DIEMA 14

₁Lapa le agwa ke mosadi yo bohlale,

wa lešilo yena o ithubela lona.

₂Mohlokabosodi o boifa Morena,

wa tselakgopo yena o a mo nyatša.

₃Lešilo le ipolaya ka dipolelo tša lona,

yo bohlale yena o itšhireletša ka tše a di bolelago.

₄Ge go se dipholo tša go lema, legopo ga le be le dijo;

ge dipholo di le gona, puno e ba ye ntši.

₅Hlatsepotegi ke ye e sa bolelego maaka,

hlatse ya maaka yona ke seaketšabatho.

₆Mokodutli le ge a ka tsoma bohlale a ka se bo hwetše;

wa tlhaologanyo yena tsebo o e hwetša gabonolo.

₇O se batamele lešilo,

gobane ga go sa tlhaologanyo se le ka go botšago sona.

₈Bohlale bja setsebi ke go tseba tsela ya sona;

bošilo bja lešilo bjona bo a le timetša.

₉Go setlatla sehlabelo sa dibe ke metlae;

moloki o kgahla Modimo.

₁₀Bohloko bo kwewa ke mong wa bjona,

lethabo le lona ke la mothabi.

₁₁Lapa la yo kgopo le tla fedišwa,

la moloki lona le tla atlega.

₁₂Go na le tsela ye e bonalago nke e lokile,

fela mafelelong e iša lehung.

₁₃Motho a ka no kwa bohloko ka pelong le ge a sega;

lethabo le ka no felela ka manyami.

₁₄Mokgelogi o tla otlelwa tše a di dirilego,

moloki le yena o tla putsetšwa ditiro tša gagwe.

₁₅Mohlokatemogo go tša bophelo ke madumelatšohle,

yo bohlale yena o ipala magato.

₁₆Yo bohlale ke wa go ba le hlokomelo, a šikologa bobe;

lešilo lona le šwahlela fela le itshephile.

₁₇Sefeladipelwana o dira tša bošilo;

wa šedi yena o dula a fodišitše hlogo.

₁₈Lefa la bomohlokatemogo go tša bophelo ke bošilo,

ba bohlale bona ba putswa ka tsebo.

₁₉Ba babe ba tla khunamela ba go loka,

bakgopo ba tla obama masorong a baloki.

₂₀Modiidi o hloiwa le ke moagišani,

mohumi yena o ratwa ke ba bantši.

₂₁Yo a nyatšago mongwekayena o dira sebe;

go lehlogonolo yo a šokelago bahlaki.

₂₂A ke re mologamaanomabe ke motimedi?

Moreradibotse yena o a ratwa, a botwa ke batho.

₂₃Go katana go tlišetša motho moputso,

go etiša leleme pele gona go a mo diitša.

₂₄Moputso wa ba bohlale ke lehumo,

wa mašilo wona ke bošilo.

₂₅Hlatsethereši e ka hlakodiša motho lehung,

ya maaka hlatse yona ke moeki.

₂₆Ka go boifa Morena motho o a bolokega,

le bana ba gagwe ba ba le botšhabelo.

₂₇Go boifa Morena go tsošološa motho,

go mo phemiša lehu.

₂₈Bogolo bja kgoši bo ya le bontši bja tšhaba sa gagwe;

go fokotšega ga sona go feleletša ka go wa ga gagwe.

₂₉Wa go diega go befelwa ke yo bohlale,

sefelafeladipelwana yena ke lešilošilo.

₃₀Bopelotšhweu bo hleka mmele wa motho;

lehufa lona ke bolwetši bja go ja marapo.

₃₁Mohlakišabahlaki o nyefola Mmopi wa bona,

mošokelabadiidi yena o hlompha Morena.

₃₂Yo kgopo o ipolaya ka ditiro tša gagwe tše mpe,

moloki yena o šireletšwa ke boloki bja gagwe.

₃₃Motho wa tlhaologanyo o nagana tše bohlale;

ditlatla ga di tsebe selo ka bohlale.

₃₄Go loka go godiša setšhaba,

sebe sona se goboša setšhaba.

₃₅Kgoši e kgahlwa ke mohlankedi wa go kgona;

e galefela molešadihlong.