To The Word – Day 128

₁Modimo wa ka, Modimo wa ka,

o ntlogeletšeng?

Ke golola ke nyaka thušo,

eupša o no fela o le kgole le nna.

₂Mosegare ke hlwa ke go llela,

Modimo wa ka,

eupša ga o nkarabe;

le bošego ke lala ke go llela,

eupša khomotšo ga ke e hwetše,

₃etšwe o dutše sa borena o le Mokgethwa,

moo go kwalago direto tša Israele.

₄Borakgolokhukhu ba rena ba be ba go botile,

mme wena o ba hlakodiša.

₅Ba be ba go llela mme ba phološwa,

ba go botile mme ba sa swabišwe.

₆Ge e le nnayena ga ke sa le motho,

ke no ba seboko,

ke nyatšwa ke batho,

ke hlaswa ke setšhaba sa gešo.

₇Ba ba mponago ka moka ba a nkwera;

ba šonya melomo ba šišinya dihlogo

₈ba re: “Yena o botile Morena.

A a mo hlakodiše,

a mo phološe ge eba o a mo rata!”

₉Ke wena o dirilego gore ke belegwe,

ke iketle difarong tša mma.

₁₀Ke botile wena go tloga mola ke belegwago,

go tloga mola mma a mpelegago o bile Modimo wa ka.

₁₁Hle, se nkatologe,

ditlaišego di kgauswi!

Ga go yo a ka nthušago.

₁₂Manaba a mantši a ntikaneditše bjalo ka dipoo,

a ntikologile boka dipoo tše šiišago tša Bashane.

₁₃A nkahlamela bjalo ka tau ye e gabutlago e rora.

₁₄Ke bjalo ka meetse a a tšhologilego;

marapo a ka ka moka a a kgwelekgwehla;

pelo ya ka e tologa bjalo ka moti.

₁₅Magalagapa a ka a gagaletše boka lekopelo,

leleme le kgomaretše mehlagare.

O nthapaladitše gore ke hwele thogorogong.

₁₆Lekoko la dikebeka le ntikologile,

le ntikaneditše bjalo ka dimpša.

Ba ntlema maoto le matsogo;

₁₇ke kgona go ipala marapo.

Manaba a ka a ntomoletše mahlo.

₁₈Ba abelana diaparo tša ka,

kobo ya ka ba e direla matengwa.

₁₉Hle, wena Morena, se nkatologe!

Wena maatla a ka,

phakiša o nthuše!

₂₀Ntlhakodiše go ba ba ntlhaselago ka ditšhoša,

o mphološe dimpšeng tšeo.

₂₁Ntlhakodiše molomong wa ditau tše,

o mphološe le manakeng a tšona dinare tše.

₂₂Morena, o kwele thapelo ya ka;

ke tla anegela magagešo tše o ntiretšego tšona.

₂₃Ke tla go reta phuthegong ka re:

“Mo reteng, lena bahlanka ba Morena!

Mo hlompheng,

lena ditlogolo tšohle tša Jakobo!

Mo khunameleng,

lena setšhaba ka moka sa Israele!

₂₄Ga a lahle motlaišegi,

ga a mo hlokomologe ditlaišegong tša gagwe.

Ga a mo furalele, fela ge a mo llela o a mo thuša.”

₂₅Phuthegong ka moka ke tla go tumiša ka lebaka la tše o di dirilego;

ke tla go direla dihlabelo tše ke go tshephišitšego tšona mahlong a ba ba go khunamelago.

₂₆Badiidi ba tla ja nama ya tšona go khora,

bao ba tlago go Morena Tempeleng ba tla mo reta.

Nke ba atlege go ya go ile!

₂₇Batho ba lefase ka moka

ba tla dumela go Morena,

ba sokologela go yena;

ditšhaba tšohle di tla mo khunamela,

₂₈ka gobane ke kgoši, o a di buša.

₂₉Bahumi ka moka ba tla mo obamela;

bohle ba ba boelago leroleng ba tla mo khunamela.

₃₀Le ba ba sa tlago tswalwa ba tla mo hlankela,

le ditlogolo tša bona tša anegelwa tša Morena,

₃₁le tšona tša anegela tše di tlago ba di tswetšwe tša re:

“Morena o phološitše setšhaba sa gagwe.”

₁Morena ke modiši wa ka;

ga ke hloke selo.

₂O nkhutšiša mafulong a matala;

o nkiša meetseng a makhutšo.

₃O a ntapološa,

o ntshepediša ka tsela tše di lokilego ka lebaka la leina la gagwe.

₄Le ge nka sepela molapong wo o šiišago,

nka se boife selo,

gobane wena, Morena, o na le nna.

O ntšhireletša ka molamo wa gago,

ka lepara la gago wa ntlhahla.

₅O ntirela monyanya manaba a ka a ntebeletše;

o nkamogela mo nkego ke moeng yo mogolo,

wa ntlaletša senwelo wa go falala.

₆Ke a tseba gore botho le lerato la gago di tla ba le nna bophelong bja ka ka moka,

gomme ke tla dula ka ngwakong wa gago ge ke sa phela.

₁Lefase ke la Morena le tšohle tše di lego go lona;

lefase ke la gagwe le tšohle tše di phelago go lona.

₂O le theile godimo ga mawatle,

o le agile godimo ga phamphamadiba.

₃Ke mang yo a ka namelago thaba ya Morena?

Ke mang a ka tsenago ka Tempeleng ya gagwe ye kgethwa?

₄Ke yo a dirago tše di lokilego,

a nago le pelo ye botse.

Ke yo a sa amanego le bofora,

a sa enego ka maaka.

₅Yena Morena o tla mo šegofatša;

Modimo, Mophološi wa gagwe kahlolong,

o tla re ga a ne molato.

₆Ba babjalo ke ba ba tlago go Modimo,

ba ba ipegago go Modimo wa Jakobo.

₇Bulegang go ahlama, lena dikgoro;

ipuleng, lena mamati a bogologolo,

gore Kgoši ye kgolo e tsene!

₈Ke mang Kgoši ye kgolo yeo?

Ke Morena yo maatla le yo bogale,

Morena, yena mogale ntweng.

₉Bulegang go ahlama, lena dikgoro;

ipuleng, lena mamati a bogologolo,

gore Kgoši ye kgolo e tsene!

₁₀Le re ke mang Kgoši ye kgolo yeo?

Morena Ramaatlaohle –

ke yena Kgoši ye kgolo yeo.

₁Bohlale o ikagetše ngwako,

a o betlela dikokwane tše di šupago.

₂O hlabile dikgomo,

o natefišitše beine ya gagwe,

o adile bojelo.

₃O romile bahlanka ba gagwe ba banenyana

gore ba yo hlaeletša batho ba le serokameng sa motse ba re:

₄“Etlang mono, lena le sa lemogego tša bophelo!”

Go bahlokatlhaologanyo a re:

₅“Etlang,

re jeng dijo tše ke le apeetšego tšona,

re nweng le beine ye ke e natefišitšego.

₆Tlogelang bošilo,

gomme le tla phela.

Tšeang ka tsela ya temogo.”

₇Mokgalamogegei o ikobela mahlapa;

mosolayokgopo o ipakela maroga.

₈O se kgale mogegei,

o tla go hloya;

o kgale mohlalefi,

o tla go rata.

₉Ruta mohlalefi,

o tla hlalefa le go feta;

ruta moloki,

temogo ya gagwe e tla oketšega.

₁₀Mathomo a bohlale ke go boifa Morena;

go tseba Mokgethwa ke yona temogo.

₁₁Ge o na le bohlale o tla phela galelele,

o tla okeletšwa mengwaga ya go phela.

₁₂Bohlale bja gago bo hola wena mong,

go gegea ga gago go tla babela wena.

₁₃Mmabotlatla ke mosadi wa lešatana,

ke semaumau sa go se tsebe selo.

₁₄O kokomala mojako wa ngwako wa gagwe,

setulong se se lego serokameng sa motse.

₁₅O hlaeletša bafeti ba tsela,

ba ba ikelago mo ba yago gona, o re:

₁₆“Etlang mono,

lena le sa lemogego tša bophelo!”

Go bahlokatlhaologanyo a re:

₁₇“Meetse go tsefa a a utswitšwego,

le selewathopeng se a natefa.”

₁₈Mašilo ga a tsebe

ge lehu le a laletše moo,

le gore baeng ba gagwe ba theogetše

fasefase bodulabahu.