Lokologa – Letšatši la 4

Moprista o bile le kgonono ge a bolela le mosadi yo a bego a mmotša gore Modimo o tlile go yena ka sebele. A tšea sephetho sa go leka ge eba ga a bolele maaka. “Mohumagadi,” a realo, “ge Modimo a ka tla go wena gape, mo kgopele a go botše sebe sa ka sa sephiring seo se tsebago ka yena a le noši.” Mosadi a dumela.

Ka morago ga kgwedi, moprista a boela go mosadi. “Mohumagadi,” a thoma ka lenyatšo, “naa o botšišitše Modimo go go botša šebe sa ka sa sephiring?” A fetola: “Ee, ke dirile bjalo.” A maketše, moprista a tšwela pele, a tšhaba go botšiša, “O rile eng?” A makala, ge a araba: “Modimo o botšišitše: ‘Sebe sefe?’ ” Gomme a tšwela pele: “Botša moprista gore ge ke lebalela sebe, gape ke a lebala.”

Go Pesalome 103:12 re bala gore: “Bjalo ka ge bohlabela bo tlogelane le bodikela, le rena o (Modimo) re tlogelanya le dibe tša rena.” Go Jesaya 1:18 re bala mantšu a Modimo: “Le ge le hwibitše perr ka dibe tša lena, le tla šweufala twaa! Le ge le re hwibii, le tla šweufala pšoo!” Gape go Jesaya 44:22, Modimo o re: “Ke fedišitše bokgopo bja lena bjalo ka kgodi, le dibe tša lena bjalo ka leru.”

Modimo o lebalela le go lebala dibe tša rena ge ka nnete re sokologa dibeng tša rena le go di tlogela. Na le wena o a lebalela le go lebala dikarago tša ngwaneno yo a go phošeditšego, eupša yo a bontšhago tshokologo ya nnete. E tee ya maikemišetšo a lenaba ke gore re gomarele boitshwaro bja rena bja go se lebalele nako e telele ka mo go kgonegago, ka gobane o a tseba gore ga bo utswe fela lethabo le khutšo ya rena maphelong a rena, eupša gape bo re thibela gore re phele bophelo bjo bo feletšego. Boitshwaro bja go sa lebalele mafelelong bo fetoga pefelo gomme pefelo e re bolaya gannyane.

Lenaba le se dira bjang seo? O dira gore re kgolwe gore re a fokola ge re lebalela, ka ge tebalelo e hlaloša gore go neela ka tokelo ya gago go ka lefa bobe ka bobe. Nnete, le ge go le bjalo, ke gore ge re swarwa sekgopi nako e telele, re tla tlaišega nako e telele.

Na o nyaka go lebalela mang? Kgetha lehono go lokologa go dinala tša lenaba (ka thušo ya Moya wo Mokgethwa) le go lebalela ngwaneno yo a go phošeditšego. O ka makatšwa ke ka fao Modimo a go lokollago le ka fao wena (mohlomongwe lekga la pele) ka nnete o ka itemogelago bophelo bjo bo feletšego. Modimo a go šegofatše.