Phela ka Lethabo … Lehono – Letšatši la 17

Mathomong a letšatši la mafelelo la Thonamente ya Kolofo ya British Open ya 2012, go be go lebeletšwe gore Adam Scott e tla ba mofenyi. O be a sa etela pele ka distrouku tše nne fela, eupša moya o be o foka kudu, gomme o dira gore lebala le be boima go dibapadi tše dingwe go fihlelela Scott.

Ge go šetše melete e mene, menyetla ya Scott ya go ka thopa sefoka gateetee ya phuhlama ge a palela ke go bethela kolofo ka meleteng e mene, a baka gore Ernie Els e be mofenyi wa Claret Jug lekga la bobedi, a e ba Nkgwete e Kgolo lekga la bone.

Le ge Scott a bontšhitše moya wa papadi o mmotse nakong ya phenyo ya gagwe, ba dumedišana ka matsogo le go leka go myemyela, manyami a ga gagwe nakong ya moletlo wa go neela sefoka a be a bonala sefahlegong sa gagwe.

Manyami a Scott a dirile gore ke nagane ka manyami a re lebeletšanago le wona ka dinako tše dingwe. O ka ba o dirile dikgopelo tša mošomo o itšego. O be o le mmamoratwa go ka hwetša mošomo, eupša mošomi-gotee o monnyane wa maitemogelo a mannyane o hweditše mošomo. O ka ba o kgodišegile gore motho yo o bego o ratana le yena ke molekani wa gago wa bophelo ka moka, eupša o fedišitše tswalano. O ka ba o boditše mogwera goba leloko la lapa sephiri, gomme o lemogile gore ba paletše ke go boloka sephiri seo.

O swaragana bjang le dinakwana tša manyami a magolo? O sola batho ba bangwe goba o iša taba go Modimo, ka tsebo ya gore o na le polelo ya mafelelo boemong bjo bongwe le bjo bongwe? Modimo o tseba bokamoso gomme re ka tshepha yena ka nnete. Go Pesalome 62:5 re bala gore: “Nna khutšo ke e hwetša go Modimo fela, ke yena yo ke mo tshephilego.” O bula le go tswalela mabati go re šireletša. Go Kutollo 3:7 re bala gore: “Yo e lego yo mokgethwa le wa go botega, yo a swerego sekgonyo se e bego e le sa Dafida, yo e rego ge a bula mojako gwa se be le yo a ka kgonago go o tswalela, ge a o tswalela gwa se be le yo a ka kgonago go o bula.”

Ge wena o itemogela manyami, go e na le go ikwela bohloko, thoma go leboga Modimo. O tseba bokamoso bja gago. Ge a sa go šireletše ga bjale, mohlomongwe o maatlafatša semelo sa gago gore o kgone go emelana le dikgatelelo tše di sepedišanago le dikatlego tša go makatša go bokamoso bja gago. O nyaka tše kaonekaone go wena, ka gona kgonthišega gore o tla bula le go tswalela mabati a maleba – le ge o swanetše go kgotlelela nako e kopana ya manyami. Modimo a go šegofatše.