Phela ka Lethabo … Lehono – Letšatši la 14

Baki e bohlokwa nakong ya marega, ka ge e le borutho. Le ge go le bjalo, letšatši le letšatši, re na le kgetho magareng ga dibaki tše pedi tše re di aparelago letšatši. Baki e tee e boima, e ntsho ya go dirwa ka wulu. Ye nngwe e bofefe, ya fešene. Lentšu la Modimo le bitša dibaki tše e tee ya pelaelo goba e tee ya go tumiša.

Ge o sa laletše Moya wo Mokgethwa, e sa le mesong, bophelong bja gago le go kgetha go ba le boitshwaro bjo bo botse nakong ya letšatši, lenaba le kgetha e boima, e ntsho ya go dirwa ka wulu legatong la gago. Baki ye e baka gore re bone (le go tsepelela go) dilo tše fošagetšego kgauswi le rena – tekanyo ya go se šome ye e lego godimo, ditheko tša godimo tša mohlagase, mathata mošomong goba gae goba tekanyo e kgolo ya bosenyi. Dilo tše di ba magetleng a rena bjalo ka baki e boima, e ntsho ya go dirwa ka wulu. E baka dipelaelo, kgateletšego ya monagano le poifo go re nola moko le go re utswetša lethabo la rena.

Tharollo ke go laletša Moya wo Mokgethwa, e sa le mesong, maphelong a rena le go mo kgopela gore a re thuše go bona ditlhohlo tša bophelo ka boitshwaro bjo bo botse. Tabeng ye, re tla be re sa lemoga ditlhohlo, eupša kudukudu ka bogolo le maatla a Modimo yo re mo hlankelago. O šetše a na le dikarabo go bothata bjo bongwe le bjo bongwe gomme a ka dira gore tšohle di šomele go hola bao ba mo ratago.

Naa o apere baki efe lehono? Ge e ba matshwenyego a bohlokwa bophelong bja gago ga bjale, boela morago go lentšu la Modimo le go swara mangwalo a ka hlogo:

• 1 Petrose 5:7: “Mathata a lena ohle le a lahlele go yena, gobane o a le šetša.”

• Pesalome 23:4: “Le ge nka sepela molapong wo o šiišago, nka se boife selo, gobane wena, Morena, o na le nna.”

• Mateu 6:31-33: “Ka gona le se ke la balabala la re: ‘Na re tla ja eng, re tla nwa eng, re tla aparang?’ Tšeo ka moka ke tše baditšhaba ba dulago ba balabala ka tšona. Tatagolena wa legodimong o a tseba gore tšohle tšeo le phela ka tšona.”
• Bafilipi 4:6-7: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

Ke ka lebaka la eng o sa lahlele mathata a gago go Modimo? O tla go hlahla nakong ya sehla se thata sa bophelo bja gago. Bea tumelo ya gago go yena ka se sengwe le se sengwe se o se nyakago lehono gomme go e na le go balabala, rapela le go leboga Modimo ka katlego ye a rulaganyetšago bokamoso bja gago. Dira se gomme o ka, letšatši le lengwe, itemogela baki e boima, e ntsho ya boya bjo bontši e wela fase mola wena o tsena ka gare ga bokamoso bja gago ka baki ya go fefoga, ya fešene! Modimo a go šegofatše.