1 BAKORINTE 7

₁Bjale mabapi le taba tšela le nngwaletšego tšona ke re: Monna o dira gabotse ge a sa nyale. ₂Eupša ka ge bofebe bo iphile maatla ka mokgwa wo, monna yo mongwe le yo mongwe a a be le mosadi yo e lego wa gagwe, le mosadi yo mongwe le yo mongwe a be le monna yo e lego wa gagwe. ₃Monna a fe mosadi wa gagwe ditshwanelo tša go sepetša madi a mmele, le mosadi a fe monna wa gagwe ditshwanelo tša go sepetša madi a mmele. ₄Mosadi ga a laole mmele wa gagwe, o laolwa ke monna; le monna ga a laole mmele wa gagwe, o laolwa ke mosadi. ₅Le se ke la timana thobalo, ka ntle le ge le kwane ga sebakanyana gore le iphe nako ya go rapela, eupša ka morago le boelane, gore Sathane a se tlo le diriša sebe ka ge le sa kgone go itshwara.

₆Ge ke realo ga ke le beele molao, ke dio le eletša. ₇Gabotse ke duma ge bohle le ka be le etša nna; fela yo mongwe le yo mongwe o na le mpho ye a e filwego ke Modimo ka kgaugelo ya gagwe – mongwe o na le ye, mongwe o na le yela.

₈Ge e le bao ba sego ba nyala le bahlologadi, go bona ke re go ka ba kaone ge ba ka dula ba se ba nyala ba etša nna. ₉Eupša ge ba sa kgone go itshwara, a ba nyale; gobane go kaone go nyala go na le go fišwa ke tumo.

₁₀Ge e le ba ba nyetšego bona ke ba swaretše molao wa go tšwa go Morena, e sego go nna: Mosadi a se ke a hlala monna wa gagwe; ₁₁eupša ge a ka hlala, a dule a se a nyalwa, goba a boelane le monna wa gagwe; le monna a se ke a hlala mosadi wa gagwe.

₁₂Ba bangwe ba botšwa ke nna, e sego Morena, ke re: Ge monna wa modumedi a nyetše mosadi yo e sego modumedi mme mosadi yoo a dumela go no dula naye, monna yoo a se ke a mo hlala. ₁₃Le mosadi ge a nyetšwe ke monna yo e sego modumedi mme monna yoo a dumela go no dula naye, mosadi yoo a se ke a mo hlala. ₁₄Gobane monna yo e sego modumedi o kgethwafatšwa ke go nyala mosadi yoo wa gagwe wa modumedi; le mosadi yo e sego modumedi o kgethwafatšwa ke go nyalwa ke monna yoo wa gagwe wa modumedi. Gape ge go ka be go se bjalo bana ba bona ba ka be ba swana le bana ba baditšhaba; eupša bjale ba kgethwafetše. ₁₅Fela ge yo e sego modumedi a nyaka go hlala, a a hlale. Ge go bile bjalo, monna goba mosadi wa modumedi ga a sa tlemilwe ke lenyalo leo. Modimo o le biditše gore le phele le sa lwe. ₁₆Wena mosadi wa modumedi, o tseba bjang gore o ka phološa monna wa gago? Le wena monna wa modumedi, o tseba bjang gore o ka phološa mosadi wa gago?

₁₇Motho o swanetše go phela bophelo bjo a bo abetšwego ke Morena, a dule a le seo a bego a le sona mola Modimo a mmitša. Ke sona se ke se rutago diphuthego ka moka. ₁₈Ge motho a biditšwe ke Modimo a bolotše, a se ke a leka go fihla leswao la lebollo. Ge a biditšwe e le lešoboro, a se ke a nyaka go bolla. ₁₉Gobane go bolla le go se bolle ga se selo; tabakgolo ke go phetha melao ya Modimo. ₂₀Motho a a dule a le maemong ao a bego a le mo go ona mola a bitšwa ke Modimo. ₂₁Ge o biditšwe o le lekgoba, o se tshwenyege; eupša ge o ka kgona go lokologa bokgobeng, o se ganelele. ₂₂Gobane lekgoba le le biditšwego ke Morena, ke molokologi wa Morena; le molokologi yo a biditšwego ke Morena, ke lekgoba la Kriste. ₂₃Modimo o le rekile, gomme bjale le ba gagwe, ka gona le se ke la ba makgoba a batho. ₂₄Banabešo, yo mongwe le yo mongwe a a dule a direla Modimo maemong ao a bego a le mo go ona mola Modimo a mmitša.

₂₅Bjale, mabapi le taba ye ya ba ba sego ba nyala, ga ke na molao wa go tšwa go Morena, ke dio le eletša ka ge ka kgaugelo ya Morena ke le motho yo a tshepegago.

₂₆Ge ke lemoga mathata a mehleng yeno ke bona go le kaone gore motho a itulele seemong se a lego mo go sona. ₂₇Ge o na le mosadi, o se leke go mo hlala; ge o se naye, o se nyake go nyala. ₂₈Fela le ge o ka nyala ga se gore o tla be o dira sebe; le mosadi yo a se nago monna, ge a ka nyalwa o tla be a sa dire sebe. E no ba gore ke rata go le phephiša mathata a le tlago ba le ona ge le nyetše.

₂₉Se ke le botšago sona, banabešo, ke gore ga re sa na nako ye ntši, gomme go tloga bjale ba ba nago le basadi ba itshware bjalo ka ge nke ga ba nabo; ₃₀ba ba llago ba be bjalo ka ge nke ga ba lle; ba ba thabilego ba itshware bjalo ka ge nke ga se ba thaba; ba ba rekilego selo ba be bjalo ka ge nke ga ba na le sona; ₃₁ge le šoma ka dilo tša lefase le bonale le se ba di le swareletšego. Gobane lefase le, ka mo le bonalago ka gona, le a fela.

₃₂Ke rata ge le sa dule le balabala. Monna yo a sego a nyala o kgothalela tša Morena, ka mo a ka mo kgahlago ka gona. ₃₃Yo a nyetšego yena o kgothalela tša lefase, ka mo a ka kgahlago mosadi wa gagwe ka gona, ₃₄gomme o pelopedi. Mosadi yo a sego a nyalwa le kgarebe ba kgothalela tša Morena, gore ba tle ba kgethwafale mmeleng le moyeng. Yo a nyetšwego yena o kgothalela tša lefase, ka mo a ka kgahlago monna wa gagwe.

₃₅Ke realo e le ge ke rata go le hola, e sego go le beela mellwane. Ke rata ge le phela ka mo go lebanego, le ikgafela go hlankela Morena ka dipelo tša lena ka moka.

₃₆Ge motho a bona gore ga a dire gabotse ge a lesa morwedi wa gagwe a fetwa ke lebaka la bokgarebe a se a nyalwa, a a phethe thato ya gagwe. Ga a dire sebe ge a mo nyadiša. ₃₇Eupša ge motho a feditše le pelo ka boyena a se na se se mo gapeletšago go se nyadiše morwedi wa gagwe, a kgona go itshwara mme a ikemišeditše go se mo nyadiše, o tla be a dira gabotse go se mo nyadiše. ₃₈Ka gona, yo a nyadišago lekgarebe la gagwe o dira gabotse, fela yo a sa le nyadišego o sa mo phala.

₃₉Mosadi yo a nyetšwego o tlemagane le monna wa gagwe ge monna yoo a sa phela, eupša ge a ka hwa, gona mosadi o lokologile go ka nyalwa ke monna yo mongwe yo a mo ratago, segolo e be modumedi. ₄₀Eupša ge a ka itulela a le bjalo, a ka iketla le go feta. Ke ka mo nna ke bonago ka gona, gomme ke a kgolwa le nna ke na le Moya wa Modimo.