Lokologa – Letšatši la 9

Nagana ka boemo bjo bo latelago. O lešole leo le nago le morero. Wena le bašomi-gotee le rometšwe go yo lwa le madira a kotsi, gomme a apere ka mo go sa lemogegego go tloga hlogong go yo fihla maotong. Kgateletšego ya monagano e a gola ka gare ga sefofane ka tsebo ya gore o ka lahlegelwa ka bophelo bja gago morerong wo.

Sefofane se a kotama gomme ge lebati le bulwa, lenaba le a go thunya. O ka gare ga ntwa e šoro gomme gateetee, go fihla go wena gore ga o na dibetša! Ga o na sethunya, sebetša goba pomo. Pelo ya gago e kiba ka lebelo. Bokagare bja diatla tša gago bo tšwa kudumela. Na o tla hlokafala lehono?

Go kwagala go le bošilo go tsena ntweng ka ntle le dibetša. Le ge go le bjalo, se ke se se diregago ge re se na tsebo ya dikholofetšo tša Modimo. Lenaba le tla go re hlasela ka dikgopolo tše mpe gomme ka ntle le Lentšu la Modimo, o tla re fenya gabonolo a re tlogela re gateletšegile monaganong re nolegile moko.

Go Baroma 12:2 re bala gore: “Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong.” Gomme go 2 Bakorinte 10:3-5 re bala gore: “Gape le ge re phela mo lefaseng, ga se gore ge re elwa re hlohleletšwa ke tša lefase. Dihlabani tše re lwago ka tšona ga se tša lefaseng, ke tša Modimo tše maatla, tše re di filwego go pšhatlaganya dibo ka tšona. Re fenya ba ditshele ka dipolelo, le ba go ikgantšha ba go gana molaetša wa Modimo. Re leka go dira gore batho ba nagane tše di kgahlago Kriste.” Karolo e le noši ya dihlabani tša Modimo ye re ka hlaselago lenaba ka yona ke tšhoša – Lentšu la Modimo.

Ka gona, ke eng tharollo go lwešeng dikgopolo tše mpe tša lenaba? Fenya ntwa ka monaganong wa gago. O dira bjang seo? Ka go latela mohlala wa Jesu lešokeng ge lenaba le mo leka. O boetše morago go dikholofetšo tša Modimo gomme a ema a tia go tšona.

A re dire gore e šome. Ke eng tlhohlo ya gago boemong bjo? Boela morago Lentšung gomme o sware mangwalo ka hlogo a se Modimo a se bolelago ka boemo bja gago. Go fa mohlala, ge o itemogela thulano lenyalong la gago gomme lenaba le leka go go kgodiša gore molekani wa gago a ka se fetoge, mo gopotše ka mantšu go Diema 21:1: “Morena o laola monagano wa kgoši bjalo ka ge a laola moela wa meetse, a o lebiša mo a ratago gona.” Gomme go Hesekiele 36:26: “Ke tla le fa dipelo tše mpsha le menagano ye mefsa. Ke tla le amoga dipelo tša lena tše thata ka le fa dipelo tše boleta.” Gomme ge lenaba le leka go go kgodiša gore bokamoso bja gago ga bo phadime, mo gopotše ka mantšu go Pesalome 37:5: “Dula o ipeile ka diatleng tša Morena; o mmotile mme yena o tla go phethela.”

Lentšu la Modimo ke sebetša sa rena kgahlanong le lenaba. A re itekeng go le bea dipelong tša rena. Ga o nyake go makatšwa ge dikolo tša pele di thuntšhwa gomme ga o na sethunya, sebetša goba pomo ye o ka lwago ka yona. Modimo a go šegofatše.