To The Word – Day 133

_1-2Kgoši Zerksese o be a buša dilete tše 127, go tloga India go ba go yo fihla Etopia, a le setulong sa gagwe sa bogoši kua Susa, motsemošate.

₃Ka ngwaga wa boraro wa pušo ya gagwe a direla babušiši ba gagwe ka moka le bahlanka monyanya. Madira a Persia le a Media a be a le gona, gotee le bakgomana le bahlankedi ba dilete tša gagwe. ₄A ba bontšha mahumo a kgoro ya mošate gotee le botse bja yona le bogolo bja bogoši bja gagwe matšatši a mantši, e lego a lekgolo le masome a seswai.

₅Ka morago ga moo a direla banna ka moka, bahumi le badiidi, ba motsemošate Susa monyanya. Wona wa tšea matšatši a a šupago o swaretšwe lebaleng le le lego ka serapeng sa mošate. ₆Kgoro ya gona e be e kgabišitšwe ka digaretene tša lešela la mmala wo mošweu le wo serolane tše di kgokeletšwego mefsiring ya silibera mo dikokwaneng tša magakabje ka dithapo tša lešela le boletiana la bohwibidu bja moretele. Ditulo tša gauta le silibera di be di beilwe lebaleng leo lebato la lona le bego le batetšwe ka magakabje, maswikana a mahwibidu, perela le thekoise. ₇Dino di be di tlišwa ka dinwelo tše di sa swanego tša gauta, gomme beine ya mošate e le ye ntši. ₈Motho o be a sa lekanyetšwe dino; kgoši o be a laetše bahlanka ba mošate gore yo mongwe le yo mongwe a nwe ka mo a ratago ka gona.

₉Ka kua lapeng la mošate Mohumagadi Bashti le yena o be a diretše basadi monyanya.

₁₀Ka letšatši la bošupa la monyanya, ge kgoši a ikhoretše dino, a bitša banna ba ba šupago ba ba amogilwego bonna ba e bego e le bahlanka ba gagwe ba bagolo, Mehumane, Biseta, Harbona, Bigta, Abagtha, Setare le Karkase. ₁₁A ba laela gore ba tliše Mohumagadi Bashti a rwele mphapahlogo wa gagwe wa bogoši. Gape mohumagadi yoo e be e le mosadi yo mobotse, gomme kgoši a nyaka go kgantšhetša bakgomana le baeng ba gagwe ka moka botse bja gagwe. ₁₂Eupša ya re ge bahlanka bao ba botša Mohumagadi Bashti se kgoši a se laetšego, yena a gana go tla. Gomme seo sa befediša kgoši kudu.

₁₃Kgoši o be a tlwaetše go kgopela keletšo ye e nepagetšego mabapi le ditaba tša molao le toka; ka gona a bitša baeletši ba gagwe bao ba bego ba tseba ditaba. ₁₄Ba a bego a atiša go kgopela keletšo go bona e be e le Karshena, Shetare, Admatha, Tarshishe, Merese, Marsena le Memugane, bona bakgomana ba ba šupago ba Persia le Media ba e bego e le ba maemo a godimo mmušong. ₁₅A re go banna bao: “Nna, Kgoši Zerksese, ke romile bahlanka ba ka go Mohumagadi Bashti gore ba yo mmotša taelo ya ka, fela yena o ganne go e phetha! Ka molao re dira eng ka yena?”

₁₆Ke moo Memugane a begetšego kgoši le bakgomana ba gagwe a re: “Mohumagadi Bashti ga se a phošetša kgoši fela, o phošeditše le bakgomana ba gagwe – gabotsebotse o phošeditše banna bohle mmušong wohle wa kgoši. ₁₇Mosadi yo mongwe le yo mongwe o tla thoma go nyatša monna wa gagwe ge a ekwa se mohumagadi a se dirilego. Ba tla re: ‘Kgoši Zerksese o laetše Mohumagadi Bashti gore a tle go yena, gomme yena a gana.’ ₁₈Ge basadi ba bakgomana ba mošate wa Persia le Media ba ekwa se mohumagadi a se dirilego, ba tla botša banna ba bona taba ye pele ga ge le tšatši le dikela. Basadi mo gohle ba ka se sa hlompha banna ba bona, mme banna ba tla ba galefela. ₁₉Ge kgoši a dumela, a a bee molao wo o rego Bashti a se sa tsoga a tlile pele ga kgoši. A a laele gore molawana woo o ngwalwe melaong ya Persia le Media gore o se ke wa tsoga o fetošitšwe. Gomme madulo a gagwe a bogoši a a fe mosadi yo mongwe yo a mo phalago. ₂₀Ge molao wo wa kgoši o begwa gohle mmušong wo mogolo wo, mosadi yo mongwe le yo mongwe o tla hlompha monna wa gagwe ka tshwanelo, le ge monna yoo e le mohumi goba modiidi.”

₂₁Kgoši le bakgomana ba gagwe ba ile ba kgahlwa ke keletšo yeo, gomme kgoši a dira se Memugane a se boletšego. ₂₂A romela mangwalo seleteng se sengwe le se sengwe sa kgoši ka mmolelo le mongwalelo wa sona, a a rego monna yo mongwe le yo mongwe a laole lapa la gagwe, gomme se a se bolelago se phethwe.

₁Ka morago, le mola kgalefo ya kgoši e šetše e okobetše, yena o ile a no fela a gopola se Bashti a kilego a se dira le se a ilego a se bega ka ga yena. ₂Ka gona bahlanka ba bangwe ba kgoši ba bagolo ba re: “Ke eng o sa ntšhe lesolo wa tsoma dikgarebe tše botsana? ₃O ka bea batseta seleteng se sengwe le se sengwe sa mmušo wa gago gore ba tliše dikgarebjana tše botsana ngwakong wa basadi mo Susa, motsemošate. O ba fe Hegai, moamogwabonna yo a hlokometšego basadi ba gago, gore a ba šetše, gomme ba fiwe ditlolo tša go ithakga. ₄O tšee ngwanenyana yo o mo ratago kudu o mo dire mohumagadi legatong la Bashti.”

Kgoši a bona keletšo yeo e lokile, gomme a e amogela.

₅Gona moo Susa go be go dula Mojuda yo mongwe yo a bego a bitšwa Mordekai, morwa wa Jaire; yena e be e le wa kgoro ya Benjamene, gomme borakgolokhukhu ba gagwe ba bangwe e le Kishe le Shimi. ₆Mola Kgoši Nebukadnesare wa Babilone a thopa Joyakine wa Juda, kgoši ya Jerusalema, gotee le sehlopha sa mathopša, Mordekai le yena o be a le gare ga mathopša ao. ₇O ile a tšea Estere, morwedi wa rangwaneagwe, a mo godiša bjalo ka ngwana wa gagwe ge batswadi ba gagwe ba hlokafetše. Leina la gagwe la Seheberu e be e le Hadasa. E be e le mosetsana yo mobotse wa go bopega.

₈Ge kgoši a seno bea molao wo mofsa banenyana ba bantši ba tlišwa Susa, Estere o be a le gare ga bona. Le yena a tlišwa mošate gomme a hlokomelwa ke Hegai yo a bego a hlokometše ngwako wa basadi. ₉Hegai a rata Estere ka gore o be a mo kgahla. Ka ntle le go senya sebaka, a mo fa ditlolo tša go thakga letlalo, gotee le dijo tše di swanetšego. A mo nea madulo a mabotsebotse moo ngwakong wa basadi, gomme a kgetha dikgarebe tše di šupago moo mošate gore di mo hlankele.

₁₀Go ya ka keletšo ya Mordekai, Estere o be a utile gore ke yena Mojuda. ₁₁Tšatši le lengwe le le lengwe Mordekai o be a fela a itshepetšatshepetša pele ga kgoro ngwakong wa basadi, gore a bone gore Estere o phela bjang, le gore go tla direga eng ka yena.

₁₂Basadi ba ile ba tšea ngwaga ba ithakga ka ditlolo – dikgwedi tše di selelago tša mathomo ba be ba tlola ka makhura a mira, gomme tše dingwe tše selelago ba tlola ka balsamo le ditlolo tše dingwe. Ka morago ga moo banenyana ba išwa go Kgoši Zerksese ka o tee ka o tee. ₁₃Ge ngwanenyana a etšwa ka ngwakong wa basadi a eya go kgoši, o be a dumeletšwe go apara se a se ratago. ₁₄O be a eya mantšiboa, gomme mosong a išwe ngwakong wo mongwe wa basadi, a hlokometšwe ke Shaashegase, moamogwabonna yo a bego a hlokomela metlabo ya kgoši. O be a sa boelele go kgoši, ge e se ge a kgahlile kgoši moo e kago mmitša ka leina.

₁₅Nako ya gore Estere a ye go kgoši ya fihla. Estere yo e be e le morwedi wa Abihaile, rangwane wa Mordekai yo a mo godišitšego bjalo ka morwedi wa gagwe. Yena o be a kgahla batho ka moka ba ba mmonago. Ge nako ya gore a ye e fihla, o ile a apara tšona tšela Hegai, moamogwabonna yo a bego a hlokometše ngwako wa basadi, a mmoditšego gore a di apare. ₁₆E be e le ka ngwaga wa bošupa ge Zerksese e le kgoši, ka kgwedi ya lesome ya Tebete, ge Estere a tlišwa go kgoši mošate. ₁₇Kgoši a mo rata go feta basadi ba gagwe ka moka; gomme a mo kganyoga, a ba a kgahlwa ke yena go feta banenyana bale ba bangwe bohle. A mo rweša mphapahlogo wa bogoši gomme a mmea mohumagadi legatong la Bashti. ₁₈Ka morago kgoši a direla Estere monyanya wo mogolo, gomme a laletša bakgomana le bahlanka ba gagwe. A bega gore letšatši leo ke letšatši la boikhutšo mmušong wa gagwe ka moka, gomme a abela batho dimpho tša segoši.

₁₉Ka nako yeo kgoši o be a šetše a beile Mordekai molaodi wa mošate. ₂₀Estere yena o be a sešo a utolla gore ke yena Mojuda. Mordekai o be a mo laile gore a se botše motho, gomme yena a mo theeletša bjalo ka ge a be a mo theeletša go tloga bjaneng mola a sa mo godiša.

₂₁Nakong ya ge Mordekai e le molaodi wa mošate, Bigtana le Tereshe, baamogwabonna ba babedi ba mošate ba ba bego ba hlapetša mejako ya go tsena ka diphapošing tša kgoši, ba thoma go hloya Kgoši Zerksese gomme ba loga maano a go mmolaya. ₂₂Mordekai a kwa taba ye gomme yena a e botša Mohumagadi Estere, yo a ilego a botša kgoši se Mordekai a se kwelego. ₂₃Go ile gwa nyakišišwa gomme gwa hwetšwa gore taba yeo ke therešo, ka gona banna bao ba babedi ba fegwa koteng. Kgoši a laela gore taba yeo e ngwalwe ka pukung ya ditaba tša mmušo wa gagwe.

₁Ka morago ga lebaka Kgoši Zerksese a hlatlošetša monna yo mongwe wa go bitšwa Hamane maemong a botonakgolo. Hamane yo e be e le morwa wa Hamedatha, Moagaga. ₂Kgoši o ile a laela bahlanka ba gagwe ka moka gore ba hlomphe Hamane ka go mo khunamela le go mo obamela. Ka moka ba ile ba dira bjalo ka ntle ga Mordekai, yo a ilego a gana. ₃Bahlanka ba bangwe ba mošate ba mmotšiša gore o ganelang go phetha taelo ya kgoši; ₄gomme letšatši le lengwe le le lengwe ba fela ba mmotša taba yeo, fela yena a se ba theeletše. O be a ba fetola a re: “Ke nna Mojuda, gomme nka se khunamele Hamane.” Bona ba nama ba botša Hamane, ba maketše gore na o tla kgotlelela se Mordekai a se dirago. ₅Hamane o ile a galefa ge a lemoga gore Mordekai o gana go mo khunamela le go mo obamela, ₆gomme ge a ekwa gore Mordekai ke Mojuda, a ikemišetša go otla le Bajuda ba bangwe, e sego Mordekai a nnoši. Ka gona a loga maano a go bolaya Mojuda yo mongwe le yo mongwe mo mmušong wa Persia ka moka.

₇Ka ngwaga wa lesome le metšo ye mebedi wa pušo ya Kgoši Zerksese, kgweding ya mathomo ya Nisane, Hamane a laela gore go dirwe matengwa, ona a be a bitšwa “purime”, gore a tsebe kgwedi le letšatši le le swanetšego la go phetha morero woo wa gagwe. Gwa ntšhwa letšatši la lesome le metšo ye meraro la kgwedi ya lesome le metšo ye mebedi, kgwedi ya Adara.

₈Ke moo Hamane a boditšego kgoši a re: “Go na le setšhaba se sengwenyana se se gašanego le ditšhaba tše di lego dileteng ka moka tša mmušo wa gago. Ba na le mekgwa ye e sa swanego le ya ditšhaba tše dingwe. Godimo ga moo ga ba phethe melao ya mmušo wa kgoši; ka gona, ga wa swanela go ba lesa. ₉Ge o dumela, kgoši, a go bewe molao wa go re ba fedišwe. Ge o ka dira seo, ke tla tliša silibera ya dikilokramo tše dikete tše makgolo a mararo matlotlong a mošate tša go sepediša ditaba tša mmušo.”

₁₀Kgoši a khwamola palamonwana ya gagwe ye e bego e tlokilwe sekibo sa mošate a e nea Hamane, lenaba la Bajuda, morwa wa Hamedatha, Moagaga. ₁₁Kgoši a re go yena: “Tšhelete yeo itshwarele yona; setšhaba seo sona o dire ka sona se o se ratago.”

₁₂Ka gona, ka letšatši la lesome le metšo ye meraro la kgwedi ya mathomo, Hamane a bitša bangwaledi ba kgoši a ba botša pego ye e swanetšego go fetolelwa mebolelong le mengwalong yohle ye e šomišwago mmušong wa kgoši, le go romelwa go dintona, balaodi le bakgomana ka moka. Pego ye e ile ya phatlalatšwa ka leina la Kgoši Zerksese, gomme ya kibja ka palamonwana ya gagwe. ₁₃Dikitimi di ile tša fihliša pego yeo seleteng se sengwe le se sengwe sa mmušo. Yona e be e re Bajuda ka moka – ba bafsa le ba bagolo, basadi le bana – ba fedišwe ka letšatši le tee, letšatši la lesome le metšo ye meraro la kgwedi ya Adara. Ba bolawe ntle le lešoko, gomme dithoto tša bona di thopše. ₁₄Pego yeo e be e swanetše go dirwa molao mme e begwe phatlalatša seleteng se sengwe le se sengwe, gore mang le mang a be a itokišitše ka letšatši leo.

₁₅Ka taelo ya kgoši molao woo o ile wa begwa phatlalatša Susa, motsemošate, gomme dikitimi tša akgofa tša iša pego yeo dileteng tšohle. Kgoši le Hamane bona ba itulela ba nwa, mola motse wa Susa o le gare o huduega.

₁Ge Mordekai a ekwa tšohle tše di diregilego, a gagola diaparo tša gagwe ka manyami. A apara diaparo tša go ilela, a itšhela hlogo ka melora gomme a sepela le motse a hlabošitše lentšu a lla gabohloko, ₂a ba a fihla lesorong la kgoro ya mošate. Fela a se ke a tsena, ka gobane go be go se motho yo a dumeletšwego go tsena ka kgoro ya mošate a apere diaparo tša go ilela. ₃Dileteng ka moka mo pego yeo ya kgoši e bego e tsebagaditšwe gona go be go kwala sello se segolo gare ga Bajuda. Ba itima dijo, ba lla ba golola, gomme ba bantši ba apara diaparo tša go ilela ba patlama meloreng.

₄E rile ge badiredi ba Estere ba basadi le baamogwabonna ba gagwe ba mmotša se Mordekai a se dirago, yena a tshwenyega kudu. A romela Mordekai diaparo gore a di apare mme a apole tšeo tša go ilela, fela Mordekai a di gana. ₅Ke moo Estere a biditšego Hatake, yo mongwe wa baamogwabonna ba mošate yo a beilwego ke kgoši gore a hlankele Estere, a mo laela gore a ye go Mordekai go yo nyakišiša gore se a se dirago se šupa eng, le gore ke ka lebaka lang a se dira. ₆Gomme Hatake a ya go Mordekai lepatlelong la motse kua lesorong la kgoro ya mošate. ₇Mordekai a mo laodišetša tšohle tše di mo hlagetšego, le gore Hamane o re o tla tliša tšhelete ye kaakang matlotlong a mošate ge Bajuda ka moka ba ka bolawa. ₈A neela Hatake lengwalo le le ngwalolotšwego la pego ye e tsebagaditšwego kua Susa ye e rego Bajuda ba fedišwe. Mordekai a mo kgopela gore a le bontšhe Estere, a mo hlathollele gore ditaba di eme bjang, a be a mmotše gore a ye go kgoši a mo rapele mme a mo kgopele gore a šokele setšhaba seo sa gaboyena Estere. ₉Hatake a dira bjalo, ₁₀gomme Estere a re a boele go Mordekai a mmotše a re: ₁₁“Ge motho ofe le ofe, monna goba mosadi, a ka tsena ka lapeng go yo bona kgoši a se a bitšwa, o a bolawa. Woo ke molao; mang le mang o a o tseba, go thoma ka bahlanka ka moka ba kgoši go fihla ka batho ba dilete tša gagwe. Go na le tsela e tee fela yeo ka yona motho a ka phemago molao wo: Ge kgoši a ka šupa motho ka molamo wa gagwe wa bogoši wa gauta, gona motho yoo a ka se bolawe. Eupša e šetše e le kgwedi nna ke se ka bitšwa.”

₁₂Ge Mordekai a ekwa se Estere ₁₃a se boletšego, a roma batseta gore ba mo eletše ba re: “O se ke wa gopola gore ka gore o wa mošate wena o ka se bolawe le Bajuda ba bangwe, ₁₄gobane le ge o ka no ikhomolela gonabjale, Bajuda ba tla thušwa ke legodimo ba phologa; eupša wena o tla hwa, gomme lapa la tatago la felelela. Gomme go tseba mang – mohlomongwe bohumagadi o bo beetšwe yona nako ye!”

₁₅Estere a roma batseta go Mordekai gore ba mo fetole ba re: ₁₆“Sepela o bothe Bajuda ka moka ba ba lego motseng wa Susa. Le itime dijo ka lebaka la ka. Le se je, le se nwe matšatši a mararo le mašego a ona. Le nna gotee le badiredi ba ka ba basadi re tla itima. Ka morago ga moo ke tla ya go kgoši, le ge molao o gana. Ge eba ka go dira bjalo ke tla hwa, gona ke tla no hwa.”

₁₇Ke moka Mordekai a tloga a yo dira tšohle tše Estere a mmoditšego gore a di dire.

₁Ka letšatši la boraro la ge Estere a itima dijo, a apara diaparo tša gagwe tša bohumagadi gomme a tsena ka lapeng la mošate, a ya a ema moo a lebane le phapoši ye setulo sa bogoši se se bego se le ka go yona. Kgoši yena o be a le ka gare, a dutše setulong sa gagwe sa bogoši a lebane le mojako. ₂Ya re ge kgoši a bona Mohumagadi Estere a eme lapeng, a mo lebelela ka botho gomme a mo šupa ka molamo wa bogoši wa gauta. Ke moka Estere a batamela a kgwatha ntlha ya wona. ₃Kgoši a napa a mmotšiša a re: “Molato ke eng, Mohumagadi Estere? Mpotše se o se nyakago, gomme o tla se fiwa le ge e ka ba seripa sa mmušo wa ka.”

₄Estere a mo fetola a re: “Ge o dumela, kgoši, o tle le Hamane lehono monyanyeng wo ke go direlago wona.”

₅Kgoši a nama a laela Hamane gore a tle ka pela, gore ba tle ba phethe se Estere a se kgopetšego. Ka gona kgoši le Hamane ba ya monyanyeng woo ga Estere. ₆Ya re ge go nwewa beine kgoši a re go Estere: “Mpotše se o se nyakago, gomme o tla se fiwa. Ke tla go fa se o se kgopelago, le ge e ka ba seripa sa mmušo wa ka.”

₇Estere a mo fetola a re: ₈“Ge o le yo botho go nna, kgoši, mo e lego gore o ka mpha se ke se kgopelago, gona o tle le Hamane bosasa monyanyeng wo mongwe wo ke tlago le direla wona. Ke ka nako yeo moo ke tlago go botša, kgoši, se ke se nyakago.”

₉Ge Hamane a tloga moo monyanyeng o be a thabile, pelo ya gagwe e le ye tšhweu. Eupša a bona Mordekai lesorong la kgoro ya mošate, gomme ya re ge Mordekai a sa emelele, le gona a sa bontšhe gore o a mo hlompha, a mo tukela bogale. ₁₀Eupša a no itshwara, a ya gae. A laletša bagwera ba gagwe gore ba tle lapeng la gagwe, gomme a kgopela Sereshe, mosadi wa gagwe, gore a be nabo. ₁₁O ile a ba kgantšhetša ka moo a humilego, ka moo a nago le barwa ba bantši, ka moo kgoši a mo hlatlošeditšego maemong a godimo, le ka moo yena a fetago bakgomana le bahlanka ba kgoši ka gona. ₁₂Hamane a tšwela pele a re: “Go feta moo, Mohumagadi Estere ga se a direla motho monyanya ge e se nna fela le kgoši, gomme le bosasa re sa laleditšwe. ₁₃Eupša tšeo ka moka ga di nkgotsofatše ge ke sa bona Lejuda lela ba rego ke Mordekai le dutše lesorong la kgoro ya mošate.”

₁₄Ke moo mosadi le bagwera bale ba gagwe ka moka ba mmoditšego ba re: “A go epelwe kota ya botelele bja dimetara tše masome a mabedi le metšo ye meraro. Ke moo bosasa mosong o ka kgopelago kgoši gore Mordekai a fegwe go yona, ka morago wa ya monyanyeng o thabile.” Hamane a bona taba yeo e le ye botse, gomme a laela gore kota yeo e epelwe.

₁Bjona bošegong bjoo kgoši a lala a se a robala, ka gona a laela gore puku ya ditaba tša mmušo e tlišwe go yena gomme a e balelwe. ₂Karolong ye e ilego ya balwa go be go na le ditaba tša ka moo Mordekai a kilego a utolla maanomabe a go bolaya kgoši, maanomabe a Bigtana le Tereshe, baamogwabonna ba babedi ba mošate bale ba bego ba leta diphapoši tša kgoši. ₃Kgoši a botšiša a re: “Na Mordekai re ile ra mo hlompha ra ba ra mo putsa bjang tabeng yeo?”

Bahlanka ba gagwe ba mo fetola ba re: “Ga se a ka a direlwa selo.”

₄Kgoši a ba botšiša a re: “Kgane go na le yo mongwe wa bakgomana mo mošate?”

Gomme Hamane o be a sa tšo fihla kgorong. Yena o be a tlile go kgopela kgoši gore Mordekai a fegwe koteng yeo e bego e šetše e epetšwe. ₅Ka gona bahlanka ba mo fetola ba re: “Hamane o gona mo mme o nyaka go go bona.”

Kgoši a re: “A a tsene.”

₆Ke moo Hamane a tsenego, gomme kgoši a re go yena: “Go na le motho yo mongwe yo ke tlogago ke nyaka go mo hlompha. A motho yoo ke mo direle eng?”

Hamane a ipotšiša a re: “Na e ka ba mang yo kgoši a nyakago go mo hlompha ka mokgwa wo? Ke nna, ga go yo mongwe.”

_7-8Ke gona a fetotšego kgoši a re: “A diaparo tša bogoši di tlišetšwe monna yoo, tšona diaparo tše wena mong o di aparago. A pere ya gago e rwešwe sekgabišo sa bogoši. ₉Bjale o laele yo mongwe wa bakgomana ba gago ba bagolo gore a apeše monna yoo diaparo tšeo, a mo hlahle a mo putliše lepatlelo la motse monna yoo a nametše pere yela. Gomme ge ba putla mokgomana yoo a tšame a goa a re: ‘Bonang ka moo kgoši a putsago monna yo a ratago go mo hlompha!’ ”

₁₀Gomme kgoši a re go Hamane: “Itlhaganele o yo tšea diaparo tšeo le pere, gomme o hlomphe Mordekai, Mojuda, ka go mo direla tšohle tše o di boletšego. O tla mo hwetša a dutše lesorong la kgoro ya mošate.”

₁₁Ke moka Hamane a yo tšea diaparo tšeo le pere. A apeša Mordekai diaparo tšeo, gomme Mordekai a namela pere yela, mme Hamane a mo putliša lepatlelo la motse a goa a re: “Bonang ka moo kgoši a putsago monna yo a ratago go mo hlompha!”

₁₂Ka morago ga moo Mordekai a gomela lesorong la kgoro ya mošate, mola Hamane yena a potlakela lapeng la gagwe a ikhurumeditše hlogo a nyamile. ₁₃A fihla a botša mosadi wa gagwe le bagwera bale ba gagwe ka moka tšohle tše di mo hlagetšego. Ke moo mosadi le bagwera bale ba gagwe ba mahlajana ba itšego go yena: “Ke gona ge o thoma go ušwa ke Mordekai. Yena ke Mojuda, gomme o ka se mo kgone. Ruri, o ka se mo dire selo.”

₁₄Ba re ba sa bolela, baamogwabonna ba mošate ba tsena ba itlhaganetše ba tlile go iša Hamane monyanyeng ga Estere.

₁Ka gona kgoši le Hamane ba yo ja le Estere ₂la bobedi. Ya re ge go nwewa beine kgoši a botšiša Estere gape a re: “Bjale ge, Mohumagadi Estere, o nyaka eng? Mpotše, gomme o tla fiwa se o se kgopelago, le ge e ka ba seripa sa mmušo.”

₃Mohumagadi Estere a mo fetola a re: “Ge eba ke go kgahla ebile o dumela go theeletša kgopelo ya ka ya bošuana, kgoši, ke no kgopela gore nna le setšhaba sa gešo re phele. ₄Nna le setšhaba sa gešo re rekišitšwe gore re fedišwe. Gomme ge nkabe re rekišitšwe gore re be makgoba nkabe ke ile ka ikhomolela; eupša re šetše re le kgauswi le go fedišwa, go swielelwa, gomme lenaba leo le ka se kgone go lefa kgoši tahlegelo yeo.”

₅Ke moo Kgoši Zerksese a botšišitšego Mohumagadi Estere a re: “Ke mang yo a ka bago le bogajana bja go dira taba ya mohuta woo? Na monna yoo o kae?”

₆Estere a mo fetola a re: “Motlaiši le lenaba la rena ke yena monna yo mobe yo, Hamane!”

Hamane a gakanega pele ga kgoši le mohumagadi. ₇Ke moo kgoši a emeletšego a galefile, gomme a tšwela ntle a ya ka serapeng sa mošate. Hamane a bona gore kgoši o ikemišeditše go mo otla ka lebaka la bobe bjoo; ka gona yena a šala a kgopela Mohumagadi Estere gore a se ke a bolawa. ₈Hamane o be a sa tšo itahlela fase setulong se Estere a bego a dutše go sona a kgopela tshwarelo, ge kgoši a boela ka phapošing a etšwa ka serapeng. Ge kgoši a bona seo a goa a re: “Na monna yo o nyaka go kata mohumagadi gona mo pele ga ka, ka lapeng la ka?”

Kgoši a sa tšo bolela bjalo ya ba baamogwabonna ba khurumetša Hamane hlogo. ₉Gomme yo mongwe wa bona yo a bitšwago Harbona a re: “Gape Hamane ebile o epetše kota kua ga gagwe ya go tlo fega Mordekai yo a kilego a begela Estere gore kgoši o tlile go bolawa. Botelele bja yona ke dimetara tše masome a mabedi le metšo ye meraro.”

Kgoši a ba laela a re: “Fegang Hamane go yona!”

₁₀Ka gona Hamane a fegwa koteng ye a bego a e epetše gore a tle a fege Mordekai go yona. Ya ba gona pefelo ya kgoši e okobalago.