Phela ka Lethabo … Lehono – Letšatši la 15

[BOKAMORAGO: Modimo o sa dira mehlolo lehono. Mo ke bopaki go tšwa go babadi bjo bo bontšhago se.]

Mmadi wa 1, Atel: “Go bile le nako bophelong bja ka mo ke ilego ka felelwa ke kholofelo. Ke be ke sa nona fela le go inyatša, gape ke be ke sa hwetše diaparo tša maleba gomme seo se be se dira gore ke gateletšego kudu. Letšatši le lengwe, morago ga maiteko a mantši le go palela go ja dijo tša maleba, ke tšere sephetho sa go bolela le Modimo ka se. Ke mo kgopetše go nthuša gore ke fokotše boima, ka ge ke se na tšhelete ya go ka ingwadiša go lenaneo la go fokotša boima.

Mma wa ka o be a ile matšatšing a maikhutšo gomme a nkgopetše gore ke hlokomele dimpša tša gagwe. Ge a boa o mphile tšhelete. Ke be ke sa nyake go e amogela, eupša a phegelela. A sa tsebe, e be e le tšhelete ye ke e nyakago go ingwadiša go lenaneo la go fokotša boima.

Ke thomile lenaneo gomme ka ikwa o ka re Modimo o mphile kgotlelelo ye e phagametšego tlhago. Ke tšwetše pele gomme, ka morago ga ngwaga, ke be ke fokoditše boima bja ka ka dikilogramo tše 35. Ga bjale, ke bogega kudu. Ge yo mongwe a mpotšiša gore sephiri sa ka ke eng, ke araba ka sebete, ‘Thapelo e a šoma!’

Se ga ke a se dira ka bonna, eupša Modimo o mmaatlafaditše go fihlelela tebanyo ya ka gomme ke sa netefatša letšatši le letšatši gore ga ke oketše boima bja ka. Letago ka moka go Yena!”

Mmadi wa 2, Arina: “Mengwaga ye meraro ya go feta, ke lahlegetšwe ke mošomo. Ke be ke nyamile kudu. Nakong yeo, le ge go le bjalo, Modimo o hlokometše bana ba ka, gomme ra se bolawe ke tlala. Ka beke ya ge ke amogela UIF ya ka ya mafelelo, ke hweditše mošomo o moswa. Mogolo o be o le ka tlase ga wo ke bego ke o gola pele eupša ke lebogile Modimo ka ge a nkabetše.

Ka dibeke tše pedi fela mošomog wa ka o moswa, molaodi o bone bokgoni bja ka gomme a oketša mogolo wa ka. Morago ga dikgwedi tše tharo, molaodi wa ka o ntsebišitše gore ba hudugela New Zealand. O rile ke tla tšwela pele le go šoma go fihlela ke hwetša mošomo o mongwe. Ke ile ka hwetša mešomo e meraro gomme molaodi wa ka, ka nako yeo, o nthušitše go kgetha mošomo wa ka wa bjale. Ke lemogile ka morago gore nako ya ka le khamphani yeo e nthušitše go hwetša gape boitshepo bja ka lefelong la mošomo.

Ga bjale, mo go nyakilego go e ba mengwaga e meraro mošomong wa ka wa bjale, ke bile le monyetla wa go dira kgopelo ya mošomo wa maemo a phagamego. Poledišano ya mošomo e sepetše gabotse kudu. Dibeke tše pedi ka morago ke kwele gore go ka se thwale motho go maemo ao ka lebaka la tshepetšo ya tlhamo-leswa. Le ge batho ba mmalwa ba tsebišitswe gore ba tla lahlegelwa ke mešomo ya bona, mošomo wa ka le mošomo o mongwe o tee khamphaning go ralala le naga e be e bolokegile ka ge e be e se karolo ya tlhamo-leswa. Mola ke hwetše maemo ao, mohlomongwe nka be ke lahlegetšwe ke mošomo. Ga bjale ke a kwesiša gore Modimo o laola dilo gomme o tseba bokaone. Ditheto ka moka go yena.”

Atel le Arina ba nepile. Modimo ke lerato gomme o nyaka tše kaonekaone maphelong a rena. Ga go boemo bjo e lego bjo bogolo goba bjo bonnyane go ka boledišana le yena ka bjona. Go Jesaya 40:31 re bala gore: “Eupša bao ba tshephilego Morena ba tla lapologa, ba se sa felelwa ke maatla, ba swana le dintšhu tše di akalalago. Ba tla kitima ba se lape, ba sepela ba sa fele maatla.” A re tshepheng yena lehono gore re hwetše tše kaonekaone maphelong a rena – e ka ba tlhohlo lefelong la mošomo goba ka gae, go hwetša molekani wa maleba, goba go fokotša boima ka dikilogramo tše mmalwa. Modimo o tseba tše o di nyakgo gomme ge go le bohlokwa go wena, go bohlokwa go yena. Modimo a go šegofatše.