Lokologa – Letšatši la 7

Mmadi o ngwetše beke ya go feta: “Ke na le mengwaga e 43 gomme ke palela ke go ikamogela bophelong bja ka ka moka. Go tla ba selo se sebotse kudu go fenya se. Ka kgopelo thuša.”

Na le wena o palela ke go ikamogela? Na o ipapetša ka sebopego, mabokgoni a gago, lapa la gago le tšhelete ya gago ka pankeng le ba bangwe, mola o ikwa o inyatša?

Ge eba go bjalo, etla le nna ge ke sepela mokgotheng wa gauta. Na o kwa mašata a modiro wa go betla kua kgojana ge re batamela? Ge re fihla boyong bja rena, maletere a magolo lemating a re dumediša: “Bobetlelo bja legodimo.” Re gaša mahlo ka phapošing ka tlhokomelo gomme gateetee ra fegelwa. Go na le methaladi e mentši ya dinko, mahlo, ditsebe, matsogo le dikarolo tše dingwe tša mmele gomme Morena le Tatago rena o dutše gare ga phapoši, gomme o gare o kgetha sete ya moswananoši ya tlholo e mpsha tafoleng ye a šomelago go yona. Sephutha se e ka se be sa moswananoši fela ka ponagalo, eupša gape ka seriti le morero lefaseng.

Na o a lemoga gore le wena gape e sa le wa ba tafoleng ya go šomela pele ga Modimo? O kgethile sephutha sa gago sa moswananoši gomme ga go motho yo mongwe lefaseng yo a ka phelago boyo bja gago, eupša wena. Ka gobane lenaba le tseba se, ka mehla o tla tsenya dikgopolo monaganong wa gago gore o ipapetše le ba bangwe gore o kwe o inyatša. Se ke leano la gagwe la go dira gore re se atlege. Go Pesalome 139:13-18, le ge go le bjalo, re hwetša dinnete tše bohlokwa tše tharo tše di tla re thušago go lemoga go ba moswananoši ga rena:

1) Modimo o re hlodile: Go Pesalome 139:13 re bala gore: “Ditho tša ka tšohle di hlodilwe ke wena; ke wena o di kgomagantšego ka popelong ya mma.” Modimo ka boyena o go bopile popelong ya mmago.

2) Modimo o tseba palo ya matšatši a gago a go phela lefaseng: Go Pesalome 139:16 re bala gore: “O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona.” Modimo o tseba gore o ya kae ka bophelo bja gago.

3) Modimo o na le dikgopolo tše ntšintši ka yo mongwe le yo mongwe wa rena: Go Pesalome 139:17-18 re bala gore: “Aowii, Modimo, tše o di naganago nna di a mpalela; ga se ka bontši! Ge nka re ke a di bala, di feta dithorwana tša lešabašaba.” Modimo o na le ditoro tše kgolo ka bophelo bja gago.

Ka gona, ge o thoma go inyatša gape ge o kopana le mogwera o mmotse, mogwera wa go huma, mošomi-gotee wa go tuma goba bagwera bao bana ba bona ba lego bohlale, ba go rata dipapadi, eya o eme pele ga seipone mola o le gare o leboga Modimo ka go ba wa moswananoši (le ge o ekwa o sa nyake go dira seo le ge mpa e le e kgolo, o na le lefatla goba nko ya go kgopama e go lebeletše morago ka gare ga seipone). Leboga ka mabokgoni a gago, seriti le morero. O ka makala ka fao go inyatša go timelelago ka pela ka gona, ge o lemoga gore ga go o tee wa “batho ba” yo a nago le bokgoni bjo Modimo a go filego bjona gore o dire phapano lefaseng.

Gopola, le wena gape o be o le tafoleng ya go šomela. Sephutha sa moswananoši sa Modimo e bile mpho ya gago go wena. Se o se dirago ka sona ke mpho ya gago go yena. Modimo a go šegofatše.