Phela ka Lethabo … Lehono – Letšatši la 4

Ke amogetše emeile go tšwa go mmadi. “Pelo ya ka o ka re e hwile. Ga go na maikutlo, ke pelo fela ye e kibago.” Naa o ikwa bjalo lehono? O leka go gatela pele ka maatla a gago ka moka, eupša lebota le le sa bonagalego le a go thibela? Mohlomongwe, o leka go ya morago nakong e fetilego go dira diphetho tše fapanego, eupša lebota le lengwe le a go thibela? Goba mohlomongwe, o ka re o kgakgetšwe ka moleteng gomme maboto a go tswalelela go tšwa ka mathoko ka moka, go gamola lethabo la mafelelo le bophelo go tšwa go wena?

Se ke ka fao Shadraka, Meshaka le Abednego ba ka bego ba ikwele ka gona, ba eme pele ga moubelo wo o laumago mollo. Ba kgethile go se khunamele diswantšhobopša, ka lebaka la Modimo, eupša ga bjale ba be ba tla bolawa. Abrahama le Sarai ba kgethile go tshepha Modimo gore ba tla ba le ngwana, eupša be ba šetše ba tšofetše. Go thweng ka mosadi wa bolwetši bja ngope? O etetše dingaka tša go fapafapana le go rapelela phodišo kudu, eupša gwa se direge selo.

Naa o ikhwetša ka gare ga boemo bjo swanago lehono? Naa o rapelela pelo ya molekani wa gago gore e be boleta go wena, eupša o ka re lenyalo la gago le a phuhlama? Naa o rapelela katlego ya ditšhelete, eupša go bonala eke boemo bja gago bja ditšhelete bo a mpefala? Mohlomongwe o rapelela phodišo, katlego lefelong la mošomo goba ngwana yo e lego wa gago – eupša ga o hwetše karabo?

Theeletša mantšu go Pesalome 40:2-4 moo Mopesalome a re gopotšago gore Modimo a ka re ntšha ka gare ga molete le ge e le ofe, ge re mo tshepha go dira seo. “A nntšha moleteng wa tahlego, moo tebetebeng ya leraga, a mpea sebong, a ntshepediša mo go omilego. A mpha kopelo ye mpsha, sereto sa Modimo wa rena. Ba bantši ba tla re go kwa kopelo ya ka ba gakgamala, ba tshepha Morena. Go lehlogonolo motho yo a tshephilego Morena, yo a sa fadišego baikgogomoši …” Gomme go Jeremia 32:27, Modimo o re gopotša gore ga go bothata bjo e lego bjo bogolo go yena. Theeletša mantšu a moprofeta Jeremia: “Ke nna Morena, Modimo wa batho ka moka. Kgane go na le se se ntšhitago?”

Modimo o phološitše Shadraka, Meshaka le Abednego moubelong wo o laumago mollo meriri ya bona e sa tlaboga, ka gobane ba mo tshephile gore a ba phološe. O file Abrahama le Sarai ngwana le ge ba be ba tšofetše kudu, ka gobane ga ba a felelwa ke kholofelo. Mosadi wa bolwetši bja ngope a fodišwa ka go swara morumo wa seaparo sa Jesu, ka gobane o bile le tumelo ntle le pelaelo. Modimo a ka dira ka mo go swango go wena. Naa o tla tšwela pele le go mo tshepha ka mohlolo – le ge a diega? Ga a ka pela, goba go ba morago ga nako, eupša ka mehla o fihla ka nako ya maleba. Modimo a go šegofatše.