Lokologa – Letšatši la 10

Ke nyaka go le hlalošetša kanegelo ya mootledi wa thekisi, Ken Nerburn, ye e kgommego pelo ya ka. Kholofelo ya ka ke gore e tlo go hlohleletša go bontšha lerato gohle mo o yago gona.

Ken: “Go be go le ka 02:30 ge ke phaka koloi pele ga moago wa leswiswi, wa go se be le lešata. Go be go bonala lebone le tee fela ka lefestere lebatong la fase. Ka tlase ga maemo a, baotledi ba bantši ba tla letša pele gatee goba gabedi, ba lete motsotso o tee gomme ba sepele. Eupša ke bone batho ba bantši, bao ba phelago ka bodiidi, bao ba bego ba tshephile thekisi bjalo ka senamelwa sa bona fela. Ka gona, ke ile lemating gomme ka kokota. ‘Motsotswana fela,’ gwa araba lentšu la go fokola la motho yo mogolo. Ke kwele go gogwa selo lebatong.

Mosadi yo mokopana, wa mengwaga ye e ka bago ye 80, a ema pele ga ka. ‘O ka nkišetša mokotla wa ka koloing?’ a botšiša. ‘Nka rata go ba ke le tee nakwana. Gomme, o tla boa wa nthuša? Ga ke na maatla.’ Ke tšere mokotla ka o iša thekising, gomme ka boela go yo thuša mosadi. A ntshwara ka letsogo gomme ra sepela ka go nanya go ya thekising. O be a le gare a nteboga ka botho bja ka.

Ge re fihla thekising, o mphile aterese gomme a botšiša: ‘O ka otlela go ya toropong?’ Ke mmoditše gore e be e se tsela ya ka pejana. ‘Oh, ga ke na bothata,’ a realo. ‘Ga ke a itlhaganela. Ke tseleng ya go ya lefelong le go hlokomelwago balwetši.’ Ka lebelela seiponeng sa go bona tša morago. ‘Ga ke sa na balelapa,’ a tšwela pele. ‘Ngaka o re ke ye fao. O re ke šaletše ke dikgwedi tše mmalwa tša go phela.’

Ka otlolla letsogo gomme ka tima mithara. ‘O nyaka gore ke sepele ka tsela efe?’ ka botšiša. Re feditše diiri tše pedi tša go latela re otlela ka gare ga toropo. A ntaetše moago mo a šomilego gona bjalo ka molaodi wa elebeita. Re otletše lefelong leo yena le molekani wa gagwe ba bego ba dula go lona ge ba fetša go nyalana. A dira gore ke eme pele ga lebenkele la diphahlo leo e sa lego ya ba lefelo la go tantsha, mo a bego a tantsha gona e sa le kgarebe. Ka dinako tše dingwe o be a re ke otlele ka go nanya pele ga moago o itšego goba sekhutlong moo a tlago lebelela leswiswing gomme a se bolele selo. Ge le letšatši le hlaba, gateetee a re: ‘Ke lapile. A re sepele bjale.’

Re otletše ka setu go ya go aterese ye a mphilego yona. Bahlokomedi ba babedi ba tlile thekising gateetee ge re ema fao. Ba be ba swanetše go ba ba mo letetše. Ka bula kutu gomme ka tšea mokotla ka o iša lemating. Mosadi o be a šetse a dutše setulong sa digole. ‘Ke go kolota bokae?’ a botšiša a tšea sekhwama sa gagwe. ‘Ga o nkolote,’ ka realo. ‘O swanetše go iphediša,’ a araba. ‘Go na le banamedi ba bangwe,’ ka araba. Ka ntle le go nagana, ka khunama ka mo kgokarela. A nkgokarela kudu. ‘O file mokgekolo nakwana ya lethabo,’ a realo. ‘Ke a leboga.’ Ka mo swara ka letsogo, gomme ka sepela. Ka morago ga ka, ke kwile lemati le tswalelwa. E be e le modumo wa go tswalela bophelo.

Ga se ka nametše banamedi ba bangwe nakong ya ka ya go šoma. Ke otletše ke sa tsebe gore ke ya kae, ke eja marapo a hlogo. Go thweng ge eba mosadi yola o be a hweditše mootledi yo a bego a befetše goba a fela pelo ya go ka kgaotša go šoma? Go thweng ge e ba ke ganne go yo mo tšea goba ka letša pele gatee, gomme ka sepela? Go thweng ge eba ke be ke tenegile gomme ka se boledišane le mosadi? Ge mosadi yola a nkgokarela gomme a re ke tlišitše nako ya lethabo, go be go kgonega go dumela gore ke beilwe lefaseng ka morero o tee wa go ka mo nametše koloi la mafelelo. Ga ke nagane gore go na le se ke se dirilego bophelong bja ka se se lego bohlokwa go feta seo.”

Ken o nepile. Modimo o re fa menyetla go bontšha lerato la gagwe go bao ba le hlokago. Go Johanese 13:34-35, Jesu o re: “Ke le fa molao wo mofsa, wa gore le ratane. Bjalo ka ge ke le ratile, le lena le rataneng. Ge le ratana ke mo batho ba tlago tseba gore le barutiwa ba ka.”

A re beng barutiwa ba Jesu ka lerato la rena le re le bontšhago bao ba le hlokago. Tiro ya gago ya botho e ka ba nakwana ya lethabo leo motho o mongwe a le hlokago. Modimo a go šegofatše.