To The Word – Day 131

₁Go madimabe lena le iketlilego mo Sione, le lena ba Samaria le se nago maseme, lena bagolo ba setšhaba sa Israele sa go phala tše dingwe, lena Baisraele ba tlago ba nyaka thušo go lena. ₂Eyang motseng wa Kalene le yo bona; le fetele le motsengmogolo wa Hamate, le be le theogele le motseng wa Bafilista wa Gathe. Na metse yeo e phala mmušo wa Juda le wa Israele? Naga ya bona yona kgane e feta ya lena? ₃Ga le dumele gore nako ya masetlapelo e kgauswi, eupša ditiro tša lena ke tšona tše di batametšago nako yeo ka yona le tlago bušwa ke batho ba sehlogo. ₄Go madimabe lena le lalago malaong a a kgabišitšwego ka nakatlou, le patlamago magogweng a lena, le ipshinago ka nama ya nku le ya kgomo. ₅Le rata go hlama dikoša bjalo ka Dafida, la di letša ka sekgapa. ₆Le gampela beine ka phafana; le tlola ka ditlolo tše bohlokwa, le se na taba le ge setšhaba sa Israele se tlilo fedišwa. ₇Ke ka lebaka leo e tlago ba lena ba mathomo ba go thopša, ya ba gona ge go fedišwa menyanya ya bomajaapatlame.

₈Morena, Mong wa bohle, Modimo Ramaatlaohle, o boletše a tiišitše a re: “Ke šišimišwa ke boikgodišo bja Baisraele; ke hloile dibo tša bona. Motse wa bona le tšohle tše di lego ka go wona ke tla di gafela manaba.”

₉Ge ka lapeng le tee go ka šala batho ba lesome, le bona ba tla hwa. ₁₀Ge leloko la bobahu le le swanetšego go fiša ditopo le ka tla la di tšea ka moo ntlong, mme la botšiša yo a ka bago a sa khutile kua moseo la re: “Na go sa na le yo mongwe ka ntle le wena?” yoo a araba a re: “Aowa,” lona le swanetše go re: “Homola, ga se ra swanela go bolela ka leina la Morena!”

₁₁Ge taelo e etšwa go Morena, dintlo tše dikgolo di a thubaganywa, tše dinyenyane di a pšhatlaganywa. ₁₂Kgane dipere di ka kata letlapeng, goba motho a lema lewatle ka dipholo? Eupša lena le fetotše toka mpholo, boloki la bo fetola lengana. ₁₃Lena le thabelago go thopa motse wa Lo-Dabare le re: “A ke re re thopile motse wa Karnaime ka a rena maatla?”

₁₄Morena Modimo Ramaatlaohle o re: “Lena setšhaba sa Israele, ke tlilo romela setšhabatsoko sa le hlasela. Ba tla le hlakiša go tloga sefateng sa Hamate go yo fihla nokeng ya Araba.”

₁Morena, Mong wa bohle, o ile a mpontšha pono. Mo ponong yeo ka bona a hlola motšitšhi wa tšie ge diruiwa tša kgoši di seno kgelwa bjang mme bjang bo thoma go hloga ka lefsa. ₂Ya re ge tšie yeo e lle ditala ka moka nageng e di feditše ka re: “Morena, Mong wa bohle, hle, lebalela setšhaba sa gago! Na ba ka phologa bjang? Ga ba nene.”

₃Morena a buša pelo mme a re: “Se o se bonego se ka se direge.”

₄Morena, Mong wa bohle, a mpontšha pono ye nngwe. Mo ponong yeo ka bona a itokišetša go otla setšhaba se gagwe ka mollo. Mollo woo wa fiša lewatle le legolo le le lego ka fase ga lefase, gomme wa thoma go tšhuma le mašemo. ₅Ke moka ka re: “Lesa, hle, Morena Modimo! Setšhaba sa gago se ka phologa bjang? Ga se nene.”

₆Morena a buša pelo gape, gomme a re: “Seo le sona se ka se direge.”

₇Morena a mpontšha pono ye nngwe gape. Mo go yona ka bona a eme kgauswi le leboto le le agilwego ka kelaseemo, a swere kelaseemo ka seatla. ₈Yena a re go nna: “Amose, na o bonang?”

Ka mo fetola ka re: “Ke bona kelaseemo.”

Ke moka a re: “E mpontšha gore setšhaba sa ka se bjalo ka leboto le le sekamego. Nka se sa buša pelo, ke tla se otla. ₉Dintotoma tšeo go tšona ditlogolo tša Isaka di khunamelago medimo ya diswantšho di tla phušolwa. Mafelo a makgethwa a Israele a tla fedišwa. Ke tla dira gore ba lapa la bogoši la Jerobeamo ba bolawe ka tšhoša.”

₁₀Ke moka Amatsia, moprista wa Bethele, a roma motseta go Kgoši Jerobeamo wa Israele gore a fihle a mmotše a re: “Amose o hlohleletša setšhaba gore se go lakane. Dipolelo tša gagwe di tla senya setšhaba ₁₁gobane o re: ‘Jerobeamo o tla hwela ntweng, gomme setšhaba sa Israele se tla tšewa nageng ya sona sa išwa bothopša.’ ”

₁₂Ke moka Amatsia a re go Amose: “Wena moprofeta, tloga mo o fetele Juda o yo porofeta gona mme o lefelwe mošomo woo. ₁₃Mo Bethele gona o se sa porofeta ka gobane ke felo ga kgoši ga tirelo, ke tempele ya setšhaba.”

₁₄Amose a mo fetola a re: “Ga se nna moprofeta wa go porofetela tefo, ebile ga ke wa lekgotla la baprofeta. Mošomo wa ka ke go diša diruiwa le go bjala mego. ₁₅Eupša Morena o ntšere diruiweng tša ka a ntaela gore ke yo porofetela setšhaba sa gagwe sa Israele. ₁₆Bjale ge, theeletša se Morena a se bolelago. Wena o mpotša gore ke se ke ka porofetela Baisraele, ka kgalema ditlogolo tšeo tša Isaka. ₁₇Ka gona wena Amatsia, Morena o go botša gore mosadi wa gago e tla ba segwebakathobalo motseng wo; bana ba gago le bona ba tla bolawa ntweng. Mašemo a gago a tla arolwa a fiwa ba bangwe, gomme wena mong o tla hwela nageng ya baditšhaba. Ge e le setšhaba sa Israele sona ruri se tla tšewa nageng ya sona sa išwa bothopša.”

₁Morena, Mong wa bohle, o ile a mpontšha pono ye nngwe. Mo go yona ka bona seroto sa dikenywa tše di budulego. ₂A mpotšiša a re: “Amose, na o bonang?”

Ka mo fetola ka re: “Ke bona seroto sa dikenywa.”

Ke moka Morena a re go nna: “Ke mafelelo a setšhaba sa ka sa Israele. Nka se sa buša pelo ka se se otle. ₃Mohlang woo mošate batho ba ka se sa opela, ba tla lla. Go tla ba le ditopo tše dintši, mme tša lahlwa ka setu.”

₄Theeletšang mo, lena le gatelelago bahloki, le tlaišago badiidi ba naga ye. ₅Le ipotša le re: “Monyanya wa Ngwedi wa lebalana o tla feta neng gore re tle re rekiše mabele a rena? Sabatha e tla feta neng, gore re tle re a rekiše? Ke mo re tlago ela ka dikelo tše e sego tšona, ra lefiša batho go feta tekanyo, ra ba hlalefetša ka dikeloboima tše e sego tšona. ₆Modiidi re ka mo reka ka tšhelete, le mohloki ra mo reka ka dieta, ešita le ditlhoka tša mabele ra di rekiša.”

₇Morena, yo Baisraele ba ikgantšhago ka yena, o ikanne a re: “Nka se tsoge ke lebetše mediro ya bona ye mebe. ₈Ga ke re ke yona ye e tlago hlola tšhišinyego ya lefase, gomme bohle ba ba dulago mo nageng ba lla? Ruri, lefase lohle le tla tekateka la kukutlologa bjalo ka Naele, la ba la kokobela bjalo ka noka yeo ya Egepeta. ₉Mohlang woo ke tla dira gore letšatši le sobele mosegare wo mogolo, le lefase le aparelwe ke leswiswi mosegare. Ke realo, nna, Morena, Mong wa bohle.

₁₀“Menyanya ya lena ke tla e fetoša mahloko, dikopelo tša lena ka di fetoša dillo. Ke tla le apariša tša go ilela, ka le boodiša dihlogo, gomme le tla swana le batswadi ba ba iletšego morwa motswalwanoši wa bona. Letšatši leo ka moka e tla ba la mahloko.

₁₁“Go tla nako yeo ka yona ke tlago wiša tlala nageng. Batho ba tla swarwa ke tlala, eupša e sego ya bogobe; ba tla nyorwa, eupša ba sa nyorelwe meetse. Ba tla swarwa ke tlala le lenyora la go nyaka go kwa tše Morena a di bolelago. Ke realo, nna, Morena, Mong wa bohle. ₁₂Batho ba tla ebela go tloga Lewatleng le le Hwilego go yo fihla Lewatleng la Mediteraniene, ba goloma ba tloga leboa ba ya bohlabela ba nyaka lentšu la Morena, fela ba le hloka. ₁₃Mohlang woo makgarebe a mabotse le masogana ba tla akgega ka lenyora. ₁₄Bao ba ikanago ka modimo wa seswantšho wa Samaria ba rego: ‘Ka modimo wa Dane wo o phelago,’ goba ‘Ka modimo wa Beresheba wo o phelago,’ ba tla wa gomme ba se sa tsoga.”

₁Ke ile ka bona Morena a eme kgauswi ga aletare. A laela a re: “Betha dihlogwana tša dikokwane, gore le direpodi di šikinyege. Di kgonole, gore di wele batho godimo. Ba ba šetšego ke tla ba bolaya ntweng. Ga go yo a tlago tšhaba, ga go le o tee yo a tlago phonyokga. ₂Le ge ba ka ikepela molete wa go tšhabela bodulabahu, ke tla ba ntšha. Le ge ba ka namelela legodimong, ke tla ba theoša. ₃Le ge ba ka khuta godimo ga thaba ya Karmele, ke tla ba tsoma ka ba swara. Ge ba ka nkhutela ka fase ga lewatle, ke tla laela kgolomodumo gore e ba metše.

₄“Ge ba ka išwa bothopša ke manaba a bona ke tla laela gore ba bolawe ka tšhoša. Ke ikemišeditše go ba dira tše mpe, e sego tše dibotse.”

₇Morena o re: “Lena setšhaba sa Israele, ga ke bone le phala batho ba Etopia. Ke ntšhitše Bafilista Kreta le Basiria Kire go no swana le lena ge ke le ntšhitše Egepeta. ₈Nna, Morena, Mong wa bohle, ke lebeletše ba mmušo wo wa Israele ba ba dirago dibe, gomme ke tla ba fediša lefaseng. Eupša nka se fediše ditlogolo tšohle tša Jakobo.

₉“Ke tla laela manaba gore a hlokole setšhaba sa Israele bjalo ka mabele ka leselo. Ke tla ba hlokola gare ga ditšhaba mme le o tee wa ba ba lokilego a ka se lahlege. ₁₀Badiradibe bohle setšhabeng sa ka ba ba rego: ‘Rena re ka se welwe ke kotsi, e ka se re batamele,’ ba tla bolawa ntweng.”

₁₁Morena o re: “Nako e etla yeo ka yona ke tlago tsošološa mmušo wa Dafida wo o lego bjalo ka ntlo ye e welego. Ke tla thiba matlere a yona ka e tsošološa. Ke tla e aga ka lefsa ka dira gore e swane le kgale, ₁₂gore setšhaba sa Israele se thope naga ye e sa šetšego ya Edomo le ya ditšhaba tšohle tše se kilego sa di buša legatong la ka.” O realo, Morena, yo a tlago phethagatša tše ka moka.

₁₃Morena o re:

₁Pono ya Obadia. Se ke se Morena, Mong wa bohle, a se bolelago mabapi le Edomo: