Phela ka Lethabo … Lehono – Letšatši la 3

Ke be ke thabile kudu go reka founu e mpsha ge kontraka ya ka ya founu e felela ke nako. Dibeke tše ntši, ke be ke bapetša difounu go fihlela ge ke tšea sephetho go reka founu ye e tšeago dibidio le diswantšho tše botse.

Ke thabile, ke ile gae le founu ya ka e mpsha ka kholofetšo ya gore ke tla thoma go e diriša gosasa mesong. Gosasa mesong, ke tšere seswantšho sa ka sa pele. Ke maketše boleng bja sona bo be bo sa kgahliše le go se bonale gabotse. Go feta moo, ge ke amogela mogala wa pele, ke be ke katana le go kwa motho yo a nteleditšego. Ke nyamme kudu. Go be go na le selo se segolo se se fošagetšego.

Ka morago letšatšing lona leo, ka go makala le go ja ke dihlong, ke hweditše gore ke be loketše founu ka gare ga sepipetše sa yona sa tšhireletšo sa plastiki se ke se rekilego letšatši pele ga yona, eupša ke lebetše go se tloša – se pipeditše khamera le sepikara! Go molaleng gore morago ga go tloša sepipetši ke be ke ekwa motho yo a nteletšago mogala gabotse le khwalithi ya diswantšho e be e kgahliša kudu.

Na o a lemoga gore le rena ka dinako tše dingwe re katana le go kwa lentšu la Moya wo Mokgethwa goba re ba le pono ye e sa bonalege gabotse bophelong ka lebaka la mapheko maphelong a rena? Lepheko le ba gona ka dibopego tša go fapafapana. E ka ba boitshwaro bjo kgopišago go mogwera wa gago yo a go kwešitšego bohloko, pefelo goba lehufa go mošomi-gotee mošomong, pefelo goba boitshwaro bja go se lebalele go motho yo o mo ratago goba gaešita le go nyamišwa ke Modimo, ge a sa araba dithapelo tša gago ka tsela ye o letetšego gore a arabe ka yona.

Theeletša mantšu a Jesu go Mateu 5:23-24: “Ka gona, ge o ka re o iša mpho go Modimo aletareng, wa elelwa o le moo gore ngwaneno o ngongorega ka wena, o tlogele mpho ya gago moo pele ga aletare, o yo boelana le ngwaneno pele, o kgone o iša mpho ya gago.” Gape go Pesalome 139:23-24, Mopesalome o ngwetše gore: “Mphetleke, Modimo, o tsebe pelo ya ka; ntekole, o bone khuduego ka go nna. Ntebelele ge ke na le bobe, gomme o nkiše tseleng ya go sa felego.”

A re kgopeleng Moya wo Mokgethwa go re hlahla ka go sa felego go tloša “plastiki” maphelong a rena gore re kgone go kwa lentšu la gagwe gabotse re bone bophelo ka pono e mpsha. Modimo a go šegofatše.