Phela ka Lethabo … Lehono – Letšatši la 16

Ka mehla ke amogela diemeile tša go fapafapana go tšwa go babadi ba nkgopela go ngwala se sengwe mabapi le go phela o thabile ge molekani wa gago a sa dumele, ge o le modumedi o nnoši lefelong la gago la mošomo goba ge bana ba gago ba tšere sephetho sa go tlogela Modimo. Naa ye ke potšišo ya gago lehono?

Ke kwele kanegelo ya moromiwa yo a kwelego a hlahlwa go yo bega ebangedi go sehlopha se itšego sa batho ba ba bego ba se ba kwa ebangedi. Mathomong, o bile le kholofelo ya gore o tla hwetša toloki go hlatholla molaetša o a bego a nyaka go ba botša wona. Le ge go le bjalo, se ga se a direga. Morago ga dikgwedi tše mmalwa a katana le go bolela leleme la lefelo, moromiwa o tšere sephetho sa go yo dula mokutwaneng, ka ntlenyana ga motse. Moo, o rapeletše batho ba motse letšatši le letšatši, a le gare a bontšha semelo sa Jesu ka mediro ya gagwe.

Ka pejana ka morago ga lehu la moroiwa, sehlopha se sengwe sa baromiwa se fihlele motseng. Ka go šomiša ditoloki, ba thoma go begela batho molaetša wa ebangedi ya Jesu Kriste. Le semeetseng, badudi ba motse ba o amogela. Ge ba botšišwa gore ba kwele ka Jesu Kriste pele, ba ile ba dumela ka dihlogo. Yo mongwe wa bona a šupa mokutwana wa moromiwa yo a hlokafetšego, ka mantšu a “O be a dula mola!” Boikgafo bja moromiwa bja go hloka boithati le dithapelo go batho di bjetše peu, yeo ka morago e dirilego gore ba amogele Jesu Kriste bjalo ka Mophološi wa bona.

Ke eng boitshwaro bja gago go batho ba o phelago le bona? Naa o ba hlohleletša gore ba nyake go ithuta tše ntši ka Mophološi wa gago? Naa o rapela letšatši le letšatši gore Moya wo Mokgethwa o ka bula dipelo tša bona le menagano go amogela nnete? Se ke sephiri go pheleng o thabile, gaešita le ge o le modumedi o nnoši tikologong ya gago.

KE KA LEBAKA LA ENG GO LE BOIMA GO KGODIŠA MOTHO YO A SA DUMELEGO GORE A DUMELE?

Go 2 Bakorinte 4:4 re bala gore: “Ke ba ba sa dumelego, bao modimo wa lefase le o ba šitišago go kwešiša. O ba šitiša go bona seetša se se ba bonegelago sa go tšwa go Taba ye Botse ya letago la Kriste, yo e lego yena seswantšho sa Modimo.” Re swanetše go rapela gore Moya wo Mokgethwa a tloše seširo dipelong le menaganong ya ba ba sa dumelego, gore ba kgone go lemoga nnete ya Jesu Kriste.

KE ENG SE RE SWANETŠEGO GO SE DIRA GE RE NYALANE LE MOHLAKATUMELO GOBA MOKGELOGI?

Go 2 Bakorinte 6:14, re a lemošwa go se nyale motho yo a sa dumelego – gore re se hloke tumelo ka moka. Le ge go le bjalo, ge e ba o nyetše gomme molekani wa gago o kgeloga go Modimo, goba o a phološwa gomme molekani wa gago e sa le mohlokatumelo, re bala go 1 Bakorinte 7:12-16 gore ga re a swanela go nyaka le semeetseng ditsela tša go tšwa lenyalong. Go e na le moo, re swanetše go latela molawana wo o hwetšwago go 1 Petrose 3:1-2: “Le lena, basadi, le ikokobetše go banna ba lena, gore ge go na le ba ba sa dumelego lentšu la Modimo ba tle ba sokollwe ke maitshwaro a lena ntle le polelo, ge ba tla be ba bona mesepelo ya lena ye e hlwekilego, le ka mo le ba hlomphago ka gona.”

Ka gona, a re tlogeleng go ahlola bahlokatumelo gomme re tsepelele go bokgoni bja Modimo le tumo ya go phološa mohlakatumelo. A ka fetoša molekani wa gago wa go hloka tumelo, bašomi-gotee le/goba maphelo a bana ba gago. Se re hlokago go se dira ke go tšwela pele re rapela le go kgopela Moya wo Mokgethwa go romela batho ba maleba maphelong a bona, le go re maatlafatša go dira ka lerato ka mehla go batho ba re phelago le bona. Dira se gomme o ka makala ge Morena Modimo a fetola motho wa pelo ye thata, go ba yo a mo hlankelago. Modimo a go šegofatše.