Phela ka Lethabo … Lehono – Letšatši la 18
Go phela o thabile ... le ge o robegile pelo
(Di)temana ya Bibele
Pesalome 34
Pesalome 147
JESAYA 40
Babadi ba mmalwa ba nkgopetše gore ke ngwale se sengwe mabapi le go phela o thabile ka gare ga tobo goba pelo ye e robegilego.
Kadija ya madira a dikepe tša ntwa ya Amerika yo a ilego Middle East gararo; mosetsana wa mengwaga e selelago; le monna yo morago a šireletšago lekgarebe la gagwe le buti wa lona go dikolo tše di bolayago. Ba ke ba bararo fela ba batho ba bantši bao ba hlokafetšego bao ba gorogilego lefelong la difilimi le le bego le tletše ka batho pontšhong ya filimi ya bošegogare ya filimi ya Batman ya 2012, The Dark Knight Rises kua Aurora, Colorado kua America – ba tsa tsebe gore ye e tla ba filimi ya bona ya mafelelo.
Mo e ka bago seripa sa iri morago ga ge filimi e thomile, James Holmes wa mengwaga ye 24 o tsene ka holong ya filimi a apere sešira-sefahlego sa kgase, dibetša le kgase ya go ntšhiša megokgo. Batho ba 58 ba gobaditšwe gomme ba 12 ba hlokafetše le semeetseng.
Ge Holmes, yo morago ga go swarwa ga gagwe a ipiditšego “Joker” go tšwa go filimi ya Batman, a tšwelela pele ga kgorotsheko ka Mošupologo, maloko a lapa le baratiwa ba bao ba hlokafetšego ba beile matšoba le mangwalo ao go wona ba hlagišago maikutlo a bona ka ntle ga lefelo la difilimi.
Ke kwela bohloko bao ba ke se bego le monyetla wa go gokara baratiwa ba bona goba go ba botša gore ba a ba rata.
Naa le wena o na le pelo e robegilego lehono? Mohlomongwe, motho yo o mo ratago o hlokafetše ka tsela e sehlogo ye e swanago. Mohlomongwe, go na le motho yo a go tšeetšego molekani. Goba mohlomongwe o eme nakong e fetilego kgauswi le lebitla le le bulegilego la motho yo o mo ratago morago ga gore a babje nako e telele? Tobo ya motho yo o mo ratago e tlogela ntho dipelong tša rena tše Modimo fela a ka di fodišago. Theeletša dikholofetšo tša gagwe le go nagana ka tšona ge o le ka gare ga mathata:
Pesalome 34:18: “Morena o kgauswi le bao ba nolegilego moko; o phološa bao ba feletšwego ke tshepo.”
Pesalome 147:3: “O homotša ba ba nyamilego, o ba kgothatša manyaming a bona.”
Jesaya 40:29: “O lapološa bao ba lapilego, bao ba fokolago a ba fa maatla.”
Modimo o kgauswi le ba nolegilego moko. O fodiša dintho tša rena le go re fa maatla ge re se na maatla go ya pele. Lehodu le tlile go utswa, go bolaya, le go lobiša, Jesu o tlile go re nea bophelo bjo bo feletšego. Ka gona, a re tsepeletšeng mahlo a rena go yena ka tsebo ya gore a ka se tsoge a re tlogetše goba go re lahla. Ke ka lebaka la eng o sa kitimele go yena gore a go fodiše lehono? Modimo a go šegofatše.
