To The Word – Day 132

₁Mehleng ya ge Josia, morwa wa Amone, e le kgoši ya Juda, Morena o ile a botša Sofonia tše di ngwadilwego mo. Sofonia e be e le morwa wa Kushe, Kushe morwa wa Gedalia, Gedalia morwa wa Amaria, Amaria morwa wa Hiskia.

₂Morena a re: “Ke tlilo fediša tšohle tše di lego lefaseng. ₃Ke tlilo fediša batho, diphoofolo, dinonyana le dihlapi. Ke tla phuhlamiša bakgopo. Ke tla fediša batho lefaseng. Ke realo, nna, Morena.

₄“Ke tla otla batho ba Juda le badudi bohle ba Jerusalema. Bohle ba ba khunamelago Baale ke tla ba fediša felo fa, gomme ga go yo a tlago gopola baprista ba ba mo hlankelago. ₅Bao ba khunamelago letšatši goba ngwedi goba dinaledi godimo ga ditlhaka tša dintlo ke tla ba bolaya. Ke tla bolaya le bao ba rego ba nkhunamela mme ba ikana ka nna, ba ba ba ikana le ka Milkomo. ₆Ke tla bolaya ba ba kgelogago ba sa tlego go nna, le ba ba sa nkgopelego maele.”

₇Letšatši la go tla ga Morena le kgauswi, ka gona le iphuthe mo pele ga gagwe. Morena o itokišetša go hlaba setšhaba sa gagwe bjalo ka diphoofolo tša sehlabelo. ₈Morena o re: “Mohlang woo wa go hlaba ke tla otla baetapele, le barwa ba kgoši, le bohle ba ba latelago ditlwaedi di šele. ₉Ke tla otla bohle ba ba tshelago serepodi sa tempele ya modimo wa bao ba o khunamelago, le ba ba tlatšago tempele ya medimo ya bona ka dithoto tše ba ikhweleditšego tšona ka boganka le ka bomenemene.”

₁₀Morena o re: “Mohlang woo batho ba tla hlaba mokgoši ba le Lesorong la Dihlapi. Ba tla golola ba le karolong ya motse ye e bitšwago Motsemofsa, mme kua mebotong go tla kwagala lešata le legolo. ₁₁Gololang, lena badudi ba karolo ya motse ye e bitšwago Legolo, ka gobane babapatši bohle ba tla be ba hwile, bohle ba ba elago tšhelete ba tla be ba bolailwe.

₁₂“Mehleng yeo ke tla putuka Jerusalema ka lebone. Ke tla otla bao ba letšago molodi wa nko, ba ipotago ba re: ‘Morena a ka se re dire selo, e ka ba se sebotse goba se sebe.’ ₁₃Ba tla hulwa mahumo a bona, ba thubelwa le dintlo. Dintlo tše ba di agago ba ka se di dule, le beine ya merara ye ba e bjalago ba ka se e nwe.”

₁₄Letšatši le legolo la Morena le kgauswi, le kgauswi kudu, le gona le tla ka go phakiša! Sello sa tšatši leo la Morena e tla ba se bohloko, le bagale ba tla golola. ₁₅E tla ba letšatši la kgalefo, letšatši la mahloko le mahlomola, letšatši la tobo le tahlego, letšatši la leswiswi la kgampipi, letšatši la maru le monyama, ₁₆letšatši la mollo wa phalafala, le mekgoši ya madira a a hlaselago metse ye e ageleditšwego ka merako le dibo tše di phagamego.

₁₇Morena o re: “Ke tla tlaletša batho mo ba tlago ba ba sepela ba phophola bjalo ka difofu, ka gobane ba mphošeditše. Madi a bona a tlilo tšhollwa fase, le mateng a bona a kgotholwa mo nkego ke boloko.”

₁₈Mohlang woo wa kgalefo ya Morena silibera ya bona le gauta di ka se ba thuše. Lefase ka moka le tla tšhungwa ka mollo wa kgalefo ya gagwe. Yena o tla bolaya badudi bohle ba lefase gasehlogo.

₁Hee, lena setšhaba sa go hloka dihlong, gopodišišang tše le di dirago ₂pele ga ge Modimo a le dira se a ikemišeditšego sona, pele Letšatši la Kahlolo le fihla mme lena le tšhungwa ke kgalefo ya Modimo go swana le mooko ge o fišwa ke mollo, pele letšatši la pefelo ya gagwe le le fihlela. ₃Nyakišišang thato ya Morena, lena baikokobetši bohle ba mo nageng ba le phethago ditaelo tša gagwe. Dirang tše di lokilego gomme le ikokobetše pele ga Morena. Mohlomongwe le ka phephišwa kotlo ka letšatši la kgalefo ya gagwe.

₄Motseng wa Gasa go tla tšhabja, Ashkelone e tla ba marope, batho ba Ashdode ba tla rakwa mosegare wo monana, le motse wa Ekrone o tla thubja. ₅Le hwile, lena Bafilista le dulago lebopong la lewatle. Morena o šetše a le ahlotše, lena badudi ba Kanana, naga ya Bafilista. O tla le feleletša, gwa se šale le o tee wa lena. ₆Naga ya lena ye e bapilego le lewatle e tla fetoga meraka ya badiša le mašaka a dihuswane. ₇E tla ba ya mašaledi a batho ba Juda. Ba tla fudiša mehlape ya bona gona moo, gomme ba robala ka dintlong tša Ashkelone. Morena Modimo wa bona o tla ba hlokomela, a ba atla gape.

₈Morena Ramaatlaohle o re: “Ke kwele batho ba Moaba le ba Amone ba rumola setšhaba sa ka ba se roga, ba bile ba ikgantšha ba re ba tla thopa naga ya sona. ₉Ke ikana ke le Modimo yo a phelago wa Israele gore Bamoaba le Baamone ba tla fedišwa bjalo ka badudi ba Sodoma le ba Gomora. Dinaga tša bona e tla ba felo ga ditshehlo le meepo ya letswai le leganata go ya go ile. Mašaledi a setšhaba sa ka a tla ba hula, a ba amoga naga.”

₁₀Ke ka mo batho ba Moaba le ba Amone ba tlago otlelwa boikgantšho bja bona ka gona. Ba tla otlwa ka ge ba rogile setšhaba sa Morena Ramaatlaohle, ba bile ba itheta ba re ba tla se fenya. ₁₁Go bona Morena o tla šiiša. O tla fediša medingwana yohle ya lefase, ya ba gona ditšhaba tšohle tša mabopong a lewatle di mo khunamelago, bangwe le bangwe nageng ya bona.

₁₂Le lena Baetopia, Morena o tla le bolaya ka tšhoša.

₁₃O tla otla naga ya Asiria ka leboa a e fediša. Motse wa Ninibe o tla o fetoša marope le lesehla, lehlokameetse. ₁₄Ke mo go tlago robala mehlape ya diruiwa le diphoofolo tša mehutahuta. Maribiši a tla robala dikokwaneng tša wona, a lla mafasetereng; magokobu a tla re gwaa, gwaa, direpoding. Dikota tša mesedere tša meago ya wona di tla be di hlomotšwe. ₁₅Ke tšona tše di tlago hlagela motse woo badudi ba wona ba dulago ba iketlile le gona ba bolokegile. Batho ba gona ba bona nke motse wa bona o feta metse yohle ya lefase. E tlilo ba lefelo le le ngadilwego, letšaba la diphoofolo tša lešoka. Bafeti bohle ba tsela ba tla o kgotsa ka molodi, ba šikinya dihlogo.

₁Jonna, Jerusalema, motse wa manganga, wa go tšhilafatšwa ke dibe tša badudi ba wona, motse wo o hlakišago baagi ba wona! ₂Ga o theeletše Morena, ebile ga o dumele ge a o kgala. Ga o bote Morena, le gona ga o khunamele yena Modimo wa wona. ₃Baetapele ba wona ba bjalo ka ditau tše di bopago; baahlodi ba wona nke ke diphiri tše di tsomago ka swahlane, tše di sa šadišetšego la gosasa nthathana. ₄Baprofeta ba gona ga ba na boikarabelo ebile ga ba tshephagale; baprista ba gona ba tšhilafatša tše dikgethwa, le gona ba hlatholla melao ya Modimo gore e lokele bona. ₅Le ge go le bjalo, Morena o sa le ka mo motseng, mme ke moloki, ga a dire tša go se loke. Mosong wo mongwe le wo mongwe o šetša gore badudi ba motse ba direlwe ka toka. Le ge go le bjalo, badiratšempe ba gona ga ba na dihlong ka tše ba di dirago.

₆Morena o re: “Ditšhaba tše dingwe ke di fedišitše, dibo tša bona ya ba marope. Mebila ya bona e wetše kgwahlana; ga go sa sepela motho go yona. Metse ya bona e phušotšwe, ga go sa dula motho, ga go sa na moagi moo. ₇Ke be ke gopola gore ke mo badudi ba Jerusalema ba tlago mpoifa mme ba dumela go kgalwa ke nna, le gore ba ka se tsoge ba lebetše dikotlo tšohle tše ke ba otlilego ka tšona. Eupša ya ba gona ba fišegelago go dira tše mpe.”

₈Morena o re: “Bjale ge, le ntetele go fihlela mohla ke tlelago go sekiša ditšhaba. Ke feditše le pelo gore ke tla kgoboketša ditšhaba, ka phutha le batho ba mebušo, gore ke tle ke tšhollele kgalefo ya ka godimo ga bona. Lefase ka moka le tla tšhungwa ke kgalefo ya ka ye e laumago bjalo ka mollo.

₉“Ke mohla ke tlago hlwekiša dipolelo tša ditšhaba gore bohle ba rapele nna, Morena, ba ntlhankele mmogo. ₁₀Banthapedi, e lego setšhaba sa ka se se šwalalanego, ba tla ntlišetša dikabelo ba etšwa ka kua ga dinoka tša Etopia. ₁₁Mehleng yeo, lena badudi ba Jerusalema, le ka se sa lewa ke dihlong tša ge le ile la ntsogela maatla. Bao ba ipshinago ka boikgantšho bja bona ke tla ba tloša motseng wa lena, gomme le ka se sa ba le makoko thabeng ya ka ye kgethwa, ₁₂gobane motseng wa lena ke tla šadiša baikokobetši le babotlana ba ba tlago tšhabela go nna. ₁₃Mašaledi a Israele a ka se dire tše kgopo, a ka se bolele maaka, ebile a ka se fore motho. A tla atlega, a bolokega, a se tšhošwe ke motho.”