Lokologa – Letšatši la 3
Lokologa o phele bophelo bja ditikree Celcius tše 100
(Di)temana ya Bibele
DANIELE 10
JESAYA 49
Jerusalema e tla bušetšwa sekeng sa yona
Mo ke setsopolwa go tšwa go emeile ya mmadi ye ke e amogetšego: “Benescke, o re Modimo o gohle, eupša motho a ka dira eng ge eba o go lebetše? Bibele e re: ‘Ga le hwetše se le se nyakago, ka gobane ga le se kgopele go Modimo,’ eupša go thweng ge o rapela gomme o sa hwetše karabo go tšwa go Modimo? Bibele gape e re: ‘Gomme Modimo wa ka o tla le fa tšohle tše le di hlokago, go ya ka lehumo le legolo le a nago le lona ka Kriste Jesu,’ eupša go thweng ge se se bonala o ka re ke nnete fela go batho ba bangwe? Ka kgopelo thuša.”
Dinakong tša mathata goba dinakong tše telele tša dithapelo tše di sa arabjego, teko e gona ka mehla go thoma go dumela gore Modimo o lebetše ka wena, goba o araba dithapelo tša batho ba bangwe. Nnete ke gore, Modimo ga se mohlomphi wa batho. O re rata ka moka ka go lekana gomme o na le morero wa go re fa katlego e se go re kweša bohloko.
Ka gona, ge o ikwa bjalo ka mmadi wa ka godimo lehono, ke nyaka go go hlohleletša ka molawana wa tikree Celcius e tee. Na o kwele ka wona?
Go ditikree Celcius tše 99, meetse a a fiša – a fiša kudu. Le ge go le bjalo, a swanetše a fihle go ditikree Celcius tše 100 go bela le go ntšha mušimeetse. Mušimeetse a a ka sepetša terene, difeketori le dikepe. Meetse a go fiša a ka se dire seo. Ke phesente yeo e tee ya koketšo ye e dirago phapano.
Maphelong a rena, re wela gabonolo molabeng wa go ineela go ditikree Celcius tše 99. Nagana ka tsela ye o ikwago ka gona ge o be o rapelela mošomo, molekani, ngwana, phodišo go bolwetši, motho yo o mo ratago go fetoga goba tsošološo ya lenyalo la gago – ka ntle le katlego. Meetse a ruthela, eupša ga a na mušimeetse. Mo ke fao o swanetšego go fenya teko ya semelo.
Jobo le Josefa ba ile ba ba fao. Jobo, a tšeetšwe dithoto tša gagwe ka moka, o ile a swanela ke go lebeletšana le bohloko bja tobo ya bana ba gagwe le dišo mmeleng wa gagwe. Josefa o be a le ka gare ga kgolego ya ditšhila, ye e hlokomologilwego kua Egepeta ka ntle le kholofelo efe goba efe ya go ka lokollwa. Banna ka bobedi ba be ba na le dipotšišo tše ntši ka maemo a bona, eupša ga go o tee yo a furaletšego Modimo. Ba tšwetše pele go dumela gore o laola dilo maphelong a bona. Ka ge ba fentše teko ya semelo, Modimo a tsena dilo gare gomme a fetola maemo a bona. Jobo a hwetša gabedi tekanyo ya dithoto tše a di lahlegetšego gomme Josefa a dirwa mmušiši wa Egepeta ka moka. Ba itemogela ka fao ditikree Celcius tše 99 di fetogilego ditikree Celcius tše 100 – tše ka moka ka lebaka la tumelo ya bona.
Daniele gape a rapelela katlego – gomme ka morago, a itima dijo le go rapela. Go Daniele 10:12-13, re bala gore Modimo a araba ka lona letšatši la pele, eupša go tšere matšatši a 21 ka gobane maatla a batemone a thibetše karabo. Go itima dijo ga Daniele go fentše maatla ao gomme a amogela karabo. Go Mateu 17:21, Jesu o re dikatlego tše dingwe di direga fela ka go itima dijo le go rapela.
Go Jesaya 49:8, Modimo o re gopotša gore o laola nako: “Morena o re go setšhaba sa gagwe: ‘Ge nako ye ke ratago go le phološa ka yona e fihla, ke tla kwa dillo tša lena ka le thuša.’ ”
A re fenyeng teko ya semelo le go tšwela pele go tshepha gore Modimo o laola maphelo a rena – le ge go tšea nako go hwetša katlego. O ka se tsebe, lehono mohlomongwe e ka ba letšatši la gore ditikree Celsius tša gago di fetoge ditikree Celcius tše 100. Modimo a go šegofatše.
