Lokologa – Letšatši la 2

Go thomile ka SMS ye ke e amogetšego ka studiong go lenaneo la ka la radio go Radio Tygerberg 104fm. Makgolo yo a lego tlalelong, Aletta go tšwa Eerste River, o mpoditše ka motlogolo wa gagwe wa mengwaga ye 9, Cole, yo a bego a robegile pelo morago ga ge paesekela ya gagwe ye a e letetšego nako e telele, ba e utswa ka mafuri a jarata ya bona bošegong bja go feta. Ba be ba se na tšhelete ya go reka e nngwe. O rile Cole o llile o ka re go hlokafetše leloko la lapa.

Ka kholofelo ya gore motho o mongwe go gongwe Nkasehlakahlakeng sa Kapa a ka ba a na le paesekela ye e sa e šomišego gomme a ka efa mošemane, ka aba SMS le batheeletši. Ka tlase ga metsotso e mebedi ka morago ga fao, ke maketše, ke amogetše SMS go tšwa go motheeletši a mpotša gore o tla rekela Cole paesekela e mpsha. Ke ile ka thaba kudu.

Re rulagantše gore makgolo, motlogolo, le moabedi, Ryno, ba tle ka studiong. Seo Cole le Aletta ba bego ba sa se tsebe ke gore paesekela e mpsha, ye theko ya yona e bego e le gahlano go e na le ye e utswitšego, e be e utilwe ka studiong se sengwe. Mošomi-gotee wa ka o be a emetše sešupo go tšwa go nna go ka tliša paesekela ka studiong.

Ge nako yeo e fihla, Cole le makgolo wa gagwe ba ile ba lla. Ba be ba sa kgolwe seo ba se bonago. Ka dikeledi, Cole a gokara moabedi, Ryno, a le gare a mo leboga leboelela. E bile fela ka morago moo makgolo a re boditšego gore Cole le bagwera ba gagwe ba lorile ka paesekela ya go swana le yeo. Ka gobane ga ba na tšhelete e ntši, o be ka mehla a ba botša gore ke Modimo fela yo a kago abela paesekela e bjalo go Cole. Modimo a dira bjalo.

Kanegelo ye e dirile gore ke lemoge gape gore Modimo ka nnete o tseba ditumo tša rena. Go Pesalome 37:4 re bala gore: “O ithabiše ka Morena, mme yena o tla go fa tše o di kgopelago.” Gomme go Baefeso 3:20-21 re a gopotšwa gore ga go se se mo palelago: “Yena a kgonago go dira tše di fetago kudu tše re kago di kgopela goba ra di nagana … a a tumišwe ke ba meloko yohle ka kerekeng le go Kriste Jesu go ya go ile! Amene.”

Na o ikhwetša o le ka gare ga boemo bjo bo swanago moo o swanetšego go lebeletšana le tobo goba manyami? Mohlomongwe tswalano e bohlokwa e fedile, kwano ya kgwebo e paletše goba ga o a thwala go “mošomo wa ditoro” wo o dirilego dikgopelo go wona. Go e na le go lla goba go ikwela bohloko, thoma go leboga Modimo. O tseba bokamoso bja gago gomme mohlomongwe o a go šireletša go kgetho ye e fošagetšego goba mohlomongwe o go lokišetša katlego e kgolo kudu.

O ka nagana ka myemyelo sefahlegong sa Modimo ge paesekela e kgoromeletšwa ka studiong go makatša mošemane? O a rata go re makatša. Ke eng se o tshephang Modimo go go direla sona lehono? Modimo a go šegofatše.