Lokologa – Letšatši la 13

Letšatši le lengwe ke boletše le mosadi yo, a bego a lla, a mpoditšego gore morago ga go itemogela kgateletšego ya monagano, o lahlegetšwe ke tumelo ya gagwe go Modimo. Mohlomongwe o ikwa ka mo go swanago. Ekaba manyami, tobo goba bohloko bjo o itemogetšego bjona bophelong bja gago bo dirile gore o palele ke go bona botho bja Modimo?

Ke kwele kanegelo ya tate yo a tsogilego ka masa, morago ga ge alamo ya muši e llile lebatong la ka tlase ga ntlo. A tsoša mosadi wa gagwe le semeetseng gomme a kitimela diphapošing tša bana go ba tsoša. Ge tate a kukile morwedi wa gagwe wa ngwaga le seripa le go swara ka letsogo mošemane wa gagwe wa mengwaga e mene, a ba ntšhetša ntle ga ntlo, muši ka ntlong wa ba o mokoto.

Lebakeng le lengwe, mošemane a tlogela letsogo la tatagwe gomme a kitimela pele. Tatagwe a nagana gore o kitimetše ka ntle. Seo ba bego ba sa se lemoge, ke gore mošemane o kitimetše ka phapošing ya gagwe, a utama ka gare ga dithoye tša gagwe, a nagana gore go bolokegile.

Ge tate a le ka ntle, a lemoga gore o be a se fao. A lebelela godimo gomme a bona hlogo ya mošemane ka phapošing ya gagwe lebatong la pele, ge mošemane a goeletša gore ba mo thuše. Tatagwe le semeetseng a ya go ema go lebana le lefastere la gagwe gomme a goeletša mošemane gore a taboge. Mošemane yo a bego a tshwenyegile a araba: “Tate, ga ke go bone!” Tate a re: “Se belaele, ke a go bona!” Mošemane a taboga ka tumelo gomme a wela matsogong a tatagwe.

Ge re itemogela maemo a hlohlago maphelong a rena, le rena re thoma go ikwa re tswaleletšwe ka gare ga ntlo ye e swago, re palela ke go bona Modimo ka gare ga muši wo o re dikologilego. Nnete, le ge go le bjalo, ke gore mahlo a Tatago rena ka mehla a re lebeletše, a lebeletše ditsela tša go re šireletša. Go Pesalome 33:13-14 mopesalome o ngwetše gore: “Morena o lebelela a le legodimong, mme o bona batho bohle. O lebelela badudi bohle ba lefase a dutše setulong sa gagwe sa bogoši.” Gomme go 2 Dikronika 16:9 re bala gore: “Morena o phela a lebeledišitše lefase ka moka go maatlafatša bao ba mo tshephilego ka dipelo tša bona ka moka.”

Go Sistine Chapel kua Vatican, “Tlholo ya Adamo” ya Michelangelo gape e re bontšha gore letsogo la Modimo ka mehla le otlolletšwe go rena. Se re hlokago go se dira go itemogela maatla a gagwe le botho, ke go le kgwatha. Ga go maketše ge re bala go Jakobose 4:8: “Batamelang Modimo, gomme le yena o tla le batamela.”

Ge pelaelo, pefelo goba manyami a tšhošetša go go nola moko, ikgopotše gore Modimo, bjalo ka tate kgauswi ga ntlo ye e swago, o ema a letile a butše matsogo go go swara (le ge o sa mmone). Otlolla letsogo la gago gomme o kgome seatla sa gagwe. Seo se ka fetola bophelo bja gago. Gopola, Mohlodi wa lefase o botegela Lentšu la gagwe gomme ge a re bao ba ba mo nyakago ba tla mo hwetša, seo ke sona se se tlago direga. Modimo a go šegofatše.