Lokologa – Letšatši la 8

Moreri o monnyane ka mehla o be a botšiša Francis wa go tuma wa Assisi go mo ruta seo a bego a se tseba ka go rera. Letšatši le lengwe, Francis a dumela go sepela le yena go e tee ya diketelo tša gagwe tša go rera ka mantšu a: “Lehono ke ya motseng wa kgauswi go yo rera. O ka sepela le nna go yo bona gore go dirwa bjang.”

Letšatši ka moka, Francis le moreri o monnyane ba sepetše mekgotheng o mogolo le wa ka morago ga motse. Go badudi ba bangwe fao, ba neile maele, go ba bangwe, myemyelo fela gomme ba bantši ba kgothaditše ke lentšu la tlhohleletšo. Ba kopane le batho ba bantšintši.

Ge letšatši le dikela, Francis a itokišetša go tsamaya ge moreri o monnyane, ka go makala le go nyama, a re: “Eupša ga o a rera goba go bolela ka Jesu? Kgane seo e be e se wona maikemišetšo a ketelo ya rena?” Francis a myemyela pele a araba: “Re rerile gohle mo re ilego gona lehono. Batho ba bantši ba re bone gomme ka gobane re Bakriste, ba šeditše ka kelohloko ka mo re dirilego ka gona. Ga gona lebaka la gore re rere ge maphelo a rena e se thero ka bowona.”

Nagana nakwana ka fao o arabelago ka gona ge mootledi wa go hloka šedi a tsena ka pele ga sefatanaga sa gago ka gare ga sephethephethe sa dikoloi, ge molaodi wa gago wa go fela pelo a go kgadimola go sa hlokege, ge ngwana wa gago wa mahlalagading a bolela tshwayotshwayo ya kgegeo gape, ge o topa gape diaparo tša molekani lebatong goba mpša ya moagišani e epa melete ka jarateng ya gago. Na o a befela o le gare o goeletša le go hlaba lešata, goba o bontšha semelo sa Jesu ka tsela ye o ikarabelago ka yona ka gare ga maemo a a sa thabišego?

Go 1 Bakorinte 11:1 Paulose o ngwetše: “Ka gona le nkekiše, bjalo ka ge le nna ke ekiša Kriste.” Paulose o kwešišitše gore ga gona mantšu a maatla bjalo ka mohlala wa gagwe. O bontšha semelo sa Jesu.

Ka gona, pele o nyaka go ka rerela bao ba lego kgauswi le wena, netefatša gore bophelo bja gago ke thero ka bobjona. Mafelelong, seo ke molaetša o maatla kudu wo o ka o bolelago. Modimo a go šegofatše.