BAFILIPI 4

₁Ka gona, banabešo ba ke le ratago gape ke le hlolosetšego, lena le nthabišago mme ke ikgantšhago ka lena, le eme le tiile le le ba Morena, lena barategi.

₂Wena Efodia le wena Sintige, ke a le kgothatša, le kwane Moreneng. ₃Le wena modirikanna yo a botegago, ke go kgopela gore o thuše basadi bao; ba be ba katanela go nthuša go bega Ebangedi gotee le Klemense le badirikanna ba bangwe bao maina a bona a lego ka pukung ya ba ba phelago.

₄Thabang ka mehla le le ba Morena. Ke a boeletša, ke re thabang!

₅Ebang ba botho go yo mongwe le yo mongwe. Morena o kgauswi le go tla. ₆Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. ₇Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.

₈Banabešo, ke fetša ka gore le dule le nagana fela ka tšohle tše e lego tša nnete, tšohle tše di tumišegago, tšohle tše e lego tša go loka, tšohle tše di hlwekilego, tšohle tše di kgahlišago, tšohle tše di dirago gore motho a retwe – a ke re tšohle tše di dirago gore motho e be mothomotho mme a tumišwe ke batho – tšeo ke tšona tše le swanetšego go dula le di nagana. ₉Le dire tše le ithutilego tšona go nna le tše le di amogetšego go nna, e ka ba tše le kwelego ke di bolela goba ke di dira. Gomme Modimo yo a re fago khutšo o tla ba le lena.

₁₀Ka ge ke le wa Morena, ke thabile kudu ge ke lemoga gore ka morago ga nako ye telele ka mokgwa wo le sa nkgopola. E se gore ke re le kile la ntebala – se le bego le se hloka ke sebaka. ₁₁Ge ke realo ga se gore ke ipega mohlako, gobane ke ithutile go kgotsofala ka se ke nago le sona. ₁₂Mohlako ke a o tseba, bohumi le bjona ke a bo tseba. Ke itlwaeditše tšohle, e ka ba go khora goba go bolawa ke tlala, go tlalelwa ke dilo goba go di hloka. ₁₃Tšohle ke di kgona ka maatla ao Kriste a mphago ona.

₁₄Fela le dirile gabotse ge le nkimolotše mathata a ka. ₁₅Gomme lena Bafilipi, le a tseba gore mola ke tloga moo Matsedonia mathomong a modiro wa ka wa go bega Ebangedi ga se gwa ka gwa ba le phuthego ye nngwe ya go nthuša ditšheleteng tša go tsena le tša go tšwa, ntle le lena. ₁₆Mola ke le motseng wa Thesalonika le gona le nthometše tše ke bego ke di hloka, la ba la boeletša. ₁₇Ge ke realo ga se gore ke dio nyaka go amogela dimpho; gagolo se ke se nyakago ke gore go holega ga lena go oketšege. ₁₈Bjale ge, tšohle tše le nthometšego tšona ke di amogetše, gomme ebile ke hwetša di ntlaletše. Ke di tlišeditšwe ke Ephafroditose, gomme bjale ke na le tšohle tše ke bego ke di hloka. Tšona ke bona e le sehlabelo se se amogelegago go Modimo mme se mo kgahlago e le seorelo sa go nkga bose. ₁₉Gomme Modimo wa ka o tla le fa tšohle tše le di hlokago, go ya ka lehumo le legolo le a nago le lona ka Kriste Jesu. ₂₀A go tumišwe yena Modimo Tatagorena go ya go ile! Amene.

₂₁Le dumediše badumedi bohle ba Kriste Jesu. Badumedi ba ke nago le bona mo ba re le dumele. ₂₂Badumedi bohle ba a le dumediša, gagolo ba lapa la Kesare.

₂₃Morena wa rena, Jesu Kriste, a le gaugele bohle.