To The Word – Day 127

₁“Letša phalafala! Manaba a phuthuma badudi ba naga ya ka bjalo ka ntšhu, gobane ba lahlile kgwerano ya ka le bona, ba tshela le melao ya ka. ₂Baisraele ba a ntelela ba re: ‘Modimo wa rena, re dumela go wena!’ ₃Baisraele ba ganne tše di lokilego; ka gona manaba a tla ba hlomara.

₄“Ba ipeetše dikgoši ke se ka ba dumelela; ba ikgethela baetapele ba se ba boledišane le nna. Ba ipopetše medimo ya diswantšho ka silibera le ka gauta, ya ba gona go ipolaya ga bona. ₅Wena Samaria, modingwana woo wa gago wa namane o a ntšhišimiša. Basamaria ke ba tukela bogale. Ba tla lesa neng go khunamela medimo ya diswantšho? ₆Etse modingwana woo ke selo se se bopilwego ke mmopisethakga wa Moisraele, gomme e dio tloga e se modimo. Namane ya kua Samaria e tla pšhatlaganywa. ₇Ka ge ba bjetše phefo, ba tla buna ledimo. Mabele ge a sa tswale a ka se tšwe bupi. Le ge bo ka be bo ka tšwa, bo be bo tla lewa ke bašele. ₈Setšhaba sa Baisraele ga se sa ne maatla; ditšhaba tše dingwe di se bona e le selo se se se nago mohola. ₉Ba ile ba ya Asiria bjalo ka pitsi ge e ikela mo e ratago. Ba lefile ditšhaba tše dingwe gore di ba šireletše. ₁₀Le ge ba dirile bjalo, nna bjale ke yo ba kgoboketša ka ba otla. Kgauswinyana ba tla be ba menekana ge kgošikgolo e ba gateletše.

₁₁“Baisraele ba agile dialetare tše dintši gore ba tle ba dire dihlabelo tša tshwarelo ya dibe mo go tšona, fela ke tšona dialetare tše tše di ba dirišago dibe. ₁₂Ke ba ngwaletše melao ye e se nago palo, eupša bona ba re ga e ba ame. ₁₃Ge ba ntirela dihlabelo, nama ya gona e lewa ke bona. Eupša nna, Morena, ga di nkgahle, gomme dibe tša bona nka se di lebale, ke tla ba otlela tšona. Ke tla ba bušetša Egepeta.

₁₄“Baisraele ba rile go ntebala, nna, Mmopi wa bona, ba thoma go agela magoši a bona dintlo. Bajuda le bona ba ikagela metse ye mentši ye e ageleditšwego ka merako. Eupša metse yeo nna ke tla e tšhuma ka mollo, wa fiša le tšona dintlo tšeo tša magoši a bona.”

₁Lena Baisraele, lesang go keteka menyanya ya lena bjalo ka baditšhaba, gobane le furaletše Modimo wa lena la se sa mmotegela. Seboeng se sengwe le se sengwe le be le itshwara bjalo ka segwebakathobalo ka ge le be le gabile go lefša. ₂Eupša le ka se sa ba le mabele le beine, beine ye mpsha le yona le tla e hloka. ₃Baisraele ba ka se sa dula nageng ya Morena, ba tla bušetšwa Egepeta, gomme kua Asiria ba tla tlemega go ja seila. ₄Ba ka se kgone go tšhelela Morena dikabelo tša dino, le dihlabelo tša bona di ka se mo kgahle dinageng tšeo. Dijo tša bona di tla tšhilafatša bohle ba ba di jago, go no swana le dijo tša mogoga. Dijo tša bona di tla jelwa go dio tloša tlala, ga go se se tlago išwa ka Tempeleng ya Morena e le kabelo. ₅Bjale ba tla dirang mohla wa monyanya wo o beetšwego go hlompha Morena? ₆Ešita le ge ba ka se bolawe ke manaba, Baegepeta bona ba tla ba kgoboketša ba ba bolaya, gomme ba bolokwa Memfise. Dikgabišo tša bona tša silibera di tla khupetšwa ke ditshehlo, ka magaeng a bona go tla mela dihlašana tša meetlwa.

₇Nako ya kotlo e tlile, yona nako ya tefetšo. Mohla seo se phethega, go tla tseba lena, Baisraele. Lena le re: “Moprofeta yo ke setlaela. Monna yo wa go tsenwa ke moya o a gafa.” Etse le ntlhoile ka mokgwa wo ka gobane sebe sa lena e le se segolo gakaaka. ₈Gape nna, moprofeta, Modimo o mpeile mohlapetši wa lena, Baisraele. Eupša gohle mo ke yago gona le nthea ka sefu bjalo ka nonyana. Batho ba mphetogetše manaba gona mo nageng ya Modimo wa ka. ₉Ke ba babe la bohloko go tšohle tše ba di dirago, go no swana le mola ba le Gibea. Modimo a ka se lebale dibe tša bona, mme o tla ba otlela tšona.

₁₀Morena o re: “Mola ke hwetša Baisraele la mathomo ke ile ka swana le motho yo a hwetšago diterebe lešokeng. Mola ke thoma go bona borakgolokhukhu ba lena e be nke ke ge ke bona dithakangwaga mohlareng wa mogo. Fela ya re ge ba fihla Baale-Peore ba ineela go Baale, modimo wa go leša dihlong, mme ba šišimiša bjalo ka wona modimo woo ba bego ba o rata. ₁₁Setumo sa Baisraele se tla ba tšhabela boka nonyana ge e fofa, gomme basadi ba ka se sa belega, goba ba ima, goba ba riboga. ₁₂Fela le ge ba ka belega bana ba ba godiša, bana bao ke tla ba tloša tšatšing, gwa se šale le o tee. Ka lahla Baisraele – masetlapelo fela!”

₁₃Go nna Baisraele ba kile ba swana le motse wa Tirose wo o agilwego lefelong le lebotse. Fela bjale ba swanetše go iša bana ba bona go babolai. ₁₄Na nka go kgopela gore o ba dire eng, Morena? Basadi ba bona a e be ba go ima ba boa tseleng, e be ba matswele a go hloka mekgato.

₁₅Morena o re: “Bobe bjohle bja bona bo thomile Gilgale. Ke gona kua mo ke ilego ka thoma go ba hloya. Gomme ka lebaka la tše mpe tše ba di dirilego, ke tla ba raka mo nageng ya ka. Nka se sa ba rata; baetapele bohle ba bona ba ntsogetše maatla. ₁₆Baisraele ba wetšwe ke masetlapelo. Ba bjalo ka semelana se se hwilego medu mme se sa enywe. Le ge ba ka belega, ke tla bolaya bana bao ba bona ba ba ratago kudu.”

₁₇Modimo wa ka o tla lahla Baisraele, ka ge ba sa mo theeletše. E tla ba bageremi gare ga baditšhaba.

₁Baisraele ba kile ba swana le morara wo o entšwego kudu. Ya re ge ba atlega bjalo, ba atiša le dialetare tša medimo ya diswantšho. Ge monono wa naga o tšwelela, ba tšweletša le botse bja dikokwane tša maswika tše ba di khunamelago. ₂Batho ba pelo tša bonokwane bjale ba tlilo otlwa. Morena o tla kgereša dialetare tša bona, le dikokwane tša bona tša maswika o tla di pšhatlaganya.

₃Ke moka ba tla re: “Ga re na kgoši ka ge re sa tšhabe Morena. Fela kgoši yona e be e ka re direlang?” ₄Ba ipolelela ditšiebadimo, ba ikana ka maaka, ba gwerana le ditšhaba tše dingwe. Tshekong ba sekamiša toka ya ba bjalo ka boori bolemeng.

₅Badudi ba Samaria ba tshwenyegile ka modingwana wa bona wa namane wa kua Bethe-Abene. Bona le baprista ba ba hlankelago modingwana woo ba tla o llela, ba golola ge o humolotšwa bothakga bja wona bja gauta. ₆Modingwana woo wona o tla thothelwa Asiria ya ba seloba go kgošikgolo. Baisraele ba tla gobošwa ba hlabišwa dihlong ka lebaka la mathaithai a bona. ₇Motse wa Samaria o thubilwe. Kgoši ya gona e tla thopša ya etša phatša ya legong ye e tšewago ke noka. ₈Dintotoma tša Abene, moo Baisraele ba dirago dibe, di tla phatlalatšwa. Godimo ga dialetare tša bona go tla mela mehlašana ya meetlwa le ditshehlo. Ya ba mo batho ba goelelago dithaba ba re: “Re weleng godimo!” Ba goelela meboto ba re: “Re pipeng!”

₉Morena o re: “Baisraele e sa le ba ngangabalela sebeng go tloga mola ba le Gibea, mme ba no tšwela pele bjalo. Ka gona, ba tla rakelelwa ke manaba gona kua Gibea. ₁₀Ke tla ba hlasela ka ba otla. Ditšhaba di tla ba thika tša ba otlela dibe tša bona tše pedi.

₁₁“Baisraele ke sethole se se rutantšhitšwego, se se ratago go fola mabele. Ka gona nna ka sebele ke tla se bea joko molaleng wa sona wo mobotsana, ka se pana. Bajuda ke tla ba lemiša, ditlogolo tša Jakobo tšona ke tla di thubiša makwate. ₁₂Ipšaleleng peu ya toka, ke mo le tlago buna leratorato. Ikgatheleng lehwiti, gobane ke nako ya gore le nnyake, nna, Morena, gore ke tle ke le nešetše ditšhegofatšo boka pula. ₁₃Lena le bjetše bobe la buna dikenywa tša bjona. Le lle dikenywa tša maaka a lena.

“Ka ge le ikantše dikoloi tša lena tša ntwa le bontši bja bagale ba gabolena, ₁₄setšhabeng sa gabolena go tla kwagala mašata a ntwa, gomme dibo tšohle tša lena di tla thubja. Go tla etša mohla wola Kgoši Shalmane a thuba motse wa Bethe-Arbeele ka ntwa, gomme bommagobana le bana ba bona ba tlapiriganywa. ₁₅Ke tše di tlago le hlagela, lena ba Bethele, ka lebaka la bobe bjoo bja lena bja go šiiša. Kgoši ya Israele e tla bolawa ntweng e sa le ka masa.”

₁Morena o re:

₅“Ba ganne go boela go nna, ka gona ba swanetše go boela Egepeta, gomme naga ya bona e tla bušwa ke Asiria. ₆Tšhoša e tla bolaya badudi ba metse ya bona, gomme manaba a robaganya maphika a dikgoro tša metse yeo. Setšhaba sa ka se tla fedišwa ka lebaka la tše se ikemišeditšego go di dira. ₇Ba phegeletše go mphuralela. Ba tla lla ka lebaka la joko ye ba tla bego ba e rwele, eupša ga go yo a tla ba rolago yona.

₁₀“Baisraele ba tla ntatela, nna, Morena, ge ke bopa bjalo ka tau. Ge ke bopa bana bao ba ka ba tla tla ba phaphasela bjalo ka nonyana ba etšwa bodikela. ₁₁Ba tla be ba etšwa Egepeta ba phaphasela, ba etšwa Asiria boka maeba. Nna ke tla ba bušetša magaeng a bona. Ke realo, nna, Morena.”

₁“Setšhaba sa Israele se ntikaneditše ka maaka le boradia, sa Juda sona se sa ntatela, nna, Modimo, se sa mpotegetše, nna, Mokgethwa. ₂Se sengwe le se sengwe se se hlwelwago go dirwa ke Baisraele ga se na mohola, ke sa go senya. Bonokwane le dikgaruru di ba atela di eya pele. Ba kwana le Asiria, gomme le nageng ya Egepeta ba romela makhura a mohlware.”

₃Morena o bona batho ba Juda molato; le ditlogolo tša Jakobo o tla di otlela dibe tša tšona. O tla ba lefetša tše ba di dirilego. ₄Jakobo o ile a leka go ema mogolwagwe legato ba sa le ka popelong ya mmagobona; le mola e le monna o ile a katana le Modimo – ₅a lwa le morongwa gomme a mo fenya. A lla a mo kgopela kgaugelo. Le kua Bethele Modimo o ile a kopana naye, a bolela le yena. ₆Yoo e be e le yena Morena Modimo Ramaatlaohle – Morena ke lona leina le a swanetšego go bitšwa ka lona ge a rapelwa. ₇Bjale ge, boelang go Modimo wa lena, le dule le rata yena Morena, le dira tše di lokilego, le mo tshepile, yena Modimo wa lena.

₈Morena o re: “Baisraele ba swana le Bakanana ka boradia; ba rata go hlalefetša batho ka dikelo tša bofora. ₉Ba re: ‘Re na le sa rena, lehumo le re atlile. Gomme ga go motho yo a ka re bonago molato wa go ikhumiša ka bohwirihwiri.’ ₁₀Eupša nna ke lego Morena Modimo wa lena go tloga mola le le Egepeta, ke tla dira gore le boele le dule ka mešašeng, go swana le ka nako yela ya Tente ya bodulo bja Morena.

₁₁“Ke boletše le baprofeta, ka ba bontšha dipono tše dintši, ka ba ka botša setšhaba dipapišo ka bona. ₁₂Batho ba Gileade ba dira tše kgopo, gomme ba tla bolawa. Kua Gilgale go direlwa dipoo dihlabelo; ke ka lebaka leo dialetare tša gona di tlago ba bjalo ka mekgobo ya maswika bolemeng.”

₁₃Jakobo o ile a tšhabela nageng ya Aramo mo a ilego a dišetša monna yo mongwe dihuswane, e le go šomela go hwetša mosadi. ₁₄Morena o ntšhitše Baisraele Egepeta ka moprofeta, a ba a ba hlokomela ka yena moprofeta. ₁₅Baisraele ba galefišitše Morena gabohloko; o tla ba otlela go bolaya batho. Morena wa bona o tla ba otlela go mo goboša moo ga bona.

₁Mehleng ya kgale e be e re ge ba kgoro ya Efraime ba bolela, ba dikgoro tše dingwe ba šie. Ba be ba hlompšha ke Baisraele ba bangwe. Fela ba ile ba ikobela molato ka go khunamela Baale, gomme ka lebaka la sebe seo ba hwa. ₂Le gonabjale ba sa iša pele le go dira dibe ka go ipopela medimo ya diswantšho, diswantšhobopša tša silibera tše ba di bopago ka mo ba di bonago ka gona, tšohle di bopša ke bakgoni ba bona. Ke moka ba re: “E hlabeleng didimo!” Aowii, batho ba napile ba khunamela medingwana ya manamane ba e atla! ₃Ke ka lebaka leo ba tlago timelela bjalo ka kgodi ya masa, bjalo ka phoka ye e timelelago ge le hlaba. Ba tla etša mooko wo o tšewago ke phefo seboeng, ba swana le muši wo o tupago ka lešoba.

₄Morena o re: “Ke bile Morena Modimo wa lena go tloga mola le le Egepeta. Ga le na Modimo yo mongwe ntle le nna. Ntle le nna ga go Mophološi yo mongwe. ₅Ke ile ka le hlokomela kua lešokeng, nageng yela ya go omelela. ₆Ka le fepa la khora, mme ya re ge le sosometše la ikgogomoša, la ntebala. ₇Ka gona ke tla le hlasela boka tau. Ke tla le lalela tseleng bjalo ka nkwe. ₈Ke tla le tsogela go etša bere ye e hlakotšwego bana, ka le gagola. Ke tla le kgabutla ka bjako boka tau; ka le rathaganya bjalo ka sebata.

₉“Ke tla le fediša, lena Baisraele, gomme le tla hlakodišwa ke mang? ₁₀Bjale kgoši ya lena e kae e tle e le hlakodiše metseng yohle ya lena? Ba kae babuši ba lena ba le kilego la kgopela Samuele la re: ‘Re fe kgoši le baetapele!’ ₁₁Ka gona ka le fa kgoši ke galefile, ka ba ka le amoga yona ke galefile.

₁₂“Sebe sa Baisraele le molato wa bona ke di ngwadile, mme mangwalo a gona ke a lotile. ₁₃Baisraele ba sa na le sebaka sa go phela, fela ba šilofetše mo ba sa bonego mohola wa go se šomiša – ba swana le ngwana yo a lego kgauswi le go belegwa, yo a ganago go tšwa ka popelong ya mmagwe. ₁₄Na nka nama ka ba hlakodiša bodulabahu? Nka ba phološa lehung? Hee, lehu, tliša mauba a gago! Tliša lebolela la gago, wena bodulabahu! Setšhaba se nka se sa se šokela. ₁₅Le ge Baisraele ba atlega bjalo ka lehlakanoka ke tla ba romela phefo ya bohlabatšatši ya go tšwa lešokeng, gomme e tla pšheša didiba tša bona le methopo. E tla ba hlakola tšohle tše bohlokwa.

₁“Basamaria ba tla otlelwa go ntsogela maatla ga bona, nna, Modimo wa bona. Ba tla bolawa ka tšhoša; masea a bona a tla tlapiriganywa, le baimana ba gabobona ba tla fatolwa.”

₂Lena setšhaba sa Israele, sokologelang go Morena Modimo wa lena. Bokgopo bja lena bo a le kgopa bja le wiša. ₃Sokologelang go Morena, gomme se le mo abelago sona e be thapelo ye: “Re swarele bokgopo bjohle bja rena, o re kwe ge re go rapela, ke gona re tlago go reta. ₄Asiria e ka se kgone go re phološa, le dipere tša ntwa di ka se re hole ka selo. Re ka se sa tsoga re boditše medimo ye re itiretšego yona ka diatla ra re ke medimo ya rena. Morena, ke wena o šokelago ba ba tlogetšwego ke ditšhaba.”

₅Morena o re:

₁₀A yo a lego bohlale a kwešiše tše di ngwadilwego mo, le yo a nago le temogo a di dumele. Ditsela tša Morena di lokile, gomme baloki ba sepela ka tšona, eupša batshelamolao bona ba kgopša go tšona ba wa.