Pesalome 11

₁Nna ke tšhabela go Morena.

Le reng le re go nna:

“Fofela dithabeng bjalo ka nonyana,

₂gobane bakgopo ba nganga bora bja bona,

ba lebantšha baloki ka mesebe go ba tsetsemetša ka leswiswing.

₃Ge dilo di šetše di hlakahlakane,

ke eng se moloki a ka hlwago a sa se dira?”

₄Morena o ka Tempeleng ya gagwe ye kgethwa;

setulo sa gagwe sa bogoši se legodimong.

O lebeletše batho ba lefase;

o a ba lebelediša a bona tše ba di dirago.

₅O lekodišiša moloki le mokgopo go swana;

ntwadumela yena o mo hloile.

₆O nešetša bakgopo magala a a tukago le tshebela;

ya bona kabelo ke phefo ye e fišago.

₇Morena o lokile mme o rata boloki;

baloki ba tla dula le yena.