1“Basamaria ba tla otlelwa go ntsogela maatla ga bona, nna, Modimo wa bona. Ba tla bolawa ka tšhoša; masea a bona a tla tlapiriganywa, le baimana ba gabobona ba tla fatolwa.”
Se Baisraele ba swanetšego go se dira
2Lena setšhaba sa Israele, sokologelang go Morena Modimo wa lena. Bokgopo bja lena bo a le kgopa bja le wiša. 3Sokologelang go Morena, gomme se le mo abelago sona e be thapelo ye: “Re swarele bokgopo bjohle bja rena, o re kwe ge re go rapela, ke gona re tlago go reta. 4Asiria e ka se kgone go re phološa, le dipere tša ntwa di ka se re hole ka selo. Re ka se sa tsoga re boditše medimo ye re itiretšego yona ka diatla ra re ke medimo ya rena. Morena, ke wena o šokelago ba ba tlogetšwego ke ditšhaba.”
Morena o tshepiša Baisraele bophelo bjo bofsa
5Morena o re:
“Ke tla bušetša setšhaba sa ka go nna,
ka dira gore se se sa kgeloga.
Ke tla ba rata ka pelo ya ka ka moka,
gobane ga ke sa ba galefetše.
6Go setšhaba sa Israele ke tla ba bjalo ka phoka.
Ba tla atlega boka matšoba a a thunyago;
ba tla tia medu go etša mehlare ya Lebanone.
7Ba tla ba le bana ba bantši,
gape ya ba ba babotse boka mehlware.
Ba tla nkga bose go swana le mesedere ya Lebanone.
8Ba tla buša ba dula ba šireleditšwe ke nna,
ba bjala mabele,
ba atlega go swana le morara.
Ba tla tuma bjalo ka beine ya Lebanone.
9Setšhaba sa Israele se ka se sa ba le taba le medimo ya diswantšho;
ke tla kwa dithapelo tša bona gomme ka ba hlokomela;
ke tla ba mothopo wa tšohle tše ba di hlokago,
go swana le mesaeprese ge e le ye bohlokwa go bona.”
Mafelelo
10A yo a lego bohlale a kwešiše tše di ngwadilwego mo, le yo a nago le temogo a di dumele. Ditsela tša Morena di lokile, gomme baloki ba sepela ka tšona, eupša batshelamolao bona ba kgopša go tšona ba wa.
