JESAYA 43

₁Lena Baisraele,

Morena yo a le hlodilego,

yo a le bopilego,

lena ditlogolo tša Jakobo, o re:

“Le se ke la boifa –

ke le hlakodišitše.

Ke le biditše ka leina la Israele –

le ba ka.

₂Ge le tshela noka ye e išago,

ke tla ba le lena;

matshwenyego a lena a ka se le tšee bjalo ka lefula.

Ge le putla mollo le ka se tlaboge,

₃gobane nna ke Morena Modimo wa lena,

Modimo yo mokgethwa wa Israele,

yo a le phološago.

Ke tla loba ka Egepeta gore ke le lokolle;

ke tla gafa Etopia le Seba legatong la lena.

₄Ke tla loba ka batho le tšona ditšhaba gore ke le phološe,

ka gobane le ba bohlokwa go nna mme ke le tšeela godimo,

ke a le rata.

₅Le se ke la boifa –

ke na le lena.

“Ke tla kgobokanya batho ba gabolena ba etšwa bohlabatšatši,

ka bušetša ditlogolo tša lena gae go tloga bodikelatšatši.

₆Ke tla botša leboa gore le ba lokolle,

ka botša le bodikela gore bo se ba thibele.

Lesang setšhaba sa ka se tloge nageng tša kgole,

dikhutlong tša lefase.

₇Ke setšhaba sa ka,

ke se hlodile,

ka se bopa gore se tumiše nna.”

“Biletšang setšhaba sa ka kgorong ya tsheko.

Ba na le mahlo, eupša ba foufetše;

ba na le ditsebe, eupša ke ditholo!

₉Ditšhaba ka moka di kgobokane kgorong ya tsheko,

merafe e bokane ka moo.

Ke medimo efe ya tšona ye e kago bolela tša ka moso?

Ke efe ye e boletšego tše di fetilego?

Nke medimo yeo e bitše dihlatse tša yona go bontšha gore e a rereša,

le gore e bege gore e boletše nnete.

₁₀“Lena setšhaba sa Israele,

le dihlatse tša ka;

ke le kgethile gore le be bahlanka ba ka,

gore le tle le ntsebe mme le ntumele,

gomme le kwešiše gore ke nna fela ke lego Modimo.

Ka ntle le nna ga go modimo wo mongwe;

ga se a ka a ba gona,

ebile a ka se tsoge a bile gona.

₁₁“Ke nna fela ke lego Morena,

ke nna fela nkago le phološa.

₁₂Ke boletše pele ka bega tše di tlago direga,

ka morago ka le phološa.

Ga go modimo o šele gare ga lena wo o kilego wa dira tšeo;

lena le dihlatse tša ka.

₁₃Ke nna Modimo, gomme ka mehla ke tla no ba yena.

Ga go yo a kago hlakodiša yo ke mo otlago;

se ke se dirilego sona ke mang yo a kago se dirolla?”

“Gore ke tle ke le hlakodiše,

ke tla romela madira a go lwa le Babilone;

gomme Bababilone ka moka ba leka go tšhaba

ka maselawatle ale ba bego ba ikgantšha ka ona.

₁₅Ke nna Morena Modimo wa lena yo mokgethwa,

ke le bopile, lena Baisraele,

gomme ke nna Kgoši ya lena.”

₁₆O realo, Morena, Mophulatsela lewatleng,

Mmulammila gare ga maphoto a magolo;

₁₇yo a dirilego gore madira a maatla a tšwe,

madira a dikoloi tša ntwa le dipere.

A wele ohle, a ka se sa tsoga,

a tingwa bjalo ka lebone.

“Le se ke la itshwarelela ka tše di fetilego,

goba la dula le gopola tša kgale.

₁₉Bonang, ke tla dira se sefsa;

se šetše se tšwelela gonabjale –

le a iponela ka bolena!

Ke tla phula tsela lešokeng,

ka ediša dinoka nageng ye e omilego.

₂₀Diphukubje le dimpšhe le diphoofolo tše dingwe tša naga di tla ntlhompha

ge ke ediša dinoka leganateng,

gore ke noše setšhaba se ke se kgethilego meetse.

₂₁Ke setšhaba se ke ipopetšego sona,

gomme se tla bega letago la ka.”

“Eupša le be le sa nthapele,

lena Baisraele;

ebile le sa itapiše ka go nkhunamela,

lena ditlogolo tša Jakobo.

₂₃Le be le sa ntirele dihlabelo tša go tšhungwa ka moka ka dihušwane,

le gona le sa ntlhomphe ka dihlabelo tše dingwe tša lena.

Ke be ke sa le gapeletše go ntlišetša dikabelo tša bupi,

le gona ke sa le lapiše ka go le kgopela gore le ntšhumele diorelo.

₂₄Le be le sa nthekele diorelo,

goba la nkhoriša ka makhura a diruiwa tša lena.

Sa lena e bile go nkimetša dibe tša lena,

le go ntapiša ka makgopo a lena.

₂₅Le ge go le bjalo,

nna ke Modimo yo a le swarelago dibe,

gomme ke dira seo ka gobane ke nna Modimo wa kgaugelo.

Nka se sa gopola dibe tša lena.

₂₆“A re yeng kgorong ya tsheko;

le nkgopotše se se lokilego se le kilego la se dira!

Le bolele le bontšhe gore ga le ne molato!

₂₇Rakgolokhukhu wa lena wa pele o be a dira dibe;

baetapele ba lena ba be ba mphošetša.

₂₈Ka gona ke ba kokobeditše,

bona setšhaba sa ka se sekgethwa,

ka le tlišetša le masetlapelo,

ka ba ka dira gore le rogakwe.”