To The Word – Day 146

₁Ge Kgoši Rehabeamo a fihla Jerusalema o ile a rapa bahlabani ba bogalegale ba kgoro ya Benjamene le ya Juda ba dikete tše lekgolo le masome a seswai. O be a ikemišeditše go yo lwa le dikgoro tša ka leboa tša Israele gore e be kgoši ya tšona gape. ₂Eupša Morena a laela moprofeta Shemaya ₃gore a botše Kgoši Rehabeamo le batho ka moka ba kgoro ya Juda le ya Benjamene a re: ₄“Le se ke la hlasela bomorwarragolena, batho ba Israele. Yaang gae ka moka ga lena. Se se diregilego ke thato ya ka.” Ka moka ba phetha se Morena a ba laetšego sona gomme ba se ke ba yo lwa le Jerobeamo.

₅Rehabeamo a dula Jerusalema gomme a laela gore metse ye e latelago ya Juda le ya Benjamene e ageletšwe ka merako: ₆Betlelehema, Ethamo, Tekoa, ₇Bethe-Tsure, Soko, Adulamo, ₈Gathe, Maresha, Sife, ₉Adoraime, Lakishe, Aseka, ₁₀Tsora, Ayalone le Hebrone. ₁₁A laela gore e tiišwe kudu ka merako gomme a bea molaodi go wo mongwe le wo mongwe wa yona; metseng yeo ka moka a boloka dijo, makhura a mohlware, le beine, ₁₂le dikotse le marumo. Ka mokgwa woo a kgona go fela a buša kgoro ya Juda le ya Benjamene.

₁₃Baprista le Balefi ba huduga nageng ka moka ya Israele ba tla nageng ya Juda. ₁₄Balefi ba tlogela mafelo a phulo le magae a bona mme ba thothela Juda le Jerusalema, ka gobane Kgoši Jerobeamo wa Israele le ba ba ilego ba mo hlatlama bogošing ba be ba sa ba dumelele go dira mediro ya bona ya baprista ba Morena. ₁₅Jerobeamo a ipeela baprista ba gagwe gore ba hlankele medimo ya diswantšho ye e bego e khunamelwa dintotomeng, le gore ba rapele meoya ye mebe le diswantšhobopša tša dipowana. ₁₆Dikgorong ka moka tša Israele batho ba ba bego ba tloga ba nyaka go direla Morena Modimo wa Israele, ba ile ba latela Balefi ba hudugela Jerusalema, gore ba tle ba kgone go direla Morena, Modimo wa borakgolokhukhu ba bona, dihlabelo. ₁₇Seo se ile sa tiiša mmušo wa Juda, gomme ba thekga Rehabeamo, morwa wa Solomone, mengwaga ye meraro ba phela ka moo ba bego ba phela ka gona mola ba sa bušwa ke Kgoši Dafida le Kgoši Solomone.

₁₈Rehabeamo o ile a nyala Mahalate yo tatagwe e bego e le Jerimote, morwa wa Dafida, gape yo mmagwe e bego e le Abihaile, morwedi wa Eliaba le setlogolo sa Isai. ₁₉Barwa ba bona ya ba Jeushe, Shemaria le Sahamo. ₂₀Ka morago a nyala Maaka, morwedi wa Absalomo, gomme ba ba le barwa ba: Abia, Athai, Sisa le Shelomite. ₂₁Basadi ba Rehabeamo e be e le ba lesome le ba seswai, gomme metlabo ya gagwe e le ye masome a a selelago. A ba le barwa ba masome a mabedi a metšo ye seswai, le barwedi ba masome a a selelago. O be a rata Maaka go feta basadi ba gagwe ba bangwe le metlabo, ₂₂gomme Abia, morwa wa gagwe, Rehabeamo a mo dira yo mogolo barweng ba gagwe ka moka, a ba a mo kgetha gore a tle a mo hlatlame bogošing. ₂₃Gomme a loga maano, a dira barwa ba gagwe dintona metseng ye e ageleditšwego ka merako nageng ya Juda le ya Benjamene ka moka. A ba fa thoto ye ntši, a ba nyalela le basadi ba bantši.

₁Ge Rehabeamo a seno tielela bogošing, yena le setšhaba sa gagwe ba ile ba lahla melao ya Morena. ₂Ngwageng wa bohlano wa pušo ya gagwe ba otlelwa go se botegele Morena moo. Kgoši Shishake wa Egepeta a hlasela Jerusalema ₃ka madira a dikoloi tša ntwa tše makgolo a lesome le a mabedi, le banamedi ba dipere ba dikete tše masome a a selelago, le bahlabani ba bantši ba go se balwe, gare ga bona go na le ba Libia, ba Sukote, le ba Etopia. ₄A thopa metse ya Juda ye e ageleditšwego ka merako, a ba a fihla Jerusalema.

₅Moprofeta Shemaya a ya go Kgoši Rehabeamo le go baetapele ba Juda ba ba bego ba kgobokane Jerusalema ba tšhabile Shishake. A re go bona: “Morena o re: ‘Le ntahlile, ka gona le nna ke le lahletše diatleng tša Shishake.’ ”

₆Kgoši le baetapele ba dumela gore ba dirile dibe, gomme ba re: “Morena o re dira se se re swanetšego.”

₇Ge Morena a bona gore ba a itshola a re go Shemaya: “Ka gobane ba ipona molato, nka se ba fediše, eupša ke tla ba phološa ka pela. Nka se otle batho ba Jerusalema ka Shishake ke ba galefetše, ₈fela e tla ba bahlanka ba gagwe, gomme ba tseba gore go hlankela nna le go hlankela babuši ba lefaseng go fapana bjang.”

₉Kgoši Shishake a hlasela Jerusalema gomme a tšea matlotlo a ka Tempeleng le a mošate. A tšea dilo ka moka, gotee le dikotse tša gauta tšela di bego di dirilwe ke Kgoši Solomone. ₁₀Legatong la tšona Rehabeamo a dira dikotse tša mphiri a di nea balaodi ba baleti ba masoro a mošate. ₁₁Nako ye nngwe le ye nngwe ge kgoši a eya Tempeleng, baleti ba be ba etla ba swere dikotse tšeo, gomme ka morago ba di boetše ka phapošing ya baleti. ₁₂Ka gobane Rehabeamo o ile a itshola, Morena o ile a se ke a hlwa a mo galefetše, ka gona a se ke a fedišetša bogoši bja gagwe sa ruri. Le gona batho ba Juda ba be ba sa dira tše dingwenyana tše di kgahlago Morena.

₁₃Rehabeamo o bušitše a le Jerusalema gomme a tielela bogošing. O be a na le mengwaga ye masome a mane a motšo o tee ge e eba kgoši, gomme a buša a le Jerusalema mengwaga ye lesome le ye e šupago. Jerusalema e be e le motse wo Morena a ikgethetšego wona nageng ya Israele ka moka gore a khunamelwe go wona. MmagoRehabeamo e be e le Naama, a etšwa nageng ya Amone. ₁₄Rehabeamo o ile a dira dibe ka gobane o be a sa leke go dira thato ya Morena.

₁₅Ditiro tšohle tša Rehabeamo go tloga mathomong a pušo ya gagwe go fihla mafelelong, le ditaba tša lapa la gagwe di ngwadilwe mo go Ditaba tša moprofeta Shemaya le mo go Ditaba tša moprofeta Ido. Rehabeamo le Jerobeamo ba be ba no fela ba tsogelana maatla. ₁₆Rehabeamo o ile a hwa gomme a bolokwa mabitleng a botatagwe motseng wa Dafida, mme Abia, morwa wa gagwe, a mo hlatlama bogošing.

₁Ngwageng wa lesome le metšo ye seswai wa pušo ya Kgoši Jerobeamo wa Israele, Abia e ile ya ba kgoši ya Juda, ₂gomme a buša mengwaga ye meraro a le Jerusalema. Mmagwe e be e le Mikaya, morwedi wa Uriele, wa motse wa Gibea.

Abia le Jerobeamo ba ile ba tsoša ntwa. ₃Abia a tšwa dira ka bahlabani ba bogale ba ba kgethilwego ba dikete tše makgolo a mane, Jerobeamo yena a yo mo gahlanetša ka ba dikete tše makgolo a seswai.

₄Madira ao a kopana nageng ya dithaba ya Efraime. Kgoši Abia a namela thaba ya Tsemaraime gomme a goeletša Jerobeamo le Baisraele a re: “Ntheetšeng! ₅Ga ke re le a tseba gore Morena Modimo wa Israele o dirile kgwerano ya go ya go ile le Dafida, a fa yena le ditlogolo tša gagwe bogoši bja Israele go ya go ile? ₆Jerobeamo, morwa wa Nebate, mohlankedi wa Solomone, o ile a tsogela Solomone, kgoši ya gagwe, morwa wa Dafida, maatla. ₇Ka morago a kgobokanya lekoko la dihwirihwiri, gomme ba patla Rehabeamo, morwa wa Solomone, yo e bego e sa le yo monnyane, a se ne temogo, mme a sa kgone go ba thibela. ₈Bjale le leka go lwa le mmušo wa Morena wo a o filego ditlogolo tša Dafida. Le na le madira a mantšintši, le gona le na le dipowana tša gauta tše Jerobeamo a di bopilego gore e be medimo ya lena. ₉Le rakile baprista ba Morena, ditlogolo tša Arone, la raka le Balefi. Legatong la bona le beile baprista ka mokgwa woo ditšhaba tše dingwe di dirago. Yo mongwe le yo mongwe yo a tlago le poo goba dikgapa tše di šupago o ipea moprista wa dilo tšeo tša lena tše le rego ke medimo.

₁₀“Eupša rena Morena e sa le Modimo wa rena, gomme ga se ra mo tlogela. Baprista ba e lego ditlogolo tša Arone ba hlankela Morena, gomme Balefi ba a ba thuša. ₁₁Mosong wo mongwe le wo mongwe le mantšiboeng a mangwe le a mangwe ba mo thuntšhetša seorelo, ba mo direla le dihlabelo tša go tšhungwa ka moka. Ba beakanya dinkgwa tafoleng ye e hlwekilego, gomme mantšiboeng a mangwe le a mangwe ba tšhuma mabone sehlomamaboneng sa gauta. Rena re dira tše Morena a re laetšego tšona, eupša lena le mo tlogetše. ₁₂Morena ke yena moetapele wa rena gomme baprista ba gagwe ba gona mo ba swere diphala, ba šetše ba itokišeditše go di letša gore re thome go lwa le lena. Setšhaba sa Israele, le se ke la lwa le Morena, Modimo wa borakgolokhukhu ba lena! Le ka se ke la mo fenya!”

₁₃Jeroboamo o be a šetše a laetše bahlabani ba gagwe ba bangwe gore ba potologe madira a Juda ba yo a lalela ka morago, mola ba ba šetšego ba lebane le bona. ₁₄Batho ba Juda ba retologa gomme ba bona gore ba dikaneditšwe. Ba llela Morena gore a ba thuše, gomme baprista ba letša diphala. ₁₅Bahlabani ba Juda ba hlaba mokgoši wa ntwa gomme ba hlasela ba etilwe pele ke Abia, mme Modimo a fenya Jerobeamo le madira a Israele. ₁₆Modimo a gafela madira a Israele go a Juda, gomme ona a tšhaba. ₁₇Abia le madira a gagwe ba fenya madira a Israele o šoro – gwa bolawa bahlabani ba Israele ba bakaonekaone ba dikete tše makgolo a a fetšago seatla. ₁₈Ka gona batho ba Juda ba fenya ba Israele, ka tsela yeo ba ba kokobetša, ka gobane Bajuda ba be ba tshephile Morena Modimo wa borakgolokhukhu ba bona.

₁₉Abia a hlomara madira a Jerobeamo gomme a thopa metse ye mengwe ya gagwe, e lego Bethele, Jeshana le Efrone, le metsana ye e lego kgauswi le yona. ₂₀Jerobeamo a se hlwe a kgonne go tielela gape nakong ya ge go sa buša Abia. Morena a mo hlolela lehu la tšhoganetšo.

₂₁Ge e le Abia yena a fela a tia maatla. A nyala basadi ba lesome le metšo ye mene, mme a ba le barwa ba masome a mabedi a metšo ye mebedi, le barwedi ba lesome le metšo ye e selelago. ₂₂Ditaba tše dingwe tša Abia, tše a di boletšego le tše a di dirilego, di ngwadilwe mo go Ditaba tša moprofeta Ido.

₁Kgoši Abia a hwa gomme a bolokwa mabitleng a botatagwe motseng wa Dafida. Asa, morwa wa gagwe, a mo hlatlama bogošing, gomme ge go buša Asa naga ya lala mengwaga ye lesome. ₂Asa a kgahla Morena Modimo wa gagwe ka go dira tše di lokilego le tše botse. ₃A tloša dialetare di šele, a ba a phušola dintotoma tšeo go tšona go bego go khunamelwa medimo ya diswantšho, a pšhatla le dikokwane tša maswika tša borapedi, a rema le dikota tša borapedi. ₄A laela batho ba Juda gore ba dire se Morena, Modimo wa borakgolokhukhu ba bona, a se nyakago, le gore ba latele dithuto ba phethe le ditaelo tša gagwe. ₅Ka gobane a ile a phušola dintotoma tšeo go tšona go khunamelwago medimo ya diswantšho, a ba a tloša le dialetare tša seorelo metseng ka moka ya Juda, naga e ile ya lala mehleng ya pušo ya gagwe. ₆Ka lebaka leo a ageletša metse ya Juda ka merako, gomme nakong yeo gwa se be le ntwa, ka gobane Morena o be a mo file khutšo. ₇A re go batho ba Juda: “A re tiišetšeng metse ka go e ageletša ka merako le go aga ditora tša tlhapetšo le masoro a a kago phekelwa. Naga ye e sa le ya rena gobane re dirile se Morena Modimo wa rena a se nyakago. O re bolokile ka mathokong ohle.” Ka gona ba di aga gomme ba atlega. ₈Kgoši Asa o be a na le bahlabani ba dikete tše makgolo a mararo ba Juda ba ba itlhamilego ka dikotse le marumo, le ba dikete tše makgolo a mabedi le tše masome a seswai ba Benjamene ba ba itlhamilego ka dikotse le mara. Ka moka ga bona e be e le banna ba bogale.

₉Moetopia yo mongwe yo leina la gagwe e bego e le Serage o kile a hlasela Juda ka madira a dikete tše sekete le ka dikoloi tša ntwa tše makgolo a mararo, gomme a ba a yo fihla Maresha. ₁₀Asa a tšwa dira go yo lwa le yena, gomme dihlopha tšeo tše pedi tša ipeakanyetša ntwa ka moeding wa Tsefata, kgauswi le Maresha. ₁₁Asa a rapela Morena Modimo wa gagwe a re: “Morena, ga go yo a swanago le wena yo a ka thušago ba ba fokolago go ba ba nago le maatla. Hle, bjale re thuše, wena Morena Modimo wa rena, ka gobane re botile wena, gomme ka leina la gago re tlile go lwa le madira a a mantšintši. Morena, o Modimo wa rena; a go se be le motho yo a go fenyago.”

₁₂Morena a fenya madira a Baetopia ge Asa le madira a Juda ba ba hlasela. Ba tšhaba, ₁₃gomme Asa le madira a gagwe ba ba rakediša go ba go yo fihla Gerare. Go ile gwa bolawa Baetopia ba bantšintši mo e lego gore bahlabani bao ba ile ba šitwa ke go bokana ba lwa. Ba ile ba fenywa ke Morena le madira a gagwe, gomme madira a Juda a tšea thoto tše ntši. ₁₄Ka morago ba senya metse ya tikologong ya Gerare, ka gobane batho ba moo ba be ba tšhošitšwe ke Morena. Madira a Juda a hula metse yeo ka moka gomme a thopa thoto ye ntši. ₁₅Ba hlasela le mešaša ya badiši, ba thopa dihuswane le dikamela tše ntši. Ka morago ba boela Jerusalema.

₁Moya wa Modimo wa aparela Asaria, morwa wa Odede, ₂gomme a yo gahlanetša Kgoši Asa. A goelela a re: “Ntheetše, Kgoši Asa, le lena batho ka moka ba Juda le ba Benjamene! Morena o tla ba le lena ge le lena le na le yena. Ge le mo nyaka, o tla dira gore le mmone, eupša ge le ka mo tlogela, le yena o tla le tlogela. ₃Baisraele ba phela nako ye telele ka ntle le Modimo wa mmakgonthe, ka ntle le baprista ba go ba ruta, ka ntle le molao. ₄Eupša ge mathata a ba tlela, ba be ba sokologela go Morena Modimo wa Israele. Ba be ba mo nyaka mme a dire gore ba mo hwetše. ₅Mehleng yeo go be go se na motho yo a ka yago felo a bolokegile, ka gobane nageng ye nngwe le ye ye nngwe go be go na le meferefere. ₆Ditšhaba di be di hlaselana, le metse e hlaselana, ka gobane Modimo o be a ba gakantšhitše ka matshwenyego a mantši. ₇Eupša lena le tie, le se ke la nolega moko. Le tla putsetšwa tše le di dirilego.”

₈Ge Kgoši Asa a ekwa profeto yeo ya Asaria, morwa wa Odede, a tia maatla. A tloša medimo yohle ya makgapa nageng ya Juda le ya Benjamene le metseng ye a bego a e thopile nageng ya dithaba ya Efraime. A ba a tsošološa aletare ya Morena ye e bego e le ka kgorong ya Tempele.

₉Bafaladi ba bantši ba kgoro ya Efraime le ya Manase le ya Simeone ba ile ba ngwegela go Asa, ka gobane ba be ba lemogile gore Morena o na le yena. Asa a ba botha ka moka gammogo le batho ba Juda le ba Benjamene. ₁₀Ba kgobokana Jerusalema kgweding ya boraro ya ngwaga wa lesome le metšo ye mehlano wa ge Asa e le kgoši. ₁₁Ka letšatši leo ba direla Morena dihlabelo ka diruiwa tše dingwe tše ba bego ba di thopile, e lego dikgomo tše makgolo a a šupago le dihuswane tše dikete tše di šupago. ₁₂Ba dira kgwerano ye ka yona ba ilego ba itlema gore ba tla dira se Morena, Modimo wa borakgolokhukhu ba bona, a se nyakago, ka dipelo le moya wa bona ka moka. ₁₃Yo mongwe le yo mongwe, mofsa goba motšofadi, monna goba mosadi yo a bego a sa mo khunamele, o be a swanetše go bolawa. ₁₄Ba enela Morena ka legoa le legolo gore ba tla boloka kgwerano yeo, gomme ba goa ba letša diphala le diphalafala. ₁₅Setšhaba ka moka sa Juda se be se thabile ka gobane se be se dirile kgwerano yeo ka dipelo tša sona ka moka. Ba thabela go khunamela Morena, gomme yena a ba amogela mme a ba hlatlola manabeng a bona ka mathoko ohle.

₁₆Kgoši Asa a tloša Maaka, makgolwagwe, maemong a gagwe a makgolo wa kgoši ka gobane o be a betlile seswantšho se se lešago dihlong sa Ashera, modimo wo motshadi. Asa a se rema, a se rathaganya, gomme a se tšhuma ka moeding wa Kidrone. ₁₇Le ge Asa a ile a se ke a phušola dintotoma tšeo go tšona go bego go khunamelwa medimo ya diswantšho, o ile a botegela Morena bophelong bja gagwe ka moka. ₁₈Tšohle tše tatagwe a bego a di abetše Modimo o ile a di bea ka Tempeleng gotee le dilo tša gauta le tša silibera tše yena ka boyena a bego a di file Morena. ₁₉Gwa se hlwe go eba le ntwa go fihlela ka ngwaga wa masome a mararo le metšo ye mehlano wa pušo ya gagwe.

₁Ngwageng wa masome a mararo le metšo ye e selelago wa pušo ya Kgoši Asa wa Juda, Kgoši Basha wa Israele a šwahlela Juda, gomme a thoma go tiiša motse wa Rama gore a tle a thibele batho gore ba se ke ba ya goba ba tšwa nageng ya Juda. ₂Ka gona Asa a tšea silibera le gauta polokelong ya Tempele le ya mošate gomme a di romela Damaskose go Kgoši Benhadade wa Siria, a re: ₃“A re tsošološe kwano yela ya botatagorena. Silibera le gauta šedio. Bjale lesa go kwana le Kgoši Basha wa Israele, gore a tle a gapeletšege go tloša madira a gagwe mo nageng ya ka.”

₄Benhadade a dumela se Asa a se kgopelago, gomme a romela balaodi ba madira a gagwe le madira a bona gore ba yo hlasela metse ya Israele. Ba thopa Iyone, le Dane, le Abele-Bethe-Maaka le metse ka moka ya Naftali yeo go bego go bolokelwa dithoto go yona. ₅Ge Kgoši Basha a ekwa taba yeo a lesa go ageletša Rama, a tlogela modiro woo wa gagwe. ₆Ke moo Kgoši Asa a kgobokantšego banna nageng ya Juda ka moka mme a ba laela gore ba thothe matlapa le dikota tše Basha a bego a ageletša Rama ka tšona, gomme ba di šomiša go ageletša motse wa Geba le wa Mitsepa.

₇Mehleng yeo moprofeta Hanani a ya go Kgoši Asa a re go yena: “Ka gobane o ile wa bota kgoši ya Siria bakeng sa go tshepha Morena Modimo wa gago, madira a kgoši yeo a go phonyokgile. ₈Ga ke re Baetopia le Balibia ba be ba na le madira a mantši le dikoloi tše ntšintši tša ntwa le banamedi ba dipere ba bantšintši? Fela ka gobane o ile wa bota Morena, yena o ile a ba gafela diatleng tša gago. ₉Morena o phela a lebeledišitše lefase ka moka go maatlafatša bao ba mo tshephilego ka dipelo tša bona ka moka. Wena o dirile tša botlatla, gomme go tloga bjale o tla phela o elwa.” ₁₀Seo sa galefiša Asa gomme a tsenya moprofeta yoo kgolegong. Yona mehleng yeo Asa a thoma go gatelela ba bangwe ba setšhaba.

₁₁Ditaba ka moka tša Asa, go tloga mathomong a pušo ya gagwe go iša mafelelong, di ngwadilwe mo go Ditaba tša magoši a Juda le a Israele. ₁₂Ngwageng wa masome a mararo le metšo ye senyane wa ge e le kgoši, o ile a swarwa ke bolwetši bjo bošoro bja maoto; eupša le ka yona nako yeo a se ke a nyaka thušo go Morena, a e nyaka go dingaka. ₁₃Ka ngwaga wa masome a mane le motšo o tee wa pušo ya gagwe a hwa, gomme a ithobalela le botatagwe. ₁₄A bolokwa ka lebitleng la letlapa le a bego a ipetletše lona motseng wa Dafida. Ba mmea leakong le le bego le tšhetšwe dinoko le ditlolo tša mehutahuta tša go nkga bose. Ba gotša mollo wo mogologolo go mo hlompha.