To The Word – Day 121

₁Manase o be a na le mengwaga ye lesome le metšo ye mebedi ge e eba kgoši ya Juda, gomme a buša a le Jerusalema mengwaga ye masome a mahlano a metšo ye mehlano. Mmagwe e be e le Heftsiba. ₂Manase a latela ditlwaedi tša makgapa tša ditšhaba tše Morena a di rakilego nageng ge setšhaba sa gagwe se goroga; ka go dira bjalo a dira dibe pele ga Morena. ₃A tsošološa dintotoma tšela go tšona go bego go khunamelwa medimo ya diswantšho tšela Hiskia, tatagwe, a bego a di phušotše; a aga dialetare tšeo go tšona go bego go khunamelwa Baale, a ba a betla kota ya borapedi, a etša Kgoši Ahaba wa Israele. Le gona Manase o be a obamela dinaledi, a di khunamela. ₄A aga dialetare tša medimo e šele ka Tempeleng, felo mola Morena a itšego ke moo a swanetšego go khunamelwa gona. ₅Ka dikgorong ka pedi tša Tempele a aga dialetare tšeo go tšona go bego go khunamelwa dinaledi. ₆A dira sehlabelo ka morwa wa gagwe. A šomišana le baloi le didupe, a ba a dirišana le dinoge le ba malopo. A dira dibe ka kudu pele ga Morena, a mo rumola. ₇A hloma seswantšhobetlwa sa modimo wo motshadi, Ashera, ka Tempeleng, felo mola Morena a itšego go Dafida le go Solomone, morwa wa gagwe: “Gona mo Jerusalema, ka mo Tempeleng ye, ke felo fa ke go kgethilego nageng ka moka ya dikgoro tše lesome le tše pedi tša Israele gore ke mo ke swanetšego go khunamelwa gona go ya go ile. ₈Gomme ge setšhaba sa Israele se ka phetha ditaelo tša ka ka moka ka potego, sa phetha le melao yohle ye mohlanka wa ka, Moshe, a ba filego yona, gona nka se ba lese ba lelekwa nageng ye ke e filego borakgolokhukhu ba bona.” ₉Eupša batho ba Juda ba se ke ba theetša Morena, gomme Manase a ba diriša dibe tše kgolo go feta le tšela tša ditšhaba tše Morena a ilego a di fediša nageng yeo ge setšhaba sa gagwe se tsena go yona.

₁₀Morena a bolela ka bahlanka ba gagwe, baprofeta, a re: ₁₁“Kgoši Manase o dirile makgapa a, a dira dilo tše mpe go feta tše Bakanana ba bego ba di dira, gomme ka medimo ya gagwe ya diswantšho a diriša batho ba Juda dibe. ₁₂Ka gona nna, Morena Modimo wa Israele, ke tla tlišetša Jerusalema le Juda mahlomola ao yo mongwe le yo mongwe yo a a kwago a tlago gakgamala. ₁₃Ke tla otla Jerusalema bjalo ka ge ke otlile Samaria, bjalo ka ge ke otlile Kgoši Ahaba wa Israele le ditlogolo tša gagwe. Ke tla fediša batho ba Jerusalema ka moka, Jerusalema ya šala e se na le selo, e le bjalo ka sebjana se motho a se fadilego a se ribega. ₁₄Ke tla lahla mašaledi ao a phologilego ka a gafela manabeng a bona ao a tlago ba fenya mme a senya naga ya bona. ₁₅Setšhaba sa ka ke tla se dira se ka gobane se dirile dibe pele ga ka mme sa nthumola go tloga ka nako yela borakgolokhukhu ba sona ba etšwa Egepeta, go fihlela le lehono.”

₁₆Ka ntle ga go diriša batho ba Juda dibe pele ga Morena, Manase o ile a bolaya batho ba bantši ba ba se nago molato mo e lego gore mekgotha ya Jerusalema e ile ya tlala madi.

₁₇Tše dingwe tše Manase a di dirilego, gammogo le dibe tša gagwe, di ngwadilwe mo go Ditaba tša magoši a Juda. ₁₈Manase a ithobalela le botatagwe, gomme a bolokwa ka serokolong sa mošate, serokolo sa Usa, mme morwa wa gagwe, Amone, a mo hlatlama bogošing.

₁₉Amone o be a na le mengwaga ye masome a mabedi le metšo ye mebedi ge e eba kgoši ya Juda, gomme a buša a le Jerusalema mengwaga ye mebedi. Mmagwe e be e le Meshulemete, morwedi wa Harutse, wa motse wa Jotoba. ₂₀O ile a dira dibe pele ga Morena, go no swana le Manase, tatagwe. ₂₁A dira tšohle tše tatagwe a bego a di dira, a ba a khunamela medimo ya diswantšho ye tatagwe a bego a e khunamela. ₂₂A furalela Morena, Modimo wa borakgolokhukhu ba gagwe, a nyatša ditaelo tša gagwe.

₂₃Bahlankedi ba Amone ba ile ba mo logela maanomabe gomme ba mmolaya mošate. ₂₄Batho ba Juda ba bolaya batho bale ba bolailego Amone, gomme ba bea morwa wa gagwe, Josia, kgoši.

₂₅Tše dingwe tše Amone a di dirilego di ngwadilwe mo go Ditaba tša magoši a Juda. ₂₆Amone o ile a bolokwa ka lebitleng la gagwe ka serokolong sa Usa, gomme morwa wa gagwe, Josia, a mo hlatlama bogošing.

₁Josia o be a na le mengwaga ye seswai ge e eba kgoši ya Juda, gomme a buša a le Jerusalema mengwaga ye masome a mararo a motšo o tee. Mmagwe e be e le Jedida, morwedi wa Adaya, wa motse wa Botsekate. ₂Josia o ile a dira tše di kgahlago Morena; a etša rakgolokhukhu wa gagwe, Dafida, ka ditiro, a se ke a phamoga ditseleng tša Dafida.

₃Ngwageng wa lesome le metšo ye seswai wa ge go buša Kgoši Josia, kgoši o ile a roma mongwaledi wa kgoro, Shafane, morwa wa Atsalia, setlogolo sa Meshulamo, Tempeleng a mo laela a re: ₄“Yaa go Moprista yo Mogolo, Hilkia, gomme o mmotše gore a bale tšhelete ye baprista ba ba letilego mojako wa Tempele ba e kgobokantšego go batho. ₅O mmotše gore a tšee tšhelete yeo a e fe banna ba ba hlokometšego go lokišwa ga Tempele. Ba lefe ₆babetli le baagi le babetli ba matlapa, ba be ba reke dikota le matlapa a a betlilwego ao a šomišwago ge ba lokiša Tempele. ₇Banna bao ba hlokometšego modiro ba a botega, ka gona o se ke wa hlwa o tshwenyega ka go ba botšiša ka tšhelete yeo.”

₈Ke moka Hilkia a botša Shafane gore o hweditše puku ya melao ya Morena ka Tempeleng. A mo fa puku yeo gomme Shafane a e bala. ₉Ke moo a boetšego go kgoši, a mmegela a re: “Bahlanka ba gago ba tšere tšhelete yeo e bego e le ka Tempeleng ba e neetše banna ba ba hlokometšego modiro wa go lokiša Tempele.” ₁₀A ba a re: “Mo ke swere puku ye Hilkia a nneetšego yona.”

₁₁Ge kgoši a ekwa tše di balwago ka pukung yeo, a gagola diaparo tša gagwe a tshwenyegile, ₁₂gomme a laela moprista Hilkia, le Ahikamo, morwa wa Shafane, le Akboro, morwa wa Mika, le Shafane, mongwaledi wa kgoro, le Asaya, mohlanka wa kgoši, a re: ₁₃“Sepelang le yo mpotšišetša, nna le batho ka moka ba Juda, go Morena ka seo puku ye e se rutago. Morena o re tukela bogale ka gobane borakgolokhukhu ba rena ga se ba dira tše puku ye e rego di swanetše go dirwa.”

₁₄Hilkia, Ahikamo, Akboro, Shafane le Asaya ba ya go mosadi yo a bitšwago Hulda, moprofeta yo a bego a dula karolong ye mpsha ya Jerusalema. Monna wa gagwe, Shalume, morwa wa Tikba, setlogolo sa Hasra, o be a hlokometše diaparo tša ka Tempeleng. Ba mmotša se se diregilego, ₁₅gomme a ba botša gore ba boele go kgoši, ba fihle ba mmotše gore Morena Modimo wa Israele ₁₆o re: “Ke tlile go tlišetša Jerusalema le batho ba yona ka moka mahlomola, bjalo ka ge go ngwadilwe ka pukung ye kgoši a e badilego. ₁₇Ba mphuraletše gomme ba diretše medimo ye mengwe dihlabelo, mme ba nthumotše ka tšohle tše ba di dirilego. Ke tukela Jerusalema bogale gomme bogale bjoo bo ka se fele. ₁₈Ge e le kgoši yena le mmotše gore nna, Morena Modimo wa Israele, ke re: O theeditše se se ngwadilwego ka pukung, ₁₉wa ba le pelo ye boleta mme wa ikokobetša pele ga ka, wa gagola diaparo tša gago, wa lla ge o ekwa ka moo ke rego ke tla otla Jerusalema le batho ba yona. Ke tla e dira gore e šiiše, e be felo fao leina la gona batho ba tlago le diriša ge ba rogaka. Eupša ke kwele thapelo ya gago, ₂₀gomme mahlomola a ke tlago a tlišetša Jerusalema a ka se tle pele o ithobalela le botatago. Ke tla go dira gore o bolokwe ka khutšo.” Banna bao ba boela go Kgoši Josia ba mmotša ditaba tšeo.

₁Kgoši Josia a bitša baetapele ka moka ba Juda le Jerusalema, ₂gomme ba ya Tempeleng mmogo ba na le baprista le baprofeta le batho bohle, ba bagolo le ba bannyane. Kgoši a ba balela ditaba tšohle tša puku ya kgwerano ye e hweditšwego ka Tempeleng. ₃A ema kokwaneng ya magoši mme a dira kgwerano le Morena gore o tla mo hlompha, a phetha melao le ditaelo tša gagwe ka pelo ya gagwe ka moka le ka moya wa gagwe ka moka, le gore o tla dira se kgwerano yeo e se nyakago bjalo ka ge go ngwadilwe ka pukung. Gomme le setšhaba ka moka sa itlema ka kgwerano yeo.

₄Ke moo Josia a laetšego Moprista yo Mogolo, Hilkia, le baprista ba ba mo thušago le baleti ba mojako wa Tempele gore ba ntšhe dilo ka moka ka Tempeleng tše di bego di šomišwa ge go khunamelwa Baale, le modimo wo motshadi, Ashera, le dinaledi. Kgoši a tšhuma dilo tšeo ka moka ka ntle ga motse ka moeding wa Kidrone, mme a laela gore melora yeo e yo tšhollelwa Bethele. ₅Baprista bao magoši a Juda a bego a ba beile gore ba dire dihlabelo dintotomeng tšeo go tšona go bego go khunamelwa medimo ya diswantšho metseng ya Juda le tikologong ya Jerusalema a ba ntšha modirong – baprista ka moka ba ba bego ba direla Baale le letšatši le ngwedi le dinaledi tšohle dihlabelo. ₆A tloša seswantšhobetlwa sa modimo wo motshadi, Ashera, Tempeleng, a se ntšha motseng a se iša moeding wa Kidrone, a se tšhuma, a se šila ya ba lerole mme a le gaša mabitleng a setšhaba. ₇A phušola diphapoši tša ka Tempeleng tšeo ka go tšona go bego go dula digwebakathobalo tša banna tša ka tempeleng. Ke gona ka moo basadi ba bego ba loga diaparo tše di bego di šomišwa tirelong ya Ashera. ₈A tliša baprista ba ba bego ba le metseng ya Juda Jerusalema, gomme nageng ka moka a tšhilafatša dintotoma tše ba bego ba dira dihlabelo go tšona metseng, go tloga Geba go yo fihla Beresheba. Le tše di bego di le dikgorong lesorong la Joshua, ramotse, la ka letsogong la nngele la kgoro ye kgolo ge motho a tsena motseng, a di phušola. ₉Baprista bao ba ile ba se ke ba dumelelwa go dira mošomo wa boprista ka Tempeleng, eupša dinkgwa tše di se nago komelo ba be ba ka di ja le baprista ba bangwe.

₁₀Kgoši Josia a tšhilafatša le Tofete, lefelo la tirelo la modimo wa seswantšho ka moeding wa Bene-Hinomo, gore go se ke gwa hlwa go eba le motho yo a direlago modimo Mologo sehlabelo sa go tšhungwa ka moka ka morwa goba morwedi wa gagwe. ₁₁A tloša le dipere tšeo magoši a Juda a bego a di neetše letšatši, gomme a tšhuma dikoloi tše di bego di šomišwa tirelong yeo. Tšona di be di le ka kgorong ya Tempele lesorong kgauswi le ngwakwana wa Netane-Meleke, mohlankedi yo mogolo. ₁₂Kgoši Josia a kgereša dialetare tše magoši a Juda a bego a di agile tlhakeng ya mošate godimo ga phapoši ya ka godimo ya Kgoši Ahase, gotee le dialetare tše di bego di agilwe ke Kgoši Manase ka dikgorong ka dipedi tša Tempele; a pšhatlaganya dialetare tšeo ya ba thogorogo, gomme a e tšhollela ka moeding wa Kidrone. ₁₃Josia a tšhilafatša dialetare tše Kgoši Solomone a bego a di agile ka bohlabela bja Jerusalema, ka borwa bja Thaba ya Mehlware, e le tša tirelo ya medimo ya bohlola ya diswantšho – Astarte, modimo wo motshadi wa Sidone, Kemoshe, modimo wa Moaba, le Milkomo, modimo wa Amone. ₁₄Kgoši Josia a pšhatlaganya dikokwane tša borapedi tša maswika, a rema dikota tša borapedi, gomme felo mo di bego di hlomilwe gona a go khupetša ka mašapo a batho.

₁₅Josia a phušola ntotoma yeo go yona go bego go khunamelwa medimo ya diswantšho kua Bethele ye e bego e agilwe ke Kgoši Jerobeamo, morwa wa Nebate, yo a dirišitšego Israele dibe. Josia a kgereša aletare ya gona, a pšhatlaganya matlapa a yona, mme a a šilaganya ya ba lerole; a ba a tšhuma le kota ya borapedi. ₁₆Ge a retologa a bona mabitla a mangwe mola thabeng; a laela gore a fatollwe mme mašapo a a lego ka go ona a tšhungwe aletareng. Ka tsela yeo a tšhilafatša aletare, a dira sela moprofeta a bego a kile a se bolela monyanyeng mola Kgoši Jerobeamo a eme manamelong a aletare. Kgoši Josia a lebelela ka gohle gomme a bona lebitla la moprofeta yola a bego a kile a bolela taba yeo. ₁₇A botšiša a re: “Lela ke lebitla la mang?”

Batho ba Bethele ba mo fetola ba re: “Ke lebitla la moprofeta wa Juda yo a boletšego dilo tše o di dirilego aletare ye lehono.”

₁₈Josia a re: “Yena mo tlogeleng. Mašapo a gagwe a se ke a šuthišwa.”

Ka gona mašapo a gagwe a se ke a kgwathwa, le ona ale a moprofeta yo a bego a etšwa Samaria.

₁₉Motseng wo mongwe le wo mongwe wa Israele Kgoši Josia a thuba ditempelana ka moka tša dintotomeng tša go agwa ke magoši a Israele tšeo go tšona go bego go khunamelwa medimo ya diswantšho, gomme ka tšona a rumotše Morena. Dintotoma tšeo ka moka a di dira tše a bego a di dirile dintotoma tša kua Bethele. ₂₀Godimo ga dialetare tša dintotoma tšeo a bolaya baprista ba ba bego ba hlankela medimo ya diswantšho dintotomeng, a ba a tšhuma mašapo a batho godimo ga dialetare tšeo. Ya ba gona a boelago Jerusalema.

₂₁Kgoši Josia a laela batho ba Juda gore ba keteke Monyanya wa Paseka go hlompha Morena Modimo wa bona, bjalo ka ge go ngwadilwe pukung ya kgwerano. ₂₂Go be go se gwa ka gwa ba le Paseka ya go swana nayo ye e bego e kile ya ketekwa ke kgoši ye nngwe ya Israele goba ya Juda go tloga mehleng yela setšhaba se sa bušwa ke baahlodi. ₂₃Eupša bjale, mo ngwageng wa lesome le metšo ye seswai wa pušo ya Josia, Paseka yeo ya ketekwa Jerusalema.

₂₄Gore Kgoši Josia a tle a kgone go phetha melao ye e ngwadilwego pukung ye Moprista yo Mogolo, Hilkia, a e hweditšego ka Tempeleng, o ile a tloša dinoge, le didupe, le medimo ya malapa, le medingwana ya diswantšho, le dilo ka moka tša tirelo ya medingwana ya diswantšho Jerusalema le nageng ya Juda ka moka. ₂₅Go be go se gwa ka gwa ba le kgoši ye e swanago le yena ye e bego e sokologetše go Morena ka pelo ya yona ka moka, le ka moya wa yona ka moka, le ka maatla a yona ka moka, e phetha melao yohle ya Moshe; le gona ga se gwa ka gwa hlwa go eba le kgoši ye e swanago le yena.

₂₆Eupša Morena o be a tukela Juda bogale bjo bošoro ka lebaka la tšeo Kgoši Manase a bego a mo rumotše ka tšona, gomme le bjale bogale bjoo bo be bo se bja okobala. ₂₇Morena a re: “Ke tla dira batho ba Juda se ke se dirilego ba Israele: Ke tla raka batho ba Juda pele ga ka mme ka lahla Jerusalema, motse wo ke o kgethilego, le Tempele, felo fao ke itšego ke moo ke swanetšego go khunamelwa gona.”

₂₈Tše dingwe tše Kgoši Josia a di dirilego di ngwadilwe mo go Ditaba tša magoši a Juda. ₂₉Mola Josia e sa le kgoši, Kgoši Neko wa Egepeta o ile a tšwa dira a ya nokeng ya Yufratese go yo thuša kgoši ya Asiria. Kgoši Josia a leka go thibela madira ao a Egepeta kua Megido, gomme a bolawa ge ntwa e seno thoma. ₃₀Bahlankedi ba gagwe ba rwala setopo sa gagwe ka koloi ya ntwa ba se iša Jerusalema, moo a ilego a bolokwa ka lebitleng la gagwe.

Batho ba Juda ba kgetha morwa wa gagwe, Joahase, mme ba mo tlotša ya ba kgoši.

₃₁Joahase o be a na le mengwaga ye masome a mabedi a metšo ye meraro ge e eba kgoši ya Juda, gomme a buša a le Jerusalema dikgwedi tše tharo. Mmagwe e be e le Hamutale, morwedi wa Jeremia, wa motse wa Libna. ₃₂A dira dibe pele ga Morena go swana le borakgolokhukhu ba gagwe. ₃₃Pušo ya gagwe e ile ya felela ge Kgoši Neko wa Egepeta a mo golega kua Ribla nageng ya Hamate, mme a ntšhiša batho ba Juda seloba sa silibera ya dikilokramo tše dikete tše tharo, le sa gauta ya dikilokramo tše masome a mararo a metšo ye mene. ₃₄Kgoši Neko a bea morwa wa Josia, Eliakime, kgoši ya Juda go hlatlama Josia, gomme a fetoša leina la gagwe a re ke Joyakime. Joahase yena a išwa Egepeta ke Kgoši Neko, gomme a hwela gona.

₃₅Kgoši Joyakime o ile a ntšhiša batho motšhelo go ya ka tše ba nago le tšona, gore a tle a kgoboketše tšhelete ya seloba se se bego se nyakwa ke kgoši ya Egepeta.

₃₆Joyakime o be a na le mengwaga ye masome a mabedi a metšo ye mehlano ge e eba kgoši ya Juda, gomme a buša a le Jerusalema mengwaga ye lesome le o tee. Mmagwe e be e le Sebuda, morwedi wa Pedaya, wa motse wa Ruma. ₃₇Joyakime a dira dibe pele ga Morena, go swana le borakgolokhukhu ba gagwe.

₁Mehleng ya ge go buša Joyakime, Kgoši Nebukadnesare wa Babilonia o ile a hlasela Juda, gomme Joyakime a gapeletšega go mo loba mengwaga ye meraro; ka morago a mo tsogela maatla.

₂Morena a romela bašwahledi ba Bababilonia le ba Basiria le ba Bamoaba le ba Baamone go yo lwa le Joyakime le go fediša batho ba Juda, bjalo ka ge a be a boletše ka bahlanka ba gagwe, baprofeta. ₃Seo sa direga fela ka taelo ya Morena, gore a tle a rake batho ba Juda pele ga gagwe ka lebaka la dibe ka moka tše Kgoši Manase a bego a di dirile, ₄gagolo le ka lebaka la madi a a se nago molato ao a a tšholotšego gore a be a tlale Jerusalema. Morena a se ke a lebalela Manase tabeng yeo.

₅Tše dingwe tše Joyakime a di dirilego di ngwadilwe mo go Ditaba tša magoši a Juda. ₆Joyakime a ithobalela le botatagwe, gomme morwa wa gagwe, Joyakine, a mo hlatlama bogošing.

₇Kgoši ya Egepeta le madira a yona ya se ke ya hlwa e tloga Egepeta gape, ka gobane kgoši ya Babilonia bjale e be e laola naga ka moka ye e bego e le ya Egepeta, go tloga nokeng ya Yufratese go yo fihla mollwaneng wa ka leboa wa Egepeta.

₈Joyakine o be a na le mengwaga ye lesome le ye seswai ge e eba kgoši ya Juda, gomme a buša a le Jerusalema dikgwedi tše tharo. Mmagwe e be e le Nehushta, morwedi wa Elnathane wa Jerusalema. ₉Joyakine a dira dibe pele ga Morena, go swana le tatagwe.

₁₀E bile mehleng ya pušo ya gagwe moo madira a Babilonia a ilego a tla Jerusalema a e dikanetša, a laolwa ke balaodi ba madira ba Kgoši Nebukadnesare. ₁₁Yona nakong yeo Nebukadnesare a tla Jerusalema ka boyena, ₁₂gomme Kgoši Joyakine, le mmagwe, le bahlankedi ba gagwe, le balaodi ba madira a gagwe, le bahlankedi ba mošate ba ineela go Bababilonia. Ngwageng wa seswai wa pušo ya Nebukadnesare, Nebukadnesare a thopa Joyakine ₁₃gomme a thothela mahumo ka moka a ka Tempeleng le a mošate Babilonia. Bjalo ka ge Morena a be a boletše, Nebukadnesare a pšhatla dibjana ka moka tša gauta tše di bego di dirilwe ke Kgoši Solomone e le tša go šomišwa ka Tempeleng. ₁₄A thopa batho ba Jerusalema, le balaodi ba madira, le bagale, gomme ka moka ya ba ba dikete tše lesome. A thopa le banna ka moka ba tsebo ya mediro, gammogo le barulatshipi, a šadiša fela badiidi kua Juda.

₁₅Nebukadnesare a iša Joyakine bothopša kua Babilone gotee le mmagwe le basadi ba gagwe le bahlankedi ba mošate le baetapele ba Juda. ₁₆A iša banna ka moka ba maemo Babilonia, ka moka ya ba ba dikete tše di šupago, le banna ba sekete ba tsebo ya mediro, gammogo le barulatshipi, ka moka ga bona e le banna ba bogale ba ba loketšego ntwa.

₁₇Nebukadnesare a bea Matania, rangwane wa Joyakine, kgoši ya Juda, gomme a fetoša leina la gagwe a re ke Tsedekia.

₁₈Tsedekia o be a na le mengwaga ye masome a mabedi a motšo o tee ge e eba kgoši ya Juda, gomme a buša a le Jerusalema mengwaga ye lesome le o tee. Mmagwe e be e le Hamutale, morwedi wa Jeremia, wa motse wa Libna. ₁₉Kgoši Tsedekia a dira dibe pele ga Morena, go swana le Kgoši Joyakime. ₂₀Morena a galefela batho ba Jerusalema le ba Juda moo e lego gore o ile a ba raka pele ga gagwe.

Tsedekia o ile a tsogela Kgoši Nebukadnesare wa Babilonia maatla,

₈Ka letšatši la bošupa la kgwedi ya bohlano ya ngwaga wa lesome le metšo ye senyane wa pušo ya Kgoši Nebukadnesare wa Babilonia, Nebusaradane, mohlankedi wa gagwe yo e bego e le molaodi wa baleti ba kgoši, a tsena Jerusalema. ₉A tšhuma Tempele le mošate le nywako le meago ka moka ye megolo Jerusalema, ₁₀gomme bahlabani ba gagwe ba kgereša morako wa motse. ₁₁Ke moka Nebusaradane a thothela batho ba ba bego ba šetše motseng Babilonia, le banna ba tsebo ya mediro ba ba bego ba sa šetše, le bao ba bego ba šetše ba ineetše go Bababilonia. ₁₂Eupša a šadiša badiidi ba bangwenyane nageng ya Juda gore ba šome mašemong le ka dirapeng tša merara.

₁₃Bababilonia ba pšhatlaganya dikokwane tša mphiri le dikoloyana tša ka Tempeleng, gotee le legopo le legolo la mphiri, gomme ba iša mphiri wa gona ka moka Babilone. ₁₄Ba thotha le dibjana tša go olelela melora, digarafo, ditimamabone, meruswi, le ditlabakelo ka moka tša mphiri tše di bego di šomišwa tirelong ya Tempeleng. ₁₅Ba thotha dilo ka moka tše di bego di dirilwe ka gauta goba silibera, gammogo le dibjana tša magala le meruswi ya go foka madi. ₁₆Mphiri wa dikokwane ka dipedi le wa dikoloyana le wa legopo le legolo, e lego dilo tše Kgoši Solomone a bego a di diretše Tempele, e be e le wo boima kudu go ka o ela. ₁₇Dikokwane tšeo tše pedi di be di swana: ye nngwe le ye nngwe e be e le ya dimetara tše 8,3 go ya godimo, mme e na le hlogwana ya mphiri ka godimo ya bogodimo bja dimetara tše 2,3. Go rarela hlogwana ye nngwe le ye nngwe go be go na le ntikodiko ya mphiri ye e bego e kgabišitšwe ka diswantšho tša digarenate tša mphiri.

₁₈Nebusaradane, molaodi wa baleti ba kgoši, a thopa Seraya, Moprista yo Mogolo, le Sofonia, moprista yo a bego a mo latela ka maemo, le baprista ba bararo ba ba bego ba leta mejako ya Tempele. ₁₉Motseng a tšea molaodi wa madira, le baeletši ba bahlano ba kgoši ba ba bego ba sa le motseng, le mongwaledi wa molaodi yo mogolo yo a bego a hlokometše go rapa dira, le banna ba bangwe ba maemo ba masome a a selelago. ₂₀Nebusaradane a ba iša go kgoši ya Babilonia yo a bego a le motseng wa Ribla ₂₁nageng ya Hamate. Moo kgoši a laela gore ba itiwe, ba bolawe.

Ke ka moo batho ba Juda ba thothilwego nageng ya bona ba išwa bothopša.

₂₂Kgoši Nebukadnesare wa Babilonia a bea Gedalia, morwa wa Ahikamo, setlogolo sa Shafane, mmušiši wa naga ya Juda, gore a buše batho ka moka bao ba bego ba se ba išwa Babilonia. ₂₃Ge balaodi ka moka ba madira a Bajuda le bahlabani ba ba bego ba tšhabile ba ekwa taba yeo, ba ikopanya le Gedalia kua Mitsepa. Bahlankedi bao e be e le Ishmaele, morwa wa Netania, Johanane, morwa wa Kareage, Seraya, morwa wa Tanhumete, wa motse wa Netofa, le Jaasania wa Maaka. ₂₄Gedalia a re go bona: “Ke le enela gore bahlankedi ba Bababilonia ba ka se le tshwenye. Dulang mo nageng ye, le hlankele kgoši ya Babilonia, gomme tšohle di tla le lokela.”

₂₅Eupša ka kgwedi ya bošupa ya ngwaga woo Gedalia a beilwego mmušiši ka wona, Ishmaele, morwa wa Netania, setlogolo sa Elishama, yo mongwe wa ba lapa la mošate, a ya Mitsepa le banna ba lesome, ba hlasela Gedalia mme ba mmolaya. Ba ba ba bolaya le Baisraele le Bababilonia bao ba bego ba na le yena moo. ₂₆Ke gona Baisraele ka moka, ba bagolo le ba bannyane, gotee le balaodi ba madira ba tlogilego ba ya Egepeta, ka gobane ba be ba boifa Bababilonia.

₂₇Ka ngwaga wo Ebile-Merodaka e bilego kgoši ya Babilonia ka wona o ile a ntšha Kgoši Joyakine wa Juda kgolegong. Seo se diregile ka letšatši la masome a mabedi a metšo ye e šupago la kgwedi ya lesome le metšo ye mebedi ya ngwaga wa masome a mararo a metšo ye e šupago ka morago ga ge Joyakine a thopilwe. ₂₈Ebile-Merodaka a mo swara gabotse, gomme a mmea maemong a a hlomphegago go feta a dikgoši tše dingwe tše e bego e le mathopša le yena kua Babilonia. ₂₉A ba a mo apola diaparo tša gagwe tša kgolego, gomme a ja dijo le kgoši bophelo bja gagwe ka moka. ₃₀Ka mehla o be a fiwa tše di nyakegago tša letšatši ka letšatši.