba ba dira dihlabelo tša go tšhungwa ka moka ka Tempeleng ya Morena Modimo wa Israele. ₈Ka lebaka la taba yeo Morena a galefela batho ba Juda le ba Jerusalema, gomme se a ba dirilego sona sa tšhoša batho, sa ba gakgamatša, sa ba sa dira gore ba ba kwere. Taba yeo le e bona gabotse. ₉Ke ka lebaka leo botatagorena ba bolailwego ntweng, gomme barwa le barwedi le basadi ba rena ba thopša.

₁₀“Bjale ke ikemišeditše go dira kgwerano le Morena Modimo wa Israele, gore a se ke a hlwa a re galefetše. ₁₁Bana ba ka, le se ke la hlwa le senya sebaka. Ke lena ba Morena a le kgethilego gore le mo hlankele ka Tempeleng, le mo tšhumele seorelo ka moo, le be le hlahleng batho ge ba tlile go mo khunamela.”

_12-14Balefi ba ba latelago ba be ba le moo:

₁₅Banna bao ba kgobokanya Balefi ba gabobona, gomme ka moka ga bona ba itlhwekiša. Ke moka ba thoma go hlwekiša Tempele, bjalo ka ge kgoši, yo a bego a dira ka moo Morena a bego a laetše ka gona, a be a ba boditše. ₁₆Baprista ba tsena ka Tempeleng gore ba e hlwekiše, gomme tšohle tše di bego di tšhilafetše ba di ntšhetša ka kgorong ya Tempele. Go tloga moo Balefi ba di ntšha motseng ba di iša moeding wa Kidrone.

₁₇Modiro woo o be o thomilwe ka letšatši la pele la kgwedi ya mathomo, gomme ka letšatši la seswai ba be ba feditše modiro ka moka gotee le phapoši ya matsenong a Tempeleng. Ka morago ba šoma matšatši a mangwe a seswai go fihlela ka la lesome le metšo ye e selelago la kgwedi, ba beakanyetša Tempele tirelo.

₁₈Balefi ba begela Kgoši Hiskia ba re: “Re feditše go hlwekiša Tempele yohle, gotee le aletare ya dihlabelo tša go tšhungwa ka moka, le tafola ya dinkgwa tše kgethwa, le ditlabakelo tša tšona ka moka. ₁₉Le gona ditlabakelo ka moka tše Kgoši Ahase a di tšhilafaditšego mengwageng yela a buša a sa botegele Modimo, re di boeditše sekeng sa tšona gomme re di kgethwafaditše gape.”

₂₀Ka le le latelago Kgoši Hiskia a tsoga e sa le bošego a kgobokanya baetapele ba motse, ba ya le yena Tempeleng. ₂₁Ba tšea dipoo tše di šupago, dikgapa tše di šupago, dikwanyana tše di šupago le diphooko tše di šupago go dira sehlabelo sa go tloša dibe tša ba lapa la mošate le tša batho ba Juda, le go hlwekiša Tempele ka tšona. Kgoši a botša baprista, ditlogolo tša Arone, gore ba dire dihlabelo ka diruiwa tšeo aletareng. ₂₂Gwa hlabja dipoo tšeo pele, gwa latela dikgapa, gwa latela dikwanyana, mme baprista ba ageletša madi ba a foka aletareng. ₂₃Mafelelong ba iša diphooko tšela go kgoši le go barapedi ba bangwe, gomme ka moka ba bea diatla godimo ga tšona. ₂₄Ka morago baprista ba di hlaba, gomme ba tšhollela madi a tšona aletareng ya ba sehlabelo sa go boelanya setšhaba ka moka le Modimo, ka gobane kgoši o be a laetše gore setšhaba sa Israele ka moka se direlwe sehlabelo sa go tloša dibe le sa go tšhungwa ka moka.

₂₅Kgoši a bea Balefi ka Tempeleng ba swere masenkana, diharepa le dikgapa go ya ka moo Morena a bego a laetše Kgoši Dafida ka Gade, moprofeta wa kgoši, le ka moprofeta Nathane. ₂₆Diletšo tše ke tšela Kgoši Dafida a bego a laetše gore di šomišwe. Baprista le bona ba be ba eme fao ba swere diphala. ₂₇Hiskia a laela gore go dirwe dihlabelo tša go tšhungwa ka moka, gomme ge dihlabelo tšeo di thoma go dirwa, batho ba tumiša Morena ka kopelo, mme baletši ba thoma go letša diphala le diletšo tše dingwe. ₂₈Yo mongwe le yo mongwe yo a bego a le moo a obama, gomme gwa opelwa gwa letšwa le diphala go fihlela dihlabelo ka moka di tšhumilwe. ₂₉Ke moka Kgoši Hiskia le bohle ba ba bego ba na le yena ba khunama ba obamela Modimo. ₃₀Kgoši le baetapele ba botša Balefi gore ba tumiše Morena ka dikopelo tša Dafida le tša moprofeta Asafo. Ka gona ka moka ba opela ka lethabo ge ba khunamile ba obametše Modimo.

₃₁Hiskia a botša batho a re: “Bjale ka gobane le ineetše Morena, tlišang dihlabelo e be tša go mo leboga.” Ba di tliša, gomme ba bangwe ba bona ba ithaopa ba tliša diruiwa gore e be dihlabelo tša go tšhungwa ka moka. ₃₂Ba tliša dikgomo tše masome a a šupago, dikgapa tše lekgolo, le dikwanyana tše makgolo a mabedi gore ba direle Morena dihlabelo tša go tšhungwa ka moka ka tšona. ₃₃Ba tliša le dikgomo tše makgolo a a selelago le dihuswane tše dikete tše tharo ya ba dihlabelo tše kgethwa. ₃₄Ka ge go be go se baprista ba ba lekanego go hlaba diruiwa tšeo ka moka, Balefi ba ile ba ba thuša go fihlela modiro ka moka o phethilwe, le baprista ka moka ba itlhwekišitše. Balefi ba be ba phala baprista ka go botegela go itlhwekiša. ₃₅Go tlaleletša dihlabelo tšeo tše ntši tša go tšhungwa ka moka tše baprista ba bego ba swanetše go di dira, ba be ba swanetše go tšhuma makhura a dihlabelo tša kagišano, le go tliša dikabelo tša seno tše di bego di abiwa le dihlabelo tša go tšhungwa ka moka.

Ka mokgwa woo tirelo ya Tempeleng ya thongwa gape. ₃₆Kgoši Hiskia le setšhaba ka moka ba be ba thabetše ge Modimo a be a ba beakanyeditše dilo tšeo, ka gobane taba yeo e be e diregile ka bjako.

_1-3Setšhaba se be se sa kgone go keteka Monyanya wa Paseka ka nako ye e beilwego ya kgwedi ya mathomo, ka gobane baprista ba ba bego ba itlhwekišitše ba be ba se ba lekana, le gona setšhaba se be se se sa kgobokana Jerusalema. Ka gona Kgoši Hiskia le bahlankedi ba gagwe le batho ka moka ba Jerusalema ba kwana gore ba keteke monyanya woo kgweding ya bobedi, gomme kgoši a roma batseta go batho ka moka ba Israele le ba Juda. A ba a ngwalela le kgoro ya Efraime le ya Manase mangwalo, a ba laletša gore ba tle Tempeleng Jerusalema go tlo keteka Paseka go hlompha Morena Modimo wa Israele. ₄Taba yeo ya kgahla kgoši le batho bohle ba Jerusalema, ₅ka gona ba laletša Baisraele ka moka, go tloga Dane go ba go yo fihla Beresheba, gore ba tle ba kgobokane Jerusalema gomme ba keteke Paseka go ya ka melao ya Moshe, ka gobane mehleng yeo setšhaba se be se sa keteke Paseka mmogo. ₆Dikitimi tša iša mangwalo nageng ka moka ya Juda le ya Israele di laetšwe ke kgoši le bahlankedi ba yona, a a rego:

“Lena setšhaba sa Israele, le phologile diatleng tša Basiria. Bjale retologelang go Morena, Modimo wa Abrahama le Isaka le Jakobo, gomme le yena o tla retologela go lena. ₇Le se ke la swana le borakgolokhukhu ba lena le Baisraele ba gabolena bao ba bego ba sa botegele Morena Modimo wa bona. O ile a ba otla o šoro bjalo ka ge le bona. ₈Le se ke la ba le melala ye methata bjalo ka bona, eupša le theetšeng Morena. Tlaang Tempeleng Jerusalema, Tempele ye Morena Modimo wa lena a e kgethwafaleditšego sa ruri, gomme le mo khunamele gore a se ke a hlwa a le galefetše. ₉Ge le ka boela go Morena, gona bao ba thopilego meloko ya bolena le bana ba lena ba tla ba šokela gomme ba ba lesa ba boela mo gae. Morena Modimo wa lena ke yo botho mme o na le lešoko, gomme ge le ka boela go yena, o tla le amogela.”

₁₀Dikitimi tšeo tša ya motseng wo mongwe le wo mongwe nageng ya kgoro ya Efraime le ya Manase, go ba go yo fihla kgorong ya Sebulone, eupša batho ba ba sega ba ba kwera. ₁₁Le ge go le bjalo go be go na le ba bangwe ba kgoro ya Asere le ya Manase le ya Sebulone ba ba ilego ba ikokobetša ba tla Jerusalema. ₁₂Modimo le yena a tlemaganya batho ba Juda ka maatla a gagwe gore ba dire thato ya gagwe ka go phetha ditaelo tša kgoši le bahlankedi ba yona.

₁₃Lešaba le legolo la bokana Jerusalema kgweding ya bobedi gore ba tle ba keteke Monyanya wa Dinkgwa tše di se nago komelo. ₁₄Ba tšea dialetare ka moka tše di bego di šomišwa Jerusalema go dira dihlabelo le go tšhuma seorelo ba di lahlela ka moeding wa Kidrone. ₁₅Gomme ka letšatši la lesome le metšo ye mene la kgwedi yeo ba hlaba dikwanyana tša sehlabelo sa Paseka. Baprista le Balefi ba ba bego ba se ba hlweka ba lewa ke dihlong mo e lego gore ba ile ba itlhwekišetša Morena, gomme bjale ba kgona go dira dihlabelo tša go tšhungwa ka moka ka Tempeleng. ₁₆Ba dula madulong a bona ka Tempeleng go ya ka mo go laetšwego ka gona mo melaong ya Moshe, monna wa Modimo. Balefi ba fa baprista madi a dihlabelo tšeo, gomme bona ba a foka aletareng. ₁₇Ka ge batho ba bantši ba be ba se ba hlweka, Balefi ba ile ba ba ema legato ba hlaba dikwanyana tša Paseka gore e be tše kgethwa go Morena. ₁₈Ntle le fao ba bantši ba ba bego ba etšwa kgorong ya Efraime le ya Manase le ya Isakara le ya Sebulone ba be ba se ba itlhwekiša, gomme ba keteka Paseka ka bošaedi. Kgoši Hiskia a ba rapelela a re: ₁₉“Wena Morena yo botho, Modimo wa borakgolokhukhu ba rena, hle, lebalela ba ba go khunamelago ka dipelo tša bona ka moka, le ge ba se ba hlweka.” ₂₀Morena a kwa thapelo ya Hiskia; a lebalela setšhaba gomme a se ke a se otla. ₂₁Gwa tšea matšatši a a šupago batho ba ba bego ba kgobokane Jerusalema ba keteka Monyanya wa Dinkgwa tše di se nago komelo ka lethabo le legolo, gomme letšatši le lengwe le le lengwe Balefi le baprista ba tumiša Morena ka diletšo tša medumo ye megolo. ₂₂Hiskia a reta Balefi ka lebaka la ge ba ile ba sepediša tirelo ya Morena ka bokgoni.

Ka morago ga matšatši ale a šupago ao ka ona ba ilego ba dira dihlabelo tša kagišano ba tumiša Morena, Modimo wa borakgolokhukhu ba bona, ₂₃ka moka ba ikemišetša go bina monyanya matšatši a mangwe a a šupago. Ka gona ba bina monyanya woo ka lethabo. ₂₄Kgoši Hiskia a ntšha dipoo tše sekete le dihuswane tše dikete tše di šupago gore batho ba di hlabe ba je, gomme bahlankedi le bona ba ntšha dipoo tše dingwe tše sekete le dinku tše dikete tše lesome. Baprista ba bantši ba itlhwekiša. ₂₅Yo mongwe le yo mongwe a thaba – batho ba Juda, baprista le Balefi, batho ba ba bego ba dutše Israele, le bafaladi ba ba bego ba dutše Israele le Juda. ₂₆Motse wa Jerusalema wa tlala lethabo, ka gobane taba ya mohuta woo e be e se ya ka ya dirwa motseng woo go tloga mehleng ya Kgoši Solomone, morwa wa Dafida. ₂₇Baprista le Balefi ba kgopela Morena gore a šegofatše setšhaba. Modimo a kwa dithapelo tša bona a le legaeng la gagwe le lekgethwa legodimong, gomme a di amogela.