Phela ka Lethabo … Lehono – Letšatši la 13

Lehono, ke nyaka go le botša sephiri se bonolo sa lethabo. Le ikemišeditše? Ke se: Lethabo la nnete le thoma ka bokgoni bja gago bja go beela ka thoko dikganyogo tša gago tša boithati gomme o kaonafatše bophelo bja motho yo mongwe. Naa ke seo o se dirago bophelong bja gago?

Ke nyaka go le botša molawana wo wa ka godimo go kanegelo go tšwa go Dipapadi tša Diolimpiki tša 1936 kua Berlin, Germany:

Stadiamo sa diatleletiki se be le tletše wa go falalala ge ramabelo wa motabogi wa moAmerika, Jesse Owens, a ikemišetša go kitima lebelo la go tabogela kgole. Ka nako yeo, Jesse o be a šetše a thopile dimetale tša gauta tše tharo diOlimpiking gomme a le kgauswi le go thopa wa bone. Khuetšo ya kgethollo ya moetapele wa mokgatlo wa Nazi, Adolf Hitler, le ge go le bjalo, e be e le molaleng go lehloyo la lešaba go dibapadi tša bathobaso. Se se mpefaditšego maemo le go feta go Jesse e bile gore o be a phenkgišana le mmamoratwa wa Mojeremane, Luz Long, go metale wa gauta.

Mahlapa le lehloyo go tšwa lešabeng gateetee gwa nola Jesse moko gomme a gata ka ntle ga mothaladi gabedi, a dira bjalo gabedi. Ka ge a be a šaletše fela ke monyetla o tee wa go ka ya go makgolakgang, o lekile ka maatla go ka leka go tsepamiša šedi ya gagwe gape. Ge a ka gata ka ntle ga mothaladi gape, toro ya gagwe ya metale wa bone wa gauta e be e tla hwelela.

Majeremane ka moka ba be ba thekga Luz. Ge Jesse a be a sa gate gabotse, monyetla wa Luz wa go thopa metale wa gauta o oketšegile. Pele Jesse a taboga la mafelelo, gateetee go bile le setu ka lebaleng ge Luz a dira se se bego se sa letelwa. O ile go Jesse. Pele dipapadi di thoma, baphenkgišani ba ba babedi ba be ba kwele ka yo mongwe le yo mongwe, eupša ba sa ka ba boledišana. Luz o bone gore Jesse o nolegile moko ke lehloyo la lešaba gomme o be a palela ke go tsepamiša šedi.

Pele ga diketekete tša batho, Luz o beile letsogo la gagwe legetleng la Jesse gomme a re: “Jesse, theoša maswafo. Bokgole bja go go iša go makgaolakgang ke dikgato tše 23 (dimetara tše 7) gomme o tabogile dikgato tše 26 (dimetara tše 7,9) gabonolo nakong e fetilego. Bušetša sešupi sa gago morago mo o thomago ka disentimetara tše e ka bago tše 3, go thibela gore o gate ka ntle ga mothaladi”. Jesse o latetše keletšo ya Luz. A taboga a se gate ka ntle ga mothaladi, gomme a ya go makgaolakgang. Ka morago letšatšing leo, ga a thopa fela metale wa gauta wa bone, eupša a hloma rekhoto e mpsha.

Poledišanong morago ga diOlimpiki, Jesse o rile dimetale tša gagwe ka moka tša gauta di ka tološwa, eupša ga go se se ka bago bohlokwa kudu go feta segwera sa gagwe le Luz nakong ya ge a be a tšhogile. Luz o beetše thoko dikganyogo tša gagwe tša boithati gomme a kaonafatša bophelo bja motho yo mongwe. Le ge banna bao ba sa ka ba bonana gape morago ga letšatši leo, ka ge Luz a hlokafetše nakong ya Ntwa ya Lefase ya II, segwera se se dirilwego magareng ga bona ke se Jesse a ka se tsogego a se lebetše.

Ngwaga ka ngwaga, ka 18 Phuphu, re keteka Letšatši la Mandela. MaAfrika Borwa ka moka ka nageng a tsepelela, go metsotso e 67, go direng phapano bophelong bja motho yo mongwe – ke ka lebaka la eng e le letšatši le tee fela? Ke ka lebaka la eng re sa o dire molawana wa letšatši le letšatši maphelong a rena? Go Diema 19:17 re bala gore: “Yo a fago modiidi selo o adima Morena, gomme Morena o tla mo putsa.” Go Diema 21:13 re bala gore: “Moithibatsebe wa ge go lla modiidi, le yena ge a lla a ka se kwewe.” Gomme go Mateu 25:40, Jesu o rile, “Kgoši o tla ba fetola a re: ‘Ruri, ke le botša gore ge le be le direla yo mongwe wa banabešo ba ba nyatšegago ba, le be le direla nna!’ ”

Sephiri go lethabo la nnete? Beela dikganyogo tša gago tša boithati ka thoko nakwana, tsepelela go beeletšeng go batho le go ba thuša go lemoga ditoro tša bona. Dira se gomme o ka hwetša gore ga gona magomo go se Modimo a kago se dira ka le bophelong bja gago. Modimo a go šegofatše.