Phela ka Lethabo … Lehono – Letšatši la 19

Morago ga sengwala sa letšatši la 17, moo ke gateletšego gore Modimo a ka bula le go tswalela mabati maphelong a rena go re šireletša, babadi ba bantši ba botšišitše gore ba ka ba le nnete bjang gore diphetho tša bona di sepedišana le thato ya Modimo ya maphelo a bona?

Bontši bja rena re itemogetše dinakwana tše bjalo, pele ga sephetho se segolo. Ge boikwelo bja go se tsebe gore o direng bo tšhošetša go go fenya. Mohlomongwe, go be go le go dira sephetho se segolo lefelong la mošomo, o dira sephetho sa go ka thiba sefero, o hudugela toropong e nngwe, o kgetha sekolo se seswa sa bana ba gago goba gaešita le go kgetha sellathekeng se seswa, ge nako ya go kaonafatša sellathekeng sa gago e fihlile. Ga go sephetho se e lego se segolo goba se se nnyane go ka se rerišana le Modimo.

Potšišo, le ge go le bjalo, ke gore: “O rerišana le Modimo pele o dira sephetho goba o a mo tsebiša ka morago ga go se dira, ka kholofelo ya gore o tla šegofatša sephetho sa gago? Nagana nakwana ka se. O rerišana le yena goba go no mo tsebiša fela ka diphetho tša gago?

Go Lukase 11:9, Jesu o re go barutiwa ba gagwe, “Kgopelang, le tla fiwa; nyakang, le tla hwetša; kokotang, le tla bulelwa.” Bothata ke gore re palela go rapela ka diphetho tša rena gomme, ka go realo, re bala go Jakobose 4:2c: “Ga le hwetše se le se nyakago, ka gobane ga le se kgopele go Modimo.”

Mo ke dikgato tše tharo go kaonafatša tshepetšo ya gago ya go dira diphetho nakong e tlago:

KGATO YA 1: KGOPELA MODIMO GO GO HLAHLA

Go Diema 3:5-6 re bala gore: “O tshephe Morena ka pelo ya gago ka moka. O se ke wa tshepha kwešišo ya gago. O gopole Morena dilong tšohle tše o di dirago, gomme yena o tla go lokišetša ditsela.” Go tlaleletša moo, go Jakobose 1:5 re bala gore: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.” Re ka ba le nnete ya gore Modimo o kwa dithapelo tša rena le go re fa bohlale ge re bo hloka – re hloka fela go kgopela!

KGATO YA 2: THEELETŠA LENTŠU LA MOYA WO MOKGETHWA

Go Jesaya 30:21, re hwetša kgonthišetšo ya gore Moya wo Mokgethwa o bolela le rena: “Ge le phamoga tsela le eya ka thoko efe le efe, le tla kwa lentšu ka morago ga lena le re: ‘Tsela ke ye. Tšeang ka yona.’ ” Ge re fetša nako e ntši bogoneng bja Modimo, ke mo re tla lemogago kudu lentšu la Moya wo Mokgethwa. Ge o sena nnete ya gore o bolela le wena, ngwala se o itemogelago sona pelong ya gago gomme o se lekanye kgahlanong le lentšu. Tlhahlo ya Moya wo Mokgethwa ka mehla e tla sepedišana le lentšu la Modimo.

KGATO YA 3: TSHEPHA KHUTŠO PELONG YA GAGO

Modimo o re hlahla ka khutšo dipelong tša rena. Lenaba le šomiša pelaelo bjalo ka sebetša sa gagwe. Ge wena, ka gona, o kgopetše Modimo bohlale le go dumela gore o go hlahlile ka Moya wa gagwe wo Mokgethwa, ela hloko go se dumelele pelaelo le poifo go huetša bophelo bja gago. Ge e le gabotse, go Jakobose 1:6 re bala gore: “Fela ge le kgopela le be le tumelo, e sego pelaelo, ka gobane yo a belaelago o swana le lephoto la lewatle le le akgaakgwago gape le tšokotšwago ke phefo.” Ge o na le pelaelo pele o dira sephetho se segolo, kgopela Modimo go go utollela ge e ba ke temošo go tšwa go yena, goba ke lenaba le le lekago go go dira gore o belaele.

A re boledišane le Modimo pele, go e na le go mo tsebiša ka diphetho tša rena ka morago. Ge o dirile diphetho tše fošagetšego o sa tsebe, ga se bofelo bja bophelo bja gago. Ge o ya go yena ka pelo ya nnete gomme o mo kgopela gore a go hlahle, o ka no itemogela ka fao a fetošago boemo bjo bobe bophelong bja gago go ba boemo bjo bo šegofatšago. O tseba bokamoso gomme re ka tshepha khutšo dipelong tša rena bjalo ka sešupo sa tlhahlo ya gagwe. Modimo a go šegofatše.