To The Word – Day 126

₁Wo ke molaetša wo Morena a ilego a o fa Hosea, morwa wa Beeri, mehleng ya ge Usia, Jotamo, Ahase le Hiskia e le dikgoši tša Juda, gomme Jerobeamo, morwa wa Joase, e le kgoši ya Israele.

₂Mohla Morena a bolela la mathomo le Baisraele ka Hosea o ile a re go yena: “Sepela o yo nyala mosadi yo e ka tlago ya ba seotswa. Bana ba gagwe le bona ba tla mo abela. Ke ka moo setšhaba sa ka se ntlogetšego ka gona mme se tlogago se sa mpotegele.”

₃Hosea a yo nyala mosadi yo leina la gagwe e bego e le Gomere, morwedi wa Diblaime. Yena a ima, a tla a mmelegela morwa. ₄Ke moka Morena a re go Hosea: “Mo thee leina la ‘Jesriele’, ka gobane ga ke sa le kgole le go otla kgoši ya Israele ka lebaka la batho bao Jehu, rakgolokhukhu wa gagwe, a ba bolailego motseng wa Jesriele. Ke tlilo fediša mmušo wa Israele. ₅Gomme mehleng yeo ke tla dira gore madira a Israele a fenyetšwe sa ruri moeding wa Jesriele.”

₆Gomere o ile a ima gape gomme a belega ngwana wa ngwanenyana. Morena a re go Hosea: “Mo thee leina la ‘Mosegaugelwe’, ka gobane nka se sa gaugela setšhaba sa Israele goba ka se swarela. ₇Ge e le setšhaba sa Juda sona ke tla se gaugela. Nna, Morena Modimo wa bona, ke tla ba phološa, fela nka se ba phološe ka ntwa – ka mara le mesebe, goba ka ditšhoša, goba ka dipere goba ka banamedi ba dipere.”

₈Ge Gomere a tshwešitše Mosegaugelwe o ile a ima gape gomme a belega morwa yo mongwe. ₉Morena a re go Hosea: “Mo thee leina la ‘Gasesetšhabasaka’, ka gobane setšhaba sa Israele ga se sa ka, gomme le nna ga ke Modimo wa sona.”

₁₀Le ge go le bjalo setšhaba sa Israele se tla swana le lešabašaba la lewatle, le ka se elwe goba la balwa. Bjale Modimo o re go bona: “Ga le setšhaba sa ka,” eupša mehleng ye e tlago ba tla bitšwa bana ba Modimo yo a phelago. ₁₁Batho ba Juda le ba Israele e tla ba setšhaba se tee gape. Ba tla ikgethela moetapele o tee, ba buša ba gola mme ba atlega nageng ya bona. Ee, letšatši la Jesriele e tla ba le legolo.

₁Ka gona lena Baisraele bitšanang “Setšhaba sa Modimo” le “Bagaugelwa”.

₂Bana ba ka, beang mmagolena molato ka gobane ga e sa le mosadi wa ka, gomme le nna ga ke sa le monna wa gagwe. A a tlogele bofebe le bootswa bja gagwe. ₃Ge a ka se bo tlogele ke tla mo hlobodiša a šala a le fela boka mola a belegwa. Ke tla mo dira bjalo ka leganata, ka mo swantšha le naga ye e omeletšego, gomme ka mmolaya ka lenyora. ₄Bana ba gagwe nka se ba gaugele – ke bana ba seotswa, ₅ka gobane mmagobona o be a otswa, motswadi wa bona o be a dira tša go leša dihlong. O be a re: “A ke ye go baratiwa ba ka ba ba mphago dijo le meetse, boya bja nku le mašela a boletiana, makhura a mohlware, le tša go nwa.”

₆Ka lebaka leo ke tla mo thibela tsela ka mašaša a meetlwa, ka aga le morako gore a se kgone go tšea ka ditsela tša gagwe. ₇O tla šala baratiwa ba gagwe morago, fela a se ba sware. O tla ba nyaka, eupša a se ba hwetše. Ke gona a tlago re: “A ke boele go monna yo e lego wa ka – mola ke phela le yena go be go le kaone go phala bjale.”

₈O be a sa dumele gore ke nna ke mo filego mabele, beine, makhura a mohlware, ke mo neilego silibera le gauta ka bontši, mme yena a direla Baale ka tšona. ₉Bjale ge, ge go bunwa ke tla mo amoga mabele a ke mo fago ona, ka mo amoga le beine ya ka ka nako ya yona; ke tla mo tšeela le boya bja nku le mašela a boletiana a ke mo filego ona gore a dire tša go ikapeša. ₁₀Ke tla mo hlobodiša pele ga baratiwa ba gagwe, gomme ga go yo a tlago kgona go mo hlakodiša diatleng tša ka. ₁₁Ke tla fediša mathabo a gagwe ka moka, menyanya ya gagwe ya ngwaga ka ngwaga, le ya Lebalana, le ya Disabatha – menyanya yohle ya gagwe ya sedumedi. ₁₂Ke tla senya merara le mego ye a rilego o e filwe ke baratiwa ba gagwe e le meputso ya ge a robala le bona. Dirapa tša gagwe tša merara le tša mego ke tla di fetoša lešoka; di tla lewa ke diphoofolo tša naga. ₁₃Ke tla mo otlela mehla yela ya ge a be a ntebala, a direla Baale dihlabelo, a bile a apara mangina a nko le dikgabišo tše dingwe, a latela baratiwa ba gagwe.

O realo, Morena.

₁₄Ka gona ke tla mo goketša ka mo iša lešokeng; moo ke tla mo rapeletša ka mmušetša go nna. ₁₅Ke tla mmušetša dirapa tšela tša gagwe tša merara, gomme Moedi wa Matshwenyego ka o dira felo ga kholofelo. Moo o tla kwana le nna bjalo ka mola e sa le yo mofsa, mola a etšwa Egepeta. ₁₆Mehleng yeo o tla buša a mpitša monna wa gagwe – a ka se sa mpitša Baale wa gagwe. ₁₇Nka se sa tsoga ke mo dumeletše go bolela leina la Baale gape, a ka se sa mo rapela.

₁₈Mehleng yeo ke tla dira kgwerano le diphoofolo tša naga le dinonyana tša legodimo le digagabi lefaseng, gore di se tshwenye setšhaba sa ka. Le gona ke tla tloša dibetša tša ntwa nageng – mara le mesebe le ditšhoša – gomme ka dira gore setšhaba sa ka se dule se bolokegile.

₁Morena a re go nna: “Boela o yo ratana le mosadi yo a ratanago le monna yo mongwe mme e le seotswa. O mo rate bjalo ka ge le nna ke rata Baisraele, le ge ba khunamela medimo e šele, ba bile ba rata diphaphašana tša makwapi a diterebe tše ba di neetšego medingwana.”

₂Ka gona ka yo mo nyala ka dipapetlana tša silibera tše lesome le tše tlhano, le mekotla ye mebedi ya garase. ₃Ka re go yena: “O ntetele nako ye telele o sa gwebe ka thobalo, o sa otswe; le nna ke tla itshwara ka mokgwa woo go wena.” ₄Baisraele le bona ba swanetše go dula nako ye telele ba se na kgoši goba moetapele, ba sa dire sehlabelo, ba se na kokwane ya borapedi ya leswika, goba pheko, goba modingwana. ₅Ka morago ga moo ba tla sokologa ba khunamela Morena Modimo wa bona gape, ba hlankela yo e lego setlogolo sa Dafida, kgoši ya bona. Ba tla buša ba boifa Morena, ba hwetša mahlatse a go tšwa go yena mehleng ya bofelo.

₁Lena Baisraele, ekwang tše Morena a di bolelago, ka gobane lena badudi ba naga ye Morena o le bea molato o re: “Setšhaba ga se tshepane, ga se ratane, le gona ga se ntšee gore ke nna Modimo wa sona nageng ye. ₂Ba hlolelana madimabe, ba bolela maaka, ba a bolaya, ba a utswa, ebile ba a otswa. Bosenyi bo a ata, ba tšholla madi ba sa fetše. ₃Ka gona naga e welwa ke komelelo, le tšohle tše di phelago go yona di a felelela. Diphoofolo tša naga le dinonyana tša legodimo le tšona dihlapi di a hwa.”

₄Morena o re: “A go se be le motho yo a beago setšhaba molato, goba a se kgalago – nna molato ke o bea lena baprista. ₅Mosegare le dira dibe, gomme bošego baprofeta le bona ba mphošetša le lena. Ke yo fediša setšhaba sa Israele, mmagolena. ₆Setšhaba sa ka se a felelela ka ge se sa ntšee gore ke Modimo wa sona. Lena baprista le ganne go ntumela, ka gona le nna ke tla le lahla la se sa ba baprista ba ka; ka ge le nyaditše thuto ya ka, le nna barwa ba lena nka se ba tšee gore ke baprista ba ka.

₇“Ge lena baprista le ata, le atiša le dibe tša lena, ka gona tlhomphego ya lena ke tla e fetoša kgobogo. ₈Le phela ka dihlabelo tša tshwarelo ya dibe tše setšhaba sa ka se di dirago, ka gona le nyaka gore ba tšwele pele le go dira dibe. ₉Moprista o tla hlagelwa ke se se hlagelago setšhaba – ke tla le otla, ka itefeletša ka ge le dira tše kgopo. ₁₀Le ge le lle kabelo ya lena ya dihlabelo le ka se khore. Le ge le ka rapela medimo ya tswala le ka se be le bana, ka gobane le tlogetše go ntlhompha.”

₁₁“Beine ya kgale le ye mpsha e hlokiša setšhaba sa ka tlhaologanyo. ₁₂Ba kgopela maele go kota, ba phekolwa ka ditaola. Tumo ya bona ya go khunamela medimo e šele e ba arošitše, gomme ka go khunamela medimo yeo ba mphuraletše, nna, Modimo wa bona. ₁₃Ba dira dihlabelo godimo ga dithaba, le dikabelo ba di tšhuma mebotong ka fase ga mehlare ye metelele ya go ikala, ka gobane meriti ya yona ga se ka bose!

“Ke ka lebaka leo barwedi ba lena ba febago, le dingwetši tša lena di otswago. ₁₄Le ge go le bjalo, nka se ba otlele seo, ka gobane lena banna le šika le difebe, gomme le dira dihlabelo gotee le digwebakathobalo tša ka tempeleng. Ke ka mo setšhaba sa go hloka tlhaologanyo se wago ka gona.

₁₅“Le ge lena Baisraele le sa mpotegele, nke Bajuda bona ba ka se ikobele molato woo. Le se ke la ya Gilgale goba Bethe-Abene go nkhunamela, goba la ikana gona ka leina la Morena yo a phelago. ₁₆Baisraele ba ne kgang bjalo ka sethole sa kgang. Na nka ba fudiša bjalo ka dikwanyana molaleng? ₁₇Baisraele ba ikamantše le medimo ya diswantšho. Ba tlogeleng ba le bjalo. ₁₈Ge ba tagilwe ba ipha bofebe, ba thabela kgobogo go phala tlhomphego. ₁₉Ba tla phamolwa nageng ya bona mo nkego ba tšewa ke ledimo, gomme dihlabelo tša bona di tla ba leša dihlong.

₁“Ekwang taba še, lena baprista! E eleng hloko, lena setšhaba sa Israele! Theeletšang, lena ba lapa la mošate! Ke a le ahlola gobane le fetogile molaba kua Mitsepa. Ke lena lelokwa le le theilwego thabeng ya Taboro. ₂Ke lena molete wa go iša wo o epilwego motseng wa Shitime, gomme ke tla le otla ka moka ga lena. ₃Baisraele ke ba tseba gabotse – ba ka se nkhutele. Ga se ba mpotegela, gomme ba tšhilafetše.”

₄Ditiro tša bona tše mpe di ba šitiša go boela go Modimo wa bona, gobane ba gogwa ke tumo ya go khunamela medimo e šele, gomme ga ba amogele Morena. ₅Boikgantšho bja bona bo a ba wetša. Dibe tša bona di a ba kgopa, Bajuda le bona ba kgopša nabo. ₆Le ge ba ka ya go nyaka Morena ba gapa dihuswane le dikgomo tša go mo direla dihlabelo, ba ka se mo hwetše ka ge a ba ngadile. ₇Ba be ba sa mmotegele, gomme le bana ba bona ga ba mo khunamele. Ka gona, bona le mašemo a bona bjale ba tlilo fedišwa ka Monyanya wa Lebalana.

₈Letšang phalafala kua Gibea, le lepatata kua Rama! Hlabang mokgoši kua Bethe-Abene! Eyang ntweng, lena banna ba Benjamene. ₉Mohla Morena a le otla, lena Baisraele, naga ya lena e tla šala e le lešoka. Lena dikgoro tša Israele, ke le begela se se tlilogo hlaga.

₁₀Morena o re: “Baetapele ba Juda ba šwahletše naga ya Israele. Ka gona, ke tla tšhollela kgalefo ya ka godimo ga bona ya etša lefula. ₁₁Baisraele ba gateletšwe, ba tlaišega kudu ka ge ke ba otlela go phegelela go khunamela medimo ya diswantšho ga bona. ₁₂Ka gona, go Baisraele nna ke bjalo ka sekaku; go Bajuda ke swana le bolwetši bja go ja motho marapo.

₁₃“Ge Baisraele ba bona gore ba a lwala, le Bajuda ba bona bja bona bolwetši, Baisraele ba ile ba ya Asiria go kgopela thušo go kgošikgolo, eupša yena a palelwa ke go ba alafa, goba go ba fodiša. ₁₄Nna ke tla hlasela Baisraele bjalo ka tau; ke tla tsogela Bajuda bjalo ka sebata. Ge ke ba hlwahlwaiša ga go yo a kago ba hlakodiša.

₁₅“Ya ba gona ke boelago mo ke dulago gona go fihlela ge ba dumela gore ba na le molato, mme ba etla ba nnyaka. Ge ba le tlalelong ba tla phegelela go nnyaka.”

₁Setšhaba se re: “A re sokologeleng go Morena! Ke yena a re rathagantšego, eupša o tla re kgomaganya; o re gobaditše, eupša o tla re tlema dintho. ₂Ka morago ga sebakanyana o tla be a re bušeditše sekeng gomme ra phela re mo rapela. ₃A re lekeng go tseba Morena. Ruri, o tla tla go rena bjalo ka masa, bjalo ka pula ya tsheola ye e thapišago lefase.”

₄Eupša Morena o re: “Wena Israele le wena Juda, ke dire eng ka lena? Lerato la lena le timelela ka pela bjalo ka kgodi mosong, le etša phoka e sa le gosasa. ₅Ke ka lebaka le ke romilego baprofeta ba ka go lena gore ba le botše gore ke tlilo le otla ka le bolaya. Kotlo ya ka e bonala bjalo ka seedi. ₆Se ke se nyakago ke leratorato la lena, e sego dihlabelo. Ke kganyoga gore setšhaba sa ka se ntsebe go na le gore se ntirele dihlabelo tša go tšhungwa ka moka.

₇“Eupša kua Adamo ba ile ba lahla kgwerano, ba se mpotegele. ₈Gileade ke motse wo o tletšego badiratšempe le babolai. ₉Baprista ba swana le lekoko la bahlakodi ba ba lalelago batho. Ešita le mo tseleng ya go ya Shekeme ba bolaya batho. Bohlola bja dihlong! ₁₀Ke bone setšhaba sa Israele se dira taba ye e šiišago: se itšhilafatša ka go khunamela medimo ya diswantšho.

₁₁“Le lena, Bajuda, ke le beetše nako ya go le otla.”

“Ge ke re ke boeletša go atla setšhaba sa ka sa Baisraele, ₁le ge ke re ke a se alafa, go fela go utologa dibe tša bona le ditiro tše mpe tša Basamaria. Ba a hlalefetšana; ba šwahlela ka dintlong ba utswa; ba hlakola batho mebileng. ₂Ga ba ke ba nagana gore bobe bjoo ka moka ke tla bo gopola; dibe tša bona di ba dikaneditše, gomme ke dula ke di bona.”

₃“Kgoši ba e kgahliša ka bokgopo bja bona, bakgomana ba ba kgahliša ka maaka a bona. ₄Ka moka ga bona ga ba mpotegele. Ba etša mollo wo o thunyago muši sebešong, le ge moapei a se sa o kgohletša, a le gare a duba bupi go fihlela bo hlakana. ₅Ka letšatši la monyanya wa kgoši ya bona bakgomana ba tagwa ke beine, gomme kgoši le yena a thušane le bakwerani go kwera. ₆Ba fiša tšhiritšhiri bjalo ka sebešo ge ba loga maanomabe. Bošego kgalefo ya bona e lala e thunya, gomme ge go esa e laume kgabo.

₇“Ba bolaya babuši ba bona ba galefile; kgalefo ya bona e tuka bjalo ka mollo sebešong. Magoši ohle a bona a thenotšwe, eupša ga go le o tee wa bona yo a kilego a nkgopela thušo.”

₈“Baisraele ba swana le senkgwa se se sego sa šatolwa. Ba itswakanya le ditšhaba tše di bapilego nabo. ₉Ditšhaba di šele di ba fokoditše maatla, eupša bona ga ba lemoge. Go se gwa ya kae setšhaba sa bona se tla be se fedile, eupša bona ga ba tsebe. ₁₀Boikgantšho bja bona bo a ba wetša. Le ge go le bjalo ga ba sokologele go nna, Morena Modimo wa bona, goba ba nkhunamela. ₁₁Baisraele ba bjalo ka leeba, ke ditlaela tše di se nago tlhaologanyo; ba kgopela thušo Egepeta, ka morago ba ye Asiria. ₁₂Eupša nna ke tla phurolla lelokwa la ka ka ba tanya bjalo ka dinonyana ge ba feta. Ke tla ba otlela tše mpe tše ba di dirilego.

₁₃“Ba madimabe ke bona, gobane ba kgelogile. Ba tla fedišwa, ka gobane ba ntsogetše maatla. Ke be ke nyakile go ba hlakodiša, eupša bona ba mphara ka maaka. ₁₄Ga ba nthapele ka dipelo tša bona ka moka; ba golola ba le malaong a bona. Ge ba kgopela mabele le beine go nna ba a iphatša. Ba ntsogela maatla. ₁₅Le ge e le nna ke ba godišitšego ka ba tiiša, ba a ntakana. ₁₆Ba kgelogela go medimo ya diswantšho ye e se nago mohola. Ga ba tshepagale, ba etša bora bja go se tsebalege. Ka ge bakgomana ba gabobona ba bolela ka makokwana, ba tla bolawa ka tšhoša. Ke mo ba tlago segwa ke Baegepeta.”