Lokologa – Letšatši la 6
Lokologa o phele ka gobane Modimo o na le leano la go go ntšha ka gare ga mathata a gago
(Di)temana ya Bibele
Pesalome 40
Kopelo ya tumišo
JESAYA 43
JESAYA 43
Mmadi e sa le a nngwalela a re: “Ke tlalelong. Sephetho se sengwe le se sengwe se ke se dirago ga se nkiše felo. Ke nyaka go ineela bophelong. Ke kgopelo nthuše.”
Na o ikwa bjalo ka mmadi yo lehono? O ikwa o ka re o eme ka gare ga phapoši ya leswiswi gomme maboto a go tswalelela?
Dibeke tše mmalwa tša go feta, ke botšišitše batheeletši, nakong ya lenaneo la ka la radio, gore ba mpotše ka semaka sa bona se segolo. Ke amogetše melaetša e mentši, ya go kgahliša le go segiša ka SMS. Go melaetša yeo, go be go na le wa go tšwa go Adriaan. O ngwetše: “Semaka sa ka e bile go kwa lentšu la Modimo ge ke be ke nyaka go ipolaya. Mantšu a gagwe e bile: ‘Ngwanaka, ge o dira se lehono, o ntima monyetla go ka šoma bophelong bja gago.’ Go fihla lehono, ke bona seatla sa gagwe se šoma bophelong bja ka.”
Leano la lenaba ke go re dira gore re dumele gore ga gona tharollo go mathata a re kopanago le wona. Seo ke maaka. Ka Modimo, ka mehla go na le kholofelo le tharollo. Theeletša mantšu a mopesalome go Pesalome 40:1-3: “Ke be ke letile Morena ka tlhologelo, mme a ntlhwaela tsebe, a nkwa ge ke mo llela. A nntšha moleteng wa tahlego, moo tebetebeng ya leraga, a mpea sebong, a ntshepediša mo go omilego. A mpha kopelo ye mpsha, sereto sa Modimo wa rena. Ba bantši ba tla re go kwa kopelo ya ka ba gakgamala, ba tshepha Morena.”
Gape go Jesaya 43:2,16 re bala gore: “Ge le tshela noka ye e išago, ke tla ba le lena; matshwenyego a lena a ka se le tšee bjalo ka lefula … O realo, Morena, Mophulatsela lewatleng, Mmulammila gare ga maphoto a magolo.”
Ke eng se se go “nolago mooko” lehono? Na o amogetše pego e mpe ya tša maphelo? Ga o tsebe gore dijo tša go latela di tla tšwa kae? Na lenyalo la gago le a phuhlama? Ekaba o na le mathata mošomong? Goba o ikwa bjalo ka mmadi, ka ge tšohle tše o di lekago di sa go iše felo?
Ka Modimo ka mehla go na le kholofelo le tharollo. O diretše Baisraele tsela ka gare ga lewatle. Modimo o šomile bophelong bja Adriaan ge a mo dumelela go dira bjalo. Ga gona magomo go bokgoni bja gagwe bophelong le mathateng a gago. Ga a emiše fela maboto go go tswalelela, o dira lemati ka phapošing yeo gore wena o tšwe ka leswiswing, gore o sepele go ya bophelong bja seetša bjo boswa. A re lokologeng gomme re tshephe Modimo. O nyaka go bea kopelo e mpsha dipelong tša rena. Modimo a go šegofatše.
