Lokologa – Letšatši la 14

Na o kile wa fihla boemong bophelong bja gago mo o bego o eme gomme mokokotlo o le kgahlanong le lebota, o tshepha Modimo ka katlego? Mo ke bopaki ka moopedi le mogaši wa radio, Rouchelle Liedemann, ka se Modimo a mo diretšego sona le monna wa gagwe, Jamie.

“Dikeledi di be di elela marameng a ka mo ke bego ke eme khitšhing. Boikwelo bja go hloka thušo bo be bo tšhošetša go nnola moko. Maphelo a rena a fetoga bjang kudu ka nako e kopana? Dijo tša rena tša go latela di tlo tšwa kae?

Dikgwedi pele, re amogetše ditaba tše mpe tša gore mothwadi wa monna wa ka o bolailwe. Motho o mo kgoromeditše go tšwa moagong kua Claremont. Ka nako yeo, re be re phela gabotse. Re be re na le legae le lebotse, dikoloi tše pedi gomme re eta gantši ka matšatši a maikhutšo. Ke be ke sa šome ka gobane re be re se na mathata a ditšhelete. Yo monnyane wa bana ba rena ba bararo o be a na le dikgwedi tše tharo. Kgwedi morago ga ge mothwadi wa Jamie a hlokafetše, o ile a lahlegelwa ke mošomo ka lebaka la diphetogo tše di bilego gona kgwebong. Gateetee, re be re se sa na letseno. Re be re maketše.

Jamie le semeetseng a thoma go dira dikgopelo tša mošomo, eupša a se atlege. Tšhelete ya rena ye re bego re e bolokile ya thoma go fela. Mosong wo ke bego ke eme khitšhing, re be re na le R20 ka ntlong. Re be re swanetše go tšea sephetho sa ge eba re reka borotho goba mohlagase. Pelo ya ka e be e le bohloko go bona ka tsela ye monna wa ka a bego a ikwa ka gona ka ge a palela ke go re hlokomela. Ka rapela le go kgopela Modimo katlego. Ke yena fela yo a bego a tla re fa yona.

Gateetee motho a kokota lemating. Ge ke bula, o tee wa maloko a rena a kereke o be a eme mathuding a swere mekotla e mmalwa ya dijo. Modimo o dirile gore a re rekele dijo. Mantšu a Pesalome 37:25 a fihla monaganong wa ka: ‘Le ge nkile ka ba yo mofsa mme bjale ke tšofetše, ga se nke ka bona moloki a lahlilwe, goba ditlogolo tša gagwe di kgopela diyamaleng.’ Ke tsebile gore ke Modimo yo a bego a re abela.

Dikgweding tšeo tše boima tša go hloka tšhelete, lapa la ka la lemoga gore Modimo o dirile gore re ikokobetše le go tshepha yena. Le ge go le bjalo, a se re lahle. Ka gare ga dinako tše boima, ka thoma go ngwala dikopelo tša albamo e mpsha. Ka pelong ya ka, ka ikwa ke hlahlwa go ngwala ka tumelo ka mathomo a maswa – le ge re se re itemogele wona ga bjale. Go be o ka re go nagana le go bolela ka katlego ya rena, go hlohleleditše tumelo dipelong tša rena go tshepha Modimo kudukudu.

Go bile fela ge re thoma go leboga Modimo ka tumelo, ka gobane katlego ya rena e tseleng, mo re thomilego go itemogela letsogo la Modimo maphelong a rena. Jamie o hweditše mošomo o mmotse, mošomo wa ka wa atlega gomme maemo a rena a ditšhelete a kaonafala. Lehono, ke sa hlompha se Modimo a kago se dira le go nyaka go se dira, ge re na le tumelo go yena. Tlhompho ka moka le letago di ya go yena.”

Rouchelle o nepile. Modimo o na le kgahlego kudu go semelo sa rena go e na le boiketlo bja rena. Ge re thoma go mo tumiša ka gare ga madimo a rena, o bontšha maatla a gagwe ka tsela e kgolo kudu. Go Baheberu 11:1 re bala gore: “Tumelo ke bonnete bja tše re holofelago gore di tla hlaga, ke go kgolwa tše re sa di bonego.” Gomme go Bafilipi 4:6-7 re bala gore: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

A re thomeng go tumiša Modimo ka gare ga madimo a rena. Maru a maso a ka timelela ka pela kudu go feta ka mo o bego o nagana, ge letšatši le hlaba. Modimo a go šegofatše.