Phela ka Lethabo … Lehono – Letšatši la 21

Lehono, ke nyaka go le botša sephiri se sengwe sa go phela ka lethabo: E ba modirakhutšo.

Nakong e fetilego, ke kwele motho a re o nagana gore o na le temalelo ya khutšo. Mathomong, o be a nyaka gore pono ya gagwe e be e nepagetšego ka mehla go fenya ngangišano. Ga bjale, o lemoga gore motho yo a dirago khutšo tebanyo ya gagwe le go ikemišetša go kgopela tebalelo pele, ga a na fela bohlale bja nnete, eupša e ba mofenyi. Ke a dumela ka mo go feletšego.

Lefase le ka bitša badirakhutšo bafokodi, eupša Jesu, go Mateu 5:9, o ba bitša bana ba Modimo: “Ba lehlogonolo ke badirakhutšo, gobane ba tla bitšwa bana ba Modimo.”

Lefase le ka go botša gore, o na le tokelo ye nngwe le ye nngwe go swara sekgopi kgahlanong le motho yo a a go kwešitšego bohloko goba go itefeletša, eupša go Baefeso 4:26-27 re bala gore: “Ge le ka tšhoga le galefile le se ke la lesa kgalefo ya lena e le diriša sebe, le gona letšatši le se ke la le sobelela le sa galefile. Le se ke la fa Diabolose sebaka.”

Gomme lefase le ka go kgodiša gore katlego ke tebanyo ya gago, go sa šetše gore ke batho ba bakae bao o ba kwešago bohloko tseleng ya gago, ke manaba a makae ao o a dirago goba ke ditswalano tše kae tše o di fedišago, eupša go Bakolose 3:15 re bala gore: “Mererong ya lena le hlahlwe ke khutšo ye le e fiwago ke Kriste, gobane Modimo o le bileditše gona khutšong ye gore le be mmele o tee; gomme le leboge.”

Naa se se ra gore ga o a swanela go ntšha sa mafahleng? Aowa. Ge go na le bothata, bo rarolle, eupša ka maikemišetšo a go boelanya gomme e se go kweša yo mongwe bohloko goba go tlogela tswalano ye e robegilego morago. Se se tliša phapano, e se khutšo.

Ka khutšo maphelong a rena, re dira diphetho tše kaone, re na le pono e kaone go maemo a thata le go kwa lentšu la Modimo gabotse kudu, gomme re thibela diphapano, lehloyo, poifo goba bogale go ka ba mapheko tswalanong ya rena le Modimo.

Nka paka gore bophelo bja ka ga bo bonolo fela, eupša ke thabile mola ke thomago go ba wa pele go kgopela tebalelo, le ge e be e se nna fela wa phošo ka gare ga boemo. Ke lebalela bonolo, ka gobane ga ke nyake go fa lenaba sebaka bophelong bja ka gomme ke kgethile go dira khutšo ya Modimo tebanyo ya ka.

Ka gona, e ba modirakhutšo ka go beela thoko dinyakwa tša gago tša boithati nakwana gomme o ikgopotše gore Modimo ke Mong wa bohle. A ka lwa legatong la gago. Se o swanetšego go se dira ke go dira khutšo tebanyo ya gago gomme nka go netefaletša bophelo bja lethabo lehono. Modimo a go šegofatše.