Phela ka Lethabo … Lehono – Letšatši la 22
Go phela o thabile ... lehono (bofelo)
(Di)temana ya Bibele
BAFILIPI 3
MATEU 5
Pesalome 37
Pesalome 112
Katlego ya yo a boifago Morena
Pesalome 147
2 BAKORINTE 12
MATEU 25
MATEU 5
[Phetho: Ke leboga emeile ye nngwe le ye nngwe ye ke e amogetšego. E sa le tokelo e kgolo go bona moo Moya wo Mokgethwa o šomago, o fetošago maphelo le go batametša batho kgauswi le Modimo. Ke ruma lelokelelo le ka kakaretšo e kopana ya ditabataba tše re di ahlaahlilego. Ke holofela gore se se tla go thuša go phela ka lethabo letšatši le letšatši! Ditumedišo, Benescke]
Go na le mehuta ye meraro ya batho, Motho wa nako e fetilego yo a sa gopolago tša kgale, motho wa gosasa yo a tsepeletšego kudu bokamoso le motho wa lehono yo a lemogago manyami a gagwe le diphošo, eupša a se dumele gore di laole bophelo bja gagwe.
Re ba bjang batho ba lehono? Go Bafilipi 3:13-15, Paulose o nea karabo: “Se ke se dirago ke gore tša ka morago ga ka ke a di lebala, ka obelela tša ka pele ga ka. Ke šianela go ba thwadi gore ke yo thopa sefoka, e lego go biletšwa ke Modimo bophelong bja legodimong ka Kriste Jesu.”
Mo ke melawana ya go phela ka bophelo bja lethabo lehono.
GO PHELA BOPHELO BJA LETHABO KA NTLE LE MAPHEKO:
Go Mateu 5:23-24 Jesu o rile: “Ka gona, ge o ka re o iša mpho go Modimo aletareng, wa elelwa o le moo gore ngwaneno o ngongorega ka wena, o tlogele mpho ya gago moo pele ga aletare, o yo boelana le ngwaneno pele, o kgone o iša mpho ya gago.”
GO PHELA BOPHELO BJA LETHABO KA NTLE LE POIFO LE MATSHWENYEGO:
Go Pesalome 37:5 re bala gore: “Dula o ipeile ka diatleng tša Morena; o mmotile mme yena o tla go phethela.”
GO PHELA BOPHELO BJA LETHABO, O THEELETŠA MODIMO:
Go Pesalome 112:1-2 Mopesalome o ngwala gore: “Go lehlogonolo motho yo a boifago Morena, yo a kgahlwago kudu ke go phetha melao ya gagwe. Ditlogolo tša gagwe e tla ba tše maatla mo lefaseng; e tla ba moloko wo lehlogonolo wa baloki.”
GO PHELA BOPHELO BJA LETHABO LE GE PELO YA GAGO E KA BA E ROBEGILE:
Go Pesalome 147:3 re bala gore: “O (Modimo) homotša ba ba nyamilego, o ba kgothatša manyaming a bona.”
GO PHELA BOPHELO BJA LETHABO GO SA ŠETŠWE DINAKO TŠE THATA:
Go 2 Bakorinte 12:9, Paulose o ngwala gore o kgopetše Modimo gararo go mo hlomola phatša nameng ya gagwe. Phetolo ya gagwe e bile: “Kgaugelo ya ka e go lekane, gobane maatla a ka a tiile kudu mo go ba ba fokolago.”
GO PHELA BOPHELO BJA LETHABO, O THUŠA BA BANGWE:
Go Mateu 25:40 Jesu o rile: “Ruri, ke le botša gore ge le be le direla yo mongwe wa banabešo ba ba nyatšegago ba, le be le direla nna!”
GO PHELA BOPHELO BJA LETHABO O LE MODIRAKHUTŠO:
Go Mateu 5:9 Jesu o rile: “Ba lehlogonolo ke badirakhutšo, gobane ba tla bitšwa bana ba Modimo.”
A re ithuteng go tša nakong e fetilego le go rulaganyetša bokamoso, eupša kgetha go phela ka lethabo mola re dula re butše mahlo gore re se fete ke menyetla go ka kaonafatša bophelo bja motho yo mongwe, ka go ba gona moo go fihlelela dinyakwa tša gagwe. Modimo a go šegofatše.
