To The Word – Day 147

₁Joshafate a hlatlama Asa, tatagwe, bogošing, gomme a tiiša Juda gore a tle a kgone go itšhireletša go Israele. ₂A bea bahlabani metseng ya Juda ye e ageleditšwego ka merako le kua nageng le metseng ye Asa a bego a e thopile nageng ya Efraime. ₃Morena a ba le Joshafate ka gobane bophelo bja gagwe bo be bo swana le bja tatagwe bja mathomong. O be a sa khunamele Baale, ₄a khunamela Modimo wa tatagwe, a phetha ditaelo tša gagwe, gomme a sa itshware ka moo magoši a Israele a bego a itshwara ka gona. ₅Morena a tiiša Joshafate mmušong wa Juda, gomme batho ba gagwe ka moka ba mo tlišetša diloba mme a huma le dinala, a hlomphega kudu. ₆A fišegela go phetha thato ya Morena, gomme a phušola dintotoma tšohle tšeo go tšona go bego go khunamelwa medimo ya diswantšho, a tloša le dikota tša borapedi mo Juda.

₇Ngwageng wa boraro wa pušo ya gagwe a romela bahlankedi ba ba latelago gore ba yo ruta metseng ya Juda: Benhaile, Obadia, Sakaria, Netanele le Mikaya. ₈Ba be ba na le Balefi ba: Shemaya, Netania, Sebadia, Asahele, Shemiramote, Jonathane, Adonia, Tobia le Tobo-Adonia, le baprista ba: Elishama le Joramo. ₉Ba tšea puku ya melao ya Morena gomme ba putla metseng ka moka ya Juda, ba e ruta batho.

₁₀Morena a dira gore batho ba mebušo ka moka ya dinaga tše di bapilego le naga ya Juda ba boife go lwa le Kgoši Joshafate. ₁₁Bafilista ba bangwe ba tlišetša Joshafate silibera ye ntši le diloba tše dingwe, gomme Baarabia ba mo tlišetša dikgapa tše dikete tše di šupago le makgolo a a šupago, le diphooko tše dikete tše di šupago le makgolo a a šupago. ₁₂Ka gona Joshafate a gola a ba le maatla kudu. A aga dibo le metse ya polokelo nageng ya Juda, ₁₃gomme metseng yeo a bolokela dithoto ka bontši.

A bea bahlabani ba bogale Jerusalema ₁₄go ya ka dikgorwana tša bona. Adna e be e le molaodi wa madira a dikgorwana tša Juda, gomme a na le bahlabani ba bogale ba dikete tše makgolo a mararo ba a bego a ba laola. ₁₅Yo a mo latelago ka maemo e be e le Johanane, a na le bahlabani ba dikete tše makgolo a mabedi le tše masome a seswai, ₁₆mme wa boraro e le Amatsia, morwa wa Sikri, a na le bahlabani ba dikete tše makgolo a mabedi. Amatsia o be a ithaopile go hlankela Morena. ₁₇Molaodi wa madira a dikgorwana tša Benjamene e be e le Eliada, mohlabani yo bogale, yo a bego a laola banna ba dikete tše makgolo a mabedi ba ba itlhamilego ka dikotse le mara. ₁₈Yo a mo latelago ka maemo e be e le Josabade, a na le banna ba dikete tše lekgolo le tše masome a seswai ba ba itlhametšego ntwa gabotse. ₁₉Banna bao ba be ba hlankela kgoši kua Jerusalema, gomme godimo ga moo a bea bahlabani ba bangwe metseng ye mengwe ye e ageleditšwego ka merako nageng ya Juda ka moka.

₁Ge Kgoši Joshafate wa Juda a humile le dinala mme a hlomphega kudu o ile a nyalelana le Kgoši Ahaba. ₂Ka morago ga mengwaga e se mekae Joshafate a ya motseng wa Samaria go yo etela Ahaba. Ahaba a hlabela Joshafate le bao ba bego ba mo felegeditše dihuswane le dikgomo tše ntši. A goketša Joshafate gore a ye le yena go yo hlasela motse wa Ramote kua Gileade. ₃A re go yena: “Na o ka se ye le nna go hlasela Ramote?”

Joshafate a mo fetola a re: “Go lokile, re tla ya bohle, le bahlabani ba ka ba itokišeditše ntwa bjalo ka ba gago. Re tla ikopanya le lena ntweng.” ₄Gomme a tlaleletša ka go re: “Eupša a re nyakišiše keletšo ya Morena pele.”

₅Ka gona Ahaba a bitša baprofeta ba makgolo a mane, gomme a ba botšiša a re: “A nka yo hlasela motse wa Ramote, goba ke se ke ka ya?”

Ba mo fetola ba re: “O hlasele. Modimo o tla o gafela diatleng tša gago.”

₆Eupša Joshafate a ba botšiša a re: “Na ga go sa na le moprofeta yo mongwe yoo ka yena re ka kwago se Morena a se bolelago?”

₇Ahaba a mo fetola a re: “Go sa na le o tee, Mika, morwa wa Jimla. Eupša yena ke mo hloile, ka gobane ga a ke a mporofetela se sebotse; ka mehla o mporofetela se sebe.”

Joshafate a mo fetola a re: “O se ke wa bolela ka mokgwa woo!”

₈Ke moo Kgoši Ahaba a biditšego mohlankedi yo mongwe wa mošate gomme a mo laela gore a yo tšea Mika ka pela.

₉Magoši a mabedi ao a be a dutše ditulong tša ona tša bogoši seboeng ka ntlenyana ga lesoro la Samaria, a apere diaparo tša ona tša bogoši, gomme baprofeta bao ka moka ba porofeta moo pele ga bona. ₁₀Yo mongwe wa bona, Tsedekia, morwa wa Kenana, a dira manaka a tshipi gomme a re go Ahaba: “Morena o re: ‘Ka manaka a o tla hlaba Basiria wa ba fenyetša sa ruri.’ ” ₁₁Baprofeta ba bangwe ka moka le bona ba realo, ba re: “Hlasela motse wa Ramote gomme o tla fenya. Morena o tla o gafela diatleng tša gago.”

₁₂Go sa le bjalo mohlankedi yola a bego a ile go tšea Mika a re go yena: “Baprofeta ba bangwe ka moka ba porofetile gore kgoši o tla atlega, gomme go tla ba kaone ge le wena o ka realo.”

₁₃Eupša Mika a mo fetola a re: “Ka Morena yo a phelago, ke tla bolela se Modimo wa ka a mpotšago sona!”

₁₄Ge a fihla go Kgoši Ahaba, kgoši a mmotšiša a re: “Mika, a nna le Kgoši Joshafate re ka ya ra hlasela motse wa Ramote goba ke lese?”

Mika a mo fetola a re: “O hlaseleng, gomme le tla fenya. Morena o tla o gafela diatleng tša lena.”

₁₅Eupša Ahaba a re: “Ke go botše gakae gore ge o bolela le nna ka leina la Morena o bolele therešo?”

₁₆Mika a mo fetola a re: “Ke bona madira a Israele a phatlaletše le meboto bjalo ka dinku tše di se nago le modiši. Gomme Morena o rile: ‘Banna ba ga ba ne moetapele; a ba ipoelele gae ka khutšo.’ ”

₁₇Ahaba a re go Joshafate: “A ga se ka go botša gore ga a ke a mporofetela se sebotse? Ka mehla o mpotša se sebe!”

₁₈Mika a tšwela pele a re: “Bjale theetša se Morena a se bolelago! Ke bone Morena a dutše setulong sa gagwe sa bogoši legodimong barongwa ba gagwe ka moka ba mo eme ka mathoko. ₁₉Morena a ba botšiša a re: ‘Ke mang yo a tlago goketša Ahaba gore a ye a bolawe kua Ramote?’ Barongwa ba bangwe ba bolela se, ba bangwe ba bolela sela. ₂₀Mafelelong gwa tšwelela moya wa ema pele ga Morena, wa re: ‘Nna ke tla mo goketša.’ Morena a o botšiša a re: ‘Bjang?’ ₂₁Moya woo wa mo fetola wa re: ‘Ke tla ya ka dira gore baprofeta ka moka ba Ahaba ba bolele maaka.’ Morena a re: ‘Sepela o yo mo goketša. O tla atlega.’ ”

₂₂Gomme Mika a feleletša ka go re: “Seo ke se se diregilego. Morena o dirile gore baprofeta ba ba gago ba go botše maaka. Eupša yena o go reretše kotsi!”

₂₃Ke moo moprofeta Tsedekia a batametšego Mika, a mo itia sefahlego ka ntahle, mme a mmotšiša a re: “Ke go thoma neng moya wa Morena o ntlogetše gomme o bolela le wena?”

₂₄Mika a mo fetola a re: “Seo o tla se tseba ge o tsena ka phapošing ya mosego o yo utama.”

₂₅Ke gona Kgoši Ahaba a laetšego yo mongwe wa bahlankedi ba gagwe a re: “Swara Mika o mo iše go Amone, ramotse, le go Joase, morwa wa ka. ₂₆O ba botše gore ba mo lahlele kgolegong, ba mo fe dijo tše nnyane le meetse a mannyane go fihlela ke boa ke bolokegile.”

₂₇Mika a hlaboša lentšu a re: “Ruri, ge o ka boa o bolokegile, gona Morena o tla be a se a bolela ka nna!” Gomme a feleletša ka go re: “Yo mongwe le yo mongwe a sware se ke se boletšego!”

₂₈Kgoši Ahaba wa Israele le Kgoši Joshafate wa Juda ba yo hlasela motse wa Ramote kua Gileade. ₂₉Ahaba a re go Joshafate: “Ge re tsena ntweng, nna ke tla ikgakantšha, eupša wena o apare diaparo tša gago tša bogoši.” Ka gona kgoši ya Israele ya ikgakantšha, gomme yena le Joshafate ba tsena ntweng.

₃₀Kgoši ya Siria e be e laetše balaodi ba dikoloi tša yona tša ntwa gore ba hlasele kgoši ya Israele fela – e sego motho yo mongwe. ₃₁Ka gona ge ba bona Kgoši Joshafate, ka moka ba gopola gore ke yena kgoši ya Israele, gomme ba mo ageletša gore ba mo hlasele. Eupša Joshafate a goa, gomme Morena a mo thuša, a goketša bahlasedi gore ba lebe thoko. ₃₂Balaodi ba dikoloi tša ntwa ba lemoga gore ga se yena kgoši ya Israele, gomme ba se hlwe ba mo hlomere. ₃₃Mohlabani yo mongwe wa Mosiria a thunya motsi mme wa hlaba Kgoši Ahaba mahlakanong a seaparo sa gagwe sa boitšhireletšo, mohlabani yoo a sa tsebe gore yo a mo lebantšego ka motsi ke mang. Ahaba a goeletša mootledi wa koloi ya gagwe ya ntwa a re: “Ke gobetše! Retologa o nntšhe ntweng!” ₃₄Ge ntwa e befela pele, Kgoši Ahaba a hlwa a emišitšwe ka koloing ya gagwe a lebane le Basiria. Ya re ge letšatši le dikela a hwa.

₁Kgoši Joshafate wa Juda a boela mošate Jerusalema a bolokegile. ₂Moprofeta yo mongwe, Jehu, morwa wa Hanani, a tšwa motseng go yo mo gahlanetša, gomme a re go yena: “Na o gopola gore go lokile go thuša ba babe le go rata bao ba hloilego Morena? Ka lebaka la se o se dirilego, Morena o go galefetše. ₃Le ge go le bjalo, go sa na le tše dibotse tše o di dirilego. O tlošitše dikota tša borapedi, o lekile le go dira tše Modimo a di nyakago.”

₄Le ge Kgoši Joshafate bjale a be a dula Jerusalema o be a fela a sepela setšhabeng sa gagwe, a tloga Beresheba a fihla nageng ya dithaba ya Efraime a sokollela setšhaba go Morena, Modimo wa borakgolokhukhu ba sona. ₅A bea baahlodi motseng wo mongwe le wo mongwe wa Juda wo o ageleditšwego ka morako, ₆gomme a ba laya a re: “Le hlokomeleng ge le seka melato, ga le ahlolele batho, eupša le ahlolela Morena, gomme yena o na le lena ge le ahlola. ₇Le boifeng Morena gomme le šomeng ka tlhokomelo, ka gobane Morena Modimo wa rena ga a kgotlelele ge toka e kgopamišwa, ge batho ba kgethologanywa, goba ge ba amogela tsogolekobong.”

₈Motseng wa Jerusalema Kgoši Joshafate a bea Balefi ba bangwe le baprista le mantona a mangwe a dikgorwana gore e be baahlodi melatong ya go tshela melao ya Morena, goba diphapanong tša batho ba motse. ₉A ba laya a re: “Le swanetše go phethagatša mediro ya lena le boifa Morena, le mmotegela mme le ineetše go yena. ₁₀Ge batho ba gabolena ba ba tšwago metseng ya bona ba etla go lena ka molato wa polao goba wa go tshela molao wo mongwenyana goba taelo, le ba laye gore ba itshware gabotse ge molato o sekwa, gore ba se ke ba ikobela molato go Morena. Ge le ka se ba laye, gona Morena o tla le galefela, a galefela le setšhaba sa gabolena. Eupša ge le ka ba laya gona le ka se obe molato. ₁₁Amaria, Moprista yo Mogolo, ke yena e tlago ba moahlodi yo mogolo melatong ya sedumedi, gomme Sebadia, morwa wa Ishmaele, mmušiši wa Juda, yena ya ba yo mogolo melatong ya selegae. Balefi bona ba swanetše go bona gore merero ya kgoro e sepele gabotse. Le tiišeng le phethe ditaelo tše, gomme Morena a be le ba ba lokilego!”

₁Ka morago ga lebaka madira a Moaba le a Amone gotee le Bameune ba bangwe ba hlasela Juda. ₂Batseta ba bangwe ba tla ba begela Kgoši Joshafate ba re: “Madira a mantši a tšwa ka mošola wa Lewatle le le Hwilego go tlo go hlasela. Ba šetše ba le kua Hatsetsone-Thamare.” Leo ke leina le lengwe la Engedi. ₃Joshafate a tšhoga gomme a ikemišetša go kgopela keletšo go Morena. Ke moka a bea letšatši la go ikona dijo nageng ka moka. ₄Batho ba Juda ba tšwa metseng ya bona yohle ba yo kgobokana Jerusalema gore ba kgopele thušo go Morena, ₅gomme bona le batho ba Jerusalema ba bokana ka kgorong ye mpsha ya Tempele. Kgoši Joshafate a ya a ema pele ga bona, ₆a rapela a re: “Wena Morena, Modimo wa borakgolokhukhu ba rena, o buša ditšhaba ka moka tša lefase o le legodimong. O na le maatla mme o yo mogolo, gomme ga go yo a ka lwago le wena. ₇O Modimo wa rena. Ge setšhaba sa gago sa Israele se etla mo nageng ye, o lelekile batho ba ba bego ba dula mo gomme wa fa ditlogolo tša Abrahama, mogwera wa gago, naga ye gore e be ya bona go ya go ile. ₈Ba dutše mo gomme ba aga Tempele gore ba go hlomphe, ba re ₉ge o ba tlišetša bothata – e ka ba ntwa gore o ba otle, goba bolwetši bja leuba, goba tlala – ba tla ema mo pele ga Tempele ye, pele ga gago, ka gobane ke moo o khunamelwago gona. Ba tla go rapela mathateng a bona, gomme o tla ba kwa, wa ba phološa.

₁₀“Bjale batho ba Amone le ba Moaba le ba Edomo ba re hlasetše. Ge borakgolokhukhu ba rena ba etšwa Egepeta, ga se wa ba dumelela gore ba tsene dinageng tšeo, ka gona ba ba šikologile gomme ba se ke ba ba fediša. ₁₁Bjale bona ba re putsa ka go re ntšha nageng ye o re filego yona. ₁₂Modimo wa rena, nke o ba otle, ka gobane rena ga re na maatla pele ga madira a mantši a a re hlaselago a. Ga re tsebe se re kago se dira, eupša re lebeletše wena gore o re thuše.”

₁₃Banna ka moka ba Juda le basadi le bana gotee le batšofadi ba be ba eme moo Tempeleng. ₁₄Moya wa Morena wa aparela Molefi yo mongwe yo a bego a le gona moo lešabeng. Leina la gagwe e be e le Jahasiele, morwa wa Sakaria, Sakaria morwa wa Benaya, Benaya morwa wa Jeiele, Jeiele morwa wa Matania, Matania setlogolo sa Asafo. ₁₅Jahasiele a re: “Wena kgoši le lena batho ka moka ba Juda le ba Jerusalema, ntheetšeng! Morena o re le se ke la boifa goba la nolega moko ka lebaka la madira a mantši a, ka gobane ntwa ye e laolwa ke Modimo, e sego lena. ₁₆Le ba hlaseleng ka moswane ge ba rotoga ka sefata sa Tsitse. Le tla gahlana nabo mafelelong a moedi wo o yago lešokeng la Jeruele. ₁₇Ntwa ye le ka se e lwe. Lena le no ema maemong a lena le letele; le tla bona manaba a lena Morena a le fenyeditše ona. Lena batho ba Juda le ba Jerusalema, le se ke la dikadika, goba la boifa, goba la nolega moko. Ka moswane le tšweng le yeng ntweng, gomme Morena o tla ba le lena!”

₁₈Ke moo Kgoši Joshafate a obamilego, gomme batho ka moka ba obama mme ba rapela Morena. ₁₉Batho ba kgorwana ya Balefi ya Kehate le ya Korage ba emelela ba goa ba tumiša Morena Modimo wa Israele.

₂₀Mosong wa le le latelago batho ba tšwa ba ya lešokeng kgauswi le Tekoa. Ge ba tloga, Joshafate a ema a re go bona: “Banna ba Juda le ba Jerusalema, ntheetšeng! Tshephang Morena Modimo wa lena, gomme le tla tia. Le kgolweng se baprofeta ba gagwe ba le botšago sona, gomme le tla atlega.” ₂₁Ge Joshafate a boledišane le batho, a laela baopedi ba bangwe gore ba apare diaparo tše ba bego ba di apara menyayeng ye mekgethwa, le gore ba ete madira pele ba opele ba re: “Retang Morena! Lerato la gagwe ke la neng le neng!”

₂₂Ge ba thoma go opela, Morena a tsenya madira ale a Baamone le a Bamoaba le a Baedomo kgakanegong, gomme ba fenywa. ₂₃Baamone le Bamoaba ba hlasela Baedomo ba ba swielela; ka morago ba thoma go fedišana seng sa bona. ₂₄Ge madira a Juda a fihla mmotong wa tlhapetšo kua lešokeng, ba ukamela manaba gomme ba bona ka moka ga ona a rapaletše fase a hwile. Go be go se gwa phologa motho.

₂₅Joshafate le madira a gagwe ba batamela go tlo tšea thoto ya manaba ao, gomme ba hwetša diruiwa tše ntši tša go rwala le tša go namelwa, le thoto le diaparo le dilo tše bohlokwa. Ba tšea matšatši a mararo ba kgobokanya dithoto tšeo, eupša e be e le tše ntši mo e lego gore ba ile ba se ke ba kgona go di tšea ka moka. ₂₆Ka letšatši la bone ba kgobokana molaleng wa Beraka gomme ba tumiša Morena ka lebaka la tšohle tše a di dirilego. Ke ka fao molala woo o bitšwago “Beraka”. ₂₇Joshafate a eta madira a gagwe pele ba boela Jerusalema ka megobo, ka gobane Morena o be a fentše manaba a bona. ₂₈Ge ba fihla motseng ba ya Tempeleng go letšwa diharepa le dikgapa le diphala. ₂₉Setšhaba se sengwe le se sengwe se se ilego sa kwa gore Morena o fentše manaba a Israele se ile sa tšhoga, ₃₀ka gona Joshafate a buša ka khutšo, gomme Modimo a mo dira gore a bolokege ka mathoko ohle.

₃₁Joshafate e be e bile kgoši ya Juda a na le mengwaga ye masome a mararo a metšo ye mehlano, gomme a bušitše a le Jerusalema mengwaga ye masome a mabedi a metšo ye mehlano. Mmagwe e be e le Asuba, morwedi wa Shilehi. ₃₂Go no swana gabotse le Asa, tatagwe, o ile a dira tše di kgahlago Morena, ₃₃eupša dintotoma tšeo go tšona go bego go khunamelwa medimo ya diswantšho a se ke a di phušola. Le ge go le bjalo batho ba ile ba se ke ba thoma go khunamela Morena, Modimo wa borakgolokhukhu ba bona, ka botlalo.

₃₄Tše dingwe tše Joshafate a di dirilego, go tloga mathomong a pušo ya gagwe go iša mafelelong, di ngwadilwe mo go Ditaba tša Jehu, morwa wa Hanani, gomme tšona ke karolo ya Ditaba tša magoši a Israele.

₃₅Ka nako ye nngwe Kgoši Joshafate wa Juda o ile a kwana le Kgoši Ahasia wa Israele, yo a bego a dira dilo tše ntši tše mpe. ₃₆Ba dira maselawatle a magolo kua Etsione-Gebere. ₃₇Eupša Eliesere, morwa wa Dodaba, wa motse wa Maresha, a kgala Joshafate a re: “Ka gobane o kwane le Ahasia, Morena o tla senya tše le di dirilego.” Gomme maselawatle ale a thokgega mme a se ke a kgona go ya Tarsose.

₁Joshafate a ithobalela le botatagwe, mme a bolokwa le bona motseng wa Dafida, gomme Joramo, morwa wa gagwe, a mo hlatlama bogošing.

₂Joramo, morwa wa Kgoši Joshafate wa Juda, o be a na le bomorwarragwe ba ba latelago: Asaria, Jehiele, Sakaria, Asariahu, Mikaele le Shefatia. ₃Tatagobona o ile a ba fa gauta le silibera ye ntši le dilo tše dingwe tše ntši tše bohlokwa, gomme yo mongwe le yo mongwe wa bona a mmea mohlokomedi wa motse wa Juda wo o ageleditšwego ka morako. Eupša ka gobane Joramo e be e le leitšibolo, Joshafate a mo dira mohlatlami wa gagwe bogošing. ₄Ge Joramo a tieletše bogošing, a bolaya bomorwarragwe ka moka le baetapele ba bangwe ba Baisraele.

₅Joramo ya ba kgoši a na le mengwaga ye masome a mararo a metšo ye mebedi, gomme a buša a le Jerusalema mengwaga ye seswai. ₆A latela mohlala wo mobe wa Kgoši Ahaba le dikgoši tše dingwe tša Israele, ka gobane o be a nyetše morwedi yo mongwe wa Ahaba. A dira dibe pele ga Morena, ₇eupša Morena o be a sa nyake go fediša pušo ya ba lapa la Dafida, ka gobane a be a dirile kgwerano le Dafida gomme a mo holofeditše gore ditlogolo tša gagwe di tla buša go ya go ile.

₈Ge go buša Joramo, Baedomo ba ile ba tsogela Bajuda maatla gomme ba ipeela kgoši ya bona. ₉Ka gona Joramo a tloga le balaodi ba madira a gagwe ka dikoloi tša ntwa gomme ba hlasela Edomo. Moo bahlabani ba Edomo ba ba dikanetša, fela ya re bošego ba ba šwahla. ₁₀Edomo ya se hlwe e bušwa ke Juda go tloga ka nako yeo. Yona mehleng yeo motse wa Libna le wona wa tsoša mpherefere ka gobane Joramo a be a tlogetše Morena, Modimo wa borakgolokhukhu ba gagwe. ₁₁Le gona o be a kgobetše dintotoma tšeo go tšona go bego khunamelwa medimo ya diswantšho dithabeng tša Juda, gomme a dira gore batho ba Juda le ba Jerusalema ba se botegele Morena, a ba aroša go yena.

₁₂Moprofeta Eliya a ngwalela Joramo lengwalo a re: “Morena, Modimo wa Dafida, rakgolokhukhu wa gago, o go tšwile ka gobane ga se wa latela mohlala wa tatago, Kgoši Joshafate, goba wa rakgolwago, Kgoši Asa. ₁₃Bakeng sa seo wena o latetše mohlala wa magoši a Israele gomme wa dira gore batho ba Juda le ba Jerusalema ba se hlwe ba botegela Modimo, ka wona mokgwa wo Ahaba le ba ba mo hlatlamego bogošing ba dirilego gore Baisraele ba se ke ba hlwa ba botega. Ebile o bolaile bomorrwarrago ba e bego e le batho ba go go phala. ₁₄Ka lebaka la taba yeo Morena o tla otla setšhaba sa gago le bana ba gago le basadi ba gago o šoro, gomme a senya dithoto tša gago. ₁₅Wena ka bowena o tla swarwa ke bolwetši bjo bošoro bja mala bjo bo tlago gola letšatši ka letšatši go fihlela mala a gago a etšwa.”

₁₆Morena a hlohleletša Bafilista le Baarabia ba ba bego ba dula kgauswi le moo go bego go dutše Baetopia ba bangwe gore ba yo lwa le Bajuda. ₁₇Ba hlasela Bajuda, ba thopa dithoto ka moka tša mošate, ba thopa le basadi le barwa ba kgoši ka moka ntle le Ahasia, morwa wa gagwe wa mafelelo.

₁₈Ka morago ga tšeo ka moka, Morena a otla kgoši ka bolwetši bjo bo sa alafegego bja mala. ₁₉Bja tšea mengwaga ye mebedi bo golela pele go fihlela ge mala a gagwe a etšwa mme kgoši a hwa a ekwa bohloko bjo bošoro. ₂₀Batho ba gagwe ba se ke ba gotša mollo wo mogolo wa go mo llela bjalo ka ge ba ile ba direla borakgolokhukhu ba gagwe.

₂₁Joramo e be e bile kgoši a na le mengwaga ye masome a mararo a metšo ye mebedi, gomme a bušitše a le Jerusalema mengwaga ye seswai. Ga go yo a ilego a nyama ge a hwile. Ba mmoloka motseng wa Dafida, eupša e sego mabitleng a mošate.