Modimo bjalo ka mothopo wa kholofelo – Letšatši la 12
Kholofelo ka thapelo
(Di)temana ya Bibele
BAFILIPI 4
Thapelo e kgathile tema e bohlokwa bophelong bja Morena wa rena lefaseng. E swanetše e be gape karolo e bohlokwa ya maphelo a rena. Jesu o re ge re batamela setulo sa bogoši sa mogau gomme re kgopela tlhahlo le thušo ya Modimo, re tla e hwetša (Mateu 7:7-11).
Eupša re swanetše go rapela bjang? Dafida o bile le boitshwaro bja maleba ge a be a le manyaming: “Ke be ke letile Morena ka tlhologelo, mme a ntlhwaela tsebe, a nkwa ge ke mo llela” (Pesalome 40:1). Gantši ge re rapela, re letela gore Modimo a re fe se re se nyakago le semeetseng. Lega go le bjalo, Modimo o na le nako ya gagwe gomme ke thato ya gagwe ye e tlago direga e se ya rena.
Modimo o araba thapelo e nngwe le e nngwe ka e tee ya ditsela tše tharo – ee, aowa le ka nako ya maleba.
Ee, bjalo ka tabeng ya moprofeta Eliya: “Eliya e be e le motho wa nama bjalo ka rena. O kile a rapela a kgothetše gore pula e se ne, gomme ka nnete pula ya se ne nageng mengwaga ye meraro le seripa. A boelela a rapela, gomme leratadima la tšholla pula, lefase la mediša dibjalo tša lona” (Jakobose 5:17-18).
Aowa, bjalo ka tabeng ya Paulose: Gararo a rapela Modimo gore a mo hlomole “phatša nameng” ye e bego e mo tlaiša le go palediša bodiredi bja gagwe. Go e na le moo, Modimo o file Paulose mogau go kgotlelela tlhophego ya gagwe gore a kgone go itemogela tšhireletšo ya maatla a Kriste go yena (2 Bakorinte 12:7-10).
Ka nako ya maleba, bjalo ka tabeng ya moprista Sakaria le mosadi wa gagwe, Elisabetha. Mengwaga e mentši ba rapelela ngwana. Ge bobedi ba tšofetše, morongwa Gabriele o ba tlišeditše ditaba: ba tla ba le ngwana yo a tlago tlala ka Moya wo Mokgethwa go tšwa matswalong gomme o tla lokišetša Morena tsela (Lukase 1:13-17).
Modimo ke Modimo yo a kwago le go araba dithapelo tša rena. Ge re rapela, re tsena bogoneng bjo bokgethwa bja Modimo. Moo re ka ipolela dibe tša rena gomme o tla re lebalela le go re hlatswa bokgopo ka moka (1 Johanese 1:9).
Paulose o kgothaletša kereke ya Thesalonika go rapela ka dinako ka moka. Le rena re swanetše go dira bjalo.
