Seswantšho se segolo – Letšatši la 16
Bibele ka leleme la ka
(Di)temana ya Bibele
Pesalome 119
Ye nngwe ya ditlhohlo tše kgolo tše Mokgatlo wa Bibele o lebeletšanego le tšona, ke go gatiša diphetolelo tša khwaliti tše di nepagetšego tše di theilwego go ditemana tša mothopo. Ke morero wa Mekgatlo ya Bibele lefaseng ka bophara go fetolela Bibele go maleme ao a antšwego letsweleng. Le ge go le bjalo, ga go mabapi le phetolelo fela, go mabapi gape le go netefatša gore diphetolelo tše di a balwa.
Mathomong a protšeke ya phetolelo ya leleme la isiNdebele sa Borwa, ke tšere diswantšho tše ntši. Re anegile kanegelo ya sehlopha sa bafetoledi bao ba kopanego, ofising ye nnyane kua Yunibesithing ya Tswane, le go šoma diiri tše telele dikhomputareng tša bona, ba šomiša diBibele le dipukuntšu tše fapafapanego.
Go bile fela mengwaga e mentši ka morago, moo re tšerego diswantšho tša mošomo wa mafelelo. Re be re sa na le batho batee sehlopheng. Phapano fela e be e le meriri ya bona ye mepududu ye e bego e bonala kudu. Se se sa fetogago e bile lerato le boikgafo bja bona, bjo ba thomile ka bjona mengwaga e mmalwa ya go feta. Peter Mabena le David Mahlangu ba be ba sa na le lerato le swanago la leleme la bona. Profesa Andries Breytenbach o be a thabile gore o šomišitše leleme le a ithutilego lona e sa le ngwana, go hlankela Morena.
Testamente ye Mpsha ka leleme la isiNdele sa Borwa e na le mengwaga e le gona. Ga bjale, ba na le Bibele ye e feletšego ka lelema la bona. Ba tla kgona gore lentšu la Morena ke seetša tseleng ya bona, le ba hlahla tseleng.
Ka bomadimabe, go sa ne le maleme a go feta a 1000 mo Afrika ao a se nago karolo le ge e le efe ye e fetoletšwego ya Bibele go malema a. A ke maleme ao a antšwego letsweleng a batho ba ga bjale ba ithekgilego go leleme la bobedi goba la boraro, gore ba kgone go bala le go kwešiša lentšu la Modimo. Ye ke tlhoko e kgolo!
Go na le diprotšeke tše ntši tše di tšwelago pele go rarolla tlhoko ye. Nnete ke gore go tšea lebaka la mengwaga ye lesome goba ye masomepedi go fetolela Bibele, gomme go nyakega diketekete go netefatša gore protšeke e tšwela pele. Tlhohlo, ka gona, ke e kgolo. Naa leo ga se lebaka le le lekanego la gore o thabele Bible ya gago?
