2 DIKGOŠI 17

₁Ngwageng wa lesome le metšo ye mebedi wa pušo ya Kgoši Ahase wa Juda, Hosea, morwa wa Ela, ya ba kgoši ya Israele, gomme a buša a le Samaria mengwaga ye senyane. ₂A dira dibe pele ga Morena, eupša e sego go swana le magoši a a bušitšego Israele pele ga gagwe. ₃Kgoši Salmanasere wa Asiria a mo tšwela dira; Hosea a ineela go yena gomme a mo ntšhetša diloba ngwaga ka ngwaga. ₄Fela ka ngwaga wo mongwe Hosea a roma batseta go So, kgoši ya Egepeta, a mo kgopela gore a mo thuše gore a se hlwe a bušwa ke Salmanasere, gomme a napa a lesa go ntšha diloba tšela tša ngwaga ka ngwaga. Ge Salmanasere a ekwa taba tšeo, a swara Hosea a mo tswalelela kgolegong.

₅Ke moo Salmanasere a hlasetšego Israele gomme a dikanetša Samaria. Ngwageng wa boraro wa go dikanetšwa fao, ₆wo e bego e le ngwaga wa senyane wa pušo ya Hosea, kgoši ya Asiria ya thopa Samaria, ya iša Baisraele bothopša kua Asiria, ya dudiša ba bangwe ba bona motseng wa Halage, ba bangwe nokeng ya Habore, seleteng sa Gosane, gomme ba bangwe ya ba dudiša metseng ya Media.

₇Samaria e ile ya wa ka gobane Baisraele ba be ba dira dibe pele ga Morena Modimo wa bona yo a ba hlakodišitšego go kgoši ya Egepeta mme a ba ntšha Egepeta. Ba be ba khunamela medimo ye mengwe, ₈ba latela ditlwaedi tša ditšhaba tše Morena a di rakilego ge setšhaba sa gagwe se goroga, ba bile ba ithuta mekgwa ye mebe ya magoši a Israele. ₉Baisraele ba be ba bolela Morena Modimo wa bona gampe. Ba ikagela dintotoma tšeo go tšona ba bego ba khunamela medimo ya diswantšho metseng ya bona ka moka, go tloga ka metsana ya ditora tša tlhapetšo go fihla ka metse ye megolo ye e ageleditšwego ka merako. ₁₀Ba hloma dikokwane tša borapedi tša maswika le dikota tša borapedi mebotong yohle ye e phagamego, le ka fase ga mehlare yohle ya merithi ye megolo, ₁₁gomme ba tšhuma diorelo dintotomeng tšohle tšeo go tšona ba bego ba khunamela medimo ya diswantšho, ba dira tše di bego di dirwa ke ditšhaba tšela Morena a go di ntšha nageng. Ba rumola Morena ka ditiro ka moka tša bona tše mpe, ₁₂gomme ba tshela molao wa Morena wo o rego ba se ke ba khunamela medimo ya diswantšho.

₁₃Morena o be a rometše baboni le baprofeta ba gagwe ka moka gore ba botše Baisraele le Bajuda ba re: “Sokologang ditseleng tša lena tše mpe gomme le phetheng ditaelo tša ka tše di lego melaong ye ke e filego borakgolokhukhu ba lena, ka ba ka e fetišetša go lena ka bahlanka ba ka, baprofeta.” ₁₄Eupša ba se ke ba theetša; ba ngangabala bjalo ka borakgolokhukhu ba bona, bale ba go se ke ba tshepha Morena Modimo wa bona. ₁₅Ba gana ditaelo tša gagwe le kgwerano ye a e dirilego le borakgolokhukhu ba bona, le gona ba se theetše ge a ba kgala. Ba khunamela medimo ya diswantšho ya lefeela gomme le bona ya ba mafeela, ba latela mekgwa ya ditšhaba tše di bapilego le bona, ba tshela taelo ya Morena ye e rego ba se ke ba dira tše ba di dirago. ₁₆Ba tshela melao ka moka ya Morena Modimo wa bona, ba ba ba bopa dipowana tše pedi ka tshipi, ba di khunamela; ba betla le kota ya borapedi, ba obamela dinaledi, ba khunamela le Baale. ₁₇Ba direla medimo e šele dihlabelo ka barwa le barwedi ba bona; ba ya go dinoge le go didupe, gomme ba ikgafela go dira tše mpe pele ga Morena, mme ka go dira bjalo ba mo rumola. ₁₈Morena a galefela Baisraele gomme a ba raka pele ga gagwe, a šadiša fela mmušo wa Juda.

₁₉Eupša le sona setšhaba sa Juda se be se sa phethe melao ya Morena Modimo wa sona; ba ile ba tšea mekgwa yela ya batho ba Israele. ₂₀Morena a lahla Baisraele ka moka, a ba kokobetša mme a ba gafela diatleng tša bašwahledi go fihlela ge a ba raka pele ga gagwe.

₂₁Ka morago ga ge Morena a kgaogantše Baisraele le lapa la bogoši la Dafida, Baisraele ba ile ba bea Jerobeamo, morwa wa Nebate, kgoši ya bona. Jerobeamo a ba aroša go Morena gomme a ba diriša dibe tše mpempe. ₂₂Ba latela Jerobeamo gomme ba se ke ba tlogela dibe tše a bego a di dira, ₂₃go fihlela ge Morena a ba raka pele ga gagwe bjalo ka ge a be a ba boditše ka bahlanka ba gagwe, baprofeta. Ka gona batho ba Israele ba išwa bothopša kua Asiria moo ba sa dulago gona le lehono.

₂₄Kgoši ya Asiria ya tšea batho motseng wa Babilone, le wa Kuta, le wa Aba, le wa Hamate, le wa Sefarabaime ya ba dudiša metseng ya Samaria, moo go bego go dutše Baisraele ba ba bego ba thopilwe. Ba tšea metse yeo gomme ba dula go yona. ₂₅Ge ba thoma go dula moo, ba se ke ba boifa Morena, ka gona a romela ditau mme tša bolaya ba bangwe ba bona. ₂₆Kgoši ya Asiria ya botšwa gore batho ba a ba dudišitšego metseng ya Samaria ga ba tsebe ka moo ba swanetšego go direla Modimo wa naga yeo ka gona, ka fao Modimo woo o rometše ditau mme di a ba bolaya. ₂₇Ka gona kgoši ya ntšha taelo ya go re: “Tšeang yo mongwe wa baprista ba re ba thopilego kua le mmušetše gona gore a yo dula gona a rute batho ba fao ka moo Modimo wa naga yeo a swanetšego go direlwa ka gona.” ₂₈Ka gona moprista yo mongwe yo a bego a thopilwe Samaria a tloga a yo dula Bethele fao a ilego a ruta batho ka mo Morena a swanetšego go khunamelwa ka gona.

₂₉Eupša merafe ye e bego e dutše Samaria ya tšwela pele le go itirela medimo ya yona ya diswantšho, gomme ba e bea ka ditempelaneng dintotomeng tša go agwa ke Baisraele, tšeo go tšona go bego go khunamelwa medimo ya diswantšho. Morafe wo mongwe le wo mongwe wa itirela medimo ya wona ya diswantšho motseng wo o bego o dula go wona: ₃₀Batho ba Babilone ba dira diswantšhobopša tša modimo wa go bitšwa Sukote-Benote; batho ba Kuta ba dira tša Nergale; ba Hamate tša Ashima; ₃₁ba Aba tša Nibihase le tša Tartake; gomme ba Sefarabaime bona ba direla medimo ya bona, Adrameleke le Anameleke, dihlabelo ka bana ba bona. ₃₂Batho ba le bona ba be ba boifa Morena, gomme ba no ikgethela mang le mang gare ga bona gore e be moprista wa go hlankela medimo ya diswantšho ditempelaneng tša dintotomeng, le go ba direla dihlabelo moo. ₃₃Ka gona ba be ba khunamela Morena ba bile ba khunamela medimo ya bona go ya ka ditlwaedi tša ditšhaba tše ba bego ba etšwa go tšona.

₃₄Le lehono ba sa latela ditlwaedi tšeo tša bona tša kgale. Ga ba khunamele Morena goba ba phetha melao le ditaelo tše a di filego ditlogolo tša Jakobo yo a mo reetšego leina la Israele. ₃₅Morena o be a dirile kgwerano le bona mme a ba laetše a re: “Le se ke la khunamela medimo ye mengwe; le se ke la e obamela, goba la e rapela, goba la e direla dihlabelo. ₃₆Le khunameleng nna, Morena, yo ke le ntšhitšego Egepeta ka maatla a magolo le go tia ga ka; le obameleng nna gomme le direleng nna dihlabelo. ₃₇Ka mehla le phetheng melao le ditaelo tše ke le ngwaletšego tšona. Le se ke la khunamela medimo ye mengwe, ₃₈le gona le se ke la lebala kgwerano ye ke e dirilego le lena. Le se ke la khunamela medimo ye mengwe, ₃₉eupša le khunameleng nna fela, Morena Modimo wa lena, mme ke tla le hlakodiša manabeng a lena.” ₄₀Fela ba ile ba se ke ba theetša, ba no tšwela pele le go latela ditlwaedi tša bona tša kgale.

₄₁Ka gona batho bao ba be ba boifa Morena, ba bile ba khunamela medimo ya bona ya diswantšho; gomme le lehono ditlogolo tša bona di sa tšwela pele le go dira bjalo.