To The Word – Day 122

₁Nna, Jakobose, mohlanka wa Modimo le wa Morena Jesu Kriste, ke a le dumediša, lena ba dikgoro tše lesome le tše pedi le phatlaletšego le lefase.

₂Banabešo, le itsheme ba lehlogonolo kudu ge le tlelwa ke meleko ya mehutahuta, ₃gobane le a tseba gore go lekwa tumelo ga lena go le tlišetša kgotlelelo. ₄Tšwelang pele le kgotlelele, ke mo le tlago ba ba ba feletšego, ba ba se nago bosodi le ba ba sa hlokego selo.

₅Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale. ₆Fela ge le kgopela le be le tumelo, e sego pelaelo, ka gobane yo a belaelago o swana le lephoto la lewatle le le akgaakgwago gape le tšokotšwago ke phefo. _7-8Motho yo mobjalo, wa pelo tše pedi, wa go hloka mahlakantšho go tšohle tše a di dirago, a se ke a gopola gore Morena a ka mo fa selo.

₉Mokriste wa mmotlana a thabe ge Modimo a mo godiša. ₁₀Mokriste wa mohumi le yena a thabe ge Modimo a mo kokobetša, gobane bahumi ba tla timelela bjalo ka matšoba a naga ge a hlohlorega. ₁₁Letšatši ge le seno hlaba mme le thoma go fiša, le pontšha dimela. Matšoba a tšona a a hlohlorega mme botse bja ona bja loba. Ka wona mokgwa woo le bahumi ba tla hlohlorega mahumo a bona ba le gare ba šoma tša bona.

₁₂Wa lehlogonolo ke yo a kgonago go kgotlelela ge a lekwa, gobane ge a ile a fenya meleko yeo o tla putswa ka bophelo bjo Modimo a bo holofeditšego bao ba mo ratago. ₁₃Motho ge a tlelwa ke meleko a se ke a re: “Ke lekwa ke Modimo.” Gobane Modimo a ka se lekwe ke bobe, le yena mong ga a leke motho. ₁₄Motho yo mongwe le yo mongwe o a lekwa ge a goketšwa mme a gogwa ke tumo ya gagwe ye mpe. ₁₅Tumo yeo ya gagwe e nape e duše mme e tswale sebe, gomme sebe ge se seno gola go iphetša se tswale lehu.

₁₆Le se ke la forwa, banabešo ba ba rategago. ₁₇Mpho ye nngwe le ye nngwe ye botse le neo ye nngwe le ye nngwe ya mmakgonthe di tšwa legodimong go Radietša yo a sa fetogego, yo seetša sa gagwe se sa fokotšegego. ₁₈Ka go rata ga gagwe o re hlodile ka lentšu la therešo, gore e be nke re dithakangwaga tša dihlolwa tša gagwe tšohle.

₁₉Banabešo ba ba rategago, taba ye le swanetšego go e tseba ke gore motho a hlaganele go kwa, eupša a diege go bolela, a diege le go galefa. ₂₀Kgalefo ya motho ga e mo diriše tše Modimo a di ratago. ₂₁Ka gona, le lahle bohlola bjohle le mašaledi ohle a bobe. Le amogeleng ka boikokobetšo molaetša wo Modimo a o gašitšego ka go lena, wo o kgonago go le phološa.

₂₂Le se iphore ka go theeletša fela Ebangedi, eupša le dire ka mo e laelago ka gona. ₂₃Yo e lego motheeletši fela wa Ebangedi a sa dire ka mo e laelago ka gona, o swana le motho yo a rego go ipona sefahlego ka seiponeng, ₂₄a itebelele gabotse, mme ge a tloga a be a šetše a lebetše gore ke yena yo mobjang. ₂₅Fela yo a lebeledišišago molao wo o sa hlaelelwego, wo o lokollago batho, yo a dulago a o ela hloko mme e se fela motheeletši wa Ebangedi wa go e lebala, eupša a dira ka mo e laelago ka gona, o tla šegofatšwa ke Modimo go tše a di dirago.

₂₆Ge motho a re ke yena morapedi eupša a sa itshware gabotse lelemeng la gagwe, gona o a iphora, bodumedi bja gagwe ga bo thuše selo. ₂₇Bodumedi bjo Modimo Tate a bonago bo hlwekile mme e le bja nnete šebo: ke go hlokomela ditšhiwana le bahlologadi matshwenyegong a bona, le go itota gore motho a se tšhilafatšwe ke tša lefase.

₁Banabešo, ka ge le le badumedi ba Morena wa rena, Jesu Kriste, Morena wa letago, le se ke la kgetholla batho. ₂Ge mo phuthegong ya lena go ka tsena monna wa go apara palamonwana ya gauta le diaparo tša mabaibai, gwa tsena le yo mongwe wa modiidi wa go apara diaparo tša ditšhila, ₃mme ya re ge le bona yoo wa go tšhepa la re go yena: “Dula mo setulong se sebotse se,” gomme go yola wa modiidi la re: “Wena ema mola, goba o dule mo fase maotong a ka,” ₄na e tla be e se gore le a kgethollana, le ahlola ka mokgwa wo mobe?

₅Banabešo ba ba rategago, theeletšang: Na ga ke re Modimo o kgethile badiitšana ba lefase gore ba humišwe ka tša tumelo, e be bajalefa mmušong wo a o holofeditšego bao ba mo ratago? ₆Fela lena le nyatša modiitšana. Kgane ga se bahumi ba ba le gatelelago, ba ba le gogelago ditshekong? ₇Ga ke re ke bona ba ba nyefolago leina leo la go hlomphega leo ka lona Modimo a le dirilego ba gagwe?

₈Le tla be le dira se se lokilego ge le ka phetha molao wa Modimo Kgoši, wo o ngwadilwego ka Mangwalong a Makgethwa wa go re: “O rate bangwekawena bjalo ka ge o ithata.” ₉Eupša ge le kgetholla batho le dira sebe, le molao wa Moshe o a le tšwa gore le batshedi ba wona. ₁₀Ge motho a ka re a phela ka go phetha Melao ye Lesome, a tshela wo mongwe wa yona, go no swana le ge a e tshetše ka moka. ₁₁Gobane yo a rilego: “O se ke wa otswa,” ke yena yo a rilego: “O se ke wa bolaya.” Le ge o sa otswe, fela o bolaya, o tshela melao ya Moshe. ₁₂Dipolelo le ditiro tša lena e be tša batho ba ba tlago ahlolwa ka molao wo o re lokollago. ₁₃Gobane Modimo a ka se be le kgaugelo ge a ahlola yo a sego a ka a ba le kgaugelo; eupša yo a bilego le kgaugelo ga a tšhabe kahlolo ya Modimo.

₁₄Banabešo, go thušang ge motho a re o na le tumelo eupša a sa bontšhe seo ka mediro? Na tumelo ya gagwe e ka mo phološa? ₁₅Ge modumedikawena wa monna goba wa mosadi a hloka diaparo goba dijo, ₁₆go thušang gore o re go yena: “Sepela gabotse! O ruthele, o be o je o khore,” etšwe o sa mo fe tše a di hlokago? ₁₇Agaa, tumelo le yona e ka mokgwa woo – ge e se na mediro ke setšha e hwile.

₁₈Eupša yo mongwe motho a ka no re: “Wena o na le tumelo, nna ke na le mediro.” Gomme yoo ke tla mo fetola ka go re: “Mpontšhe gore motho a ka ba le tumelo bjang a se na mediro, mme nna ka mediro ya ka ke tla go bontšha tumelo ya ka.” ₁₉A ke re o dumela gore Modimo ke o tee fela? Agaa, seo ke se bademone le bona ba se dumelago, mme ba a thothomela. ₂₀Setlaela towe, na o nyaka go bontšhwa gore tumelo ye e se nago mediro ga e na mohola? ₂₁Kgane Abrahama, rakgolokhukhu wa rena, ga se a lokafatšwa ka mediro mola a neela Isaka, morwagwe, mo aletareng? ₂₂Ke mo go bonagalago gore medirong ya gagwe go be go šoma tumelo, mme mediro ya gagwe e dira gore tumelo ya gagwe e be ye e feletšego. ₂₃Gwa nama gwa phethagala Mangwalo a Makgethwa mo a rego: “Abrahama a dumela go Modimo, gomme ka lebaka la tumelo ya gagwe Modimo a mmona e le moloki.” Ke ka lebaka leo Abrahama a ilego a bitšwa mogwera wa Modimo. ₂₄Bjale a ke re le a bona gore motho o lokafatšwa ka mediro ya gagwe, e sego fela ka tumelo?

₂₅Le go Rahaba, mosadi yola wa segwebakathobalo, go bile bjalo. Ga ke re o ile a lokafatšwa ka mediro ya gagwe ka go amogela dihlodi tšela tša Baisraele ka ga gagwe, a ba a ba ngwegiša ka tsela ye nngwe?

₂₆Ka gona, bjalo ka ge mmele o hwile ge o se na moya, le tumelo ge e se na mediro e hwile.

₁Banabešo, le se ke la ba baruti ka bontši, ka ge le tseba gore rena baruti re tla sekišwa gasehlogo go feta ba bangwe. ₂Bohle re atiša go dira diphošo. Ge eba go na le yo a sa kego a foša ge a bolela, gona yoo ke moloki ka botlalo yo a kgonago go itshwara le dithong ka moka. ₃Pere ge re e tsenya mogala ka molomong gore re tle re e laole, re direla gore re e sepetše ka mo re ratago ka gona. ₄Le ka no bona le ka leselawatle: le ge e le le legolo ka mokgwa wo mme le kgorometšwa ke diphefo tše maatla, le laolwa ka lephegwana le lenyenyane, le išwe mo go ratago mootledi wa lona. ₅Leleme le lona le bjalo. Ke sethonyana se senyenyane, fela le ikgantšha ka dilo tše dikgolo.

Bonang ka mo tlhase ya mollo e kgonago go tšhuma sethokgwa se segolo ka gona! ₆Gomme leleme le swana le mollo. Ke legohle la bokgopo le le dutšego mo mmeleng wa rena mme le phatlalatša bobe mothong ka moka. Le tšhuma bophelo bja rena ka mollo wa hele. ₇Motho o kgona go tlwaetša dibopiwa ka moka, ebile nka no re o di tlwaeditše – diphoofolo tša naga, le dinonyana, le digagabi, le diphedi tša ka lewatleng. ₈Ge e le leleme lona ga go motho yo a kgonago go le tlwaetša. Ke lešaedi le le padilego, le tletše mpholo wa go bolaya. ₉Ka lona re reta Morena e lego yena Tatagorena, ebile ka lona re roga bangwekarena ba ba bopilwego go swantšhwa ka Modimo. ₁₀Molomong o tee go tšwa direto, go be go tšwe maroga. Banabešo, ga se tshwanelo gore go be bjalo. ₁₁Kgane sediba se ka tšwa meetse a mabose le a a babago mothopong o tee? ₁₂Banabešo, na mogo o ka enywa dihlware goba morara wa enywa mago? Le sediba sa meetse a letswai se ka se tšwe meetse a mabose.

₁₃Na yo bohlale wa tlhaologanyo mo gare ga lena o gona? A a ipontšhe ka boitshwaro bjo bobotse le ka mediro ye a e dirago ka boleta le bohlale. ₁₄Eupša ge eba ka dipelong tša lena le hlohlonwa ke mona ebile le dijato, gona le se ke la ikgantšha la re le ba bohlale, ka gobane le tla be le sa bolele therešo. ₁₅Bohlale bja mohuta woo ga bo tšwe go Modimo; ke bja lefase, ke bja nama, ebile ke bja Sathane. ₁₆Moo go nago le mona le bojato ke moo go nago le meferefere le bobe bja mehutahuta. ₁₇Ge e le bohlale bjo bo tšwago go Modimo, sa pele bo hlwekile, sa bobedi bo nyaka khutšo, bo lokile, le gona ga bo na manganga; bo tletše lešoko le mediro ye mebotse; ga bo ne tshele le boikaketši. ₁₈Badirakhutšo, ka go leka go boelanya batho, ba dira se se nyakwago ke Modimo.

₁Dintwa le diphapano mo go lena di hlolwa ke eng? Na ga di hlolwe ke ditumo tše di dulago di elwa ka dipelong tša lena? ₂Le duma dilo, fela ga le di hwetše, gomme le ikemišetše go bolaya; le duma dilo, eupša ga le kgone go di hwetša, ka gona le a fapana la lwa. Ga le hwetše se le se nyakago, ka gobane ga le se kgopele go Modimo. ₃Ge le kgopela selo ga le se fiwe, ka gobane ga le kgopele gabotse; le kgopela go kgotsofatša ditumo tša lena. ₄Bakgelogi tenang! Kgane ga le tsebe gore go rata tša lefase ke go itira lenaba la Modimo? Gape yo a nyakago go rata tša lefase o itira lenaba la Modimo. ₅Kgane le gopola gore Mangwalo a Makgethwa ga a rereše ge a re: “Modimo o rata moya wo a re tsentšego wona kudukudu”? ₆Eupša kgaugelo ya gagwe go rena e feta lerato leo. Bjalo ka ge Mangwalo a Makgethwa a bolela: “Modimo o gana baikgogomoši, eupša baikokobetši bona o ba direla tše dibotse.”

₇Bjale ge, ikokobetšeng go Modimo. Elwang le Diabolose, gomme yena o tla le tšhaba. ₈Batamelang Modimo, gomme le yena o tla le batamela. Hee, lena badiradibe, lesang go dira dibe! Itlhwekišeng dipelo, mapelopedi tenang! ₉Hlomogang dipelo le hloname le lle; lesego la lena a le fetoge sello, lethabo le fetoge manyami. ₁₀Ikokobetšeng go Morena, gomme yena o tla le godiša.

₁₁Banabešo, le se ke la bolelana gampe. Yo a bolelago modumedikayena gampe goba a mo solago o bolela molao wa Moshe gampe ebile o a o sola. Gomme ge o o sola gona ga o sa o phetha, o mosodi wa wona. ₁₂Etse mmei wa molao le mosodi wa batho ke o tee; ke yena yo a kgonago go phološa le go senya. Bjale wena o mang, o ka solago mongwekawena?

₁₃Theeletšang mo, lena le rego: “Lehono goba gosasa re tla ya motseng wa boketekete mo re tlago dika re le gona ngwaga ka moka re gweba re bolaya tšhelete.” ₁₄Etse tša la gosasa le bophelo bja lona ga le di tsebe. Le dio swana le kgodi ye e pipago lebakanyana, ka morago e apoge. ₁₅Ebile le ka upše le re: “Ge Morena a ratile re tla tsoga re dira se goba sela.” ₁₆Eupša lena le ikgantšha ka matepe; kgantšho yohle ya mohuta woo ke ye mpe.

₁₇Bjale ge, motho ge a tseba se se lokilego se a kago se dira eupša a se se dire, o dira sebe.

₁Theeletšang mo, lena bahumi: Llang le golole ka lebaka la mahlomola ao a tlilogo le wela. ₂Mahumo a lena a bodile, diaparo tša lena di llwe ke tšhwele. ₃Gauta ya lena le silibera di llwe ke makgalwa, gomme makgalwa ao a tšona e tla ba bohlatse bja go le tšwa, a tla le ja dinama bjalo ka mollo. Le kgobetše mahumo mehleng yeno ya bofelo. ₄Le gana go lefa badiredi ba ba le bunelago mašemo. Ekwang ge ba lla, gomme dillo tša bona di fihlile tsebeng tša Morena Ramaatlaohle. ₅Bophelo bja lena mo lefaseng e bile bja mabose le maipshino fela. Le inontšheditše letšatši leo ka lona le tlago hlabja bjalo ka pudi. ₆Le tšwile ba ba se nago molato la ba bolaya, bona ba sa itwele.

₇Ka gona, banabešo, le se fele pelo Morena a be a tle. Bonang ka mo molemi a sa felego pelo ka gona ge a letetše gore tšhemo ya gagwe e ntšhe dibjalo tše a di nyakago. O letela pula tša lehlabula le tša selemo a sa fele pelo. ₈Le lena le se fele pelo. Le tie maatla gobane Letšatši la go tla ga Morena le kgauswi.

₉Banabešo, le se ke la tsotana, gore Modimo a se tlo le sekiša. Gape Moahlodi o kgauswi le go tla. ₁₀Banabešo, baprofeta ba ba bego ba romilwe ke Modimo go tlo bega molaetša wa gagwe a e be mohlala wo le o latelago wa go kgotlelela le go se fele pelo ga lena. ₁₁Rena re bona ba ba ilego ba kgotlelela e le ba lehlogonolo. Tša kgotlelelo ya Jobo le di kwele, gomme le tseba le ka mo Morena a ilego a mo hlakodiša melekong ya gagwe ka gona. Gobane Morena o tletše kgaugelo le kwelobohloko.

₁₂Go feta tšeo ka moka, banabešo, le se ke la ikana, le ge e ka ba ka legodimo, goba ka lefase, goba ka se sengwe. Sa lena e be “ee”, ge eba le dumela, goba “aowa”, ge eba le gana, gomme ke mo le ka se kego la sekišwa ke Modimo.

₁₃Ge yo mongwe wa lena a le mathateng, a rapele. Ge a thabile, a opele ditumišo. ₁₄Ge yo mongwe wa lena a lwala, a bitše bagolo ba phuthego ba tle ba mo rapelele, ba mo tlotše ka makhura a mohlware, ka ge ba laetšwe ke Morena. ₁₅Thapelo yeo ya go rapelwa ka tumelo e tla fodiša molwetši; Morena o tla mo tsoša bolwetšing, gomme ge a dirile dibe o tla mo swarela tšona. ₁₆Ka gona, le ipolele dibe seng sa lena gomme le rapelelaneng, gore le tle le fodišwe. Thapelo ya moloki e na le maatla a magolo. ₁₇Eliya e be e le motho wa nama bjalo ka rena. O kile a rapela a kgothetše gore pula e se ne, gomme ka nnete pula ya se ne nageng mengwaga ye meraro le seripa. ₁₈A boelela a rapela, gomme leratadima la tšholla pula, lefase la mediša dibjalo tša lona.

₁₉Banabešo, ge yo mongwe wa lena a ka timelelwa ke tsela ya therešo, gomme yo mongwe a mmušetša go yona, ₂₀le tsebe gore yo a sokollago modiradibe tseleng ya gagwe ye e mo timeditšego, o phološa modiradibe yoo lehung, gomme o dira gore a swarelwe dibe tše dintši.