2 DIKRONIKA 25

₁Amatsia e bile kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema. ₂O be a dira tše di kgahlago Morena, eupša a sa di dire ka pelo ya gagwe ka moka. ₃Ge a seno tielela bogošing, o ile a bolaya bahlankedi bale ba go bolaya tatagwe. ₄Eupša a se ke a bolaya bana ba bona, fela a phetha se Morena a se laetšego setšhaba melaong ya Moshe a re: “Batswadi ba se ke ba bolaelwa melato ya bana ba bona, bana le bona ba se ke ba bolaelwa melato ya batswadi ba bona; motho a bolaelwe fela molato wo o obilwego ke yena mong.”

₅Kgoši Amatsia a kgobokanya banna ka moka ba kgoro ya Juda le ya Benjamene, a ba bea ka dihlophanahlophana tša madira go ya ka dikgorwana tša bona, gomme a ba beela balaodi ba bahlabani ba ba dikete le ba ba makgolo. O be a kgobokantše banna ka moka ba mengwaga ye masome a mabedi le go feta fao. Ka moka ya ba ba dikete tše makgolo a mararo. E be e le bahlabani ba ba kgethilwego, ba itokišeditše ntwa, ba rutilwe go lwa ka marumo le dikotse. ₆Go ba oketša a thwala bahlabani ba dikete tše lekgolo ba Israele, a ba lefa ka silibera ya dikilokramo tše dikete tše tharo. ₇Eupša moprofeta yo mongwe a ya go yena a re: “O se ke wa tšea bahlabani ba ba Israele. Morena ga a eme le banna ba ba Mmušo wa ka Leboa le bona Baefraime ba. ₈Mohlomongwe o gopola gore ba tla go tiiša ntweng, eupša ke Modimo yo a nago le maatla a go dira gore motho a fenye goba a fenywe, gomme o tla dira gore manaba a gago a go fenye.”

₉Amatsia a botšiša moprofeta a re: “Bjale silibera yela ke šetšego ke ba lefile yona?”

Moprofeta a mo fetola a re: “Morena a ka go bušetša ya go feta yeo!” ₁₀Ka gona Amatsia a hlaola madira ale a go a thwala, gomme a a botša gore a boele ga gaboona. Ba boela morago ba tuketše batho ba Juda bogale.

₁₁Amatsia a itiiša maatla gomme a eta madira a gagwe pele ba ya Moeding wa Letswai. Fao ba lwa gomme ba bolaya bahlabani ba Baedomo ba dikete tše lesome, ₁₂ba ba ba thopa ba bangwe ba dikete tše lesome. Ba iša mathopša godimo ga legaga motseng wa Sela, gomme ba ba kgoromeletša fase ba pšhatlaganywa ke maswika.

₁₃Bahlabani bale ba Israele, bale Amatsia a go se ba dumelele go ya ntweng le yena, bona ba ile ba hlasela metse ya Juda gare ga Samaria le Bethe-Horone, ba bolaya banna ba dikete tše tharo, ba thopa le thoto ye ntši.

₁₄Ge Amatsia a fentše Baedomo o ile a boa le medimo ya bona ya diswantšho, a e ipeela yona, a e tšhumela le diorelo. ₁₅Taba yeo ya galefiša Morena, ka gona a roma moprofeta go Amatsia gore a mmotšiše a re: “Ke ka lebaka lang o khunamela medimo e šele ye e paletšwego le ke go phološa batho ba yona diatleng tša gago?”

₁₆Amatsia a mo tsena ganong a re: “Kgane re go beile moeletši wa kgoši? Homola, go sego bjalo o tla bolawa!”

Moprofeta yola pele ga ge a homola a re: “Bjale ke a tseba gore Modimo o rerile go go feleletša, ka ge o dirile taba ya mohuta wo mme wa hlokomologa keletšo ya ka.”

₁₇Kgoši Amatsia wa Juda le baeletši ba gagwe ba kwana gore ba hlasele Israele. Ka gona a roma batseta go Kgoši Joase wa Israele yo e bego e le morwa wa Joahase le setlogolo sa Jehu, a mo hlohla a re: “Tlaa re lwe!” ₁₈Joase a fetola Amatsia ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘A morwa wa ka a nyale morwedi wa gago.’ Gwa tla phoofolo ya naga gomme ya gatakanya mošwana wola. ₁₉Bjale Amatsia, o ikgogomoša ka go re o fentše Baedomo, ka gona o na le makoko. Eupša nna ke re itulele moo lapeng la gago. Ke ka lebaka lang o tsoša mpherefere wo o tlago tlišetša wena le batho ba gago mahlomola?”

₂₀Fela Amatsia a di tšeiša phefo. E be e le thato ya Morena gore Amatsia a fenywe, ka gobane yena le ba lapa la gagwe ba be ba khunamela medimo ya diswantšho ya Baedomo. ₂₁Ka gona Kgoši Joase wa Israele a tšwa dira a yo lwa le Kgoši Amatsia wa Juda. Ba gahlana kua Bethe-Shemeshe nageng ya Juda, ₂₂madira a Juda a fenywa, gomme yo mongwe le yo mongwe a tšhabela ga gagwe. ₂₃Joase a thopa Amatsia gomme a mo iša Jerusalema. Moo a kgereša morako wa motse go tloga Lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi. ₂₄A boela Samaria le gauta ka moka le silibera ya ka Tempeleng, le ditlabakelo ka moka tša ka Tempeleng tše di bego di hlokomelwa ke ditlogolo tša Obede-Edomo, le mahumo a mošate. A thopa le batho.

₂₅Kgoši Amatsia wa Juda a phela mengwaga ye lesome le ye mehlano ka morago ga ge Kgoši Joase wa Israele a hwile. ₂₆Tše dingwe tše Amatsia a di dirilego, go tloga mathomong go iša mafelelong a pušo ya gagwe, di ngwadilwe mo go Ditaba tša magoši a Juda le a Israele. ₂₇Go tloga ka yona nako yela Amatsia a hlanogetšego Morena o ile a dula a logetšwe maanomabe Jerusalema. Mafelelong a tšhabela motseng wa Lakishe, eupša manaba a gagwe a mo latelela moo gomme a mmolaya. ₂₈Setopo sa gagwe sa išwa Jerusalema ka koloi ya dipere, gomme sa bolokwa mabitleng a botatagwe motseng wa Dafida.